Ko e Ha ne Loga e Tau Mena Fakagalogalo?
“NAKAI fai mena ne mamafa lahi ke tuga e mena galo.” Po ke ha mena pihia ni he talahau he tala fakatai Falani. Kua fakamaama mai kia he mena nei ko e ha ne mitaki e ha tautolu a logonaaga he magaaho ne iloa e tautolu e mena galo ka e kua ita he magaaho ne nakai maeke a tautolu ke tutala hagaao ki ai? Ka e, mai he tau senetenari kua talia fiafia he tokologa he tau tagata e tau mena galo, he fakamatutaki atu a lautolu ho ko lautolu ni ke he tau matakau fakagalogalo he tutuli e foliaga taha.
Mai he tau mena ke fakamua atu he tau kaufakalatahaaga fakagalogalo nei ko e tau fakatokaaga fakalotu fufu ne moua i Aikupito, Heleni, mo Roma. He magaaho fakamui ne o kehe falu he tau matakau nei mai he ha lautolu a feakiaga fakalotu mo e fakafita ke he fakapolitika, fahi fakatupe, po ke kaufakalataha. Ke fakatai ki ai, he magaaho ne fakatu ai e tau fakalatahaaga he tau tagata feua mahuiga he vaha tuai i Europa, ne fuluhi atu e tau tagata ha lautolu ke taute mena galo ma e puipuiaga he fahi fakatupe ma lautolu ni.
Ko e tau matakau fakagalogalo he tau vaha fou nei kua fa mahani ke fakatutu ma e tau kakano hakohako, liga fakalata ma e “tau kakano ke fakafiafia mo e taute mena mitaki,” he hagaao atu ke he Encyclopædia Britannica, mo e “ke taute e tau polokalama fakamokoi mo e fakaakoaga.” Ko e falu he tau fakatokatokaaga fakamatakainaga, tau kalapu he tau fuata, tau kalapu fakafiafia, mo e falu a matakau kua fakagalogalo ai, po ke kua eke ni ke fai vala galo. Ke he laulahi, ko e tau matakau nei kua nakai fai kelea, ko lautolu i ai kua moua e loto fakafiafia ke he tau mena galo. Kua ha ha he tau vahega fakagalogalo he fakafeleveiaaga e omoiaga hohofi lahi mo e fakamalolo e pipiaga he fefakafetuiaki mo e kaufakalataha. Kua moua e lautolu e logonaaga he matutakiaga mitaki mo e fai kakano. Ko e tau kaufakalataha fakagalogalo pehenei kua fa mahani ke nakai fakahagahaga kelea ke he tau tagata noa. Ko e tau tagata i tua kua nakai ekefakakelea he nakai iloa e tau mena galo.
Magaaho ka Fakakite he Mena Galo e Hagahaga Kelea
Kua nakai fakagalogalo oti e tau matakau fakagalogalo ke he mena taha. Ka ko lautolu ne ha ha ai e “tau mena galo i loto he tau mena galo,” tuga ne talahau he Encyclopædia Britannica, kua fakatupu ai taha hagahaga kelea. Kua fakamaama mai ko e “he fakaaoga e tau matahigoa pauaki, tau fakamoliaga po ke tau iloilo,” kua taute a lautolu he tau tuaga tokoluga ke “fakatoka kehe a lautolu ho ko lautolu ni,” mo e kua fakamalolo e “tau matakau i lalo hifo ke he gahua ne lata ke hokotia ke he tau tuaga tokoluga.” Ko e tau hagahaga kelea ne putoia he tau matakau pihia kua kitia maali. Liga ko e tau matakau i lalo hifo kua nakai mataala katoatoa ke he foliaga moli he fakatokatokaaga, he nakaila hoko atu ia ke he tuaga iloilo ia. Ko e mena mukamuka ke fakalataha atu ke he matakau ne kua kitia tote ni e foliaga mo e tau puhala ke moua aki e tau mena ia mo e, moli, kua liga ke nakai talahau foki. Ka ko e tagata ne kua fita he fakafeleveia ke he matakau pihia ka liga moua e uka ke hola kehe mai a ia i ai, ke tuga kua lili a ia ke he tau filifili lapatoa he tau mena fakagalogalo.
Ka e, kua fakakite foki he tau mena fakagalogalo e hagahaga kelea lahi, he magaaho ka tutuli he matakau e tau foliaga holifono mo e lali ai ke fufu hana a ha ha i ai. Po ke ka iloa ai hana a ha ha i ai mo e tau foliaga katoa, liga to lali ai ke taofi fakagalogalo hana tau tagata mo e hana tau pulega ne taute laia. Kua moli e mena nei he tau matakau fakamatakutaku makutu lahi ne fa mahani ke fakaofo e lalolagi aki ha lautolu tau fakamatakutakuaga.
E, kua maeke e mena galo ke fakahagahaga kelea, ke he tau tagata takitaha mo e ke he kaufakalatahaaga katoa. Manamanatu la ke he tau kege he tau fuata lekaleka ne favale ki a lautolu nakai fai kelea, ko e tau fakalatahaaga holifono tuga e tau matakau fakagalogalo ko e Mafia, tau matakau pule malolo he tau palagi tuga e Ku Klux Klan,a mo e nakai ke nimo e tau matakau fakamatakutaku loga he lalolagi katoa ne fakatumau ke totoko ke he tau laliaga ke moua e mafola mo e nakai haofia he lalolagi.
Ko e Heigoa ha Lautolu ne Fa e Taute he Mogonei?
He magahala he tau atu tau he 1950, ko e mena ne tupu mai he Felakutaki Taufetului, kua fakatokatoka ai e tau matakau fakagalogalo he falu he tau motu he Fahi Lalo i Europa ke fekafekau mo fakaveaga ma e tau fakaholoaga totoko neke lali e tau Soviete ke pule ke he Fahi Lalo i Europa. He hagaao atu ke he mekasini tohi tala Sihamani ko e Focus, ke fakatai ki ai, ko e “79 e kavi toka kanavaakau fakagalogalo” ne kua fakatu i Auseturia he magahala he vaha ia. Kua nakai iloa oti foki he tau motu i Europa e tau matakau nei. Ne hokotaki fakamoli mai e mekasini tohi tala he tau atu tau fakamua he 1990: “Kua nakaila iloa ia ko e fiha e loga he tau fakatokatokaaga nei ne gahuahua he vaha nei mo e ko e heigoa ne kua taute e lautolu he magaaho nei.”
E, moli. Ko hai ka iloa moli ko e fiha e loga he tau matakau fakagalogalo ne liga he magaaho tonu nei kua fakatupu e matakutakuina lahi ke he mena ne manatu e taha ha tautolu ki ai?
[Matahui Tala]
a Ko e matakau T.F.K. nei kua taofi mau e falu he tau puhala fakalotu he tau kaufakalatahaaga fakagalogalo fakamua he fakaaoga e satauro puhopuho mo hana fakamailoga. He vaha i tuai, ne taute ai e tau tapaki fakalutukia he po, ko e tau tagata i ai kua tui e tau tapulu loloa mo e tau kafu hinavake mo e fakahoko ha lautolu a ita ke he tau tagata uli, tau Katolika, tau Iutaia, tau tagata motu kehe, mo e fakatokatokaaga ne lago atu ke he gahuaaga he tagata.