Moui ke he Fakatufono he Keriso

“Kia fetogiaki a mutolu ke he ha mutolu a tau kavega ke fua, mo e fakamoli pihia e fakatufono a Keriso.”​—KALATIA 6:2.

1. Ko e ha kua liga ai ke talahau ko e fakatufono he Keriso ko e malolo mua atu ma e mitaki he vaha nei?

I RUANATA, ko e Tau Fakamoli Hutu mo e Tutsi a Iehova kua taufetului ha lautolu a tau momoui ke fepuipuiaki mai he tau keliaga fakamatakau ne nakai la leva ia e tupu ke he motu. Ko e Tau Fakamoli a Iehova i Kobe, Sapani, ne galo e tau tagata he magafaoa he mafuike kelea lahi ne malipilipi ha ko e ha lautolu a galo. Ka e, gahua fakamafiti a lautolu ke fakahao ai e falu. E, ko e tau fakafifitakiaga mafanatia mai he lalolagi katoa kua fakatata e gahua lahi he fakatufono he Keriso he vaha nei. Ko e fakaohoohoaga mua ue atu ma e mitaki.

2. Kua galo katoa fefe he Kerisitenitome e matapatu he fakatufono he Keriso, mo e taute fefe e tautolu e fakamoliaga he fakatufono ia?

² Ke he magaaho taha, kua fakamoli ai e perofetaaga he Tohi Tapu hagaao ke he “tau aho fakamui.” Tokologa ne ha ha ai e “mahani Atua” ka e ‘kua tiaki e malolo ne toka ai.’ (2 Timoteo 3:1, 5) Mua atu ke he Kerisitenitome, kua fa taute ai e lotu mo mena kua mahani, nakai mai he loto. Kua pihia ke mena ia ha kua lahi e uka ke momoui ke he fakatufono he Keriso? Nakai. To nakai mai e Iesu e fakatufono ki a tautolu kua nakai maeke ke muitua. Kua galo katoa he Kerisitenitome e matapatu he fakatufono. Kua kaumahala a ia ke omaoma e tau kupu nei he agaga: “Kia fetogiaki a mutolu ke he ha mutolu a tau kavega ke fua, mo e fakamoli pihia e fakatufono a Keriso.” (Kalatia 6:2) Kua “fakamoli pihia e [mautolu e] fakatufono a Keriso” he hahamo e kavega he taha, he nakai fifitaki ai ke he tau Farasaio mo e nakai fakafili tonu he lafi ke he tau kavega he tau matakainaga ha tautolu.

3. (a) Ko e heigoa falu he tau poakiaga ne putoia ke he fakatufono he Keriso? (e) Ko e ha kua hepe ai ke fakaoti aki ko e fakapotopotoaga Kerisiano kua lata ke nakai fai poakiaga kehe ka ko e tau pehiaaga fakatonu he Keriso?

³ Ko e fakatufono he Keriso kua putoia e tau poakiaga oti ha Iesu Keriso​—ke he fakamatala mo e fakaako, tumau ke fakamukamuka mo e fakamea ha tautolu a tau mata, gahua ke fakatumau e mafola mo e katofia ha tautolu, po ke uta kehe e tau mahani kiva mai he fakapotopotoaga. (Mataio 5:27-30; 18:15-17; 28:19, 20; Fakakiteaga 2:14-16) Moli lahi, kua lago ke he tau Kerisiano ke kitekite ke he tau poakiaga oti i loto he Tohi Tapu ne fakahagaao mai ke he tau tutaki ha Keriso. Mo e ha ha i ai foki e falu. Ko e fakatokatokaaga ha Iehova, ti pihia foki e tau fakapotopotoaga takitaha, kua fakatu e tau poakiaga kua lata mo e tau puhala ke maeke ke tokamau e maopoopoaga mitaki. (1 Korinito 14:33, 40) Ko e mena ia, kua nakai maeke e tau Kerisiano ke feleveia fakalataha kaeke ke nakai fai poakiaga a lautolu ke lata mo e magaaho fe, i fe, mo e fefe e puhala ke fakahoko e tau feleveiaaga pihia! (Heperu 10:24, 25) Ko e gahua auloa mo e tau takitakiaga kua mitaki ne kua fakatu ai e lautolu ne kua kotofa pule he fakatokatokaaga kua eke foki ko e vala he fakamoliaga he fakatufono he Keriso.​—Heperu 13:17.

4. Ko e heigoa e fakaohoohoaga malolo i tua he tapuakiaga mea?

⁴ Ti ko e mena ia, kia nakai fakaata he tau Kerisiano moli ha lautolu a tapuakiaga ke eke mo fakatokatoka he tau fakatufono kua nakai fai kakano. Kua nakai fekafekau noa ni a lautolu ki a Iehova kakano kua tala age he taha po ke fakatokatokaaga ki a lautolu ke taute pihia. Ka e, ko e fakaohoohoaga malolo i tua he ha lautolu a tapuakiaga ko e fakaalofa. Ne tohi e Paulo: “Kua omoomoi a mautolu he fakaalofa a Keriso.” (2 Korinito 5:14) Kua poaki e Iesu ke he hana a tau tutaki ke fefakaalofaaki. (Ioane 15:12, 13) Ko e fakaalofa ne poa he tagata ko e fakaveaga he fakatufono he Keriso, mo e kua omoomoi po ke fakaohooho e tau Kerisiano moli he tau matakavi oti, ki loto he magafaoa mo e ki loto he fakapotopotoaga. O mai la tautolu ke kitia ko e fefe.

Ki Loto he Magafaoa

5. (a) Fakamoli fefe he tau mamatua e fakatufono he Keriso he kaina? (e) Ko e heigoa e manako he fanau mai he tau mamatua, mo e ko e heigoa e falu he tau kamatamata kua lata he tau mamatua ke fahia mai ai ke maeke ke foaki ai?

⁵ Ne tohi he aposetolo ko Paulo: “Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna.” (Efeso 5:25) Ka ke fifitaki e tane ke he Keriso mo e taute e hoana hana aki e fakaalofa mo e maamaaga, kua fakamoli e ia e mena aoga lahi he fakatufono he Keriso. Lafi ki ai, kua fakakite katoatoa e Iesu e hofihofi noa ke he tau fanau ikiiki, he nikiti a lautolu he hana a tau lima, ti fakalago e ia hana tau lima ki luga ia lautolu, mo e fakamonuina ai a lautolu. (Mareko 10:16) Ko e tau mamatua ne fakamoli e fakatufono he Keriso kua fakakite foki e hofihofi noa ma e tau fanau ha lautolu. Moli, kua ha ha ai e tau mamatua ne moua e paleko ke fifitaki e fakafifitakiaga a Iesu ke he mena nei. Ko e falu ne nakai pihia pauaki ai. Tau mamatua, kia nakai toka e tau manamanatuaga pihia ke taofi mai a koe mai he fakakite ke he fanau hau e fakaalofa ne logona e koe ma lautolu! Kua nakai lahi ki a koe ke iloa kua fakaalofa a koe ke he fanau hau. Kua lata ke iloa foki e lautolu. Ti to nakai iloa e lautolu ato moua e koe e puhala ke fakakite e fakaalofa hau.​—Fakatatai Mareko 1:11.

6. (a) Kua lata nakai e tau fanau ke fai poakiaga fakamatua, mo e ko e ha ne tali pihia ai a koe? (e) Ko e heigoa e kakano mua ue atu ma e tau poakiaga he magafaoa ne kua lata ke maama he tau fanau? (i) Ko e heigoa e tau hagahaga kelea ke kalo kehe mai he magaaho ka malolo e fakatufono he Keriso i loto he magafaoa?

⁶ Ke he magaaho taha, kua lata e tau fanau ke fai fakakaupaaga, ti kua kakano ai kua lata e tau mamatua ha lautolu ke fakatoka e tau poakiaga mo e falu magaaaho pehi e tau poakiaga nei ke he akonakiaga. (Heperu 12:7, 9, 11) Pihia foki, kua lata e tau fanau ke lagomatai fakahaga ke kitia e matapatu kakano ma e tau poakiaga nei: kua fakaalofa ha lautolu a tau mamatua ki a lautolu. Mo e kua lata ia lautolu ke ako ko e fakaalofa ko e kakano mua ue atu ma lautolu ke omaoma ha lautolu a tau mamatua. (Efeso 6:1; Kolose 3:20; 1 Ioane 5:3) Ko e foliaga he matua manamanatu ke fakaako e fanau ikiiki ke fakaaoga ha lautolu a “manamanatuaga iloilo” ti ke he magaaho fakamui to taute ni e lautolu e tau fifiliaga mitaki ma lautolu. (Roma 12:1, NW; fakatatai 1 Korinito 13:11.) Ke he taha fahi, kua lata e tau poakiaga ke nakai loga lahi po ke vale e akonakiaga. Ne talahau a Paulo: “Ko mutolu e tau matua tane, aua neke fakalagalaga e tau fanau ha mutolu, neke fakalolelole e tau loto ha lautolu.” (Kolose 3:21; Efeso 6:4) Ka malolo e fakatufono he Keriso he magafaoa, kua nakai ha ha ai ha ita ne nakai maeke ke taofi po ke talahauaga fakamamahi ka foaki e akonakiaga. Ke he kaina pihia, to logona he fanau e haohao mitaki mo e ati hake, nakai fakakavega mo e fakalolelole.​—Fakatatai Salamo 36:7.

7. Ko e heigoa e tau puhala kua liga foaki he tau kaina Peteli e fakafifitakiaga he magaaho ka fakatoka ai e tau poakiaga i loto he kaina?

⁷ Ko e falu ne ahi atu e tau kaina Peteli ke he lalolagi katoa kua talahau ai ko e tau fakafifitakiaga mitaki pihia he lagotatai ke he puhala he tau poakiaga ma e magafaoa. Pete kua ha ha ai e tau tagata lalahi, ko e tau fakatokatokaaga pihia kua gahuahua ai tuga ni e tau magafaoa.a Ko e fakagahuahuaaga he Peteli kua uka mo e kua lata ai ke moua loga he tau poakiaga​—loga lahi atu ke he magafaoa moli. Pete ia, kua takitaki fakamakutu e tau motua he tau kaina Peteli, tau ofisa, mo e tau gahuaaga tohi he fakagahua e fakatufono he Keriso. Kua kitekite a lautolu ki ai ko e ha lautolu a kotofaaga nakai ni ke fakatokatoka e gahua ka e pihia foki ke fakatolomaki atu fakaagaga mo e “fiafia ki a Iehova” i loto he tau tagata gahua fakalataha. (Nehemia 8:10) Ko e mena ia, kua fakamakutu a lautolu ke taute e tau mena ke he puhala kua mitaki mo e ati hake mo e lali ke he mahani mitaki. (Efeso 4:31, 32) Ati ko e mena ia ni ne talahaua ai e tau magafaoa Peteli ma e ha lautolu a agaga olioli!

Ki Loto he Fakapotopotoaga

8. (a) Ko e heigoa e foliaga tumau ha tautolu i loto he fakapotopotoaga? (e) Ko e heigoa e tau tutuaga ne kua huhu ai he falu ki ai po ke lali ke taute e tau poakiaga?

⁸ I loto he fakapotopotoaga kua tatai ia mo e ha tautolu a foliaga ke ati hake e taha ke he aga he fakaalofa. (1 Tesalonia 5:11) Ti kua lata e tau Kerisiano oti ke fakaeneene ke nakai lafi ki luga e tau kavega he falu ne kua lata ni ki a lautolu ke taute ha lautolu a tau manatu ni ke he tau mena he fifiliaga fakatagata. Ke he tau magaaho, kua tohi ai e falu ke he Sosaiete he Kolo Toko mo e huhu ai ke he tau poakiaga ke he tau mena tuga e kitekiteaga kua lata ia lautolu ke ha ha ai ke he tau ata kifaga pauaki, tau tohi, ti pihia foki e tau mena pele. Ka e, kua nakai foaki age ke he Sosaiete e pule ke kumikumi e tau mena pihia mo e ke taute e tau fakafiliaga ki ai. Ke he laulahi he tau mena, ko e tau mena hanei kua lata ke fifili ni he tagata po ke ulu he magafaoa, fakave ai he hana a fakaalofa he tau matapatu fakaakoaga ke he Tohi Tapu. Kua eke ai e falu ke fuluhi e tau lagomataiaga mo e tau takitakiaga he Sosaiete ke he tau poakiaga. Ma e fakatai, ia Mati 15, 1996, fufuta he The Watchtower, kua ha ha ai e vala tala ne fakamalolo e tau motua ke taute e tau ahiahi leveki tumau ke he tau tagata he fakapotopotoaga. Ko e kakano kia ke fakatu e tau poakiaga? Nakai. Pete ni ko lautolu kua maeke ke muitua e tau lagomataiaga ne moua mai e tau lagomataiaga loga, ka e nakai ha ha ai he falu motua e tuaga ke taute pihia. Tatai ki ai, ko e vala tala “Tau Huhu he Tau Tagata Totou” ia Aperila 1, 1995, he fufuta he The Watchtower, kua puipui mai he uta kehe e lilifu he magaaho he papatisoaga he molea e to muatua, tuga e fiafiaaga miha po ke tau fakamanatuaga kua kautu. Ko e falu kua uta fakamamafa ai e fakatonutonuaga nei, ke hokotia foki ke taute e poakiaga he fakafano atu e lau pepa fakamalolo ke he magaaho nei kua hehe!

9. Ko e ha kua aoga ai ke tiaki e tautolu e tuhituhi lahi mo e fakafili ke he taha?

⁹ Manamanatu foki, kaeke kua kautu e “fakatufono kua katoatoa e mitaki” ke he vahaloto ha tautolu, kua lata ke talia e tautolu nakai tatai oti e tau manamanatuaga he tau Kerisiano. (Iakopo 1:25) Kua lata kia ke tupetupe a tautolu kaeke ke ha ha he tau tagata takitokotaha e tau fifiliaga ne nakai moumou e tau matapatu fakaakoaga faka-Tohiaga Tapu? Nakai. To tupu ai e feveheveheaki ka taute e tautolu pihia. (1 Korinito 1:10) He magaaho ne hataki e Paulo a tautolu ke nakai fakafili e Kerisiano gahua fakalataha, he pehe: “Kua tumau a ia po ke veli ke he hana ni a iki; ka e tumau ni a ia, ha kua maeke ke he Atua ke fakatumau a ia.” (Roma 14:4) Kua fetului a tautolu mo e nakai fakafiafia e Atua ka vagahau kelea a tautolu ke he taha hagaao ke he tau mena ne kua lata ke toka ni ke he manamanatuaga he tagata.​—Iakopo 4:10-12.

10. Ko hai kua kotofa ke leveki e fakapotopotoaga, mo e lagomatai fefe a lautolu?

¹⁰ Kia manatu foki e tautolu, kua kotofa e tau motua ke leveki e fuifui mamoe he Atua. (Gahua 20:28) Ko lautolu haia ke lagomatai. Kua lata ia tautolu ke logona e tokanoaaga ke o atu ki a lautolu ma e hatakiaga, ha ko lautolu ko e tau tagata fakaako he Tohi Tapu mo e kua mahani mo e tau mena kua fa fakatutala ke he tohi he Sosaiete he Kolo Toko. He magaaho ka kitia he tau motua e mahani ne kua hagahaga ke takitaki ke moumou e tau matapatu fakaakoaga faka-Tohiaga Tapu, kua foaki e lautolu e fakatonutonuaga kua lata mo e nakai matakutaku. (Kalatia 6:1) Ko e tau tagata he fakapotopotoaga kua muitua ke he fakatufono he Keriso he gahua auloa mo e tau leveki mamoe fakahele nei, ne takitaki ai ke he vahaloto ha lautolu.​—Heperu 13:7.

Fakagahua he Tau Motua e Fakatufono he Keriso

11. Fakagahua fefe he tau motua e fakatufono he Keriso i loto he fakapotopotoaga?

¹¹ Kua mautali e tau motua ke fakamoli e fakatufono he Keriso i loto he fakapotopotoaga. Kua takitaki e lautolu e fakamatalaaga he tala mitaki, fakaako mai he Tohi Tapu ke maeke ke hokotia ke he tau loto mo e, ko e tau leveki mamoe fakaalofa mo e totonu, kua vagahau ai “kia lautolu kua lolelole.” (1 Tesalonia 5:14) Kua tiaki e lautolu e tau aga nakai Kerisiano ne kitia ai ke he loga he tau lotu a Kerisitenitome. Moli, kua tu tokolalo lahi e lalolagi nei, mo e tuga a Paulo, kua logona he tau motua e fakaatukehe ma e fuifui mamoe; ka e fakatumau a lautolu ke lagotatai he taute a lautolu ke he tau tupetupeaga pihia.​—2 Korinito 11:28.

12. Ka fina atu e Kerisiano ke kumi lagomatai ke he motua, to liga tali atu fefe he motua?

¹² Ma e fakatai, kua manako e Kerisiano ke vagahau ke he motua hagaao ke he taha mena aoga ne nakai talahau fakatonu mai he falu fakamoliaga faka-Tohiaga Tapu po ke kua manako ma e tau matapatu fakaakoaga Kerisiano kua kehe e lagotataiaga. Liga kua foaki age ki a ia e tolomakiaga he gahuaaga ne ha ha ai e totogi lahi ka e lahi foki e matagahua. Po ke matua tane nakai tua he Kerisiano tote ne kua liga ke taute e tau pehiaaga ke he hana a tama tane ka lauia ai e fekafekauaga hana. Ke he tau tutuaga pihia kua lata e motua ke fakamamao mai he foaki e manatu fakatagata. Ka e, ke liga ke hafagi e ia e Tohi Tapu mo e lagomatai a ia ke fakakakano e tau matapatu fakaakoaga kua lata tonu. Kua liga ke fakaaoga e ia e Watch Tower Publications Index, kaeke kua fai, ke moua e talahauaga he “fekafekau fakamoli mo e loto matala” ke he tala i loto he tau lau tohi he Kolo Toko mo e falu he tau tohi foki. (Mataio 24:45) Ka e kua ka taute he Kerisiano e fifiliaga he magaaho fakamui ne nakai hagahaga pulotu ke he motua? Kaeke kua nakai moumou fakatonu he fifiliaga e tau matapatu fakaakoaga po ke tau fakatufono mai he Tohi Tapu, to moua he Kerisiano kua mailoga he motua e tonu he tagata ke taute e fifiliaga pihia, he iloa to “igatia e tagata mo e fua hana ni a kavega.” Kua lata e Kerisiano ke manatu, pete ia, “ko e mena kua gana he tagata, ko e mena ia ni ke helehele mai ai e ia.”​—Kalatia 6:5, 7.

13. He nakai foaki e tau tali fakatonu ke he tau huhu po ke foaki e tau manatu ha lautolu ni, ko e ha kua taute ai e tau motua ke lagomatai e falu ke fakakakano ke he tau mena?

¹³ Ko e ha ne taute pihia ai he motua kua mahani? Kua ua ai e kakano ne moua. Fakamua, ne tala age a Paulo ke he taha fakapotopotoaga ko ia nakai ‘pule a ia ke he ha lautolu a tua.’ (2 Korinito 1:24) Ko e motua, he lagomatai hana a matakainaga ke fakakakano mai he tau Tohiaga Tapu mo e taute ai ni e ia e fifiliaga kua tonu, kua fifitaki ai ke he aga a Paulo. Kua mailoga e ia kua ha ha ai e tau kaupaaga ke he hana a pule, tuga ni ne mailoga e Iesu kua ha ha ai e tau kaupaaga ke he hana pule. (Luka 12:13, 14; Iuta 9) Ke he magaaho taha, kua mautali e tau motua ke foaki e lagomataiaga tutonu, mo e fakatonutonuaga faka-Tohiaga Tapu kua malolo ke he mena kua lata ai. Ke uaaki, kua fakamahani ai e ia hana a Kerisiano gahua fakalataha. Ne talahau ai he aposetolo ko Paulo: “Ka e ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.” (Heperu 5:14) Ti, ko e tupu atu ke he motua, kua lata ia tautolu ke fakaaoga ni ha tautolu a tau manamanatuaga iloilo, he nakai falanaki tumau ke he taha tagata ke foaki mai ki a tautolu e tau tali. He fakakite he motua e puhala manamanatu ke he tau Tohiaga Tapu ke he hana a matakainaga Kerisiano, ke he puhala nei kua lagomatai a ia ke tolomaki.

14. Maeke fefe ia lautolu ne momotua ke fakakite kua falanaki a lautolu ki a Iehova?

¹⁴ Kua maeke ke ha ha ia tautolu e tua ne foaki mai he Atua ko Iehova he hana a agaga tapu ka fakaohooho e tau loto he tau tagata tapuaki moli. Ti, ko e tau Kerisiano momotua kua ole ke he tau loto he ha lautolu a tau matakainaga, ole fakamakamaka ai a lautolu, tuga ne taute he aposetolo ko Paulo. (2 Korinito 8:8; 10:1; Filemoni 8, 9) Kua iloa ai e Paulo kua mua atu ai ki a lautolu ne nakai tututonu, nakai ko lautolu ne tututonu, ne kua lata ma e tau fakatufono fakamatafeiga ke taofi mau a lautolu ke he puhala tonu. (1 Timoteo 1:9) Ne talahau e ia, nakai ­tuaha po ke nakai falanaki, ka e tua ke he hana a tau matakainaga. Ke he taha fakapotopotoaga ne tohi e ia: “Kua tua a mautolu ke he Iki kia mutolu.” (2 Tesalonia 3:4) Ko e tua, falanaki, mo e mauokafua ha Paulo kua moli lahi ke omoi e tau Kerisiano ia. Ko e tau motua mo e tau leveki o fano he vaha nei kua tatai ai e tau foliaga. Kua fakamalolo ha e tau tagata tane tua fakamoli nei, he leveki fakaalofa e lautolu e fuifui he Atua!​—Isaia 32:1, 2; 1 Peteru 5:1-3.

Moui ke he Fakatufono he Keriso

15. Ko e heigoa e falu he tau huhu kua lata ke huhu e tautolu ki a tautolu ni ke kitia kua fakaaoga nakai e tautolu e fakatufono he Keriso he ha tautolu a fakafetuiaga mo e tau matakainaga ha tautolu?

¹⁵ Kua lata oti a tautolu ke kumikumi tumau hifo ki a tautolu ni ke kitia ko e moui nakai mo e fakatolomaki ke he fakatufono he Keriso. (2 Korinito 13:5) Moli, maeke ke aoga oti ki a tautolu he huhu: ‘Ati hake nakai au po ke tuhituhi? Lagotatai au po ke to lahi? Fakakite nakai e au e manamanatuaga ma e falu po ke tala age e au e tau tonu oti haku?’ Kua nakai lali e Kerisiano ke talahau oti e tau lakaaga ke he hana a matakainaga kua lata po ke nakai lata ke taute e tau mena ne nakai talahau fakamahino mai he Tohi Tapu.​—Roma 12:1; 1 Korinito 4:6.

16. Maeke fefe a tautolu ke lagomatai a lautolu ne ha ha ai e tau kitekiteaga kelea ki a lautolu ni, ti fakamoli e mena aoga he fakatufono he Keriso?

¹⁶ Ke he tau aho fakamui nei, kua aoga lahi ma tautolu ke kumi puhala ke fefakamaloloaki. (Heperu 10:24, 25; fakatatai Mataio 7:1-5.) Kaeke ke onoono a tautolu ke he tau matakainaga tane mo e fifine ha tautolu, nakai kia mua atu e tau mahani mitaki ha lautolu ki a tautolu nakai ko e ha lautolu a tau lolelole? Kua uho oti a tautolu ki a Iehova. Momoko ai, nakai logona pihia oti e tau tagata, ti pihia foki ki a lautolu ni. Tokologa ne hagahaga ni ke kitia e tau mena hehe fakatagata ha lautolu mo e tau nakai mitaki katoatoa. Ke fakamalolo a lautolu pihia​—mo e falu—​nakai kia lali a tautolu ke tutala ke he taha e tagata po ke tokoua ke he tau feleveiaaga takitaha, fakailoa ki a lautolu ko e ha ne uho ai ki a tautolu ha lautolu a fakalatahaaga mo e aoga he foakiaga ne taute e lautolu ke he fakapotopotoaga? Ko e olioli ha ia ke totoka hifo e kavega ha lautolu ke he puhala nei mo e fakamoli ai e fakatufono he Keriso.​—Kalatia 6:2.

Kua Gahuahua Ai e Fakatufono he Keriso!

17. Ko e heigoa e tau puhala kehekehe ne kitia e koe ke he fakatufono he Keriso kua gahuahua i loto he fakapotopotoaga hau?

¹⁷ Kua gahuahua ai e fakatufono he Keriso ke he fakapotopotoaga Kerisiano. Kua kitia ai e tautolu ke he tau aho oti​—he magaaho ka fakamakai ai e Tau Fakamoli gahua fakalataha ke he fakamatalaaga he tala mitaki, ka fakamafana mo e fakamalolo a lautolu ko e taha ke he taha, he magaaho ka fetului a lautolu ke fekafekau ki a Iehova ki lalo hifo he tau mena vihi kua mua atu e uka, he magaaho ka lali e tau mamatua ke feaki e tau fanau ha lautolu ke fakaalofa ki a Iehova mo e tau loto olioli, he magaaho ka fakaako he tau leveki e Kupu he Atua mo e fakaalofa mo e mafanatia, ati hake e fuifui mamoe ke fakamakamaka fakalahi ke fekafekau ki a Iehova tukulagi. (Mataio 28:19, 20; 1 Tesalonia 5:11, 14) Kaeke ke tuku e tautolu takitokotaha e fakatufono he Keriso ke gahuahua ke he tau momoui takitaha ha tautolu, ko e olioli ha ia he loto a Iehova! (Tau Fakatai 23:15) Manako a ia ki a lautolu oti ne fakaalofa ke he hana fakatufono ke momoui tukulagi. Ke he Parataiso ne hau, to kitia e tautolu e magaaho ka mitaki katoatoa ai e tau tagata, magaaho ka nakai fai tagata ke moumou e tau fakatufono, mo e magaaho ka mitaki katoatoa e taofiaga ke he tau loto. Ko e palepale mitaki ue atu ha ia he moui ke he fakatufono he Keriso!

[Matahui Tala]

Ko e Heigoa Hau a Manatu?

◻ Ko e ha ne galo katoa ai he Kerisitenitome e matapatu he fakatufono he Keriso?

◻ Tuku fefe e tautolu e fakatufono he Keriso ke gahuahua i loto he magafaoa?

◻ Ke fakagahua e fakatufono he Keriso i loto he fakapotopotoaga, ko e heigoa kua lata ia tautolu ke kalo kehe mai, mo e ko e heigoa kua lata ia tautolu ke taute?

◻ Omaoma fefe e tau motua ke he fakatufono he Keriso ke he tau fehagaiaga ha lautolu mo e fakapotopotoaga?

[Fakatino he lau 31]

Kua manako mua ue atu e tama hau ma e fakaalofa

[Fakatino he lau 32]

Ko e fakamalolo ha ia he tau leveki mamoe ha tautolu!