Ko e Amaamanakiaga Mua e Mitaki ma e Solu

KUA nakai amanaki e tau kautau Roma ke he mena nei. He fakamafiti atu a lautolu ke he taue he mouga i Masada, ko e toko fakamuiaki he tau matakau totoko ha Iuta, kua mau tauteute a lautolu ke tapaki ha lautolu a tau fi, ma e tau kalaga he tau toa tau, ma e tau tagi fakatutu he tau fifine mo e fanau. Ka e kehe ai he logona ni e lautolu e patapata he puho he afi. He kumi atu a lautolu ke he maaga ne vela, ne moua he tau Roma e tala moli fakamatakutakuina: ko e ha lautolu a tau fi​—kavi ke 960 e tau tagata—​kua fita he mamate! Ko e tau toa Iutaia kua fakatokatoka fakamitaki ke kelipopo ni e lautolu e ha lautolu a tau magafaoa, ti fekelipopoaki ni a lautolu. Ko e tagata tane fakamui kua kelipopo ni e ia a ia.a Ko e heigoa ne takitaki atu a lautolu ke he kelipopoaga mahaki fakateteki nei mo e taupega?

Hagaao atu ke he tagata he magaaho taha ia ko e tagata fakamau tala tuai ko Josephus, ko e vala ne mua e aoga ko e taofiaga ke he solu nakai maeke ke mate. Ko Eleazar Ben Jair, ko e takitaki he tau Matakau Makutu Lahi i Masada, kua lali he mogo fakamua ke tala age ke he hana tau tagata ko e taupega ko e mena fakalilifu lahi mai he mate po ke fakatupa ke he tau Roma. He kitia ai a lautolu ne mahalohalo, ati hopo atu a ia ke lauga fakamafanatia hagaao ke he solu. Ne tala age a ia ki a lautolu ko e tino ko e kavega mamafa noa ni, ko e fale pagota ma e solu. “Ka e he magaaho, ne ata mai he kavega ne toho hifo mai ai ke he lalolagi mo e kua tautau ai i ai,” ti fakaholo atu a ia, “ne liu e solu ke hana ni a matakavi, ti ke he mena moli kua fai vala ai ke he malolo fakamonuina mo e he malolo ne nakai fai kaupaaga, kua taute ai ke nakai ke kitia ke he tau mata he tagata ke tuga ni e Atua Hokoia.”

Ko e tali? Kua hokotaki mai a Josephus, he mole ai e vagahau fakamui e Eleazar e manatu nei, “ne tauhele he tau tagata fanogonogo hana a ia mo e kua puke ai ke fakatepetepe ke o fakaave ke taute e gahua ia.” Ne lafi mai e Josephus: “Ke tuga kua maliu e tau ulu kua fakaaveave ke o, ko e tau tagata oti kua manako lahi ke mafiti lahi mai he taha tagata, . . . ti, mo e manako ne nakai maeke ke toka kua taute ai a lautolu ke fekelipopoaki ha lautolu a tau hoana, ha lautolu a fanau, mo lautolu ni.”

Ko e fakafifitakiaga momoko nei kua fakakite mai ko e maeke e hokulo he fakaakoaga ke he solu nakai maeke ke mate ke hikihiki e onoonoaga fa mahani he tagata ke he mate. Kua fakaako a lautolu ne tua ke kitia e mate, nakai ko e fi muikau he tagata, ka e ko e gutuhala ke fakatokanoa aki e solu ke olioli e moui mua ue atu. Ka e ko e ha ne talitonu ai e tau Matakau Makutu Lahi Iutaia ke he puhala nei? Tokologa ka manamanatu ko e tau tohitohiaga tapu ha lautolu, ko e tau Tohiaga Tapu Heperu, kua fakaako na ha ha he tagata e agaga loto matala ia ia ni, ko e solu ne hola ke moui atu foki he mole e mate. Kua moli kia e mena ia?

Ko e Solu he Tau Tohiaga Tapu Heperu

Ke he kupu fakaku, nakai. I loto tonu he tohi fakamua aki he Tohi Tapu, ko e Kenese, kua tala mai ki a tautolu ko e solu nakai ko e taha mena ne ha ha ia koe, ka ko koe e mena ia. Kua totou e tautolu ke he tufugatiaaga ha Atamu, ko e tagata moui fakamua: “Kua eke tuai a ia mo [“solu,” NW] moui.” (Kenese 2:7) Ko e kupu Heperu ne fakaaoga hinei ma e solu, neʹphesh, na molea e laga 700 e magaaho ne kitia ai he tau Tohiaga Tapu Heperu, nakai lagataha ke fakakite mai e manatu he mena tu kehe, ne vevehe mai he vala fakaagaga he tagata. Ke he taha fahi, ko e mena nakai taumaleku, mauokafua, mo e kitia moli e solu.

Kia kumikumi e tau kupu Tohi Tapu totoku ne mumui mai ki loto he hau ni a Tohi Tapu, ha kua haia e kupu faka-​Heperu neʹphesh i loto ia lautolu takitaha. Kua fakakite fakamitaki mai he tau kupu ia e maeke he solu ke fehagai mo e tupetupe, hagahaga kelea, mo e ke uta kaiha (Teutaronome 24:7; Tau Fakafili 9:17; 1 Samuela 19:11); pipiki ke he tau mena (Iopu 6:7); lili aki e tau lapatoa (Salamo 105:18); kua manako ke kai, mamahi he fakakanopogi, matefua he hoge mo e fia inu; mo e matematekelea mai he gagao lolelole po ke fagumohe he fua mai he maanu. (Teutaronome 12:20; Salamo 35:13; 69:10; 106:15; 107:9; 119:28) Ke he falu he tau kupu, ha ko e solu hau ko koe ni, na ko koe ni a ia, kua maeke ai ke logona hifo he solu hau ha mena ka hoko ki a koe.b

Kua pehe kia, mogoia, kua maeke moli e solu ke mate? E. Mamao mai he nakai maeke ke mate, kua vagahau mai e tau Tohiaga Tapu Heperu hagaao ke he tau solu tagata ke “vevehe kehe,” po ke tamate, he taute mena hehe, kua keli ti mate, kelipopo, fakaotioti, mo e hehe fakavalavala. (Esoto 31:14; Teutaronome 19:6; 22:26; Salamo 7:2) “Ko e [“solu,” NW] kua hala to mate a ia,” he talahau he Esekielu 18:4. Kua kitia maali ai, ko e mate ko e fakahikuaga ni a ia he tau solu tagata, ha kua hala oti kana a tautolu. (Salamo 51:5) Ko e tagata fakamua aki, ko Atamu, kua tala age ki ai ko e fakahala he hala ko e mate​—nakai ke hiki atu ke he kavi fakaagaga mo e nakai maeke ke mate. (Kenese 2:17) Mo e he magaaho ne hala ai a ia, ne totou ai e fakahalaaga: “Ha ko e efuefu ni a koe, to liu foki a koe ke he efuefu.” (Kenese 3:19) Ti he magaaho ne mamate ai a Atamu mo Eva, kua eke ni a laua ke tuga e mena ne hagaao e Tohi Tapu ki ai ko e “tau solu mamate.”​—Numera 5:2; 6:6; NW.

Ko e mena a ia ne talahau mai ai he The Encyclopedia Americana ke he solu i loto he tau Tohiaga Tapu Heperu: “Ko e manatu he Maveheaga Tuai hagaao ke he tagata ko e he fakalatahaaga, nakai ko e fefakalatahaaki he solu mo e tino.” Kua lafi mai foki: “Ko e kupu nefesh . . . kua nakai ke maama ke gahua kehe mai he tino.”

Ti, ko e heigoa mogoia e mate ne talitonu e tau Iutaia tua fakamoli ki ai? Ke fakamukamuka, na talitonu a lautolu ko e mate nakai ko e moui. Kua tala mai he Salamo 146:4 e tau mena ne tutupu he magaaho ne toka he agaga, po ke moui malolo e tino he tagata: “Kua fina atu hana agaga, kua liu a ia ke he kelekele ne eke aki a ia, ko e aho ia ni kua mate ai hana tau manatu.”c Ti pihia foki, ne tohia he Patuiki ko Solomona ko lautolu ne mamate kua “nakai iloa e lautolu ha mena.”​—Fakamatalaaga 9:5.

Ko e ha, mogoia, ne tokologa ai e tau Iutaia tuga e tau Matakau Makutu Lahi i Masada, ne lahi e tua ke he solu nakai maeke ke mate?

Ko e Fakaohoohoaga Faka-Heleni

Na moua he tau Iutaia e manatu nei, nakai mai he Tohi Tapu, ka e mai he tau Heleni. He vahaloto he senetenari ke fitu aki mo e ke lima aki F.V.N., kua tuga e hu mai e manatu ia he tau mena galo fakalotu Heleni ke he tau pulotu Heleni. Ko e manatu ke he mole e mate ka moua he tau solu kelea e uhu he fakahala, ko e mena kua leva tuai e taofi ki ai, mo e kua fakatu ai e manatu ia mo e fakalaulahi atu. Kua nakai fai fakahikuaga e tau fetokoaki he tau tagata kumi pulotu ke he tonuhia he moliaga he solu. Ne talahau e Homer kua hola kehe e solu he magaaho he mate, ti taute ai e leo, gugu, kiokio, mo e kalikali. Ka e pehe a Epicurus kua ha ha he solu e tino ti kua, haia ni, ko e tama tino tote.d

Ka e liga ko ia ne lalago lahi atu ke he solu nakai maeke ke mate ko e tagata Heleni kumi pulotu ko Plato, he senetenari ke fa aki F.V.N. Ko e hana a fakamaamaaga ke he mate he hana faiaoga, ko Socrates, kua fakakite ai e taofiaga tuga lahi ha lautolu he tau Matakau Makutu Lahi ha Masada he tau senetenari fakamui. Tuga ne talahau he tagata fakaako ko Oscar Cull­mann, “Kua fakakite mai e Plato ki a tautolu e puhala ne hoko e mate ki a Socrates ke he mafola mo e milino katoatoa. Ko e mate ha Socrates ko e mate fulufuluola. Nakai fai mena ne kitia he mena nei ke matakutakuina ke he mate. Nakai fakaai a Socrates ke matakutaku ke he mate, ha ko e mena fakatokanoa moli a tautolu mai he tino. . . . Ko e mate ko e kapitiga lahi he solu. Kua pihia e fakaakoaga hana; ti, ke he lauiaaga homo ue atu mo e hana a fakaakoaga, ne mate a ia.”

Kua kitia moli ai he magahala he vaha he tau Maccabees, he senetenari ke ua aki ato fai Keriso, ne kamata ai e tau Iutaia ke kukumau e fakaakoaga nei mai he tau Heleni. He senetenari fakamua aki V.N., ne tala mai e Josephus ki a tautolu ko e tau Farasaio mo e tau Esene​—tau matakau lotu malolo ha Iuta—​kua hiki e fakaakoaga nei. Ko e falu kupu ne liga fafati he magaaho ia kua fakakite mai e taofiaga taha ia ni.

Ka e kua, mogoia, a Iesu Keriso? Na fakaako pihia nakai e ia mo e hana a tau tutaki e manatu nei mai he lotu Heleni?

Ko e Kitekiteaga he Tau Kerisiano Fakamua ke he Solu

Ne nakai kitekite e tau Kerisiano he senetenari fakamua aki ke he solu ke tuga he tau Heleni. Manamanatu atu, ke fakatai ki ai, e mate he kapitiga ha Iesu ko Lasaro. Kaeke ke ha ha ia Lasaro e solu nakai maeke ke mate ne hola kehe ti ata noa ai mo e fiafia, he magaaho he mate, nakai kia to kehe lahi e totou he fakamauaga ia Ioane veveheaga 11? Moli na talahau e Iesu e mena ia ke he hana tau tutaki kaeke ke moui mo e malolo mo e fai iloaaga a Lasaro i luga he lagi; ka e kehe ni, ne fakalea e ia e tau Tohiaga Tapu Heperu mo e tala age ki a lautolu ko e mohe a Lasaro, kua mohepopo. (Ioa 11 Kupu 11) Moli na fiafia foki a Iesu kaeke kua olioli e kapitiga hana ke he kitiaaga fou homo ue atu; ka e kehe ni, ne kitia e tautolu a ia ne tagi i mua he tau tagata ha ko e mate nei. (Ioa 11 Kupu 35) Kua moli ni, kaeke haia e solu ha Lasaro i luga he lagi, ne putoia ke he fiafiaaga he nakai maeke ke mate, to nakai mahani kelea a Iesu ke hea a ia ke liu mai ke moui ke he falu he tau tau gaogao i loto he “fale puipui” he tino nakai mitaki katoatoa mo e tau tagata gagao mo e hane fa e mamate.

Na liu mai kia a Lasaro he mate mo e tau talahauaga olioli he hana tokanoaaga mitaki lahi mai he tino tagata he tau aho ne fa mo peresona fakaagaga? Nakai, nakai pihia a ia. To talahau mai ai e lautolu ne talitonu ke he solu nakai maeke ke mate ko e pihia e mena ia ha ko e mena kua kitia he tagata kua ofoofogia ma e ha kupu. Ka kua kaumahala e talahauaga ia ke tu; ha ko e, nakai kia maeke agaia ia Lasaro ke tala age e mena ia ke he tau fakahele hana​—ko e mena kitia e ia kua mua atu e mitaki ke fakamaama? Ka e kehe ni, nakai talahau e Lasaro ha mena hagaao ke he ha mena kitia ne hoko ki a ia he magaaho he mate. Manamanatu ki ai​—ko e fakakononu ke he matapatu tala taha ko e onoonoaga ne mua e tuaha he tagata ki ai mai he falu: ko e tuga e heigoa e mate! Taha ni e puhala kua maeke ke fakamaama aki e fakakononu ia. Nukua nakai fai mena foki ke talahau. Ko lautolu ne mamate kua momohe, kua momohepopo ai.

Ti, kua fakakite mai kia he Tohi Tapu e mate mo kapitiga he solu, ko e puhala he aga fakalotu he vahaloto he tau tutuaga he moui? Nakai! Ke he tau Kerisiano moli tuga e aposetolo ko Paulo, nakai ko e kapitiga e mate; ko e mena ia ko e “fi fakamui.” (1 Korinito 15:26) Na kitia he tau Kerisiano e mate, nakai ko e mena pauaki, ka e ko e mena muitui he kelea, nakai ko e mena pauaki, ha ko e fua mai a ia he hala mo e totoko ke he Atua. (Roma 5:12; 6:23) Kua nakai lagataha ke eke mo vala he finagalo fakamua he Atua ma e tau tagata.

Pete ni ia, nakai noa e tau Kerisiano moli mo e amaamanakiaga ka hoko atu ke he mate he solu. Ko e liu tu mai ha Lasaro ko e taha mai he tau fakamauaga loga he Tohi Tapu ne fakakite fakamatafeiga mai ki a tautolu e amaamanakiaga moli faka-Tohiaga Tapu ma e tau solu mamate​—ko e liu tu mai. Na fakaako mai he Tohi Tapu hagaao ke he ua e faga kehekehe he liu tu mai. Ma e tokologa he tau tagata ne fa e momohe he tukuaga, pete he tututonu po ke hepehepe, kua ha ha i ai e amaamanakiaga ke liu tu mai ke he moui tukumalagi ke he Parataiso hinei he lalolagi. (Luka 23:43, NW; Ioane 5:28, 29; Gahua 24:15) Ma e matakau tote ne hagaao a Iesu ki ai ko e hana a “fuifui mamoe gahoa,” kua ha ha i ai e liu tu mai ke he moui nakai maeke ke mate ko e tau mena momoui fakaagaga he lagi. Ko lautolu nei, fakalataha mo e tau aposetolo he Keriso, ka pule mo Keriso Iesu ki luga he tau tagata mo e liuaki a lautolu ke he mitaki katoatoa.​—Luka 12:32; 1 Korinito 15:53, 54; Fakakiteaga 20:6.

Ko e ha, mogoia, kua kitia ai e tautolu e tau fakaakoaga he tau lotu Kerisitenitome, nakai ke he liu tu mai, ka e ke he solu tagata ne nakai maeke ke mate? Kikite atu ke he tali ne foaki mai he tagata fakaako fakalotu ko Werner Jaeger i loto he The Harvard Theological Review he 1959 i tuai: “Ko e fakamoliaga ne mua atu e aoga he fakamauaga tuai he fakaakoaga Kerisiano ko e matua tane he fakaakoaga fakalotu Kerisiano, ko Origen, ko ia ko e tagata kumi pulotu faka-Plato he aoga i Alexandria. Ne fakalaulahi atu e ia e tau fakaakoaga oti kana ke he solu, ko e mena ne moua e ia ia Plato.” Ti kua taute he tau lotu e mena taha ia ni ne taute he tau Iutaia he tau senetenari fakamua aki! Nukua tiaki e lautolu e tau fakaakoaga faka-Tohi Tapu ka e fiafia ke he tau pulotu faka-Heleni.

Ko e Tau Kamataaga Moli he Fakaakoaga

Mogonei kua huhu mai e falu, ke lalago atu ke he fakaakoaga ke he solu nakai maeke ke mate, Ko e ha ne fakaako ai e fakaakoaga taha ia ni, ke he taha puhala mo e taha foki, he loga he tau lotu he lalolagi? Kua foaki mai he tau Tohiaga Tapu e kakano mahinohino ke he kakano ne taofi mau ai e fakaakoaga nei he tau maaga fakalotu he lalolagi nei.

Na tala mai he Tohi Tapu ki a tautolu ko e “lalolagi oti ha he pule hana kua mahani kelea” mo e kua tuhi fakahako atu ki a Satani ko e “iki he lalolagi nai.” (1 Ioane 5:19; Ioane 12:31) Kua kitia mitaki ai, kua nakai tokanoa mai e tau lotu he lalolagi he fakaohoohoaga ha Satani. Ke he taha fahi, kua lahi mahaki e lagomatai ha lautolu ke he lekua mo e matematekelea he lalolagi he vaha nei. Mo e he talahauaga ke he solu, ko e tuga ni kua lahi e fakaata fakamitaki e lautolu e manatu ha Satani. He taute fefe?

Kia manatu e pikopiko fakamua aki kua talahau. Ne tala age e Atua ki a Atamu mo Eva to fua mai e mate kaeke ke hala a laua ki a ia. Ka e talahau e Satani ki a Eva: “Nakai ni mamate a mua.” (Kenese 3:4) Ka e moli ni, kua mamate ai a Atamu mo Eva; ati liliu ai a laua ke he efuefu tuga ni he vagahau he Atua. Ko Satani, ko e “matua he pikopiko,” ne nakai mahalo ke tiaki e hana a fakavaiaga fakamua aki. (Ioane 8:44) I loto he tau lotu loga ne o kehe mai he fakaakoaga he Tohi Tapu po ke holia katoatoa ai, ko e manatu tatai ia agaia ne fa e utafano: ‘Kua moli ai to nakai mate a koe. Liga ke galo e tino hau, ka e to fakatumau e hau a solu ke moui tukulagi​—ke tuga e Atua!’ Kua fuluola ha, na tala age foki a Satani ki a Eva to eke a ia ke ‘tuga e Atua’!​—Kenese 3:5.

Ko e mitaki lahi ha ia ke moua e amaamanakiaga ne fakave, nakai ke he tau pikopiko po ke tau pulotu he tagata, ka e ke he kupu moli. Ko e mitaki lahi ha ia ke mauokafua ko e ha tautolu a tau fakahele kua momohepopo i loto he tukuaga mai he tupetupe hagaao ke he o ki fe e tau solu nakai maeke ke mamate! Ko e mohe nei hana ne mate kua nakai lata ke fakamatakutaku po ke ke fakaagitau aki a tautolu. Ke he taha kakano, ko e tuga e onoono a tautolu ki a lautolu ne mamate ke ha ha ai he kavi okioki haohao mitaki. Ko e ha ne haohao mitaki ai? Ha kua talahau fakamoli mai e Tohi Tapu ki a tautolu ko lautolu ne mamate ko lautolu ia ne ofania e Iehova kua momoui ai ke he kakano uho. (Luka 20:38) Kua momoui a lautolu i loto he hana a manamanatuaga. Ko e manatu mafanafana hokulo a ia ha kua nakai fai kaupaaga hana a manamanatuaga. Kua lahi e manako hana ke fakamoui mai e tau afe he tau miliona he tau tagata fakahelehele mo e age ki a lautolu e magaaho ke moui tukulagi he lalolagi parataiso.​—Fakatatai Iopu 14:14, 15.

To hoko mai e aho lilifu ue atu he liu tu mai, ti pihia foki e tau maveheaga ha Iehova kua lata ke fakamoli. (Isaia 55:10, 11) Manamanatu atu la ke he perofetaaga ia ka hoko mai: “Ka e momoui a lautolu ne mamate, to fakatu hake foki e tau tino ha lautolu. Ko lautolu ne momohe he kelekele to aala mo e kalaga he fiafia; ha ko e ha lautolu a hahau ko e hahau he lamepa kikila, mo e ko e lalolagi to tamai a lautolu ne leva e mamate ke liu fanau foki.” (Isaia 26:19, The New English Bible) Ti ko lautolu ne mamate, ko lautolu ia ne momohe i loto he tukuaga kua haohao mitaki tuga e mukemuke i loto he manava he matua fifine. Nakai leva to “fanau” mai a lautolu, liuaki mai ke he moui he lalolagi parataiso!

Fai amaamanakiaga foki nakai ke mua e mitaki mai he mena ia?

[Tau Matahui Tala]

[Fakatino he lau 7]

Kua talitonu e tau Matakau Makutu Lahi Iutaia i Masada to fakatokanoa he mate e tau solu ha lautolu