Fifitaki ke he Tau Perofeta—Ioelu
1. Fifitaki fēfē e tautolu e mahani fakatokolalo ha Ioelu ka fakamatala?
1 Ko hai e perofeta ko Ioelu? Ne fakakite hokoia ni e ia ko ia “ko e tama a Petuelu.” (Ioelu 1:1) Ko e perofeta loto fakatokolalo nei ne talahau fakamalolō e fekau ha Iehova, ka e nakai ko e matagahua haana ko e utafekau. Pihia foki, he ha tautolu a gahua he fonua, he nakai kumi ke fakaheke ni e tagata po ke matalahi, kua tuku atu e tautolu e lilifu ki a Iehova mo e Tohi Tapu. (1 Kori. 9:16; 2 Kori. 3:5) Ke lafi ki ai, kua moua e tautolu e malolō ha ko e fekau kua fakapuloa e tautolu. Ko e heigoa e tau vala he perofetaaga ha Ioelu ka fakapuke aki a tautolu ke fakamakutu mo e amaamanaki he vahā nei?
2. He tata mai e aho ha Iehova, ko e heigoa ha tautolu ka omoomoi ke taute?
2 “Kua Tata Mai e Aho ha Iehova.” (Ioelu 1:15): Pete kua loga e tau meleniamu ne tohia e tau kupu nei, kua nonofo a tautolu he magahala he fakamooliaga fakahiku he tau kupu ia. Ko e tau tuaga he lalolagi kua kelea fakahaga mo e tau fekehekeheaki mo e fa va kua feleveia mo tautolu he fonua, ko e tau fakamooliaga maaliali anei kua hoko mai e tau aho fakamui he fakatokaaga kelea nei. (2 Timo. 3:1-5; 2 Pete. 3:3, 4) Ka manamanatu a tautolu ke he tata he fakaotiaga, kua latatonu ni ke tuku fakamua e gahua he fonua he tau momoui ha tautolu.—2 Pete. 3:11, 12.
3. Ko e ha kua aoga pauaki e gahua he fonua he tata a tautolu ke he matematekelea lahi?
3 “Ko Iehova Ko e Taue a Ia ma e Motu Hana.” (Ioelu 3:16): Ko e vivivivi ne fakamaama he kupu nei kua hagaao ni ke he fakafiliaga ha Iehova he magahala he matematekelea lahi. Kua mafanatia a tautolu he iloa to fakahao e Iehova e tau fekafekau tua fakamooli haana he magahala ia. (Fakakite. 7:9, 14) He taute a tautolu he gahua fakamatala mo e logona hifo e puhala kua fakamalolō mo e atihake e Iehova a tautolu, kua fakatupu ki mua e tua mo e fakauka ha tautolu mo e to lagomatai a tautolu he matematekelea lahi i mua.
4. Ko e ha kua maeke ia tautolu ke fiafia mo e hagaao atu ke he vahā i mua mo e mauokafua?
4 Pete he fakamaama he falu kua kelea e fekau ha Ioelu, ka kua foaki ke he tau tagata he Atua e amaamanakiaga kua mua atu he fakamouiaga. (Ioelu 2:32) Kia hagaao atu a tautolu ke he vahā i mua mo e mauokafua ti fakamakutu he fakapuloa e tala mitaki ke he Kautu he Atua he mumuitua ke he tau kupu ia Ioelu 2:23: “Kia fiafia a mutolu mo e olioli kia Iehova ha mutolu a Atua.”