Fakapuloa ke he Tau Tagata e Higoa a Iehova
“Kia uta mau e tautolu e poa fakaheke ke he Atua kia ia ni, ko e fua haia he tau laugutu ha tautolu, kua [“fakapuloa ke he tau tagata e,” NW] hana higoa.”—HEPERU 13:15.
1. Ko e heigoa he perofeta ko Hosea ne poaki mafiti ke he tau tagata Isaraela ke taute?
NE HA ha he perofeta a Iehova ko Hosea e fekau kua mua atu e aoga ma e hana tau tagata Isaraela. He senetenari ke valu aki fakamua to Vaha Nei, ne tomatoma e ia hana tau tagata he magahala ia ne faliuliu ke tokihala. Ne poaki e ia: “Kia taute a ha mutolu a tau kupu mo e liliu atu kia Iehova. Kia pehe atu a mutolu kia ia, Kia uta kehe e koe e tau mahani kelea oti, mo e talia e koe e mena ne mitaki ti ta atu ai e mautolu kia koe e tau poa he tau laugutu ha mautolu.” (Hosea 14:2) He poakiaga ke he tau tagata ke ta atu ki a Iehova ‘e tau poa he tau laugutu ha lautolu,’ ne fakamalolo he perofetaaga a Hosea e tau tagata Isaraela ke tokihala mo e ta atu e tau poa fakaheke fakamoli ke he Atua.
2. Ko e heigoa e vahega poa ne fakamalolo he aposetolo ko Paulo e tau Kerisiano ke foaki?
2 Kua foaki he Tau Fakamoli a Iehova ‘e poa he tau laugutu ha lautolu’ he vaha nei. Kua fanogonogo foki a lautolu ke he tomatomaaga he aposetolo ko Paulo, ne tuhi atu ke he tau kupu he perofetaaga a Hosea he magaaho ne tohi e ia: “Kia uta mau e tautolu e poa fakaheke ke he Atua [ia Iesu Keriso] ni, ko e fua haia he tau laugutu ha lautolu, kua [“fakapuloa ke he tau tagata e,” NW] hana higoa.” (Heperu 13:15) Ko e mena ia, ko e tau fekafekau he Atua kua olioli e fakaheke ki a Iehova, tuga he ha lautolu a gahua fakamatala ke he Kautu.—Mataio 24:14.
3. Foaki fefe e tautolu ki a Iehova e “poa fakaheke,” mo e ko e tau gahua ha hai ka kitekite a tautolu ki ai mogonei?
3 Ko e fakapuloaaga ke he tau tagata e higoa a Iehova ko e monuina nakai tutonuhia pauaki ma e tau tagata nakai mitaki katoatoa. Ko e fiafia ha a ia ha tautolu ke tala age ke he falu hagaao ke he Atua ha tautolu, ko e hana kakano ke ta atu ki a Iehova e “poa fakaheke,” ‘ko e tau poa he tau laugutu ha tautolu’! Ma e fakamaloloaga ma tautolu he gahua fakamatala atu he tala mitaki ke he Kautu he vaha nei, o mai a tautolu ke kitekite ko e heigoa ne tala mai he Tohi Tapu ki a tautolu hagaao ke he tau perofeta he Atua mo e falu he tau fekafekau a Iehova. Mai he ha lautolu a puhala he moui, to lahi e mena ha tautolu ka iloa e tautolu ke lagomatai aki a tautolu ke olioli ha tautolu a gahua fakamatala.—Roma 15:4.
Ko e Matagahua he Tau Perofeta
4, 5. (a) I loto he tau vagahau tuai he Tohi Tapu, ko e heigoa e matapatu kakano he tau kupu ne fakaliliu aki e “perofeta”? (e) Ko e heigoa ne fakamoli aki kua ha ha i ai e matafekau ne tu muatua ke he tau perofeta he fakatokatokaaga he Atua?
4 Ko e tau perofeta a Iehova kua monuina ke fakamatala hana fekau ke he tau tagata oti. Ko e kupu Heperu ma e “perofeta” (na·viʼʹ) kua nakai maama mitaki e kamataaga, ka ko e fakaaogaaga he Tohi Tapu kua fakakite ko e tau perofeta moli ko e tau gutu vagahau ma Iehova, ko e tau tagata he Atua mo e tau fekau mai he agaga. Ko e kupu Heleni ke he “perofeta” (pro·pheʹtes) ko e hana kakano tonu “ko e tagata vagahau atu,” ke talahau taha mena “i mua he” po ke “ki mua” he taha tagata. Ko e perofeta ko e tagata ne fakamatala e tau fekau kua fakatatai ia ke he punaaga faka-Atua. Fa mahani, ka e nakai tumau, ke perofeta tuai he tau perofeta moli he Atua e tau mena he vaha i mua.
5 Hagaao ke he matafekau ne tu ke he tau perofeta he fakatokatokaaga he Atua, kua talahau he Cyclopædia ha M’Clintock mo Strong pehe: “Ko e falu a magaaho ne huhu ke he ha lautolu a tau manatu . . . Ka e laulahi tumau ni ke logona hifo ni e lautolu e omoiaga i loto ia lautolu ke tutala ke he tau tagata ka e nakai ole ke he tau tomatomaaga ha lautolu, mo e nakai matakutaku ke vagahau atu fakamalolo he tau matakavi ka o atu a lautolu ki ai, po ke fakatupu e ita mo e matakutaku.” (Volume III, lau tohi 640) Manamanatu la ke he falu a fakatai ko e heigoa ne fakaohooho aki e tau perofeta ke tutu ke he tuaga malolo pihia.
Tau Logonaaga mo e Omoiaga
6, 7. Ko e heigoa ne age e Iehova ke he hana perofeta ko Esekielu ke kai, mo e ko e heigoa ne moua mai he mena nei?
6 Fakamua to hoko e moumouaga a Ierusalema he tau 607 F.V.N., ne vagahau a Iehova ke he tau tagata Iutaia he paeaaga i Papelonia he puhala atu he hana perofeta ko Esekielu. Ne tala age a Iehova ki a ia: “Ko e tama he tagata na e, kia kai a e mena ke moua ai e koe; kia kai a e koe e tohi vakai na ti fano a koe, mo e vagahau atu ke he magafaoa a Isaraela.” Ne omaoma a Esekielu. Ne pehe a ia: “Ti fakamaga e au haku gutu, ti fagai ai e ia au ke he tohi vakai na. Ti pehe mai a ia kia au, Ko e tama he tagata na e, kia talia a e koe ke he manava hau, kia makona ai hau a manava he tohi vakai na kua ta atu e au kia koe; ti kai ai e au, kua tuga ne meli ke he haku gutu he humelie.”—Esekielu 3:1-3.
7 Kua moua he tau tino ha tautolu e tau mena kai mai he tau mena kai ne kai e tautolu, ti ko e kakano mogoia ko e tau mena kai nei kua eke tuai mo taha vala ha tautolu. Pihia ni, ko e “tohi vakai” ne kai e Esekielu—ko e fekau a Iehova ka fakapuloa he perofeta—kua eke ia mo taha vala hana, kua lauia hana tau logonaaga. Ko e tau kupu he Atua kua fakalagalaga fakalahi aki e fatuakiloto a Esekielu ko e fakapuloa atu ke he tau tagata kua eke mo mena fiafia lahi ki a ia. Kaeke ko e Fakamoli a Iehova a koe, kua moua nakai e koe e fiafia he fakapuloaaga ke he tau tagata e fekau he Atua?
8, 9. Ko e heigoa ne fakaohooho aki a Amosa ke perofeta?
8 Manamanatu foki la, ke he perofeta ko Amosa. Ne moui he senetenari ke hiva aki F.V.N., ko ia taha he tau perofeta Heperu fakamua ne tohi e tohi he Tohi Tapu ne fakahigoa aki ni a ia. Ke tuga ni a Esekielu, ko Amosa ko e tagata tukuogo he kupu a Iehova. Ke ofo ai, ko e talahauaga “kua pehe mai e vagahau a Iehova” ne fatiaki laga hogofulu he tohi katoa ne toka ai hana higoa! (Amosa 1:3, 6, 9, 11, 13; 2:4, 6; 3:12; 5:4; 7:17) Ne logona hifo e Amosa e lata tonu ke fakapuloa e tau kupu he Atua ke he tau tagata.
9 Ha kua eke mo perofeta he Atua, ne gahua a Amosa ke he tau fakapuloaaga faka-Atua he taute fakamafiti. Puhala mai ia Amosa, ne pehe e Atua: “Kua tagi e leona ko hai kia ke nakai matakutaku ai? kua vagahau mai e Iki ko Iehova, ko hai kia ke nakai perofeta atu?” (Amosa 3:8) Ne fakaohooho fakalahi e perofeta ke fakapuloa e fekau a Iehova.
10. Gahuahua fefe e tau fekafekau a Iehova he vaha nei kaeke ke totoko mai e gahua fakamatala ha lautolu?
10 Ke tuga e leona, kua tagi mai e Iehova e tau fekau he fakafiliaga ke he fakatokaaga matahavala he lalolagi nei. Ke tuga a Amosa, kua logona he tau fekafekau a Iehova he vaha nei e omoiaga ke fakapuloa e tau kupu he Atua ke he tau tagata. Pete ni he fakamatakutaku mai he tau tagata totoko, ne mumui ni a lautolu ke he fakafifitakiaga he tau aposetolo ko Peteru mo Ioane, ne fakaohooho ke fakapuloa: “Ha kua nakai maeke ke fakamamate a maua ke he tau mena ne kitia e maua, mo e fanogonogo a maua ki ai.” Ne pehi mai foki he tau aposetolo: “Kua lata ni ke mua e omaoma ke he Atua ke he omaoma ke he tau tagata.” (Gahua 4:20; 5:29) Ka e kua mogoia, a tautolu? Kua mitaki ni ke kamatamata ha tautolu a tau logonaaga ke he tauteaga he fakapuloaaga ke he tau tagata e higoa a Iehova.
“Ha Ko e Puke he Loto”
11. Ko e heigoa kua lata ke fakalagalaga aki a tautolu ke fakamakamaka ke taute e fakapuloaaga ke he tau tagata e higoa a Iehova?
11 Kua nakai tuai fai fakauaua ko e tau perofeta a Iehova ne fakaaue lahi ma e ha lautolu a tau monuina. Ko e navanava pihia ni ki a Iehova ne maeke ke omoi aki a tautolu ke taute e fakapuloaaga ke he tau tagata e hana higoa. Salamo 145:1, 2 ne talahau: “Haku Atua na e, ko e Patuiki, to fakaheke atu au kia koe; to fakamonu atu au ke he hāu a higoa tukulagi tukumuitea. To fakamonu atu au kia koe ke he tau aho oti kana, to fakaheke atu foki au ke he hāu a higoa tukulagi tukumuitea.” Ata mai nakai he tau kupu ia e mahani hau? Ko e fakaako tumau ke he Tohi Tapu ke lagomatai aki a tautolu ke fakahokulo ha tautolu a fakaaueaga ma e tau mena ne taute e Iehova, hane taute, mo e nakai la taute ma tautolu. Mo e ka fakaako fakalataha e tautolu e Tohi Tapu ko e magafaoa, kitia nakai e tautolu ko e Kupu he Atua kua gahua malolo, mo e taute a tautolu ke manako ke vagahau hagaao ki a ia mo e hana finagalo? (Heperu 4:12) Ke maeke ke taute fakamitaki e fakapuloaaga ke he tau tagata e higoa a Iehova, kua lata foki a tautolu ke fakaaoga katoa e tau tohi Kerisiano ne tauteute he Atua ko Iehova kua puhala mai he hana tau “fekafekau fakamoli mo e loto matala” ne fakauku.—Mataio 24:45-47.
12. Maeke ua fefe he tau feleveiaaga Kerisiano mo e manamanatu fakahokulo ke lagomatai a tautolu ke taute e fakailoaaga?
12 Kaeke kua fakaheke e tautolu a Iehova mai he tau loto fakaaue, kua lata na tautolu ke o tumau he tau feleveiaaga Kerisiano. Ko e tau tagata oti a Iehova kua lata ni ke fanogonogo ke he fakatonuaga he aposetolo ko Paulo: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) Fano tumau nakai a koe ke he tau feleveiaaga Kerisiano? Tutala tumau nakai a koe hagaao ke he tau kupu moli he Tohiaga Tapu, tau mena mitaki ne iloa, mo e tau tala fulufuluola he tupu lahi teokaratiki ne logona e koe he tau feleveiaaga he tau tagata he Atua? Kaeke kua fakauaua a koe ke tala a koe hagaao ki a Iehova mo e hana tau finagalo, lata ke fakaata taha magaaho ke manamanatu ke he hana Kupu ke maeke he hana tau manatu ke hu hokulo hifo ke he loto hau. (Salamo 77:12; 143:5) E, ko e tau feleveiaaga Kerisiano mo e manamanatu tumau ke he Kupu he Atua kua lata ke lagomatai aki a koe ke fakaaue ke he monuina homo ue atu he fakapuloaaga ke he tau tagata e higoa a Iehova.
13. Maeke fefe ia tautolu ke ‘ta mai e mena mitaki’ mai he tau loto ha tautolu?
13 Ko e tau loto kua puke ke he navanava ki a Iehova, kua ta mai e tautolu e tau mena mitaki. “Kua ta mai he tagata mahani mitaki e tau mena mitaki mai he tau mena mitaki kua tanaki ke he hana loto,” he fakamaama e Iesu, “ko e tagata mahani kelea foki, kua ta mai e ia e tau mena kelea mai he tau mena kelea kua tanaki ke he hana loto; ha ko e puke he loto ke vagahau mai ai hana gutu.” (Luka 6:45) Ko e heigoa foki e puhala kua mua he mitaki ke ‘ta mai e tau mena mitaki’ he fakapuloa ke he tau tagata e higoa a Iehova mo e vagahau hagaao ke he hana finagalo ke he tau katofia ha tautolu, tau magafaoa tino ha tautolu—moli, ki a lautolu oti ka feleveia e tautolu?
Tau Fua he Fakapuloa ke he Tau Tagata
14. (a) Ko e heigoa he tagata fakapuloa mo e tagata fanogonogo ke he fekau he Kautu ka maama? (e) Ko e heigoa kua fakakatoatoa mai ha ko e gahua fakamatala he Kautu?
14 Ne moua he tau perofeta he Atua e olioli he ha lautolu a fekafekauaga, mo e ko e tau mena ne talahau e lautolu kua aoga lahi ma lautolu ne fanogonogo. Ke maeke ke fakatatai, ko e fakapuloaaga ke he tau tagata e fekau he Kautu kua ta mai e olioli lahi mahaki ke he hana tau tagata tukuogo. (Gahua 20:35) Mo e aoga ha ki a lautolu ne fanogonogo mo e fakaaue! Ko e taliaaga he tala mitaki ke lagomatai aki e tau tagata ke kautu ke he loto tupetupe po ke fahia ke kautu ki ai. To loto olioli a lautolu ne maanu ha ko e amaamanakiaga he liu tu mai. To hao mai a lautolu ne hufia he fakatupa ke he nikotini [nicotine], heroini [heroin], mo e falu he tau mena fakahufia kelea. Tokologa ne kua lagaki hake ke he mahani mitaki, mo e ko lautolu oti ne talia e kupu moli he Tohi Tapu kua moua e lautolu e ataina fakaagaga. (Ioane 5:28, 29; 8:32) Ko e fakailoaaga he Kautu ko e amaamanakiaga ni a ia hokoia ma e tagata kua taute foki ke hataki atu ke he tau tagata matahavala, ka e fakatupu mai ai e taliaaga fiafia he tau tagata loto fakamoli. Ko e mena ia hane vehevehe ai nei e tau tagata ke he “fakahala tukulagi” po ke ke he “moui tukulagi” he magaaho ka tuku ai he fakafiliaga faka-Atua e fakahala ke he lalolagi matahavala nei. (Mataio 24:14; 25:31-46; Esekielu 33:1-9; 1 Timoteo 2:3, 4) Ko e gahua fakamatala ha tautolu ko e gahua fakahao ne nakai fai fakatataiaga foki, ko e fakapuloaaga ke he tau tagata kua mua atu he laulahi mo e kaputia e lalolagi nakai la katoatoa pihia tali mai!
15. Ko e heigoa ka taute ke lagomatai aki a lautolu kua lata ne loto fiafia he matakavi ne fakamatala a tautolu ki ai?
15 Ha kua eke a tautolu mo Tau Fakamoli a Iehova he vaha fou nei, kua fakatupa fiafia mo e omaoma a tautolu ma e ha tautolu a Matua he lagi. (Roma 12:11) Ko e mena ia, kua fiafia a mautolu ke fakatoka kehe tumau e magaaho ke taute e gahua fakamatala he tala mitaki ke he tau tagata oti mo e mai he taha fale ke he taha fale. (Gahua 5:42; 20:20) Kua fakakite mai he tau hokotaki he lalolagi katoa kua ha ha i ai agaia e falu ha lautolu kua lata he tau matakavi ha tautolu. Ha kua hiki e tau tutuaga he lalolagi, ti lauia e tau tagata he tau puhala kehekehe. Tokologa ne nakai amaamanaki ke eke ke fehola fakapaea, mo tau tagata he motu kehe. Liga ha ha i ai falu he tau tagata nei he tau matakavi ne fakamatala a tautolu ki ai. Kaeke ke pihia, o mai a tautolu ke taute e tau mena oti ne maeke ia tautolu ke lagomatai aki a lautolu fakaagaga ka kua fakamakamaka a tautolu ke he “[“feua tapu,” NW] ke he vagahau mitaki.” (Roma 15:16) Ko e falu he tau Kerisiano kua fakaako ke he taha vagahau foki ke maeke ke fakapuloa e tala mitaki ke he tau tagata ia.
16. Ko e heigoa ne maeke ke lagomatai aki a tautolu ke fakamakamaka ke fakapuloa e higoa a Iehova?
16 Kua tokologa e tau perofeta he Atua ne uka lahi e tau kotofaaga. Ne nakai mukamuka ia lautolu ke fakapuloa e tau fekau faka-Atua ke he tau tagata ne nakai talia. Pihia foki ni, nakai mukamuka he tau tagata oti ne tukulele ki a Iehova ke fakapuloa ke he tau tagata e Hana higoa, mua atu ni ke he tau matakavi ne tokologa ne nakai talia. Ka e pete ni, ke moua e malolo ne fua mai ni he fakaako mo e liogi e Kupu he Atua, hoa aki e malolo ne mai e Iehova, ti maeke ia tautolu ke fakamakamaka ke fakapuloa e fekau he Kautu. (Filipi 4:13; Fakakiteaga 14:6) Mai he hagaaoaga nei, ko e heigoa foki falu a mena ne fakaako mai e tautolu mai he tau perofeta a Iehova mo e falu he hana tau fekafekau he tau vaha i tuai?
Faihoani he Fekafekauaga ke he Fonua
17. Ko e heigoa a falu fakafifitakiaga faka-Tohiaga Tapu ne aoga lahi e faihoani he fekafekauaga he Atua?
17 Ke taute fakamitaki hana a kotofaaga, ne moua mai fakamua he perofeta he Atua ko Mose e lagomatai mai he hana lafu matakainaga, ko Arona. Ne tala age a Iehova ki a Mose: “To vagahau atu a [Arona] māu ke he tau tagata, to eke foki a ia mo gutu māu.” (Esoto 4:16) Manamanatu foki la, ke he vaha he tau perofeta ko Elia mo Elisaio, he magaaho ne monuina ai e “vahega he tau perofeta.” Kua eke ai e mena nei ha ko e tau matakau fekafekau he Atua ne gahua fakalataha, ne nakai fakauaua kua olioli lahi ha ko e faihoani e taha ke he taha. (2 Tau Patuiki 2:3-5; 4:38; fakatatai 1 Samuela 10:5, 10.) Moli, ko Mose mo Arona mo e “vahega he tau perofeta” ne nakai fakapuloa e tala mitaki ke he Kautu. Pete ia, ko e ha lautolu a fakalatahaaga kua aoga ia ma lautolu oti. Ko e tau senetenari fakamui ne fakafano atu e Iesu Keriso toko 70 e tutaki ke he fekafekauaga, o “takitokoua,” mo e nakai fakauaua kua moua e lautolu nei e mena aoga mai he faihoani ne foaki mai.—Luka 10:1-16; fakatatai Gahua 17:10, 11; 20:20.
18. Taute fefe e faihoani he fekafekauaga mo kakano aoga lahi he vaha nei?
18 He tau 1953, ne tuku e Tau Fakamoli a Iehova ke he fakaholoaga ka gahua auloa ki ai e tau tagata tukuogo he Kautu ke he fekafekauaga he fonua. Moli, kua nakai taute e mena nei ma e mitaki ni he faihoani. Ko e fakaholoaga fakaako nei kua talaga ke taute aki e tau fekafekau he Atua ke eke mo tau faiaoga mo e tau tagata fakamatala mitaki lahi he tala mitaki. Ha kua ha ha i ai e hagaaoaga ia he tau loto, ti tokologa e tau tagata fakamatala tuai ke he Kautu ne gahua fakalataha ke he fekafekauaga mo lautolu ne fou. Ko e fakaholoaga fakaako nei he taha fale ke he taha fale kua tokoluga lahi e aoga mo e kua lagomatai aki e tau tagata a Iehova ke holo ki mua e fakapuloaaga ke he tau tagata hana higoa. (1 Timoteo 4:16) He vaha nei, ko e puipuiaga ko e taha matapatu mena ia kua lata tonu ke taute he tau Kerisiano ke o he fekafekauaga “takitokoua,” ti mua atu ke he falu a matakavi.
19. Ko e heigoa e mena kua lata ke tokaloto hagaao ke he tau foliaga fakatagata he fekafekauaga?
19 Ko e gahua a koe mo e taha matakainaga talitonu ke he fekafekauaga po ke fano tokotaha a koe ke he gutuhala, kia fakamalolo ke moua falu a foliaga fakatagata po ke taha mena ke fakatau atu ki ai. Kua lata tonu ke hoko moli atu ki ai. Manako lagomatai nakai a koe ke he hikihikiaga he hau a tau mataulu fakaakoaga ke fakalagalaga aki e fiafia he tau tagata he matakavi hau? Kaeke ke pihia, mitaki ke fakatauo mo e taha paionia, ko e tagata tukuogo tumau he Kautu, po ke tagata fakailoa ne liga mitaki lahi e fakaaogaaga he tau mataulu fakaakoaga. Ko e hau a hoa kua maeke ke lagomatai a koe ke tauteute mo e fakaaoga e tau mataulu fakaakoaga i loto he Our Kingdom Ministry po ke tohi Reasoning From the Scriptures. Ko e falu magaaho kaeke ke fakamatala tokoua a mua he taha fale ke he taha fale, fanogonogo fakamitaki ke he puhala fakatutala he hoa hau. Ka mole ia ti lali ke taute pihia hau a puhala fakatutala ato maeke ia koe ke iloilo ke he mena nei he hau a fekafekauaga.
20, 21. Ko e heigoa ne taute aki e faihoani he fekafekauaga ke he fonua mo mena aoga lahi?
20 Ka e kua kaeke ke manako lagomatai a koe ke taute fakamitaki aki hau a liu ahi atu mo e manatu ke kamata e fakaako Tohi Tapu? Liga mitaki ke puhala mai he hau a takitaki he Fakaakoaga Tohi he Fakapotopotoaga, ke taute taha fakatokaaga ma hau ke gahua ke he fonua mo e taha tagata fakailoa ke he Kautu ne mitaki lahi he kamata e tau fakaakoaga Tohi Tapu. Aua neke eke a koe mo hoa fakanono kaeke ke taute e liu ahi atu tokoua. Ka kua lata, ka oti he fakakite he hoa hau e puhala ne taute aki e ia e fekau he ahi atu lagataha, to kitia e koe e aoga ka liu taute foki e puhala fakatutala pihia ka taute foki taha liu ahi atu. Ko e hoa hau haia ke lagomatai a koe mo e tala atu e fakatonuaga he magaaho fakamui.—Fakatatai Kalatia 6:6.
21 Ko e tau lagomataiaga fakaalofa pihia mai he hoa hau he fekafekauaga ke he fonua ka lagomatai aki a koe ke hokotia ke he hau a tau mena ne fakatau atu ki ai he fekafekauaga. Ko e lagomatai nei mo e hau a fakaaueaga hokulo ma e fakaalofa-totonu a Iehova he fakaata a koe ke taute e gahua monuina nei ka maeke ia koe ke une ki mua e mitaki he hau a tau gahua he fakamatalaaga ke he Kautu. Mo e to ofaofa e koe hau monuina ke fakamonu a Iehova he vagahau fakamitaki tumau hagaao ki a ia mo e taute tumau e fakapuloaaga ke he tau tagata hana higoa.—Salamo 145:1, 2, 9-13.
22. Ko e heigoa e tau huhu he fakaakoaga ha tautolu ka hau ka lagomatai a tautolu ke tali?
22 Ha ko e Tau Fakamoli a Iehova, ne taute e tautolu e tau ahi tafeliuaki he ha tautolu a fekafekauaga he taha fale ke he taha fale. Tokologa ne fanogonogo ke he kupu moli mo e fakaaueaga hokulo. Ka e taha e mena, ko e falu liga fakauaua ke fanogonogo ke he fekau he Kautu. Ko e heigoa ha tautolu ka taute i lalo hifo he tau tutuaga pihia? Fakamakamaka fefe a tautolu ke he gahua ne kotofa e Iehova ke he hana tau tagata? Ko e heigoa e tau fakafifitakiaga he Tohiaga Tapu ke lagomatai po ke takitaki aki a tautolu? Ko e tau huhu nei ka tali he tala ka hau.
Maama Nakai e Koe e Tau Matapatu Kupu Nei?
◻ Ko e heigoa tokoua ha Hosea mo e aposetolo ko Paulo ne talahau ke he tau poa ke he Atua?
◻ Ko e heigoa ne fakaohooho aki a Esekielu mo Amosa ke perofeta?
◻ Kua lata ke kitia fefe e tautolu ha tautolu a gahua fakamatala ke he Kautu?
◻ Ko e heigoa e tau mena aoga ka moua mai he faihoani he fekafekauaga ke he fonua?
[Tau Fakatino he lau 13]
Kua maeke he faihoani aoga lahi ke lagomatai a tautolu ke holo ki mua e mitaki he fekafekauaga