Tau Huhu Mai he Tau Tagata Totou
Ko e heigoa e kakano he tutaki ko Iakopo he magaaho ne talahau e ia: “Haku a tau matakainaga na e, aua neke tokologa a mutolu ke eke mo tau akoako, ha kua iloa e tautolu to mua e fakahala ke moua e tautolu”?—Iakopo 3:1.
Kua nakai fakalolelole e Iakopo e tau Kerisiano mai he fakaako e kupu moli ke he falu. Ia Mataio 28:19, 20, ne poaki age a Iesu ke he hana tau tutaki ke “o atu a a mutolu ke eke e tau motu oti kana mo tutaki . . . ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” Ha kua pihia, kua lata e tau Kerisiano oti ke eke mo tau akoako. Ne fakatonu he aposetolo ko Paulo e tau Kerisiano Heperu ha kua nakai la eke a lautolu mo tau akoako. Ne tohia e ia: “Ane mai eke a mutolu mo tau akoako po kua lata ai ha kua leva, ka e aoga ni kia mutolu ke liu foki fakaako e taha kia mutolu ke he tau kupu he kamataaga he kupu he Atua.”—Heperu 5:12.
Ko e heigoa, mogoia, ne vagahau a Iakopo ki ai? Kua hagaao atu a ia ki a lautolu mo e tau kotofaaga fakaako pauaki he fakapotopotoaga. Ia Efeso 4:11, kua totou e tautolu: “Kua tuku mai foki e ia [Iesu Keriso, ko e Ulu he fakapotopotoaga] e falu ke eke mo tau aposetolo, ko e falu foki ke eke mo tau perofeta, ko e falu foki ke fakamatala e vagahau mitaki, ko e falu foki ke eke mo tau leoleo katoa mo e tau akoako.” Kua ha ha ai e tau tutuaga fakaako pauaki he tau fakapotopotoaga he senetenari fakamua ke tuga foki he vaha nei. Ke fakatai ki ai, kua hukui he Kau Fakatufono e “fekafekau fakamoli mo e loto matala” mo e ha ha ai e matagahua pauaki ke leveki atu ke he fakaakoaga he tau fakapotopotoaga he lalolagi katoa. (Mataio 24:45) Ko e tau leveki o fenoga mo e tau motua he fakapotopotoaga kua fai matagahua fakaako pauaki foki.
Kua tala age kia a Iakopo ke he tau tagata tane Kerisiano kua lata kua nakai maeke ia lautolu ke talia e kotofaaga he akoako ha kua mua e fakahala mai he Atua? Nakai pihia. Ko e feua he motua ko e kotofaaga lahi, tuga ne fakakite mai ia 1 Timoteo 3:1, ne pehe mai: “Kaeke kua foli e taha ke he feua he epikopo, kua manako a ia ke he gahua mitaki.” Ko e taha e mena kua lata tonu ke kotofa ke eke mo motua he fakapotopotoaga ko e taute e tagata tane “ke lata ke fakaako atu.” (1 Timoteo 3:2, NW) Kua nakai fakafekehekeheaki e Iakopo e tau kupu mai he agaga ha Paulo.
Ka e, kua tuga kua fifili ni he falu a lautolu mo tau akoako he senetenari V.N. fakamua, ka e nakai kua lata mo e kua nakai kotofa a lautolu. Kua tuga, kua logona hifo e lautolu e falu talahauaga he kotofaaga ia, ti manako ai a lautolu ma e lilifu fakatagata. (Fakatatai Mareko 12:38-40; 1 Timoteo 5:17.) Kua vagahau e aposetolo ko Ioane hagaao ki a Tioterefe, ne ‘kua fia mua, kua nakai talia a Ioane.’ (3 Ioane 9) Ne talahau mai ia 1 Timoteo 1:7 hagaao ki a lautolu pauaki ne ‘fia eke mo tau akoako ke he fakatufono, ka e nakai iloa e lautolu e tau mena kua vagavagahau ki ai, po ke tau mena kua talahau kua talahau fakalahi ai e lautolu.’ Ko e tau kupu ia Iakopo 3:1 kua lata lahi ma e tau tagata tane ne fia eke mo tau akoako ka e kua ha ha ia lautolu e manako hehe. Ko lautolu ia ka fakamatematekelea e fuifui mamoe mo e to moua ai e mua e fakahala ha ko e mena ia.—Roma 2:17-21; 14:12.
Kua eke foki a Iakopo 3:1 mo fakamanatu mitaki atu ki a lautolu ne kua lata mo e kua taute mo tau akoako. Ha kua lahi ne tuku age ki a lautolu, to lahi foki ka manako mai ia lautolu. (Luka 12:48) Ne talahau e Iesu: “Ko e tau kupu fakateaga oti ke vagahau he tau tagata, to fakamatala atu ai e lautolu ke he aho fakafili.” (Mataio 12:36) Kua mua atu e moli he mena nei ki a lautolu ne lahi e lauia he tau kupu, ko e tau momotua kotofa.
To fai tali e tau momotua ha ko e puhala ne fakafehagai a lautolu mo e tau mamoe a Iehova. (Heperu 13:17) Ko e heigoa kua talahau e lautolu to lauia e tau momoui. Ha kua pihia, kua lata he motua ke fakaeneene ke nakai omoi hana ni a manatu po ke ekefakakelea e tau mamoe ke tuga ne taute he tau Farasaio. Kua lata ia ia ke ukufakina ke fakatata foki e fakaalofa hokulo ne fakakite e Iesu. Ke he tau tuaga fakaakoaga oti, mo e mua atu he magaaho ka putoia ke he tau mena fakafili, kua lata he motua ke fifili e vagahau hana, mo e nakai fakaaoga e tau kupu ne fakakite e tau manatu fakatagata. He falanaki fakalahi atu ki a Iehova, hana a Kupu, mo e tau fakatonutonuaga mai he hana a fakatokatokaaga, to moua ai he leveki mamoe e monuina lahi he Atua, nakai “mua e fakahala.”