Ko Hai Ka “Fakamomoui”?

“To fakamomoui foki a lautolu oti kana ke ui atu ke he higoa [a Iehova].”​—GAHUA 2:21.

1. Ko e ha e Penetekoso 33 V.N., ko e aho ne hiki he fakamauaga tuai he lalolagi?

KO E Penetekoso 33 V.N. e aho ne hiki ai he fakamauaga tuai he lalolagi. Ko e ha? Ha ko e aho ia ne fanau mai e motu fou. Fakamua, nakai ko e motu lahi mahaki​—ko e 120 ni e tutaki a Iesu ne fakalataha ke he poko tapa ki luga i Ierusalema. Ka e he vaha nei, ko e tau motu loga i tuai ne kua nimo ai, ko e motu ne fanau ke he poko tapa ki luga kua ha ha ai agaia mo tautolu. Ko e fakamoliaga nei ko e mena aoga lahi mahaki ki a tautolu oti, ha kua fakauku ai he Atua e motu nei ke eke mo fakamoli hana ki mua he tau tagata.

2. Ko e heigoa e tau mena tutupu mana ne fakamailoga aki e fanau he motu fou?

² He mogo ne kamata ai e motu fou ia, ne hohoko ai e tau mena tutupu aoga ne kua fakamoli e tau kupu fakaperofeta a Ioelu. Totou e tautolu e tau mena tutupu nei ia Gahua 2:2-4: “Ati fakaofo mai ai he tomumu mai he lagi tuga ne matagi kua havili lahi mai, kua puke oti ai e fale ne nonofo ai a lautolu. Ne kitia foki e lautolu e tau alelo tuga ne afi kua mavehevehe kua nofo ki luga ha lautolu takitokotaha. Ne fakapuke foki a lautolu oti ke he Agaga Tapu, kua kamata ai he vagahau ke he tau vagahau kehekehe tuga he foaki mai he Agaga e vagahau kia lautolu.” Ke he puhala nei ne eke ai e 120 he tau tagata tane mo e fifine mo motu fakaagaga, ko e tau tagata fakamua ne fakahigoa fakamui ai he aposetolo ko Paulo ko “Isaraela he Atua.”​—Kalatia 6:16.

3. Ko e heigoa e perofetaaga a Ioelu ne fakamoli he Penetekoso 33 V.N.?

³ Ne fakapotopoto e moto tagata ke kitia e “matagi kua havili lahi,” ti fakamaama ai he aposetolo ko Peteru ki a lautolu kua fakamoli tuai e taha he tau perofetaaga a Ioelu. Ko e perofetaaga fe? Fanogonogo la ke he mena ne talahau e ia: “Ko e tau aho fakamui, ne pihia mai e Atua to liligi hifo ai e au haku a Agaga ki luga he tau tagata oti kana; ati perofeta mai ai ha mutolu a tau tama tane mo e ha mutolu a tau tama fifine, to kitia foki he tau fuata ha mutolu e tau fakakiteaga, ti miti foki mo e ha mutolu a tau fuakau. Ko e tau aho ia ke liligi hifo ai e au haku Agaga ki luga he haku a tau fekafekau tane mo e haku a tau fekafekau fifine, ti perofeta mai ai a lautolu. To eke foki e au e tau mana ke he lagi i luga, mo e tau fakamailoga ke he lalolagi i lalo; ko e toto, mo e afi, mo e ahua kua fakatupou. To faliu fakamua e la ke he pouli, mo e mahina ke he toto, to hoko mai e aho he Iki kua lahi mo e talahaua. To fakamomoui foki a lautolu oti kana ke ui atu ke he higoa [a Iehova].” (Gahua 2:17-21) Ko e tau kupu a Peteru ne fatiaki ne moua mai he Ioelu 2:28-32, mo e kakano e tau fakamoliaga ha lautolu kua tote lahi e magaaho ma e motu Iutaia. Ne tata mai tuai e “aho he Iki kua lahi mo e talahaua,” ko e magaaho ke mailoga he tau Isaraela nakai fakamoli. Ka ko hai ka hao, po ke fakamomoui? Mo e ko e heigoa ne fakaata mai he mena nei?

Ua e Fakamoliaga he Perofetaaga

4, 5. He kitia e tau mena tutupu hane hoko mai, ko e heigoa e fakatonuaga ne foaki e Peteru, mo e ko e ha kua latatonu ai e fakatonuaga ia ke hoko mai mogonei?

⁴ He tau tau hake he 33 V.N., ne tupuolamoui e Isaraela fakaagaga he Atua, ka e nakai pihia e Isaraela fakatino. He 66 V.N., ne felakutaki a Isaraela mo Roma. He 70 V.N., ne teitei galo a Isaraela, ti ko Ierusalema mo e faituga i ai ne tugi ki lalo. He Penetekoso 33 V.N., ne foaki e Peteru e fakatonuaga mitaki ke lata mo e matematekelea ka hoko mai. Ne liu foki fatiaki a Ioelu, ne pehe a ia: “To fakamomoui foki a lautolu oti kana ke ui atu ke he higoa [a Iehova].” Ko e tau Iutaia takitaha ne lata ke taute e fifiliaga fakatagata ke ui ke he higoa a Iehova. Kua lauia foki e mena nei ke omaoma foki ke he tau fakaakoaga a Peteru: “Ati tokihala a, ti takitaha mo e papatiso a mutolu oti ke he higoa a Iesu Keriso; mo e fakamagaloaga he tau hala.” (Gahua 2:38) Ko e tau tagata fanogonogo ki a Peteru kua lata ke talia a Iesu ko e Mesia, ne kua tiaki ai he motu ko Isaraela.

⁵ Ko e tau kupu fakaperofeta ia a Ioelu ne fakamalolo lahi ki a lautolu ne holoilalo he senetenari fakamua. Pete ia, kua lahi mahaki e fakamalolo ke he vaha nei kakano, ne fakakite he tau mena tutupu he senetenari 20 aki, kua fai fakamoliaga foki ke ua aki he perofetaaga a Ioelu. O mai la ke kikite ki ai.

6. Kamata fefe ke kitia mitaki e fakamoliaga a Isaraela he Atua he hoko mai e 1914?

⁶ He mole atu e mamate e tau aposetolo, ne maluia a Isaraela he Atua he tau titania he faka-Kerisiano fakavai. Pete ia, ke he vaha he fakaotiaga, ne kamata he 1914, ko e kitiaaga he motu fakaagaga nei ne liu foki kitia mitaki. Ko e tau mena oti nei ko e fakamoliaga he fakatai a Iesu ke he tau saito mo e tau titania. (Mataio 13:24-30, 36-43) He tata mai e 1914, ne kamata e tau Kerisiano fakauku ke vevehe mai a lautolu he Kerisitenitome nakai fakamoli, he tiaki malolo e tau fakaakoaga fakavai i ai mo e fakamatala e hauaga he fakaotiaga he “fakakatoa ai e tau vaha he tau motu kehe.” (Luka 21:24) Ka ko e felakutaki fakamua he lalolagi, ne hoko ai he 1914, ne eke ai e tau matakupu ne nakai mautali ai a lautolu. I lalo he pehiaaga malolo, tokologa ne lolelole, mo e fakahui ai e falu. He 1918 kua teitei fakaoti ai e gahua fakamatala ha lautolu.

7. (a) Ko e heigoa e mena tupu kua tatai ke he Penetekoso 33 V.N. ne tupu he 1919? (e) Kamata he ­1919, ko e heigoa e lauiaaga he liligi hifo he agaga he Atua ki luga he tau fekafekau ha Iehova?

⁷ Ka kua nakai tumau ai e tau mena ia. Kamata ai he 1919, ne kamata a Iehova ke liligi hifo e agaga hana ke he tau tagata hana ke he puhala ne manatu e tautolu e Penetekoso 33 V.N. Moli ai, he 1919 ne nakai fai vagahau kehe ai ti nakai fai matagi havili lahi. Ne maama e tautolu mai he tau kupu a Paulo ne fakamau he 1 Korinito 13:8 ne leva e mole he magahala he tau mana. Pete ia, ko e agaga he Atua kua kitia moli he 1919, he fonoaga i Cedar Point, Ohio, U.S.A., ne fakamalolo ai e tau Kerisiano fakamoli mo e liu kamata e gahua fakamatala he tala mitaki he Kautu. He 1922 ne liliu a lautolu ki Cedar Point mo e fakamalolo ai he ole “Fakailoa, fakailoa, fakailoa, e Patuiki mo e hana a kautu.” He tupu ai he senetenari fakamua, ne fakaohooho e lalolagi ke mailoga e tau lauiaaga he liligi hifo he agaga he Atua. Ko e tau Kerisiano fakauku oti​—tau tagata tane mo e fifine, fuakau mo e fuata​—kua kamata ke “perofeta” he fakailoa “e tau mana he Atua.” (Gahua 2:11) Tuga a Peteru, ne fakamafana e lautolu e tau tagata holoilalo: “Kia fakamomoui a a mutolu mai he hau fakakeukeu nai.” (Gahua 2:40) Taute fefe e lautolu kua talia? He omaoma e tau kupu ia Ioelu 2:32: “To fakamomoui ai a lautolu oti kana ke ui atu ke he higoa a Iehova.”

8. Tupu ki mua fefe e tau mena ma e Isaraela he Atua tali mai he 1919?

⁸ Tali mai he tau tau fakamua ia, ko e tau gahua he tau Isaraela he Atua kua holo ki mua. Ko e fakakatoatoa ha lautolu ne fakauku kua holo taha atu ki mua, ti tali mai he atu tau 1930 ko e moto tagata he tau tagata holoilalo mo e amaamanakiaga ke he lalolagi kua kitia ai. (Fakakiteaga 7:3, 9) Kua logona oti e fakamafitiaga, ha kua fakakite he fakamoliaga ke ua aki he Ioelu 2:28, 29 e tata lahi mahaki ha tautolu ke he aho matakutakuina lahi a Iehova, ka moumou ai e fakatokaaga he tau mena fakalotu, fakapolitika, fakatupe he lalolagi katoa. Fai kakano lahi a tautolu “ke ui atu ke he higoa a Iehova” ke he tua katoa to fakahao e ia a tautolu!

Ui Fefe a Tautolu ke he Higoa a Iehova?

9. Ko e heigoa falu mena ne lauia he ui ke he higoa a Iehova?

⁹ Lauia e heigoa he ui ke he higoa a Iehova? Kua lagomatai he talahauaga ia Ioelu 2:28, 29 a tautolu ke tali e huhu ia. Ma e fakatai, kua nakai fakateliga a Iehova ke he tau tagata oti kua ui ki a ia. Puhala mai he taha perofeta, ko Isaia, ne pehe a Iehova ki a Isaraela: “Ka fakaolo mai e mutolu ha mutolu a tau lima, to haga kehe au haku tau mata ia mutolu, ka fakaloga ai e mutolu e tau liogi nakai fanogonogo atu au.” Ko e ha ne nakai fakateliga a Iehova ke he motu hana? Kua fakamaama ni e ia: “Kua puke ha mutolu a tau lima ke he toto.” (Isaia 1:15) To nakai fakateliga a Iehova ke he ha tagata kua fakamaligi toto po ke taute agahala. Ko e mena haia ne talahau e Peteru ke he tau Iutaia he Penetekoso ke tokihala. He talahauaga he Ioelu 2:28, 29, kua moua e tautolu kua peehi foki e Ioelu e tokihalaaga. Ma e fakatai, kua totou e tautolu ia Ioelu 2:12, 13: “Ka ko ainei foki, kua pehe mai a Iehova, kia liliu mai a mutolu kia au mo e ha mutolu a tau loto katoa, mo e fakakanopogi, mo e tagi, mo e tagi aue; Kia hēhē e mutolu e tau loto ha mutolu, ka e nakai ko e tau tapulu ha mutolu, mo e liliu atu a mutolu kia Iehova ha mutolu a Atua; ha kua fakaalofa noa mai a Iehova, mo e fakaalofa hofihofi noa a ia, kua fakatuai hana a ita, ka e lahi ni hana a fakaalofa.” Kamata he 1919, ne fakalautatai atu e tau Kerisiano fakauku mo e tau kupu nei. Ne tokihala a lautolu ke he tau lolelole ha lautolu mo e fifili ke nakai liu fakahui po ke fakalolelole. Ne hafagi he mena nei e puhala he agaga he Atua ke liligi hifo. Ko e ha tagata ka manako ke ui ke he higoa a Iehova mo e logona ai kua lata ke mui ke he puhala taha.

10. (a) Ko e heigoa e tokihalaaga moli? (e) Tali atu fefe a Iehova ke he tokihalaaga moli?

¹⁰ Manatu, ko e tokihalaaga moli kua mua atu mai he talahau noa, “Kua hehe au.” Ne fa hehe he tau Isaraela e tau tapulu tua ha lautolu ke fakakite e malolo he tau logonaaga hokulo ha lautolu. Ka e pehe a Iehova: “Kia hēhē e mutolu e tau loto ha mutolu, ka e nakai ko e tau tapulu ha mutolu.” Ko e tokihala moli kua hau he loto, mai he tau logonaaga hokulo ha tautolu. Kua putoia ai e haga tua atu ha tautolu ke he taute mena kelea, ti pihia foki he totou e tautolu ia Isaia 55:7: “Kia tiaki e ia ne mahani kelea hana mahani, mo e tagata mahani hepehepe kia tiaki e ia hana tau manatu; ti liu atu a ia kia Iehova.” Kua lauia ai e fakavihia e agahala, tuga ne taute e Iesu. (Heperu 1:9) Ti, falanaki a tautolu ki a Iehova ke fakamagalo a tautolu he fakave ke he poa lukutoto ha ko Iehova kua “fakaalofa hofihofi noa a ia, fakatuai hana a ita, ka e lahi ni hana a fakaalofa.” To talia e ia e tapuakiaga ha tautolu, ko e tau poa fakaagaga he saito mo e mena inu. To fakateliga mai a ia ka ui a tautolu ke he hana a higoa.​—Ioelu 2:14.

11. Ko e heigoa e tuaga kua lata he tapuakiaga moli ke he tau momoui ha tautolu?

¹¹ He Lauga he Mouga, ne tuku mai foki e Iesu taha mena ke tokaloto e tautolu, he talahau e ia: “Kia kumikumi fakamua a mutolu ke he kautu he Atua mo e hana tututonu.” (Mataio 6:33) Ko e tapuakiaga ha tautolu kua nakai lata ke fakateaga, he eke mo taha mena tote ke totoka aki e manamanatuaga ha tautolu. Ko e fekafekau ke he Atua kua lata ke tuku fakamua ke he tau momoui ha tautolu. Ti, puhala mai ia Ioelu, kua holo atu a Iehova ke talahau: “Kia ulo a e mutolu e pu i Siona. . . . Kia fakapotopoto e mutolu e motu, kia fakatapu ai e mutolu e tutuutaaga, kia fakapotopoto a e mutolu e tau patu, kia tatanakai ai e tau tama ikiiki, katoa mo lautolu ne kai huhu; kia fina atu ai e kitofaihoana he hana poko, mo e kitofaitane he hana mohega.” (Ioelu 2:15, 16) Kua pauaki ai e hoa tokoua ne mau laia ke lavelave ki a laua ni. Ka e pihia foki ma laua, kua lata ke tuku mua e fekafekau ki a Iehova. Nakai fai mena ke fakalavelave aki ha tautolu a fakapotopoto ke he ha tautolu a Atua, he ui ke he hana a higoa.

12. Ko e heigoa e amanaki ma e tupu ki mua kua kitia ke he hokotaki he Fakamanatuaga he tau kua mole?

¹² He tokaloto e mena nei, kia manamanatu la tautolu ke he fuafuaaga ne fakakite he Hokotaki he Fekafekauaga he Tau 1997 he Tau Fakamoli a Iehova. Ko e tapunu he tau kua mole he tau tagata fakailoa he Kautu ko e 5,599,931​—ko e moto tagata moli he tau tagata fakaheke! Ko lautolu ne o atu ke he Fakamanatuaga ko e 14,322,226​—teitei ke valu mo e hafa e miliona ne molea he tau tagata fakailoa. Kua fakakite he numera ia e amanaki homo ue atu ke tupu ki mua. Tokologa ia lautolu he valu mo e hafa e miliona ne fita e fakaako e Tohi Tapu mo e Tau Fakamoli a Iehova ko e tau tagata fiafia po ke tau fanau he tau mamatua papatiso. Ko e numera lahi ne o atu fakamua laia ke he feleveiaaga. Ko e o atu ha lautolu kua foaki ke he Tau Fakamoli a Iehova e magaaho ke iloa mitaki a lautolu mo e ke foaki e lagomataiaga ki a lautolu ke holo ki mua. Ka e, ha ha ai a lautolu ne o atu he tau Fakamanatuaga he tau tau takitaha mo e liga o atu ke he tau feleveiaaga gahoa, ka e nakai holo ki mua. Moli, ko lautolu ia kia fakalataha fiafia atu ke he tau feleveiaaga. Ka e fakamafana e tautolu a lautolu ke manamanatu hokulo ke he tau kupu fakaperofeta a Ioelu mo e manamanatu ke he falu lakaaga kua lata ia lautolu ke mailoga moli to logona e Iehova a lautolu ka ui atu ke he hana higoa.

13. Ka fita a tautolu he ui ke he higoa a Iehova, ko e heigoa e matagahua kua lata ia tautolu ma e falu?

¹³ Ne peehi he aposetolo ko Paulo taha mena foki he ui ke he higoa he Atua. He tohi hana ke he tau Roma, ne fatiaki e ia e tau kupu fakaperofeta a Ioelu: “Ko e mena fakamomoui a lautolu oti kana kua ui ke he higoa [a Iehova.].” Ti fakamaama e ia: “Po ke tauui fefe a lautolu kia ia kua nakai tua ki ai a lautolu? ka e tua fefe a lautolu kia ia kua nakai fanogonogo atu ki ai a lautolu? ka e fanogonogo atu fefe a lautolu, ka nakai fai tagata ke fakamatala atu?” (Roma 10:13, 14) E, tokologa atu foki mogonei ne nakai la iloa a Iehova kua lata ke ui ke he hana a higoa. Ko lautolu kua fita he iloa a Iehova kua fai matagahua he nakai ni ke fakamatala ka e hohoko atu foki mo e foaki e lagomatai ia ki a lautolu.

Ko e Parataiso Fakaagaga

14, 15. Ko e heigoa e tau monuina fakaparataiso kua olioli he tau tagata ha Iehova kakano kua ui a lautolu ke he higoa hana ke he puhala kua fiafia a ia ki ai?

¹⁴ Ko e puhala a ia kua kitia ai e lautolu kua fakauku mo e tau mamoe kehe, ti ko e fua, kua fakamonuina e Iehova a lautolu. “Ti ita tafuā ai a Iehova ha ko e hana motu, ne fakaalofa hofihofi a ia ke he hana tau tagata.” (Ioelu 2:18) He 1919, ne fakakite e Iehova e ita tafuā mo e fakaalofa hofihofi ke he hana tau tagata he magaaho ne fakahao e ia a lautolu mo e liuaki a lautolu ke he takaiaga he gahua fakaagaga. Ko e parataiso fakaagaga moli anei, ne fakamaama fakamitaki e Ioelu ke he tau kupu nei: “Ko e fonua na e, aua neke matakutaku a koe; kia fiafia mo e olioli, ha kua eke e Iehova e tau mena lalahi. Ko e tau manu he vao na e, aua neke matakutaku a mutolu, ha kua tupu ai e vao mui ke he tau kaina he vao, ha kua fua mai e akau hana tau fua, ko e mati katoa mo e vine kua fua lahi mai ni. Ko mutolu foki ko e fanau a Siona na e, kia fiafia a mutolu mo e olioli kia Iehova ha mutolu a Atua; ha kua foaki fakalata mai e ia e uha fakamua kia mutolu, kua fakato hifo foki e ia e uha ma mutolu, ko e uha fakamua katoa mo e uha fakamui ke he mahina fakamua. To puke e tau mena taholi saito ke he tau fua saito, to puapuā foki ha lautolu a tau holiaga vine mo e tau holiaga olive ke he uaina mo e puke lolo.”​—Ioelu 2:21-24.

¹⁵ Ko e fakatino mitaki ha a ia! Ko e tau foakiaga loga he tau nonofoaga tolu he moui i Isaraela​—saito, lolo olive, mo e uaina​—fakalataha mo e tau fuifui manu loga. He vaha ha tautolu ko e tau kupu fakaperofeta ia kua fakamoli ke he puhala fakaagaga. Kua foaki mai e Iehova ki a tautolu e tau mena kai fakaagaga kua lata mo tautolu. Nakai kia fiafia a tautolu ke he tau fua loga ia kua foaki mai he Atua? Moli, tuga ne talahau tuai mai e Malaki, ko e Atua ha tautolu ‘kua hafagi e tau pa he lagi mo e liligi mai e monuina ma tautolu ato lahi ue atu ni haia.’​—Malaki 3:10.

Fakaotiaga he Fakatokaaga he Tau Mena

16. (a) Ko e heigoa kua fakakite he liligi he agaga a Iehova he vaha ha tautolu? (e) Ko e heigoa kua fakatoka mai he vaha i mua?

¹⁶ He mole e talahau tuai e tuaga fakaparataiso he tau tagata he Atua ne perofeta ai e Ioelu hagaao ke he liligi he agaga a Iehova. He fatiaki e Peteru e perofetaaga nei he Penetekoso, ne pehe a ia kua fakamoli ai ke he “tau aho fakamui.” (Gahua 2:17) Ko e liligi hifo he agaga he Atua he magahala ia kua kakano kua kamata tuai e tau aho fakamui ma e tau fakatokatokaaga he tau mena Iutaia. Ko e liligi hifo he agaga he Atua ki a Isaraela he Atua he senetenari 20 aki kua kakano kua nonofo a tautolu ke he tau aho fakamui he fakatokaaga he tau mena he lalolagi katoa. He kitia e mena nei, ko e heigoa kua fakatoka mai he vaha anoiha? Kua holo atu e perofetaaga a Ioelu ke talahau ki a tautolu: “To tuku atu foki e au e tau mana ke he lagi mo e lalolagi, ko e toto, mo e afi, mo e ahua kua fakatupou. To faliu fakamua e la ke he pouli mo e mahina ke he toto, to hoko mai e aho a Iehova kua lahi mo e matakutakuina.”​—Ioelu 2:30, 31.

17, 18. (a) Ko e heigoa e aho matakutakuina a Iehova ne hoko ki Ierusalema? (e) Ko e moli he aho matakutakuina ha Iehova ke he vaha i mua kua omoi a tautolu ke taute e heigoa?

¹⁷ Ne kamata fakamoli ai he 66 V.N. e tau kupu fakaperofeta nei i Iutaia he holo mafiti atu e tau mena tutupu ke he tapunu he aho matakutakuina a Iehova he 70 V.N. Ko e matakutakuina ha ia he magaaho ia ke auloa mo lautolu kua nakai fakatokoluga e higoa a Iehova! He vaha nei, ko e tau mena tutupu matakutakuina pihia foki kua fakatoka mai mua, ato moumou e Iehova e fakatokaaga he tau mena nei he lalolagi katoa. Ka e fakaata agaia ni e fakahaoaga. Kua holo atu e perofetaaga ke talahau: “Ati oti foki to fakamomoui ai a lautolu oti kana kua ui atu ke he higoa a Iehova; ha ko e mena ha i ai e fakamouiaga ke he mouga ko Siona mo Ierusalema, tuga he pehe mai a Iehova, to ha i ai foki kia lautolu ne toe ko lautolu ne ui ki ai e Iehova.” (Ioelu 2:32) Kua fiafia lahi moli e Tau Fakamoli a Iehova ke iloa e higoa a Iehova, ti falanaki katoatoa a lautolu to fakahao e ia a lautolu he magaaho ka ui a lautolu ke he hana higoa.

¹⁸ Ti, ko e heigoa, ka tupu he magaaho ka fakahoko he aho lahi mo e talahaua ha Iehova e ita lahi ke he lalolagi nei? To fakatutala e mena ia ke he fakaakoaga fakahiku.

Manatu Nakai e Koe?

◻ I ne fe ne liligi fakamua e Iehova e agaga hana ki luga he hana tau tagata?

◻ Ko e heigoa falu mena ne lauia he ui ke he higoa a Iehova?

◻ I ne fe ne hoko mai e aho lahi mo e talahaua a Iehova ke he Isaraela fakatino?

◻ Fakamonuina fefe e Iehova a lautolu kua ui ke he higoa hana he vaha nei?

[Fakatino he lau 23]

Kua fanau mai e motu fou he Penetekoso 33 V.N.

[Fakatino he lau 24]

Kua lata e tau tagata ke lagomatai ke ui atu ke he higoa a Iehova