Tau Mena Fakagaloglao he Higoa he Iki
NE PA e kese-kona he hala tuleni he lalo fonua i Tokyo, Sapani, ia Mati 1995, mo e tamate 12 e tau tagata, fakagagao foki e tau afe, mo e lagomatai ke fakakite e mena galo. Ko e vahega lotu ne talahaua ko e Aum Shinrikyo (Moli Mua Ue Atu) kua feaki fakagalogalo e tokaaga he kese sarin ke fakaaoga ke tutuli aki e tau foliaga fufu.
He taha e mahina he mole atu, ne pa e pomu mo e moumou e fale fakatufono i Oklahoma City, U.S.A., ti tamate ai 167 e tau tagata. Kua tuga ke fakakite he tau fakamoliaga ko e fakakeleaaga ia kua matutaki atu ke he tunono he fakatufono mo e vahega fakalotu he Branch Davidian i Waco, Texas, he ua e tau ne mole. He magaaho ia ne 80 a lautolu ne mamate he vahega fakalotu. Kua fakakite foki he pa he pomu e mena galo ke he tokologa ke he tau tagata: Loga he tau matakau tuga e tau matakautau he mogonei kua gahuahua he Tau Fahi Kaufakalataha, ka e ko e falu ni kua tuaha ki ai ke fakatokatoka e tau mena fakagalogalo ke totoko ke he fakatufono.
He magaaho fakamui, he teitei oti e 1995, ne moua ai 16 e tau tino kua vela he tau tagata he matakavi muhu akau ne tata ki Grenoble, i Falani. Ko lautolu ia ko e tau tagata he Order of the Solar Temple, ko e vahega fakalotu tote ne kua hau he nusi ia Oketopa 1994 i Suisalani mo Kanata he magaaho ne 53 e tau tagata i ai ne kua taupega po ke kua kelipopo. Ka e pete ni he mole atu ai e matematekelea nei, ne fakatumau e vahega fakalotu nei ke gahuahua. Ke hoko mai ke he aho nei ko e hana a fakaohoohoaga mo e tau foliaga kua tumau ke fakagalogalo.
Ko e Tau Hagahaga Kelea he Fakagalogalo Fakalotu
Ha ko e tau tutupuaga pihia, nakai kia ko e tonu aia ko e tau tagata tokologa kua hane fa e onoono fakatuaha atu ke he tau vahega fakalotu? Moli kua nakai fai tagata ka manako ke lago atu ke he fakatokatokaaga fakagalogalo—fakalotu po ke nakai fakalotu—ne moumou hana falanakiaga mo e taute a ia ke muitua ke he tau foliaga ne nakai talia e ia. Ko e heigoa kua maeke he tau tagata ke taute, mogoia, ke kalo mai he to atu ke he matahele ke fakalataha ke he tau kaufakalatahaaga fakagalogalo ne tuaha ki ai?
Kua nakai taumaleku, ko e ha tagata ne manamanatu ke hu he fakalatahaaga fakagalogalo kua lata ke iloa tonu e tau amaamanakiaga moli he matakau. Ke fakaohooho mai he tau kapitiga po ko lautolu ne mahani kua lata ni ke puipui mai i ai, mo e tau fifiliaga kua lata ke fakave nakai ke he logonaaga he loto ka e ke he tau mena iloa moli. Kia manatu, liga ko e tagata ho ko ia ni—nakai ko e falu—ka moua e matematekelea ke he ha fua ka tupu mai.
Ke muitua ke he tau matapatu fakaakoaga he Tohi Tapu ko e puhala moli naia ke kalo kehe mai he tau matakau hagahaga kelea ne kua nakai fakamoli. (Isaia 30:21) Kua putoia e mena nei ke tu uho mau mai he tau mena fakapolitika, fakakite e fakaalofa ke he falu, pihia foki ke he tau fi, kalo kehe mai he “tau gahua he tino,” mo e feaki e fua he agaga he Atua. Ke he tau mena oti, kua lata e tau Kerisiano moli ke nakai fai vala he lalolagi, ke tuga a Iesu ne nakai fai vala i ai, ti kua nakai fakaata he puhala nei ke fakalataha atu ke he tau kaufakalatahaaga fakagalogalo he lalolagi.—Kalatia 5:19-23; Ioane 17:14, 16; 18:36; Roma 12:17-21; Iakopo 4:4.
Ko e Tau Fakamoli a Iehova ko e tau tagata fakaako makutu ke he Tohi Tapu ne kua taute ai ha lautolu a tua mo mena uho mo e lali fakalahi ke moui hagaao ki ai. He lalolagi katoa, kua talahaua a lautolu ko e kau fakalotu ne “kumi e mafola mo e tutuli ki ai.” (1 Peteru 3:11) Ko e ha lautolu a tohi Jehovah’s Witnesses—Proclaimers of God’s Kingdom kua tohia fakahako mai: “Ko e Tau Fakamoli a Iehova nakai ke he ha kakano ni ko e kaufakalatahaaga fakagalogalo. Ko e ha lautolu a tau taofiaga ne fakave ke he Tohi Tapu kua fakamaama katoa he tau tohi ne ha ha ai ke moua he ha tagata. Ke lafi ki ai, ne taute e lautolu e tau gahua pauaki ke uiina e tau tagata ke o ke he tau feleveiaaga ke kitia mo e logona e lautolu ni e mena ne tupu.”
Kua nakai maeke e lotu moli ke taute e tau mena fakagalogalo. Kua hataki e tau tagata tapuaki he Atua moli ke nakai fufu ha lautolu a kitiaaga po ke uufi ha lautolu a finagalo ko e Tau Fakamoli a Iehova. Ne fakapuke he tau tutaki fakamua ha Iesu a Ierusalema aki ha lautolu a tau fakaakoaga. Kua fakailoa e lautolu ke he tau kavi oti ha lautolu a tau taofiaga mo e tau gahua. Kua moli pihia foki e Tau Fakamoli a Iehova he vaha nei. Kua maama ai, he magaaho ne fakakaupa he tau fakatufono pule malolo kelea e ataina ke tapuaki, kua lata he tau Kerisiano ke fakaeneene mo e fakamalolo ke fua ha lautolu a gahua, he “omaoma ke he Atua ke he omaoma ke he tau tagata,” ko e tuaga ne kua tuku ki a lautolu kakano ko e ha lautolu a malolo ke fakamatala ke he tau tagata.—Gahua 5:27-29; 8:1; 12:1-14; Mataio 10:16, 26, 27.
Kaeke ke manatu a koe, liga ko e kau po ke vahega fakalotu fakagalogalo e Tau Fakamoli a Iehova, kua pihia e mena ia kakano kua tote lahi e iloaaga hau hagaao ki a lautolu. Liga ko e mena ia ne tupu ke he tokologa he senetenari fakamuaaki.
Ne talamai he Gahua veveheaga 28 ki a tautolu hagaao ke he feleveiaaga ne taute he aposetolo ko Paulo i Roma mo e “tau iki Iutaia.” Ne pehe a lautolu ki a ia: “Ko e manako nai ha mautolu, ke fanogonogo atu kia koe he hau a taofi; ha ko e mena iloa e mautolu kua talahaua kehe e vahega na ke he tau motu oti kana.” (Gahua 28:16-22) He tali atu ki ai, ne “talahau fakatonu atu [e Paulo] e kautu he Atua,” mo e “talia fakatonu foki he falu.” (Gahua 28:23, 24) Ko e ma e ha lautolu ni a aoga tukulagi ke moua mai e tau fakamoliaga hagaao ke he faka-Kerisiano moli.
He fakamakutu ai a lautolu ke he fekafekauaga he Atua ke he tau mena oti mo e tau tagata, to fiafia e Tau Fakamoli a Iehova ke fakakite e tau fakamoliaga maaliali he ha lautolu a gahua mo e tau taofiaga ke he ha tagata ni ne manako ke iloa e tau tala moli. Ko e ha he kumikumi ho ko koe ni, ha kua ha ha he tuaga ke moua e iloaaga ke he ha lautolu a tua?
[Fakatino he lau 6]
Kua fiafia e Tau Fakamoli a Iehova ke fakakite ko hai a lautolu mo e ko e heigoa ha lautolu ne taute