Ko e Fakaholoaga Kautu Mitaki mo e Tala he Kautu

“KO E Ha ne Puke Ai e Moui he Tau Lekua?​—To Moli Nakai e Parataiso ne Noa mo e Tau Lekua?” Ko e mataulu tala he Tala he Kautu Nu. 34 anei, ko e tuleke ne fa e lau ne kua tufatufa ke he lalolagi katoa ke he 139 e tau vagahau he magahala ia Aperila mo Me he tau kua mole. “Ko e taha mai he tau mena ofoofogia he tau,” ko e puhala ne fakamaama mai he Tau Fakamoli i Tamaika e fakaholoaga he fekafekauaga nei. “Ko e punaaga lahi he olioli ma e tau matakainaga,” he ui he Tau Fakamoli i Peletiumu. He Repapiliki i Seko, ko e mogo fakamua laia he Tau Fakamoli a Iehova ke fakalataha atu ke he tufatufaaga he Tala he Kautu. Kua hokotaki mai he la: “Kua tamai he fakaholoaga e agaga fakamakutu mo e fiafia lahi.” Pihia foki e tau talahauaga ne logona mai he falu motu.

Kua ha ha he Tala he Kautu Nu. 34 e ogo uho ma lautolu ne tauoi mo e maanu ha ko e tau mena fakavihiatia ne taute he higoa he lotu. (Esekielu 9:4) Kua ha ha i ai e mafanatia ma lautolu ne lekua e tau momoui ha kua “hohoko mai ai e tau aho uka” ne nakai ­fakai ia lautolu ke taofi. (2 Timoteo 3:1) Tuhi atu ke he Tohi Tapu, ne fakakite he tuleke e tau lekua he moui ka nakai leva to uta kehe. Ko e parataiso ne noa mo e tau lekua to fakamoli. (Luka 23:43) Tokologa ne totou e Tala he Kautu kua fakaohooho ai he ogo i ai. Ne tala age he tagata tane i Togo ke he taha Fakamoli: “Ko e mena ne talahau e mutolu kua nakai ke fakafetoko.”

Ko e moli anei, ko e tufatufaaga he Tala he Kautu nei kua futiaki mai e onoonoaga kua kehe. I Tenemaka, ne tala age e tagata he fale ke he Fakamoli ne foaki e tuleke: “Ko e liu mai laia au he Tau Fahi Kaufakalataha. Ka e ato hau au, ne foaki mai he taha tagata e tuleke hau ki a au. Mogonei ko e hoko mai laia au, mo e ko e tuleke ia ni kua mai he vagahau Tenemaka!”

Lagomatai Fiafia ma e Matafekau

Ko e Tau Fakamoli a Iehova he lalolagi katoa kua fakalataha atu mo e fiafia ke he gahua ke tufatufa e tau tuleke. I Auseturia, Ele Salavatoa, Haiti, Hugari, Italia, Niu Kaletonia, ko e falu ni aia he tau motu ne hokotaki ne hohoko ke he tapunu e tau tagata fakamatala he magahala he tau mahina he magaaho ne tufatufa ai e Tala he Kautu.

I Samipia ne fakamahani he leveki ahiahi hana tama fifine ne 3 e tau he moui, ko Deborah, ke foaki e tau tohi ke he taha fale ke he taha fale. He magahala he fakaholoaga he Tala he Kautu Nu. 34, ne molea e 45 e tau lau tuleke ne foaki e Deborah. Ne kamata he matua fifine hana e tau fakaakoaga Tohi Tapu mo e falu ne talia e Tala he Kautu mai ia Deborah.

I Aferika Toga, ne foaki he fuata tote e tuleke ke he kapitiga aoga ne higoa ko Cashia. Ne totou e Cashia e tuleke mo e talahau: “Ko e homo lahi ha e mena nei​—ke nonofo tukulagi he lalolagi parataiso! Ko e ha ne nakai tala mai fakamua ai e mena nei ki a au?” Ne kamata ai e fakaakoaga he Tohi Tapu. He fahi tapu taha ia ni ne moua e Cashia e taha tuleke foki. Ne moua mai e tuleke ke ua aki he hana kapitiga tohitohi he lotu Katolika Roma, ne nofo i Kuperu. Ne fakamaama he kapitiga tohitohi ki a Cashia ko e ha ne nakai moli e tau fakaakoaga he Lotu Katolika Roma mo e tala age ki a ia kua amanaki a ia ke fakaako e Tohi Tapu mo e Tau Fakamoli a Iehova. E moli, kua lahi ai e fakamalolo he mena ia e fifiliaga ha Cashia ke fakatumau hana a fakaakoaga.

Ko e tama tane hogofulu e tau he moui i Suisalani ne fakalataha mo e hana a matua fifine ke tufatufa e tau tuleke. Ne fakaolo age e ia e tuleke ke he fifine fuata mo e fakamafana age ki a ia ke totou fakamitaki ai. Ne huhu e fifine fuata ke he tama tane ko e talitonu moli nakai a ia ke he fakatino ne fakakite he kili​—ko e moui he lalolagi ne nakai fai fakaotiaga. Ko e tali he tama tane? “Oi, e, moli lahi au.” Ati talahau ai he fifine ko e kumi a ia he tua moli ha kua to lahi e loga he tau fekehekeheaki he lotu hana. He liliu ahiahi atu, ne kamata ai e fakaakoaga Tohi Tapu.

Mafiti e Tau Taliaaga

He falu magaaho ne fakatupu he Tala he Kautu ke mafiti e taliaaga ki a lautolu ne totou ai. He oti ai e totou he tuleke, ne talahau he tama fifine ne 11 e tau he moui i Pelekiumu ke he taha he Tau Fakamoli a Iehova, ko e kaiha e ia e fale koloa. Ne manako e matua fifine he tama ke fufu e mena ia, ka e kua omoi e loto manamanatu he tama ha ko e mena ne totou e ia, ti fakamakamaka a ia ke fano ke kitia e tagata leveki gahua he tau fale koloa. Ne fakahiku ai ke talia he matua fifine ke toka e tama fifine hana ke liu ke he tau fale koloa mo e Fakamoli. Kua ofomate e tagata leveki gahua ke he mena ne talahau e ia. He magaaho ne iloa ai e ia ko e Tala he Kautu ne omoi aki e tama fifine ke taute e mena nei, ne uta e ia e taha lau tuleke ma hana ke kitia ko e heigoa e mena i loto ne lahi e malolo. Ko e tama fifine he mogonei kua mitaki e holoaga he hana a fakaakoaga Tohi Tapu.

Ne toka hifo he Fakamoli i Kamerono e lau he Tala he Kautu mo e tagata tane mo e talahau: “He magaaho ne liliu a mautolu, ne moua e mautolu kua fita he hihika ai e ia mo e loga foki e tau huhu. He magaaho ne moua ai e tau tali makona, ne talahau mai a ia: ‘Ko e moli lahi ko e lafi atu e lotu ke he nakai fiafia he tau tagata. Kua lagomatai he tuleke ha mutolu au ke lahi e maamaaga, ka e loto au ke iloa atu foki.’ ” Mogonei, kua taute tumau e fakaakoaga Tohi Tapu hana.

Ko e taha Fakamoli ne ahiahi ke he taha fale ke he taha fale i Urukuai ti toka e tuleke mo e tagata tane. Ne fakaholo atu e Fakamoli ke taute hana a gahua ke fakamatala ke he taha fale ke he taha fale mo e gahua viko ke he fahi tua he fale lahi ato hoko atu a ia ke he gutuhala he fahi tua he fale he tagata tane. Ne ofo a ia he kitia e tagata tane hane fakatali ki a ia mo e tuleke he hana lima. Kua fita he totou e ia mo e manako ke moua atu foki e tau fakailoaaga. Ne kamata ai e fakaakoaga Tohi Tapu he mogoia ni.

Ne Lagomatai e Tau Tagata ke he Tufatufaaga

I Sapani, ne finatu e Fakamoli fuata tote ke he tagata tane ne kavi ke 50 maga e tau tau mo e fakakite ki a ia e tuleke. Ne huhu e tagata: “Ko e heigoa hau ka taute aki e lau pepa tote ia ka feleveia a koe mo e tau tagata nakai maeke ke kitia?” Ne talahau he Fakamoli, nakai iloa e ia. Ne tala age e tagata ki a ia ke fakatali fakaku mo e liu a ia ki loto he hana fale. Ne liu mai a ia mo e lau he Tala he Kautu mo e talahau: “Kua fita he moua e au e lau pepa tote na. Ko e manatu haku ko e lahi e tau fakailoaaga fulufuluola mo e aoga lahi i loto, ati fakaliliu ai e au ke he tau matatohi Braille. Fakamolemole fakaaoga la e mena nei ma e tau tagata matapouli.” Kua fakamole he tagata tane ia loga e tau matahola ke fakaliliu e Tala he Kautu ke he tau matatohi Braille ke maeke ia lautolu ne matapouli ke moua e tau mena ne toka i loto.

I Solovakia, ne loto lahi e tagata tane ke he tuleke ati 20 e lau he tau tuleke ne lagaki e ia, mo e tufatufa ni e ia e tau lau pepa nei. Ne toka he tagata fakamatala i Suisalani e Tala he Kautu mo e taha magafaoa mo e fakaholo atu ke gahua ke he tau poko i luga he fale lahi ne nonofo ai e magafaoa. He liu hifo mai ki kelekele, ne feleveia a ia mo e tama tane tote he magafaoa, ne ole ma e 19 foki e lau he tau tuleke. He aoga he tama tane, kua kotofa e tau fanau ke tohi hagaao ke he tau lekua mo e ke kumikumi e tau tali. Ne manako a ia ke moua e Tala he Kautu ma lautolu oti he vahega hana.

Nakai Fai Tagata ne Toe

Kua gahua lahi a lautolu ne fakaauloa atu ke he fakaholoaga ke nakai fai tagata ke toe. I Niu Kaletonia, tokoua e Tau Fakamoli ne fenoga ke he matakavi he magafaoa mamao ke tufatufa ai e Tala he Kautu. He o ki ai, ne kitia e laua e hala ne nakai tuga ke fakaaoga, ka e pete ni ia, ne taute a laua ke o ke kitia ko e fai tagata nakai ne nofo he matahiku he hala. Toka hifo e motoka, ne o hui a laua he hala ia, o i luga he tau vai tafe ikiiki ati fakahiku ke kitia e laua e fale. Ko e tokoua e tagata ne nonofo iai ne nakai la logona ia he Tau Fakamoli a Iehova, ti talia e laua e lau he Tala he Kautu. He mole mai, ne liliu ahiahi atu e tau tagata fakamatala mo e kua ofo a laua he kitia kua taute e laua he fale e hala mo e kua fai hala laupapa ikiiki ke maeke he Tau Fakamoli ke fakaholo e motoka ha laua ke he fale. Ati kamata ai e fakaakoaga Tohi Tapu tumau.

I Polani, ne fano taha atu e Fakamoli mai he mena ta fale ke foaki e lau he Tala he Kautu ke he tagata he fale. Ne kitekite he tau tagata gahua a ia he liu mai ti mole foki e mena ta fale. Ka e fakahiku ni taha he tau tagata gahua ke hea ki a ia mo e ole ki a ia ke nakai nimo a lautolu. He magaaho ne fehagai a ia mo lautolu, ne fakanono a lautolu mo e fanogonogo fakaeneene ke he fakamaamaaga he tuleke. Kua uta ai e lautolu e tau lau he Tala he Kautu mo e tau mekasini foki ti he magaaho fakamui, he liliu ahiahi, ko e tau tohi.

Ko e tau teau he tau miliona he Tala he Kautu Nu. 34 kua tufatufa ke he tau vagahau loga. Kua fita e ogo i ai he fai lauiaaga malolo lahi. Tokologa kua ako ko e moli e parataiso ne noa mo e tau lekua. Kua liogi a mautolu ke fakatumau a lautolu ne loto tututonu ke talia mo e ke fakahiku ke eke ke ha ha he ‘tau tagata mahani molu’ ka ‘moua e motu; ti fakafiafia a lautolu ha ko e monuina kua lahi.’​—Salamo 37:11.

[Puha he lau 32]

Kia Tumau ke Tufatufa e Tau Mekasini!

Ne kitia ai ia Aperila mo Me 1995 e kautu mitaki kua mua atu he matafekau ke tufatufa e Tala he Kautu Nu. 34. He magahala he tau mahina ua ia, kua ha ha ai foki e lahi mahaki he tufatufaaga he tau mekasini Kolo Toko mo e Awake! Ko e matakainaga tane he Repapiliki i Seko, ke fakatai ki ai, ne hokotaki ko e tufa e ia 250 e lau he Tala he Kautu mo e 750 e tau mekasini ia Aperila. I Kuatelupe, Aho Faiumu, Aperila 15, kua fifili ai ma e aho mekasini pauaki. Teitei ke fakaauloa atu oti e tau tagata fakamatala he motu ke he fekafekauaga he aho ia! I Solovakia, kua ha ha ai e tapunu fou he tufatufaaga he tau mekasini ia Aperila. Kua pihia foki e tau hokotakiaga mai he falu a motu loga.

Ti ko e ha he taute a Aperila mo Me 1996 ke eke mo tau mahina uho ma e tufatufaaga he tau mekasini? Kua lata e tau fakapotopotoaga ke fakatoka e aho pauaki ma e tau mekasini. Lata he tau tagata takitokotaha ke fakalataha atu ke gahua paionia lagomatai. He tau mena nei mo e falu puhala foki, kua lata ke fakamalolo e tufatufaaga he tau mekasini, ke fakaholo ki mua ai e ogo aoga lahi ne fakapuloa he Tala he Kautu Nu. 34. Ti, tuga kua tupu he tau kua mole, to fakamonuina moli e Iehova e agaga makutu ne fakakite e tautolu.​—2 Timoteo 4:22.