Fakalataha ke he Fakamafanaaga ne Foaki e Iehova

“Kua tumau foki ha mautolu a tua kia mutolu; ha kua iloa e mautolu, tuga he igatia a mutolu mo e mamahi, to igatia pihia foki mo e fakamafanatia.”​—2 KORINITO 1:7.

1, 2. Ko e heigoa kua moua he tokologa ne kua eke mo tau Kerisiano he vaha nei?

TOKOLOGA he tau tagata totou fou he Ko e Kolo Toko kua lalahi ai mo e nakai fai iloilo ke he kupu moli he Atua. Liga kua moli e mena nei hagaao ki a koe. Kaeke ke pihia, manamanatu la ko e fefe e logonaaga hau he magaaho ne kamata ke mahafagi ai hau a tau mata he maamaaga. Ma e fakatai, he magaaho ne maama fakamua e koe kua nakai fakamatematekelea e tau tagata mamate ka e kua nakai fai logonaaga a lautolu, kua nakai kia totoka e logonaaga hau? Mo e he magaaho ne ako e koe hagaao ke he amaamanakiaga ma lautolu ne mamate, ko e totou piliona ka fakaliu tutu mai ke he moui ke he lalolagi fou he Atua, nakai kia mafanatia a koe?​—Fakamatalaaga 9:5, 10; Ioane 5:28, 29.

² Ka e kua e maveheaga he Atua ke fakaoti e mahani kelea mo e ke fakafou e lalolagi nei ke he parataiso? Ka ako a koe ke he mena nei, nakai kia fakamafana he mena ia a koe mo e fakapuke a koe aki e fakatalitali mo e manako lahi? Fefe hau a logonaaga he ako mua e koe e nakai maeke ke mate ka e ke hao ke he lalolagi Parataiso hane hau? Nakai fakauaua kua fiafia lahi a koe. E, kua eke a koe mo taha ne moua e fekau mafanatia he Atua he magaaho nei ne fa e fakamatala ke he lalolagi katoa he Tau Fakamoli a Iehova.​—Salamo 37:9-11, 29; Ioane 11:26; Fakakiteaga 21:3-5.

3. Ko e ha a lautolu ne fakalataha ke he utaaga he fekau mafanatia he Atua mo e falu kua matematekelea foki?

³ Pete ia, he lali a koe ke talahau e fekau he Tohi Tapu mo e falu, kua eke foki a koe ke mailoga ko e “mena nakai ha he tau tagata oti kana e tua.” (2 Tesalonia 3:2) Liga falu he hau a tau kapitiga tuai kua ekefakakelea a koe ha ko e talahau e tua ke he tau maveheaga he Tohi Tapu. Liga kua matematekelea foki a koe he fakatumau ke fakaako e Tohi Tapu fakalataha mo e Tau Fakamoli a Iehova. Kua liga malolo lahi e totokoaga he kamata a koe ke taute e tau hikihikiaga ke fakalautatai hau a moui mo e tau matapatu fakaakoaga he Tohi Tapu. Kua kamata a koe ke moua e matematekelea ne tamai e Satani mo e hana a lalolagi ki luga ha lautolu ne talia e fakamafanaaga he Atua.

4. Ko e heigoa e tau puhala kehekehe ka liga tali atu he tau tagata fiafia fou ke he matematekelea?

⁴ Momoko ai, kua talahau tuai e Iesu, kua fakatupu he matematekelea e falu ke tupetupe mo e fakaoti ha lautolu a fakalatahaaga mo e fakapotopotoaga Kerisiano. (Mataio 13:5, 6, 20, 21) Kua fakauka e falu ke he matematekelea he tumau ha lautolu a tau manamanatuaga ke he tau maveheaga mafanatia ne fa e ako e lautolu. He magaaho fakamui kua tukulele ha lautolu a tau momoui ki a Iehova mo e papatiso ai ko e tau tutaki he hana a Tama, ko Iesu Keriso. (Mataio 28:19, 20; Mareko 8:34) Moli ai, nakai oti e matematekelea ka papatiso ai e Kerisiano. Ma e fakatai, ko e fakatumau ke mahani fakalatalata kua eke ke taufetului lahi ma e tagata ne taute mahani kelea fakamua. Ko e falu kua fetului mo e totokoaga fakatumau mai he tau tagata he magafaoa ne nakai tua. Ko e heigoa ni e matematekelea, ko lautolu ne tutuli fakamoli e moui he tukuleleaga ke he Atua kua maeke ai ke moli ke he taha e mena. Ke he puhala fakatagata ni, to moua e lautolu e mafanatia mo e lagomatai he Atua.

‘Ko e Atua he Tau Fakamafanaaga Oti’

5. Fakalataha ke he tau kamatamata loga ne mamahi ai a Paulo, ko e heigoa foki ne moua e ia?

⁵ Ko ia ne hokulo e fakaaue ke he fakamafanaaga ne foaki he Atua ko e aposetolo ko Paulo. He mole atu e magaaho kamatamata ne mua atu i Asia mo Maketonia, ne moua e ia e totokaaga lahi he logona kua tali fakamitaki he fakapotopotoaga Korinito e hana a tohi he fakatonutonuaga. Kua omoi he mena nei a ia ke he hana tohi ke ua aki ki a lautolu, ne ha ha ai e fakakiteaga he fakahekeaga kua mui mai: “Kia fakaaue ke he Atua, ko e Matua he Iki ha tautolu ko Iesu Keriso, ko e Matua hana e fakaalofa hofihofi, ko e Atua foki hana e tau fakamafanaaga oti. Ko ia kua fakamafana mai a mautolu ke he ha mautolu a tau matematekelea oti.”​—2 Korinito 1:3, 4.

6. Ko e heigoa ne ako mai e tautolu he tau kupu a Paulo he 2 Korinito 1:3, 4?

⁶ Kua loga e tau vala tala ne talahau he tau kupu omoomoi nei. O mai la a tautolu ke kumikumi ki ai. He magaaho ne talahau e Paulo e fakahekeaga po ke tau fakaaue ke he Atua po ke taute e ole ki a ia he hana a tohi, fa moua e tautolu kua fakalataha foki e ia e fakaaue hokulo ma Iesu, ko e Ulu he fakapotopotoaga Kerisiano. (Roma 1:8; 7:25; Efeso 1:3; Heperu 13:20, 21) Ko e mena ia, ne foaki e Paulo e talahauaga nei he fakahekeaga ke he “Atua, ko e Matua he Iki ha tautolu ko Iesu Keriso.” Ti, ko e magaaho fakamua laia he hana tau tohi, ne fakaaoga e ia e kupu fakahigoa Heleni ne fakaliliu “fakaalofa hofihofi.” Ko e kupu fakahigoa nei kua hau ai he kupu ne fakaaoga ke fakakite e momoko ha ko e matematekelea he taha. Ati fakamaama ai e Paulo e tau logonaaga fakaalofa he Atua ke he ha tau fekafekau tua fakamoli Hana ne fa e mamahi ai ke he matematekelea​—kua omoi he tau logonaaga fakaalofa e Atua ke taute e fakaalofa hofihofi ke lata mo lautolu. Fakaoti ai, ne ono atu a Paulo ki a Iehova ko e punaaga he mahani manako lahi nei he ui a ia ‘ko e Matua he fakaalofa hofihofi.’

7. Ko e ha ne kua talahau ai ko Iehova ‘ko e Atua he tau fakamafanaaga oti’?

⁷ Ko e “fakaalofa hofihofi” he Atua kua fakatotoka ai ki a ia ne mamahi ha ko e matematekelea. Ti hoko atu ai a Paulo ke fakamaama ko Iehova ‘ko e Atua he tau fakamafanaaga oti.’ Ti, ko e heigoa ni ha fakamafanaaga ne moua e tautolu mai he mahani totonu he tau tagata tua fakalataha, kua maeke a tautolu ke ono atu ki a Iehova ko e punaaga. Nakai fai fakamafanaaga moli mo e tumau ne nakai mai ia he Atua. Lafi atu, ko ia ne tufugatia e tagata ke he hana a fakatai, ti fakamalolo ki a tautolu mo tau tagata fakamafana. Ti ko e agaga tapu he Atua ne omoi hana a tau fekafekau ke fakakite e fakaalofa hofihofi ki a lautolu ne kua lata mo e fakamafanaaga.

Fakamahani ke Eke mo Tau Tagata Fakamafana

8. Pete ne nakai ko e Atua e punaaga he ha tautolu a tau kamatamata, ko e heigoa e lauiaaga aoga kua maeke he ha tautolu a fakauka ke he matematekelea ne ha ha ia tautolu?

⁸ Ha kua fakaata he Atua ko Iehova e tau kamatamata kehekehe ne lauia ai hana a tau fekafekau tua fakamoli, ne nakai ko e punaaga a ia he tau kamatamataaga pihia. (Iakopo 1:13) Pete ia, ko e fakamafanaaga ne foaki e ia he magaaho ka fakauka a tautolu ke he matematekelea kua maeke ke fakamahani aki a tautolu ke mua atu e mataala ke he tau manako he falu. Mo e ko e heigoa e fua? “Kia maeke ia mautolu ke fakamafana age kia lautolu ha i ai ha matematekelea ke he fakamafanaaga kua fakamafanatia ai he Atua a mautolu.” (2 Korinito 1:4) Ti kua fakamahani e Iehova a tautolu ke eke mo tau tagata talahau mitaki he hana a mafanatia fakalataha mo lautolu ne tua fakamoli auloa mo lautolu ne feleveia ai mo tautolu ke he ha tautolu a fekafekauaga he fifitaki e tautolu e Keriso mo e “fakamafana ai a lautolu oti kua tagi.”​—Isaia 61:2; Mataio 5:4.

9. (a) Ko e heigoa ka lagomatai a tautolu ke fakauka ke he matematekelea? (e) Kua fakamafana fefe e falu ka fakauka mo e tua fakamoli a tautolu ke he matematekelea?

⁹ Ko Paulo ne fakauka a ia ke he loga he tau mamahi ti fakaaue ke he fakamafanaaga loga ne moua e ia mai he Atua ne puhala mai he Keriso. (2 Korinito 1:5) Maeke foki ia tautolu ke moua e loga he fakamafanaaga he manamanatu ke he tau maveheaga uho he Atua, he liogi ma e lagomataiaga he hana a agaga tapu, mo e moua ai e tali he Atua ke he tau liogi ha tautolu. Ti, to fakamalolo ki a tautolu ke fakatumau ke toto hake e pule katoatoa a Iehova mo e talahau moli ko e pikopiko e Tiapolo. (Iopu 2:4; Tau Fakatai 27:11) Ka fakauka mo e fakamoli a tautolu ke he ha tuaga matematekelea, kua lata a tautolu ke tuga a Paulo, he uta oti e lilifu ki a Iehova, ha ko e hana a mafanatia ne taute e tau Kerisiano ke fakatumau e tua fakamoli i lalo he kamatamataaga. Ko e fakaukaaga he tau Kerisiano tua fakamoli kua ha ha ai e lauiaaga mafanatia ke he fakamatakainaga, he taute e falu ke fakamalolo ke he “tau mamahi ia ne mamahi ai a mautolu.”​—2 Korinito 1:6.

10, 11. (a) Ko e heigoa e falu he tau mena ne fakatupu e matematekelea ke he fakapotopotoaga i Korinito tuai? (e) Fakamafana fefe e Paulo e fakapotopotoaga Korinito, mo e ko e heigoa e amaamanakiaga ne fakakite e ia?

¹⁰ Kua moua he tau Korinito ha lautolu a tau mamahi ne hoko ai ke he tau Kerisiano moli oti. Lafi ki ai, kua lata a lautolu mo e fakatonutonuaga ke tuku ki tua e tagata feuaki ne nakai tokihala. (1 Korinito 5:1, 2, 11, 13) Kaumahala ke taute e mena nei mo e ke fakahiku e fetului mo e tau feveheveheaki kua tamai ai e fakama ke he fakapotopotoaga. Ka kua hoko ni a lautolu ti fakagahua e fakatonuaga ha Paulo mo e fakatata e fakatokihala moli. Ti ko e mena ia, ne nava fakamafanatia e ia a lautolu mo e talahau ko e tali mitaki ha lautolu ke he hana a tohi kua fakamafana lahi ki a ia. (2 Korinito 7:8, 10, 11, 13) Kua kitia mitaki, ko lautolu ne tuku ki tua kua fakatokihala foki. Ti hataki e Paulo a lautolu ke “fakamagalo . . . mo e fakamafana atu ke he tagata na, neke mahala a ia ke he momoko kua lahi ue atu.”​—2 Korinito 2:7.

¹¹ Ko e tohi nei ke ua aki ha Paulo kua liga fakamafana moli aki e fakapotopotoaga Korinito. Mo e taha a nei he hana a tau amaamanakiaga. Ne fakamaama e ia: “Kua tumau foki ha mautolu a tua kia mutolu; ha kua iloa e mautolu, tuga he igatia a mutolu mo e mamahi, to igatia pihia foki mo e fakamafanatia.” (2 Korinito 1:7) Ke he fakaotiaga he hana a tohi, ne hataki e Paulo: “Kia tumau . . . ke fakamafanatia; . . . mo e ko e Atua he fakaalofa mo e he mafola ka fakalataha atu ki a mutolu.”​—2 Korinito 13:11, NW.

12. Ko e heigoa e manako ne ha ha ai he tau Kerisiano oti?

¹² Ko e fakaakoaga aoga ha a ia ke maeke ke ako mai e tautolu he mena nei! Ko e tau tagata oti he fakapotopotoaga Kerisiano kua lata ke “igatia pihia foki mo e fakamafanatia” ne foaki he Atua mai he hana a Kupu, hana a agaga tapu, mo e hana a fakatokatokaaga he lalolagi. Pihia foki a lautolu ne tuku ki tua kua liga lata he fakamafana kaeke kua tokihala a lautolu mo e fakahako ha lautolu a puhala hehe. Ti, ko e “fekafekau fakamoli mo e loto matala” kua fakatu e foakiaga hofihofi noa ke lagomatai a lautolu. Lagataha he tau liga tokoua e tau motua ka ahi pauaki atu ke he falu ia lautolu ne kua tuku ki tua. Ko lautolu nei kua liga nakai liu fakakite e aga totoko po ke he taute e agahala kelea muikau ti liga lata mo e lagomatai ke taute e tau lakaaga ke liliu fakaata mai ki loto.​—Mataio 24:45; Esekielu 34:16.

Ko e Matematekelea ha Paulo i Asia

13, 14. (a) Fakamaama fefe e Paulo e magaaho he matematekelea kelea lahi ne moua e ia i Asia? (e) Ko e heigoa e mena tupu ne liga tokaloto e Paulo?

¹³ Ko e faga mamahi ne moua he fakapotopotoaga Korinito kua hoko mai ke he mogonei kua nakai maeke ke fakatatai mo e tau matematekelea loga ne kua fakauka a Paulo ki ai. Ti, kua fakamanatu e ia ki a lautolu: “Ko e tau matakainaga na e, kua loto a mautolu ke iloa e mutolu e matematekelea ne hoko mai kia mautolu i Asia, ne mua hana mamafa nakai maeke ni a mautolu ke he malolo ha i ai ia mautolu, ato manatu ai a mautolu ko e mamate ne fai. Ka kua ha ha ia mautolu e manatu ke he mate, neke tua a mautolu kia mautolu ka e nakai ke he Atua, ko ia kua liu foki fakatu a lautolu kua mamate. Ko ia ne laveaki a mautolu mai he mate kua lahi ni, ha ne laveaki agaia foki, kua tua foki a mautolu kia ia ke laveaki mau a mautolu.”​—2 Korinito 1:8-10.

¹⁴ Kua talitonu e falu he tau pulotu fakaako Tohi Tapu ko e hagaaoaga ha Paulo ke he miha i Efeso, ne kua fakalago ki a Paulo mo e pihia foki ke he tau momoui he hana a tau hoa Maketonia tokoua ne fenoga fakalataha, ko Kaio mo Aritako. Ko e tau Kerisiano tokoua nei kua feoho mo e uta ke he fale he kitekiteaga ne kua puke ai ke he tau tagata ne kua “ua e magaaho, kua fakatutu ai a lautolu, kua mua a Tiana [ko e atua fifine] he tau tagata Efeso.” He magaaho fakamui, kua kautu ai e hataki he tohikupu he fakatekiteki e moto tagata. Ko e fakamatakutakuaga nei ke he tau momoui ha Kaio mo Aritako kua liga ke fakatupetupe lahi aki a Paulo. Moli ai, kua fia hu atu a ia mo e fakatonu atu e tau tagata ulu mao, ka kua puipui mai a ia ke ua fakamakamaka ke uta hana moui ke he puhala nei.​—Gahua 19:26-41.

15. Ko e heigoa e tuaga kehe lahi ne liga fakamaama e Paulo he 1 Korinito 15:32?

¹⁵ Pete ia, liga kua fakamaama e Paulo e tuaga kehe lahi mahaki ke he mena tupu tuai. He hana a tohi fakamua ke he tau Korinito, ne huhu a Paulo: “Ne aoga ha ha kia au he tau mo e tau manu favale i Efeso tuga e tau tagata?” (1 Korinito 15:32) Kua liga kakano e mena nei kua nakai ni fakamatakutaku he tau tagata tuga e tau manu e moui a Paulo ka e mai he tau manu huifa vale he male i Efeso. Kua fa fakahala e tau tagata holifono he fa fakaohooho ke tau mo e tau manu vale ka e hane fa e kitekite atu e tau tagata fakamaligi toto. Ka kakano a Paulo kua fehagai ai a ia mo e tau manu huifa vale, ke he magaaho fakahiku kua liga hao fakamana a ia mai he mate favale, tuga ni ne hao a Tanielu mai he gutu he tau leona.​—Tanielu 6:22.

Tau Fakafifitakiaga he Vaha Fou Nei

16. (a) Ko e ha e tokologa he Tau Fakamoli a Iehova kua kitia ai ke he tau kamatamata ne mamahi ai a Paulo? (e) Ko e heigoa kua maeke ke iloa moli e tautolu hagaao ki a lautolu ne mamate kakano ha ko e tua ha lautolu? (i) Ko e heigoa e lauiaaga ne mitaki ka kitia ai he magaaho ka moua he tau Kerisiano ne hao temotemoai mai he mate?

¹⁶ Tokologa he tau Kerisiano he vaha fou nei ne maeke ke fakatatai ke he tau matematekelea ne mamahi e Paulo. (2 Korinito 11:23-27) He vaha nei, foki, kua ha ha ai e tau Kerisiano kua ‘mua e mamafa nakai maeke ni a lautolu ke he malolo,’ mo e tokologa hane fehagai mo e tau tutuaga ne kua ‘manatu ai a lautolu ko e mamate ne fai’ a lautolu. (2 Korinito 1:8) Kua mamate e falu ke he tau lima he tau tagata kelipopo tokologa mo e tau tagata favale kelea. Kua maeke ia tautolu ke iloa moli kua fakaohooho he malolo mafanatia he Atua a lautolu ke fakauka mo e ke mamate a lautolu mo e tau loto mo e tau manamanatuaga kua mauokafua ke he fakamoliaga he ha lautolu a amaamanakiaga, ko e amaamanakiaga ke he lagi po ke he lalolagi. (1 Korinito 10:13; Filipi 4:13; Fakakiteaga 2:10) He falu mena foki, kua fakaholoholo fano e Iehova e tau mena tutupu, ti kua fakahao mai ai e tau matakainaga ha tautolu he mate. Nakai fakauaua ai ko lautolu ne hokotia ai ke he fakahaoaga pihia kua tupu ki mua e falanaki “ke he Atua, ko ia kua liu foki fakatu a lautolu kua mamate.” (2 Korinito 1:9) He magaaho fakamui, to vagahau fakalahi atu foki a lautolu mo e malolo he talahau ai e lautolu e fekau fakamafanatia mo e falu.​—Mataio 24:14.

17-19. Ko e heigoa e tau mena tutupu ne fakakite ko e tau matakainaga ha tautolu i Ruanata ko e tau tagata fakalataha ai ke he fakamafanaaga he Atua?

¹⁷ Nakai la leva ko e tau matakainaga fakahele ha tautolu i Ruanata ne hokotia ai ke he mena taha nei ne hoko ki a Paulo mo e hana a tau kapitiga. Tokologa ne galo ha lautolu a tau momoui, ka e kaumahala e tau laliaga a Satani ke moumou ha lautolu a tua. Ka e, ko e tau matakainaga ha tautolu ke he motu nei kua moua ai e fakamafanaaga mai he Atua ke he loga he tau puhala kehekehe fakatagata. Ke he magahala kelipopoaga pauaki he tau Tutsi mo e tau Hutu ne nonofo i Ruanata, kua ha ha ai e tau Hutu ne foaki ha lautolu a tau momoui ke puipui aki e tau Tutsi mo e tau Tutsi ne puipui e tau Hutu. Ko e falu kua kelipopo he tau matakau kehe lahi he puipui e tau tagata tua fakamoli fakalataha ha lautolu. Ma e fakatai, ko e Fakamoli Hutu ne higoa ko Gahizi ne kelipopo ai he mole e fakahao e matakainaga fifine Tutsi ne higoa ko Chantal. Ko e tane Tutsi a Chantal, ko Jean, kua fufu ai he matakainaga fifine Hutu ne higoa ko Charlotte ke he taha matakavi. Ke he 40 e tau aho kua fakatumau a Jean mo e taha matakainaga Tutsi ke fakamumuli ke he simini (chimney) lahi, ko e o mai ni fakaku ki fafo he po. Ke he tau magaaho oti nei, ne foaki e Charlotte ki a laua e tau mena kai mo e puipuiaga, pete ni he nofo tata ke he kemuaga kautau Hutu. Ke he lau tohi nei, maeke ia koe ke kitia e ata he liu fakalatahaaga ha Jean mo Chan­tal, ne kua fakaaue ke he ha laua a tau tagata Hutu ne tapuaki fakalataha “ne tuku hifo ha laua a na ua ke hukui” aki a lautolu, tuga ni ne taute e Pisila mo Akula ke he aposetolo ko Paulo.​—Roma 16:3, 4.

¹⁸ Ko e taha Fakamoli Hutu, ko Rwakabubu, kua fakaheke he nusipepa Intaremara he ha kua puipui ai e tau tagata Tutsi ne tua fakamoli fakalataha.a Ne talahau ai: “Ha ha ai foki a Rwakabubu, ko e taha he Tau Fakamoli a Iehova, ne fakatumau ke fufu e tau tagata ke he tau matakavi kehekehe he vahaloto he tau matakainaga hana (kua ui pihia he tagata tua fakamoli fakalataha e taha). Ne fa fakaaoga e ia e aho katoa ke uta e tau mena kai mo e tau vai inu ma lautolu pete ni ko e tagata iniini a ia. Ka e taute he Atua a ia ke mua atu e malolo.”

¹⁹ Manamanatu, foki la, ke he hoa tokoua Hutu kua fiafia ne higoa ko Nicodeme mo Athanasie. Ato hoko ai e kelipopo pauaki, ko e hoa fakamau nei kua fakaako e Tohi Tapu mo e Fakamoli Tutsi ne higoa ko Alphonse. He foaki ha laua a tau momoui, ne fufu e laua a Alphonse ke he kaina ha laua. Nakai leva ti mailoga e laua kua nakai haohao mitaki e fale kakano kua iloa he tau tuuta kaina Hutu ha laua e ha laua a kapitiga Tutsi. Ti ko e mena ia, ne fufu e Nicodeme mo Athanasie a Alphonse i loto he luo he lotopa ha laua. Ko e puhala mitaki anei kakano kua kamata e tuuta kaina ke kumi a Alphonse ke teitei ke he tau aho oti. He takoto ai ke he luo nei ke 28 e tau aho, kua manamanatu a Alphonse ke he tau talahauaga he Tohi Tapu tuga e taha ki a Raava, ne fufu e tau Isaraela tokoua ke he alo fale hana i Ieriko. (Iosua 6:17) He mogonei kua fakatumau a Alphonse he hana a fekafekauaga i Ruanata ko e tagata fakamatala he tala mitaki, mo e fakaaue ke he tau tagata fakaako Tohi Tapu Hutu hana he foaki e tau momoui ma hana. Mo e ka e kua a Nicodeme mo Athanasie? Ko e Tau Fakamoli a Iehova a laua mogonei kua papatiso mo e fakaako ai molea ke 20 e fakaakoaga Tohi Tapu mo e tau tagata fiafia.

20. Ke he puhala fe ne fakamafanatia e Iehova ha tautolu a tau matakainaga i Ruanata, ka e ko e heigoa e manako tumau ne ha ha ai he tokologa ia lautolu?

²⁰ Ke he magahala ne kamata e kelipopo pauaki i Ruanata, kua ha ha i ai 2,500 e tau tagata fakamatala he tala mitaki he motu. Pete ni e totou teau ne galo ha lautolu a tau momoui po ke omoomoi ke toka e motu, kua tupu e numela he Tau Fakamoli ke molea e 3,000. Ko e fakamoli a ia kua fakamafana moli he Atua ha tautolu a tau matakainaga. Ka e kua e tokologa he tau fanau nakai fai matua mo e tau takape i loto he Tau Fakamoli a Iehova? Pauaki ai, kua matematekelea agaia a lautolu nei mo e kua lata ma e fakamafanaaga fakatumau. (Iakopo 1:27) To holoholo kehe tukulagi e tau hihina mata ha lautolu ke he magaaho ni ka taute e liu tu mai he lalolagi fou he Atua. Pete ia, fakaaue ke he tau lagomataiaga he ha lautolu a tau matakainaga mo e ha ko e tau tagata tapuaki a lautolu ke he ‘Atua he tau fakamafanaaga oti, kua maeke a lautolu ke fahia mo e moui.’

21. (a) I fe foki ne manako lahi e tau matakainaga ha tautolu ma e fakamafanaaga he Atua, mo e ko e heigoa e taha puhala ne kua maeke ia tautolu oti ke lagomatai? (e) Magaaho fe ka fakamakona katoatoa ai e manako ha tautolu ma e fakamafanaaga?

²¹ He loga atu foki he tau matakavi, tuga a Eriterea, Sigapoa, mo Iukosalavia tuai, kua fakatumau e tau matakainaga ha tautolu ke fekafekau ki a Iehova mo e tua fakamoli pete ni e matematekelea. Kia lagomatai a tautolu ke he tau matakainaga pihia he fakatumau e tau ole ke moua ai e lautolu e fakamafanaaga. (2 Korinito 1:11) Kia fakauka mo e tua fakamoli a tautolu ato hoko e magaaho ke puhala mai he Atua ia Iesu Keriso ‘ke holoholo kehe [katoatoa] e tau hihina mata oti mai he tau mata ha tautolu.’ Mogoia to moua e tautolu e tuaga katoatoa he fakamafanaaga ka foaki e Iehova he hana a lalolagi fou he tututonu.​—Fakakiteaga 7:17; 21:4; 2 Peteru 3:13.

[Matahui Tala]

Iloa Nakai e Koe?

◻ Ko e ha ne ui a Iehova ‘ko e Atua he tau fakamafanaaga oti’?

◻ Kitekite atu fefe a tautolu ke he tau matematekelea?

◻ Mo hai ka fakalataha ki ai e tautolu e fakamafanaaga?

◻ To fakamakona katoatoa fefe ha tautolu a manako ma e fakamafanaaga?

[Fakatino he lau 31]

Pete ni ko e Tau Fakamoli Tutsi a Jean mo Chantal, kua fufu ai he tau Fakamoli Hutu a laua ke he tau matakavi kehekehe he magahala kelipopo pauaki i Ruanata

[Fakatino he lau 31]

Kua fakatumau e Tau Fakamoli a Iehova ke fakapuloa e fekau fakamafanatia he Atua mo e tau tuuta kaina ha lautolu i Ruanata