Fefakalatahaaki he Pipiaga Mitaki Katoatoa he Fakaalofa
“Kia . . . fevihiaki he fakaalofa.”—KOLOSE 2:2.
1, 2. Ko e heigoa e fakaheheina vehevehe kua mua atu he logona he vaha nei?
FANOGONOGO! Kua taogo e leo lahi mahaki ke he pulagi katoa kua pehe mai: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.” (Fakakiteaga 12:12) He mole e tau tau takitaha, kua tupu tolomaki e fakamatakutakuina he fekau ia ke he tau tagata he lalolagi.
2 Ko e fi lahi mahaki a Iehova, mai he vaha leva kua talahaua ko e totoko (Satani) mo e fatipiko (Tiapolo). Ka e ke he magaaho nei kua eke foki e patu fakavai nai ke taute e taha matagahua kelea muitui—kua eke tuai a ia mo atua ita lahi! Ko e ha? Kakano he liti hifo e Mekaeli mo e hana tau agelu a ia mai he lagi ha ko e tau ne kamata i luga he lagi he tau 1914. (Fakakiteaga 12:7-9) Iloa he Tiapolo kua tote lahi ni hana magaaho ke fakakite ko e moli hana paleko ko e maeke a ia ke liliu kehe oti kana e tau tagata mai he tapuaki ke he Atua. (Iopu 1:11; 2:4, 5) He nakai fai mena ke hola ki ai, kua tuga e fata pi vale a ia mo e hana tau temoni ne to ha lautolu a ita mahaki ke he tau tagata kapaletu lahi.—Isaia 57:20.
3. Lauia fefe he to hifo a Satani he vaha ha tautolu?
3 Kua fakamaama mai he tau mena tutupu nei, ne nakai kitia he tau mata he tagata, ko e ha ne fa mahani mau ai e tau mahani mitaki he vahaloto he tau tagata ke malona hifo he magaaho nei. Kua fakamaama foki e lautolu e tau laliaga he tau tagata ke fonofono e tau vala mavehevehe he tau motu ne kua nakai maeke ke felauaki. Kua kelea lahi e fekeliaki he tau faoa fakamatakavi mo e tau matakau ikiiki, ti ko e mena ne tupu kua ha ha i ai e tau miliona tagata ne nakai fai mena ke nonofo mo e paea fano e tau tagata. Nakai ofomate ai he tupu tolomaki e mahani matahavala ti nakai fai tataiaga mai i tuai! Tuga he talahau tuai e Iesu, ‘to momoko foki e loto fakaalofa he tau tagata tokologa.’ Ke he tau mena oti ka ono a koe ki ai, kua nakai felauaki mo e nakai fefakaalofaaki e fakamailoga he tau tagata kapaletu he vaha nei.—Mataio 24:12.
4. Kua mua atu he ha e tau tagata he Atua he mena hagahaga kelea?
4 He kitia ai e tutuaga he lalolagi, kua eke ne liogi ha Iesu, ma e hana tau tutaki ke fai kakano lahi: “Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea. Nakai ko e tau tagata he lalolagi a lautolu, ke tuga foki au, nakai ko e tagata he lalolagi au.” (Ioane 17:15, 16) He vaha nei, ko “ia ne mahani kelea” kua mua atu hana ita ne to ki a lautolu kua “omaoma ke he tau poaki he Atua, mo e taofi e talahauaga kia Iesu Keriso.” (Fakakiteaga 12:17) Na pehe kua nakai matakite lahi mo e fakaalofa e levekiaga a Iehova, kua holoholo kehe ni hana Tau Fakamoli mahani fakamoli. Kua falanaki ha tautolu a tau momoui ke he ha tautolu a loto matala ke fakaaoga fakamitaki oti e tau mena ne foaki he Atua ma e ha tautolu a haohao mitaki fakaagaga mo e tutuaga mitaki. Kua putoia ai ha tautolu a eketaha ke fakatauo mo e gahuaaga he Hana malolo ne puhala mai ia Keriso, tuga ne ole fakamakamaka mai e aposetolo ia Kolose 1:29.
5, 6. Fefe e logonaaga a Paulo ke he tau Kerisiano Kolose, mo e lata tonu he ha e matapatu kupu ma e tau 1995?
5 Pete ni kua liga nakaila kitia mata e Paulo a lautolu, ne fakaalofa a ia ke he hana tau matakainaga i Kolose. Ne tala age a ia ki a lautolu: “Kua loto au ke maama e mutolu ko e lahi mahaki fefe haku fakaatukehe ki a mutolu.” (Kolose 2:1, The New Testament in Modern English, ha J. B. Phillips) Kakano ha ko e nakai ko e vala he lalolagi e tau tutaki a Iesu, to lali tumau a “ia ne mahani kelea” ke moumou e fefakalatahaaki he tau matakainaga, he tuku e agaga he lalolagi ke he vahaloto ha lautolu. Kua kitia mai ai he tala ne tamai e Epafara i Kolose kua fita he eke ke fai mena tutupu pihia i ai.
6 Kua maeke ai ke talahau fakaku e taha he tau manamanatu lahi ha Paulo ke he hana tau matakainaga Kerisiano: ‘Kia fevihiaki he fakaalofa.’ Kua fai kakano lahi hana tau kupu he vaha nei, he lalolagi kua pukeina ke he mahani nakai fefakalatahaaki mo e nakai fakaalofa. Ka toka loto e tautolu e tomatomaaga a Paulo, to moua e tautolu e olioli he leveki e Iehova. To mahani foki a tautolu ke iloa e malolo he hana agaga ke he tau momoui ha tautolu, ti lagomatai ai a tautolu ke totoko ke he tau pehiaga he lalolagi. Kua pulotu lahi ha e fakatonuaga nei! Kua moua mai ai ia Kolose 2:2 e matapatu kupu ha tautolu he tau 1995.
7. Ko e heigoa e felauaki kua lata ke ha ha he vahaloto he tau Kerisiano moli?
7 I loto he tohi fakamua ke he tau Korinito, ne fakaaoga he aposetolo e tino he tagata mo fakataiaga. Ne tohi e ia ‘kia nakai ha i ai e feveheaki,’ i loto he fakapotopotoaga he tau Kerisiano fakauku ka “kia feleoleoaki e tau fahi tino oti kana.” (1 Korinito 12:12, 24, 25) Ko e fakataiaga homo ue atu! Ko e tau vala kakano ha tautolu kua fefalanakiaki, kua takitaha ke tututaki ke he tino katoa ha tautolu. Ko e mena taha ia ni hagaao ke he ha tautolu a kaufakalatahaaga fakamatakainaga he lalolagi katoa, ko e fakapotopotoaga ha lautolu ne fakauku mo e tau miliona tagata kua amaamanaki ke momoui he lalolagi parataiso. Kia nakai o kehe a tautolu mai he fakapotopotoaga he faoa Kerisiano ke momoui tutokotaha! He gahua mai ia Iesu Keriso, kua tafe lahi mahaki mai e agaga he Atua ki a tautolu he puhala mai he ha tautolu a feoaki fakalataha mo e tau matakainaga ha tautolu.
Matutaki e Felauaki mo e Loto Matala
8, 9. (a) Ko e heigoa e mena mua ke he ha tautolu a lagomataiaga ke he felauaki i loto he fakapotopotoaga? (e) Moua fefe e koe e loto matala ki a Keriso?
8 Taha mai he tau matapatu manatu a Paulo hanai ko e matutaki e felauaki he Kerisiano mo e loto matala, mua atu hagaao ki a Keriso. Ne tohi a Paulo kua lata e tau Kerisiano ke “fevihiaki he fakaalofa, kia moua ai e koloa oti he maliali ke he loto matala, kia iloa mitaki ai e kupu galo he Atua, ko e Matua ia, katoa mo Keriso.” (Kolose 2:2) Kua iloa ai e tautolu e loto matala—ke he tau mena moli—tali mai he kamata a tautolu ke fakaako e Kupu he Atua. Ha ko e vala he moua ai e maamaaga ko e matutaki fefe e tau mena loga moli nei mo e finagalo he Atua, kua kitia ai e tautolu e matagahua mua atu a Iesu. “Ha ha ia ia e tau tanakiaga koloa oti kana he iloilo mo e maama kua galo ai.”—Kolose 2:3.
9 Kua pihia nakai hau a logonaaga ki a Iesu mo e hana matafekau he finagalo he Atua? Tokologa i Kerisitenitome kua mafiti ke talahau a Iesu, he pehe ko e talia a ia mo e kua fakahao ai. Ka e iloa moli kia e lautolu a ia? Nakai, ha kua tokologa ne talitonu ke he Tolu Taha ko e fakaakoaga nakai mai he Tohiaga Tapu. Nakai koenaia he iloa e koe e kupu moli ke he mena nei ka e liga kua loto matala lahi foki a koe ke he tau mena ne talahau mo e taute e Iesu. Kua miliona e tau tagata ne kua lagomatai ke he puhala nei he loga lahi e tau mena ne ako mai he fakaakoaga ne fakaaoga e tohi The Greatest Man Who Ever Lived. Ka e lata agaia a tautolu ke fakahokulo lahi tumau ha tautolu a loto matala ki a Iesu mo e hana tau puhala.
10. Ke he puhala fe kua maeke ai ke moua e loto matala galo?
10 Ko e talahauaga ko e “tau tanakiaga koloa oti kana he iloilo mo e maama kua galo” ia Iesu ko e mena nakai kakano ko e nakai maeke ia tautolu ke maama e tau mena ia. Ka e, kua tuga ne hala mukamuka ke keli koloa. Kua nakai eke a tautolu ke kumi fano ke he tau mena loga mo e fakaogotau ko e kamata i fe ke aku hake e kelekele. Kua fita he iloa e tautolu—ko e kamata e loto matala moli mo e tau mena ne fakakite mai he Tohi Tapu hagaao ki a Iesu Keriso. He maama lahi ai e tautolu e matafekau a Iesu ke he fakakatoatoaaga he finagalo a Iehova, kua moua tuai e tautolu e tau koloa uho moli he pulotu mo e loto matala tonuhia. Ti ko e mena kua lata ia tautolu ke keli fakalahi hifo tumau, ke lagaki mai fakalahi e tau mena uho po ke tau mena ofania kua maeke ke moua mai he punaaga nei ne kua fita he keli hifo e tautolu.—Fakatai 2:1-5.
11. Maeke fefe ia tautolu ke fakatupu tolomaki ha tautolu a loto matala mo e pulotu he manamanatu fakahokulo ki a Iesu? (Kia fakatai ki a Iesu ne holoholo e tau alohui he tau tutaki, po ke fakaaoga falu fakafifitakiaga.)
11 Ma e fakatai, kua liga iloa e tautolu ne holoholo e Iesu e tau alohui he tau aposetolo hana. (Ioane 13:1-20) Kua eke nakai mogoia a tautolu, ke manamanatu fakahokulo ke he fakaakoaga ne fakaako mai e ia mo e aga ne fakakite e ia? Ka taute e mena ia, liga to futiaki hake mai e tautolu e koloa uho he pulotu ka lagomatai aki a tautolu—e, omoi a tautolu—ke hiki e tau puhala ne taute atu e tautolu ke he matakainaga tane po ke matakainaga fifine ne kua leva he fa fakahogohogomanava he tau mahani hana a tautolu. Po ke ka moua e kotofaaga ne nakai fiafia lahi a tautolu ki ai, kua liga to kehe e tali ka mole he maama lahi e tautolu e kakano ia Ioane 13:14, 15. Kua lauia pihia a tautolu he loto matala mo e pulotu. To lauia fefe e falu he fifitaki fakalahi a tautolu ke he loto matala kua tupu tolomaki ki a Keriso? Kua liga eke ne fuifui ke ‘lahi he fevihiaki he fakaalofa.’a
Maeke he Tau Lavelave ke Moumou e Felauaki
12. Hagaao ke he loto matala fe kua lata a tautolu ke mataala?
12 Kaeke kua fakamukamuka he loto matala tonu a tautolu ke “fevihiaki he fakaalofa,” ko e heigoa mogoia e fua ka moua mai he “tau mena kua fakahigoa pikopiko ai ko e iloilo”? Kua kehe muatua—he fa taufetoko, nakai fetataiaki, mo e o kehe mai he tua. Ti kua lata ai a tautolu ke puipui he totoko ke he tau loto matala fakavai pihia, tuga ne hataki atu a Paulo ki a Timoteo. (1 Timoteo 6:20, 21) Ne tohi foki e Paulo: “Kua tala atu e au e kupu ia, neke fakahehe e taha a mutolu ke he tau kupu fakavai. A mutolu, neke lautaki e taha a mutolu ke he pulotu nakai aoga ke fakahehe ai, ke lata mo e kupu toka tuai he tau tagata, ke lata foki mo e tau kupu fakamua he lalolagi, ka e nakai lata mo Keriso.”—Kolose 2:4, 8.
13, 14. (a) Kua hagahaga kelea he ha e tau matakainaga Kolose hagaao ke he loto matala? (e) Ko e ha ai kua eke a falu he vaha nei ke logona hifo ko e nakai ha ha a lautolu he mena hagahaga kelea pihia?
13 Kua ha ha takai he tau Kerisiano Kolose e tau tauhele fakaheheina, kua moli ko e tau mena fakahigoa fakavai ni ko e loto matala. Tokologa e tau tagata i Kolose mo e tau matakavi ne tata atu ki ai kua fakahakehake lahi e manamanatu ke he tau fakaakoaga fakataitai i Heleni. Kua ha ha i ai foki e tau tagata faka-Iutaia ne manako ke taofimau he tau Kerisiano e Matafakatufono a Mose, tuga e tau aho kaiaga galue mo e tau mena kai fakatapu. (Kolose 2:11, 16, 17) Nakai ko e loto matala moli ne moua he hana tau matakainaga ne totoko a Paulo ki ai, ka kua lata a lautolu ke fakaeneene lahi ke nakai fakataki he ha tagata a lautolu ke faiola ai, he iloilo e tau laugutu ke futiaki aki a lautolu, ke eke ai ke kitia ni e onoonoaga he tagata ke he moui mo e tau gahua. Maeke ia koe ke maama, ka toka he falu he fakapotopotoaga ha lautolu a manamanatuaga mo e tau fifiliaga ke hikitakina he tau talahauaga mo e tau aga pihia ke he moui kua nakai mai he Tohiaga Tapu, to fetoko ai ni ke he felauaki mo e fakaalofa he vahaloto he tau tagata he fakapotopotoaga.
14 ‘E,’ liga manamanatu a koe, ‘kitia e au e mena hagahaga kelea ne fehagai ke he tau Kolose, ka e nakai hagahaga kelea a au ke fakaheheina he tau talahauaga Heleni, tuga e solu nakai maeke ke mate po ke atua tolu taha; nakai kitia foki e au to hagahaga kelea ke hikitakina he tau aho okioki pouliuli he loto fakavai ne kua fita he hola kehe mai au.’ Homo. Kua mitaki ke mauokafua e loto ko e mua ue atu e kupu moli ne fakakite mai ia Iesu kua maeke ke moua mai he tau kupu Tohiaga Tapu. Ka e fefe mogoia, kaeke kua hagahaga kelea a tautolu ha ko e falu fakaakoaga fakataitai po ke tau onoonoaga he tagata kua kaputia he vaha nei?
15, 16. Ko e heigoa e onoonoaga ke he moui ka liga lauia e manamanatuaga Kerisiano?
15 Kua ha ha leva mai i tuai e taha aga pihia: “Ko fe mogoia tuga ne mavehe ke haele mai a ia? Kua tuku ha mautolu a tau matua tane he ha lautolu a okiokiaga, ka e tumau agaia e tau mena oti tuga ne fa mahani mau.” (2 Peteru 3:4, The New English Bible) Pete ni ka talahau e mena ia ke he tau kupu kehe, ka ko e mena taha agaia ni. Tuga a nai, liga to manamanatu e taha tagata, ‘He magaaho fakapa ne iloa e au e kupu moli he loga e hogofulu tau tau kua mole, ko e “ha ko ni mua” e fakaotiaga. Ka e agaia ni ke nakaila hoko mai, mo e iloa e hai to hoko a fe?’ Moli, kua nakai fai tagata ne iloa ko e hoko a fe e fakaotiaga. Ka e, mailoga la e manamanatuaga ne fakaohooho e Iesu ke ha ha ia tautolu: “Kia mataala a a mutolu, mo e liogi, ha ko e mena nakai iloa e mutolu po ke hoko mai a fe e aho ia.”—Mareko 13:32, 33.
16 Kua hagahaga kelea lahi ni ke fifitaki ke he manamanatuaga ia, he nakai iloa ko e hoko he magaaho fe e fakaotiaga, kua lata na tautolu ke kolo ke katoatoa ni e moui tuga “fa mahani”! Liga to atagia mai e onoonoaga ia he tau manamanatuaga, ‘Kua lata na au ke taute e tau lakaaga ke fakaataina a au (po ke haku fanau) ke moua e tau gahua lilifu lahi kua mitaki e tau totogi mo e maeke ai au ke olioli he moui tokotoko mitaki. Kua moli, to fano au ke he tau feleveiaaga Kerisiano mo e fai vala ka taute he gahua fakamatala, ka e kua nakai fai kakano au ke eke fakamakamaka po ke taute e tau poa lahi mahaki.’—Mataio 24:38-42.
17, 18. Ko e heigoa e onoonoaga ne fakaohooho mai e Iesu mo e tau aposetolo ke ha ha ia tautolu?
17 Kua nakai maeke ke fakatikai mogoia, ko e fakaohooho e Iesu mo e hana tau aposetolo ke momoui a tautolu mo e manamanatu fakamafiti ke taute e fakamatalaaga he tala mitaki, he eke fakamakamaka a tautolu ni mo e fakamakai ke taute e tau poa. Ne tohi e Paulo: “Ko e tau matakainaga na e, kua gahoa e tau aho kua toe kia tuga he nakai fai hoana, a lautolu kua fai hoana; . . . ko lautolu kua fakafua tuga he nakai fai mena; Ko lautolu kua toto e tau mena he lalolagi nai tuga he nakai toto fakalahi ki ai; ha ko e mena mole atu e mahani he lalolagi nai.”—1 Korinito 7:29-31; Luka 13:23, 24; Filipi 3:13-15; Kolose 1:29; 1 Timoteo 4:10; 2 Timoteo 2:4; Fakakiteaga 22:20.
18 Nakai talahau mai ke foli ke tokotoko mitaki e moui, ne tohi a Paulo i lalo he agaga tapu: “Nakai ta mai e tautolu ha mena taha ke he lalolagi, ti iloa maliali foki e tautolu nakai maeke ni ke uta kehe ai ha mena. Kaeke kua moua e tautolu e tau mena kai, mo e tau mena ke fakatapulu ai, to lata ia kia tautolu . . . Kia tau ke he tau mitaki kua lata mo e tua, kia toto e moui tukulagi, ne ui foki a koe ki ai, ne talahau atu ai e koe e talahauaga mitaki ki mua he tau talahau tokologa.”—1 Timoteo 6:7-12.
19. Ne lauia fefe e fakapotopotoaga, ka talia e lautolu i ai e onoonoaga ke he moui ne fakamalolo mai e Iesu?
19 He magaaho ka ha ha he fakapotopotoaga e tau Kerisiano fakamakutu ne eketaha fakalahi ke ‘talahau atu e talahauaga mitaki ki mua he tau talahau tokologa,’ kua aga tuai ni ke felauaki. Kua nakai mahala a lautolu ke he aga, ‘Ha ha ia koe e tau mena mitaki loga kua toka mo e tau tau loga; kia nofo fakatekiteki a, ti kai a, mo e inu, mo e fiafia ai a koe.’ (Luka 12:19) Kua kehe, he fefakalatahaaki a lautolu ke he laliaga ia, he fakamakai ke taute e tau poa ke katoatoa e vala ne kua maeke lahi ke taute ke he gahua nei ko e mena to nakai liu foki ke taute.—Fakatatai Filipi 1:27, 28.
Fakaeneene Lahi ke he Tau Kupu Fakavai
20. Ko e heigoa e taha fahi ne kua liga to hehe ai e tau Kerisiano?
20 Kua ha ha i ai moli, e falu puhala kua liga eke e tau Kerisiano ke ‘fakahehe he tau kupu fakavai’ po ke fakavaia gatigati kua fakalavelave e aga “fevihiaki he fakaalofa.” Ne tohi mai he la ofisa he Kaufakalatahaaga Kolo Toko i Sihamani: “Taha e mena tupu ne kamata ai e taufetoko ke he tau fakapotopotoaga loga, kua eke e tau tagata fakailoa mo e pihia foki e tau motua ke lalago ke he tau fahi kehekehe he taufetoko ke he tau vahega tuluiaga ne fakaaoga he matakainaga.” Ne pehe mai foki a lautolu: “Kakano he loga lahi e tau lagatau kehekehe ne fakaaoga mo e lahi mahaki e numela he tau tagata gagao, ti kua eke ai e fahi nei mo mena taufetoko lahi mo e, kaeke kua hagahaga foki e tau lagatau tului ke fai matutaki fakataulatua, kua liga hagahaga kelea lahi ni.”—Efeso 6:12.
21. Maeke fefe e Kerisiano he vaha nei ke galo e kitiaaga kua hako?
21 Manako e tau Kerisiano ke momoui mo e tino malolo tumau, ke maeke ia lautolu ke tapuaki ke he Atua. Pete ni ia, he fakatokaaga nei kua lauia na tautolu he fuakau mo e gagao ha ko e fua he nakai mitaki katoatoa. Kia kehe ai he nakai pehi e tau matakupu fakamalolo tino, kua lata na tautolu ke manamanatu lahi ke he tau vailakau moli, ma tautolu mo e ma e falu foki. (1 Timoteo 4:16) Ko Keriso e matapatu he vailakau ia, tuga ha ko ia ni foki e matapatu he fakatonuaga a Paulo ke he tau Kolose. Ka e kia manatu, ne fakakite e Paulo kua liga to o mai falu mo e “tau kupu fakavai” kua fuluhi kehe ha tautolu a manamanatuaga mai ia Keriso, liga ke he kitiaaga he tau fakamailoga, tau levekiaga tului, po ke tau mena kai.—Kolose 2:2-4.
22. Ko e heigoa e aga lagotatai kua lata ke ha ha ia tautolu ke he tau talahauaga loga lahi ne hagaao ke he tau puhala fakamaama fakamailoga gagao mo e levekiaga tului?
22 Kua patapataka ke he tau tagata he lalolagi e tau fakatataaga koloa mo e tau tohi fakamoliaga ke he tau faga levekiaga tului oti kana mo e tau puhala fakamaamaaga fakamailoga gagao. Ko e falu mai he tau mena ia kua fakaaoga lahi mo e tua lahi ki ai; ko e falu kua totoko lahi ki ai po ke tuaha lahi ki ai.b Kua lago ni ke he tau tagata takitaha ke fifili ko e heigoa ka taute e ia hagaao ke he hana malolo tino. Ka ko lautolu ne talia e fakatonuaga a Paulo ia Kolose 2:4, 8 ka puipui mai ai ti nakai fakahehe he “tau kupu fakavai” po ke “pulotu nakai aoga ke fakahehe ai” ne kua fakaheheina e tau tagata tokologa kua nakai ha ha i ai e amaamanakiaga he Kautu, ne kua loto lahi mahaki ke fai lagomatai. Pihia foki ni kaeke kua mauokafua lahi e loto he Kerisiano ko e mitaki e taha levekiaga tului ki a ia, kua nakai lata a ia ke fakaohooho e mena nei ke he tau faoa fakamatakainaga Kerisiano, ha ko e mena maeke ke uhu e tala lahi mo e taufetoko ke he tau matakavi oti. Ka kua maeke ai a ia ke fakakite e fakalilifuaga lahi ko e aoga lahi e felauaki i loto he fakapotopotoaga.
23. Ko e ha ai kua fai kakano mua atu a tautolu ke olioli?
23 Ne pehi e Paulo ko e felauaki he Kerisiano ko e fakaveaga haia he olioli moli. He vaha hana kua tote lahi e numela he tau fakapotopotoaga mai he vaha nei. Ka e kua maeke a ia ke tohi ke he tau Kolose: “Pete ni he nakai ha i ai au ia mutolu ke he tino, kua ha i ai au ia mutolu ke he agaga, kua fiafia au mo e kikite atu ke he ha mutolu a tauteute mitaki, mo e mauokafua he tua ha mutolu kia Keriso.” (Kolose 2:5; kikite foki Kolose 3:14.) Kua lahi mahaki ha, ha tautolu a kakano ke olioli! Liga to maeke a tautolu ke kitia e fakamoliaga moli ke he felauaki, maopoopo mitaki, mo e mauokafua e tua ne ha ha he ha tautolu ni a fakapotopotoaga, ko e mena kua atagia mai e tutuaga ne mahani lahi ke ha ha ai he tau tagata he Atua he lalolagi katoa. Ati ke he magaaho ku ne tote agaia he fakatokaaga nei, kia taute a tautolu takitokotaha ke mao lahi e loto ke ‘felauaki he fevihiaki he fakaalofa.’
[Tau Matahui Tala]
a Pete ni kua loga lahi mahaki e tau mena ka ako e tautolu, mai he tau fakafifitakiaga ne mui mai, kikite la ko e heigoa hau kua maeke ke ako mai ia Iesu ne kua maeke ke lagomatai aki e felauaki he hau a fakapotopotoaga: Mataio 12:1-8; Luka 2:51, 52; 9:51-55; 10:20; Heperu 10:5-9.
b Kikite The Watchtower ia Iuni 15, 1982, tau lau tohi 22-9.
Mailoga Nakai e Koe?
◻ Ko e heigoa e lauga-he-tau 1995 ma e Tau Fakamoli a Iehova?
◻ Kua lata he ha e tau Kerisiano i Kolose ke felauaki he fevihiaki he fakaalofa, mo e taute ai he ha e tautolu he vaha nei?
◻ Ko e heigoa e onoonoaga fakateteki lahi he moui, ne kua lata mua atu e tau Kerisiano ke fakaeneene lahi he vaha nei?
◻ Lata he ha e tau Kerisiano ke mataala ke nakai fakahehe he tau kupu fakavai hagaao ke he malolo tino mo e tau puhala fakamaama fakamailoga gagao?
[Tau Fakatino he lau 13]
Fakave nakai hau a tau fakatokaaga ma e vaha i mua ke he ha ha hinei a Iesu?