Kautu e Fakaakoaga Fakaatua
“Ka e kitekite atu ha mutolu a tau mata ke he [“Faiaoga Lilifu ue atu,” NW] ha mutolu. To logona foki he tau teliga ha mutolu e kupu ki tua ha mutolu, . . . Ko e puhala hanai ke o ai a mutolu.”—ISAIA 30:20, 21.
1. Kua tonu he ha ke ui aki e fakatonutonuaga a Iehova ko e fakaakoaga fakaatua?
KO E Atua ko Iehova e Punaaga he fakaakoaga homo ue atu ka maeke ai ia taha ke moua. Kaeke ke fanogonogo a tautolu, mua atu ka vagahau mai a ia he hana a Kupu Tapuina, to eke ai a ia mo Faiaoga Lilifu ue atu ha tautolu. (Isaia 30:20) Kua ui foki he tau kupu Tohi Tapu Heperu a ia “ko e Atua he tau atua.” (Salamo 50:1) Ha ko e mena ia, ko e fakaakoaga fakaatua e tau fakatonutonuaga a Iehova.
2. Ke he kakano fe mogoia kua moli ko e Atua ni hokoia ne pulotu?
2 Kua hula e lalolagi he loga hana tau fakatutuaga fakaakoaga, ka e nakai foaki mai he taha ia lautolu e fakaakoaga fakaatua. Nakai koenaia, kua eke ai ni e tau pulotu fakalalolagi oti kana mai he tau vaha mo mena tote ka fakatatai mo e fakatonutonuaga fakaatua ne fakave ke he pulotu tukumalagi a Iehova. Ne talahau mai ia Roma 16:27, ko e Atua ni hokoia ne pulotu, mo e moli ne kakano he mena nei, ha ko Iehova ni hokoia ne ha ha i ai e tau pulotu oti kana.
3. Ko e ha ni hokoia ko Iesu Keriso e faiaoga mua ue atu ne kuelaia ke fano he lalolagi?
3 Ko e Tama he Atua, ko Iesu Keriso, e fakafifitakiaga mahomo ue atu he pulotu mo e faiaoga lahi mahaki ue atu foki ne kua fai fano laia he lalolagi mai he tau vaha. Kua nakai ofo! Ha ko Iehova ni hana a Faiaoga ke he tau vaha leva i luga he lagi. Ti ko e moli hanai, ko e mena kamata ne fakaakoaga fakaatua he magaaho ne kamata e Atua ke fakatonu age ke he hana tufugatiaaga fakamua, ko e hana Tama fuataha. Ati kua maeke ai mogoia a Iesu ke pehe: “Ha ko e mena tuga ne fakaako mai he haku a Matua kia au, ko e tau mena ia ne tala atu ai e au.” (Ioane 8:28; Fakatai 8:22, 30) Ti ko e tau kupu ne talahau mai he Keriso ne fakamau i loto he Tohi Tapu kua lafilafi lahi mai ke he ha tautolu a iloilo ke he fakaakoaga fakaatua. He fakaako atu e tau mena ne fakaako mai e Iesu, kua omaoma e tau Kerisiano fakauku ke he ha lautolu a Faiaoga Lilifu ue atu, ha ko e hana finagalo a ia ke fakailoa atu “e pulotu kehekehe loga he Atua” ke he fakapotopotoaga katoa.—Efeso 3:10, 11; 5:1; Luka 6:40.
Ko e Tutuliaga ma e Pulotu
4. Ko e heigoa ne fa talahau hagaao ke he kaputiaaga he iloilo he uho ulu?
4 Ke moua e pulotu ne fua mai he fakaakoaga fakaatua, ko e mena kua lata lahi ni ke fakaaoga fakamakutu ha tautolu a tau manamanatuaga ne foaki mai he Atua. Kua maeke e mena nei kakano ha kua lahi mahaki e iloilo ne toka tuai i loto he uho ulu he tagata. Ne pehe mai e tohi The Incredible Machine: “Kua eke foki e tau tufuga komupiuta mua atu kua maeke ia tautolu ke manamanatu ki ai ke eke ke fulufagu ka fakatatai ke he uho ulu he tagata, ko e mena kua teitei ni ke tukumalagi hana vihu lahi mo e aga maofeofe—ko e tau fua ne kua moua mai he hana fakatokaaga vihu lahi ne mahomo atu e aoga he tau fakamailoga vai hila. . . . Kua miliona e tau fakamailoga ne lupalupa fano he uho ulu hau he ha magaaho he lau fano e tau fakailoaaga lahi mahaki. Kua tamai e lautolu e tau tala hagaao ke he tau tutuaga i loto he tino hau mo e tau mena i fafo: hagaao ke he matahui hopo hau, po ke mahofi he kofe inu, po ke mena fulufuluola ne talahau he kapitiga hau. He fakagahua mo e fuafua he falu fakamailoga e tau fakailoaaga, kua fakatupu ai e lautolu e falu logonaaga, tau manatu tuai, tau manamanatu, po ke lagatau kua takitaki atu ai ke he taha fifiliaga. Kua eke agataha ni mogoia e tau fakamailoga mai he uho ulu hau ke tala age ke he falu fahi he tino hau, ko e heigoa ke taute: ueue hau a matahui, inu e kofe, kata, po ke liga talahau mahifi taha tala fakakata. Ka e he magaaho taha ia kua fuafua foki he uho ulu hau e hau a fafagu, ko e tau vai he toto, ko e mafana, mo e falu fakaholoaga ne mua atu e aoga ka e eke pauaki ke nakai iloa e koe. Kua fakafano atu e tau poakiaga ne taofi mau e holoaga fakatotoka he tino hau, pete ni ia kua hikihikifano tumau ne tau tutuaga hau. Kua tauteute tuai foki ke lata mo e tau poakiaga he vaha i mua.”—Lau tohi 326.
5. Ke he kakano faka-Tohiaga Tapu, ko e heigoa e pulotu?
5 Pete ni kua nakai fai totokoaga ko e ofoofogia lahi e iloilo he uho ulu, kua maeke fefe ia tautolu ke fakaaoga ha tautolu a loto manamanatu he puhala homo ue atu? Nakai he uku hifo taha a tautolu ni hokoia ke he kumikumiaga fakahokulo lahi ke he tau vagahau, fakamauaga tuai, fakasaiene, po ke fefakatatai aki e tau lotu ke kitia e fekehekeheaga. Kua lata ia tautolu ke fakaaoga muatua ha tautolu a tau manamanatuaga ke moua e fakaakoaga fakaatua. Ko e mena nei ni hokoia ka fua mai e pulotu moli. Ka ko e heigoa e pulotu moli? Ke he kakano faka-Tohiaga Tapu, kua pehi fakalahi he pulotu e fakafiliaga mitaki kua fakave ke he iloilo tonu mo e maamaaga moli. Kua taute he pulotu a tautolu ke maeke ke kautu lahi e fakaaogaaga he iloilo mo e maamaaga ke fakamitaki aki e tau mena vihi, ke kalo kehe mai po ke hola kehe mai he tau mena hagahaga kelea, ke lagomatai e falu, mo e ke moua e tau foliaga. Kua fulufuluola lahi, ha kua fakakehekeheaki he Tohi Tapu e pulotu ke he mahani fakateteki mo e goagoa—ko e tau aga kua lata moli a tautolu ke manako ke kalo kehe mai i ai.—Teutaronome 32:6; Fakatai 11:29; Fakamatalaaga 6:8.
Ko e Tohi Fakaako Mua Atu a Iehova
6. Kaeke ke fakakite e tautolu e pulotu moli, ko e heigoa kua lata ke fakaaoga fakamitaki?
6 Kua loga lahi mahaki e pulotu fakalalolagi ne takai ia tautolu. (1 Korinito 3:18, 19) Oi, kua loga lahi ha e tau aoga he lalolagi nei mo e tau fale toka tohi ne ha ha i ai e miliona he tau tohi! Kua loga e tau tohi fakaako nei kua foaki mai e fakatonutonuaga ke he taha vagahau, tau numela, saiene, mo e falu fahi iloilo foki. Ka kua foaki mai he Faiaoga Lilifu ue atu e tohi fakaako kua mahomo ue atu mai he falu—ko e hana Kupu ne omoomoi he agaga, ko e Tohi Tapu. (2 Timoteo 3:16, 17) Kua tonu nakai ni ka talahau e tau mena hagaao ke he fakamauaga tuai, tutuaga he tau motu, mo e fahi he moui lakau, ka e pihia foki he magaaho ka talahau tuai e tau vaha i mua. Ke lafi foki ki ai, kua lagomatai a tautolu ke fiafia lahi mo e aoga lahi e tau mena ne taute he tau momoui he magaaho nei. Kua moli, ke tuga ne tau tama aoga he tau aoga fakalalolagi ne kua lata ke fakaaoga ha lautolu a tau tohi fakaako, kua lata na tautolu ke mahani lahi ke fakaaoga e Tohi Fakaako mua atu he Atua, kaeke ke maeke ai a tautolu ke fakakite e pulotu moli ke tuga ni e tau tagata ne “fakaako he Atua.”—Ioane 6:45.
7. Ko e ha kua maeke ia koe ke pehe nakai koenaia e iloilo mai he ulu ke he tau mena ne toka i loto he Tohi Tapu?
7 Ka e nakai tatai e iloilo Tohi Tapu ni he ulu mo e pulotu moli mo e fanogonogoaga ke he fakaakoaga fakaatua. Ke fakatai ki ai: He senetenari ke 17 aki he V.N., ne kumi e tagata tane Katolika ko Cornelius van der Steen ke eke mo tagata Iesuiti ka e kua nakai talia a ia kakano he ku lahi a ia. Kua talahau mai e Manfred Barthel i loto he hana tohi The Jesuits—History & Legend of the Society of Jesus: “Ne tala age he komiti ki a van der Steen to tauteute a lautolu ke fakanimonimo e fakatokaaga tuai ne loto ke lata ke tino loa, ka talia e vala gahua ke talahau manatu e ia e Tohi Tapu katoa. Ko e tala kua nakai aoga foki ke talahau kaeke kua nakai fanogonogo a van der Steen ke he manako fakatokoluga nei.” Ko e fakamakamakaaga lahi ha aia ke maeke ke akomanatu e Tohi Tapu katoa! Ko e moli hanai, kua mua atu e maamaaga ke he Kupu he Atua mai ke akomanatu noa ni.
8. Ko e heigoa ka lagomatai aki a tautolu ke moua e aoga mai he fakaakoaga fakaatua mo e fakakite e pulotu moli?
8 Kaeke ke moua e tautolu e aoga katoatoa he fakaakoaga fakaatua mo e ke fakakite e pulotu moli, kua lata na tautolu ke iloa tonu e iloilo he tau Tohiaga Tapu. Kua lata foki a tautolu ke takitaki he agaga tapu a Iehova, po ke malolo gahuahua. To taute he mena nei a tautolu ke maeke ke ako e tau kupu moli mua ue atu, “ko e tau mena hokulo ia he Atua.” (1 Korinito 2:10) Ha kua pihia, kia fakamakamaka a tautolu ke kumikumi ke he Tohi Fakaako mua atu a Iehova mo e liogi ma e takitakiaga he hana agaga tapu. Ke maeke ke felauaki mo e Fakatai 2:1-6, kia mamata atu a tautolu ke he pulotu, he hahaga atu ha tautolu a tau loto ke he lotomatala, mo e tauhea atu ke moua e loto maama. Kua lata a tautolu ke taute e mena nei ke tuga kua kumi a tautolu ma e tau koloa uho galo, ha ko e magaaho na ia ka ‘iloa ai e tautolu e matakutaku kia Iehova, mo e moua ai e iloilo ke he Atua.’ Ko e manamanatuaga ke he falu kautuaga mo e tau mena aoga ne moua mai he fakaakoaga fakaatua ka fakamahomo atu ha tautolu a fakaaueaga ke he pulotu ne foaki mai he Atua.
Maamaaga Holo Fakapapahi
9, 10. Ko e heigoa ne talahau he Atua, tuga ne fakamau ia Kenese 3:15, mo e heigoa e maamaaga tonu he tau kupu ia?
9 Kua kautu e fakaakoaga fakaatua he foaki age ke he tau tagata a Iehova e maamaaga holo fakapapahi ke he tau Tohiaga Tapu. Ke tuga e mena nai, kua iloa e tautolu ko Satani ko e Tiapolo ne vagahau mai he gata i Etena mo e tukumale ko e pikopiko e Atua he magaaho ne pehe a Ia ko e mate e fakahala ka kai e fua lakau fakatapu. Ka e pete ni ia, kua kitia e tautolu e kakano he nakai omaoma ke he Atua ko Iehova kua tamai moli ne mate ke he tau tagata. (Kenese 3:1-6; Roma 5:12) Ka e, kua age he Atua ke he tau tagata e amaamanakiaga he magaaho ne tala age e ia ke he gata, mo e ki a Satani: “To fakatupu e au e faitaua kia mua mo e fifine, ko e hau a fanau foki mo e hana fanau; to tatuki e ia hau a ulu, ka e tatuki ni e koe hana muihui.”—Kenese 3:15.
10 Kua toka ai he tau kupu ia e mena fufu ne fa e fakakite fakahaga mai he fakaakoaga fakaatua. Ne fakaako e Iehova ke he hana tau tagata ko e fakamatalahi he pule katoatoa hana e matapatu kupu muatua he Tohi Tapu, ko e mena ka puhala mai he Tega, ko e ohi a Aperahamo mo Tavita ne kua ha ha i ai e tonu fakamatafakatufono ke he pule he Kautu. (Kenese 22:15-18; 2 Samuela 7:12, 13; Esekielu 21:25-27) Ne fakaako mai he Faiaoga Lilifu ue atu ha tautolu ko Iesu Keriso ko e Tega fakamua he “fifine,” ko e fakatokatokaaga he lagi mo e lalolagi katoatoa he Atua. (Kalatia 3:16) Pete ni ne taute e Satani e tau kamatamata oti kana ki a ia, taofimau ne Iesu e mahani fakamoli—ti pihia foki ke he mate, ko e tuki fakaunoko he muihui he Tega. Kua ako foki e tautolu, kua 144,000 tagata ne moua mai he vahaloto he tau tagata ke eke mo tau hakeaga auloa he Kautu, ka gahua auloa mo Keriso ke pepela e ulu a Satani, “ko e gata tuai.” (Fakakiteaga 14:1-4; 20:2; Roma 16:20; Kalatia 3:29; Efeso 3:4-6) Kua fakaaue ha a tautolu ke he iloilo pihia mai he Kupu he Atua!
Ki Loto he Maama Ofoofogia he Atua
11. Ko e ha, kua maeke ai ke pehe kua kautu e fakaakoaga fakaatua ke tamai e tau tagata ki loto he maama fakaagaga?
11 Kua kautu e fakaakoaga fakaatua he tamai e tau tagata ki loto he maama fakaagaga. Kua moua he tau Kerisiano fakauku e iloilo ha ko e fakamoliaga he tau mena tutupu ia 1 Peteru 2:9: “Ka ko mutolu, ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna, kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.” He vaha nei, ko e maama ne foaki mai he Atua ne kua olioli foki e “moto tagata tokologa” ka momoui tukulagi he lalolagi parataiso. (Fakakiteaga 7:9; Luka 23:43) He fakaako he Atua hana tau tagata, kua eke tuai a Fakatai 4:18 ke fakamoli: “Ka ko e puhala he tau tagata tututonu, kua lata ia mo e maama he aho, kua tupu tolomaki atu hana maama ke hoko ke he tupoula.” Kua hakahaka he akoaga holo fakapapahi nei ha tautolu a maamaaga ke he fakaakoaga fakaatua, ke tuga foki e holo ki mua he tama aoga, kakano ha kua mitaki e lagomataiaga he faiaoga he magaaho ne fakaako e puhala he vagahau hako ki a lautolu, fakamauaga tuai, po ke falu mena fakaako foki.
12, 13. Ko e heigoa e tau fakaakoaga hagahaga kelea kua puipui he fakaakoaga fakaatua e tau tagata a Iehova?
12 Taha kautuaga foki he fakaakoaga fakaatua ki a lautolu ne fakatokolalo ke talia ha kua puipui mai ai he “tau kupu he tau temoni.” (1 Timoteo 4:1) Ka e ke he taha fahi, onoono atu la ki a Kerisitenitome! He tau 1878 i tuai, ne tohia he faifeau tokoluga he lotu Katolika Roma ko John Henry Newman: “Kua toka mau ai i loto he malolo faka-Kerisiano ke totoko ke nakai pikitia he mahani kelea mo e ke fakafaliu e tau kanavaakau mo e tau mena tapuaki ke he tau temoni mo e fakaaoga ai ke he gahua evagelia, . . . kua mau tauteute e tau pule he Lotu he vaha fakamua, kaeke kua tutu hake e tau magaaho, ke hiki, po ke fifitaki, po ke fakatapu e tau aga tapuaki tuai mo e mahani fakamotu he tau tagata tokologa, ti pihia foki e tau fakaakoaga fakataitai he vahega tagata fai fakaakoaga.” Ne lalafi atu foki a Newman, ko e tau mena tuga e tau vai tapu, tau tapulu akoako tapuina, mo e tau tupua ta “ne kua fai kamataaga oti kana, mo e kua fakatapuina ai ha ko e hiki maiaga ha lautolu ke he Lotu.” Kua fakaaue lahi ai e tau tagata he Atua ke he fakaakoaga fakaatua he puipui a lautolu mai he tau mena tiaki taofiaga pihia. Kua malolo katoatoa mai he tau vahega mena fakatemoni oti kana.—Gahua 19:20.
13 Kua kautu mai lahi e fakaakoaga fakaatua he tau mena hehe oti kana he tau lotu. Tuga a nai, ha ko e tau tagata kua fakaako he Atua, kua nakai talitonu a tautolu ke he Tolu Taha ka e mailoga ko Iehova e Mua ue atu, ko Iesu hana Tama, mo e ko e malolo gahuahua he Atua e agaga tapu. Kua nakai matakutaku a tautolu ke he afi a helo, ha kua mailoga e tautolu ko e helo he Tohi Tapu ko e tukuaga noa he tagata. Mo e tau mena kua talahau he tau lotu fakavai, ko e nakai maeke e solu he tagata ke mate, ka e iloa e tautolu ko e mena nakai logona e lautolu ne mamate ha mena. Ti kua holo atu lahi pihia e fakamauaga tohi he tau kupu moli ne moua mai he fakaakoaga fakaatua. Ko e fakamonuinaaga lahi ha, ke tokanoa mai he liliaga fakaagaga a Papelonia Lahi, ko e kautu lotu fakavai he lalolagi!—Ioane 8:31, 32; Fakakiteaga 18:2, 4, 5.
14. Kua maeke he ha e tau fekafekau he Atua ke o fano he maama fakaagaga?
14 Kakano ha kua kautu lahi mai e fakaakoaga fakaatua he tau mena hehe he tau lotu, ati kua maeke ai e tau fekafekau he Atua ke o fano he maama fakaagaga. Kua tuga kua logona e lautolu e kupu i tua ia lautolu kua pehe mai: “Ko e puhala hanai ke o ai a mutolu.” (Isaia 30:21) Kua puipui foki he fakaakoaga he Atua hana tau fekafekau mai he tau fakakakanoaga fakavai. He magaaho ne fakaohooho he “tau aposetolo pikopiko” e tau mena uka i loto he fakapotopotoaga Korinito, ne tohia atu e aposetolo ko Paulo: “Ha ko e tau kanavaakau he tau ha mautolu, nakai ko e tau mena he tino ia, ka ko e malolo ki mua he Atua ke ulu ai e tau kolo; Kua ulu ki lalo e tau mahalohaloaga, mo e tau mena fakatokoluga oti kua hemu ke he maama ke he kupu he Atua, kia mahala e tau manatu oti ke omaoma kia Keriso.” (2 Korinito 10:4, 5; 11:13-15) Ko e tau fakakakanoaga kua fekehekeheaki mo e fakaakoaga fakaatua, ne kua fuluhiluhi kehe he tau fakatonuaga leo molu ne foaki mai he fakapotopotoaga mo e ha ko e fakamatalaaga he tala mitaki ki a lautolu i fafo.—2 Timoteo 2:24-26.
Tapuaki mo e Agaga mo e Fakamoli
15, 16. Ko e heigoa e kakano ke tapuaki ki a Iehova mo e agaga mo e fakamoli?
15 He tolomaki atu e gahua fakamatala he Kautu, kua kautu e fakaakoaga fakaatua ke fakakite atu ki a lautolu ne loto holoilalo ke tapuaki atu fefe ke he Atua “mo e agaga mo e fakamoli.” He tapa vaikeli a Iakopo ne tata atu ke he taone ko Sikara, ne tala age e Iesu ke he fifine Samaria kua maeke a ia ke age e pukevai kua foaki age e moui tukulagi. He vagahau hagaao ke he tau Samaria, ne lalafi atu a ia: “Kua tapuaki fakahaupo na mutolu . . . Ke hoko mai e vaha, kua hoko nai foki ki ai, ko lautolu ne tapuaki fakamoli, to tapuaki a lautolu ke he Matua mo e agaga mo e fakamoli; ha ko e mena kumi e Matua kia pihia a lautolu ne tapuaki kia ia.” (Ioane 4:7-15, 21-23) Ti kua fakailoa mogoia e Iesu a ia ni ko e Mesia.
16 Ka e maeke fefe a tautolu ke tapuaki ke he Atua mo e agaga? He tuku atu e tapuakiaga mea mai he tau loto fakaaue lahi kua pukenamo mo e fakaalofa ke he Atua, ne kua fakave ke he iloilo tonu he Kupu hana. Kua maeke a tautolu ke tapuaki fakamoli ki a ia he nakai talia e mahani fakavai he tau lotu mo e he taute e finagalo fakaatua, tuga ne fakakite mai he Tohi Fakaako mua atu a Iehova.
Kautu Lahi Mai he Tau Mena Uka mo e Lalolagi
17. Maeke fefe ia koe ke fakakite moli kua lagomatai he fakaakoaga fakaatua e tau fekafekau a Iehova ka fakafehagai mo e tau mena uka?
17 He tau magaaho ka fakafehagai e tau tagata he Atua mo e tau kamatamata, kua liu foki mo e liu foki e fakaakoaga fakaatua ke kautu. Kia manamanatu la ke he mena nei: He kamataaga he Felakutaki II he Lalolagi, ia Sepetema he tau 1939, kua lata ne tau fekafekau a Iehova ke moua e lotomatala pauaki ke he hana Tohi Fakaako mua atu. Kua mua atu e lagomatai he tala i loto he The Watchtower, Novema 1, 1939, kua fakakite fakamaaliali mai e fakaakoaga fakaatua ke he tunoa faka-Kerisiano. (Ioane 17:16) Ke tuga e mena ia, mai he atu tau fakamua he 1960, ko e tau tala he The Watchtower ke he fakalilifu fakakaupa ke he fakatufono ko e “tau tui ne mua” ne kua lagomatai aki e tau tagata he Atua ke omaoma ke he fakaakoaga fakaatua ka fakafehagai mo e tau tagata miha fia latau.—Roma 13:1-7; Gahua 5:29.
18. Kua fefe e onoonoaga he tau tagata ne pehe ko e tau Kerisiano he senetenari ke ua mo e tolu aki he V.N., ke he fakafiafia tino muikau, mo e ko e heigoa e lagomatai ne kua foaki mai he fakaakoaga fakaatua he vaha nei ke he mena ia?
18 Kua lagomatai he fakaakoaga fakaatua a tautolu ke kautu mai he tau kamatamata, tuga e tau fakatakiaga ke kumi e tau fakafiafiaaga muikau. Kia mailoga la e mena ne talahau he tau tagata ne pehe ko e tau Kerisiano he senetenari ke ua mo e tolu aki he Vaha Nei ha tautolu. Ne tohi e Tertullian: “Kua nakai fai mena a tautolu ke taute, ke vagahau, ke kitia po ke fanogonogo ke he goagoa he sekesi (circus), ke he mahani fakama lahi he feua taute tala, ke he mahani vale lahi he male fakafiafia feoka makaka toatau.” Kua taha foki e tagata tohia tala he vaha ia ne huhu: “Ko e heigoa foki he Kerisiano fakamoli ke taute he vahaloto he tau mena ia, kakano ha kua nakai lata foki a ia ke manamanatu ke he mahani kelea? Ko e ha kua loto fiafia a ia ke he fakakitekiteaga he mahani pilo?” Pete ni ia ne nonofo e tau tagata tohi tala nei he tau tau fakamui ne kua mole atu e tau Kerisiano he senetenari fakamua, ne fakavihia e lautolu e tau mena fakafiafia muikau. He vaha nei, kua foaki mai he fakaakoaga fakaatua ki a tautolu e pulotu ke fakamamao mai he tau mena fakafiafia teteki, kua mahani kelea, mo e mahani vale.
19. Kua lagomatai fefe he fakaakoaga fakaatua a tautolu ke kautu mai he lalolagi?
19 Ka fanogonogo ke he fakaakoaga fakaatua kua maeke ai a tautolu ke kautu mai ni he lalolagi. E, he fakagahua e fakaakoaga he Faiaoga Lilifu ue atu ha tautolu to taute ai a tautolu ke kautu lahi mai he malolo kelea he lalolagi i lalo he pule a Satani. (2 Korinito 4:4; 1 Ioane 5:19) Kua talahau mai he Efeso 2:1-3 kua taute he Atua a tautolu ke momoui pete ni kua mamate a tautolu ha ko e tau mahani holifono mo e agahala ha tautolu he magaaho ne feoaki a tautolu mo ia ko e pule he pule malolo he matagi. Kua fakaaue a tautolu ki a Iehova ha kua lagomatai he fakaakoaga fakaatua a tautolu ke kautu lahi mai he tau manako fakalalolagi mo e agaga ne puna mai he fi hana mo e ha tautolu—ko e fakavaia ne mua, ko Satani ko e Tiapolo!
20. Ko e heigoa falu huhu foki kua lata lahi ke manamanatu ki ai?
20 Kua maaliali ai mogoia, kua kautu lahi mahaki mai e fakaakoaga fakaatua ke he tau puhala loga. Ko e moli hanai, kua nakai fakaai ke fatiaki mai hana tau kautuaga oti kana. Ko e mena lauia ai e tau tagata he lalolagi katoa. Ka ko e heigoa kua taute mau? Kua lauia fefe hau a moui he fakaakoaga fakaatua?
Ko e Heigoa ne Ako e Koe?
◻ Liga fakamaama fefe e pulotu moli?
◻ Ko e heigoa ia Kenese 3:15 kua fakakite fakahaga mai he Atua?
◻ Ne kautu fefe e fakaakoaga fakaatua ke he tau mena fakaagaga?
◻ Ko e heigoa e kakano ke tapuaki ke he Atua mo e agaga mo e fakamoli?
◻ Ne lagomatai fefe he fakaakoaga fakaatua e tau fekafekau a Iehova ke kautu mai he tau mena uka mo e lalolagi?
[Tau Fakatino he lau 22]
Ne taofimau e Iesu e mahani fakamoli ati hoko ke he mate—ko e tuki fakaunoko he muihui he Tega