Fakafiliaga ne Hoko ke he Pahua he Fakahala
“Kia lagalagā ai e tau motu kehe, mo e o hake a lautolu ke he pahua a Iehosafata, ha ko e mena to nofo ai au ke he mena ia ke fakafili ai e tau motu oti.”—IOELU 3:12.
1. Ko e ha kua kitia ai e Ioelu e moto tagata ne fakapotopoto ke he “pahua he fakahala”?
“KO E motu o tagata tokologa ni ke he pahua ke fakahala”! Kua totou e tautolu e tau kupu omoomoi ia he Ioelu 3:14. Ko e ha ne fakapotopoto ai e moto tagata nei? Kua tali e Ioelu: “Ha kua tata mai e aho a Iehova.” Ko e aho lahi he fakatokolugaaga a Iehova—ko e aho ke fakahoko e fakafiliaga ke he tau tagata kua tiaki e Kautu ne fakatu he Atua i lalo hifo ha Iesu Keriso. Fakahiku ai, ko e “tau agelu ne tokofa” he Fakakiteaga veveheaga 7 kua fakatoka e tau taofi he ‘tau matagi ne fa he lalolagi,’ ti fua mai “ke lahi e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.”—Fakakiteaga 7:1; Mataio 24:21.
2. (a) Ko e ha kua latatonu ke fakahigoa e matakavi ka fakahoko e fakafiliaga a Iehova ko e “pahua a Iehosafata”? (e) Fefe e tali mitaki ha Iehosafata ke he keliaga?
2 He Ioelu 3:12, ko e matakavi ma e fakafiliaga nei kua fakahigoa ai ko e “pahua a Iehosafata.” Lata ai, ke he magahala matematekelea he fakamauaga tuai Iutaia, ne fakahoko e Iehova e fakafiliaga ke lata mo e patuiki mitaki ko Iehosafata, kua kakano e higoa hana ko “Iehova Ko e Fakafili.” Ko e manamanatu ke he mena ne tupu he magaaho ia ka lagomatai lahi a tautolu ke maama e mena ka hoko he vaha ha tautolu. Kua moua e fakamauaga he 2 Nofoaga he Tau Patuiki veveheaga 20. He 2No 20 kupu 1 he veveheaga ia, kua totou e tautolu kua “o mai ai e fanau a Moapi, mo e fanau a Amoni, ne fakalataha foki mo lautolu falu a tagata Amoni, ke tau mo Iehosafata.” Tali atu fefe a Iehosafata? Kua taute e ia e mena ne taute tumau he tau fekafekau ha Iehova he tau tutuaga kelea lahi mahaki. Ne haga atu a ia ki a Iehova ma e takitakiaga, he liogi fakamalolo: “Ha mautolu a Atua na e, nakai kia fakafili e koe a lautolu? Ha kua nakai fai malolo a mautolu ke totoko atu ke he motu o tagata tokologa nai, kua o mai ke tau mo mautolu; nakai iloa foki e mautolu e mena ke eke; ka kua hagao atu a mautolu kia koe.”—2 Nofoaga he Tau Patuiki 20:12.
Kua Tali e Iehova e Liogi
3. Ko e heigoa e tau fakaakoaga ne age e Iehova ki a Iutaia he fehagai a lautolu mo e kelipopoaga he tau motu tata mai?
3 He “tutu a Iuta oti ki mua a Iehova, mo e tau tama ikiiki ha lautolu, ko e tau hoana ha lautolu, mo e fanau ha lautolu,” ne tali atu ai a Iehova. (2 Nofoaga he Tau Patuiki 20:13) Tuga ni he fakaaoga e ia hana “fekafekau fakamoli mo e loto matala” he vaha nei, ti fakamalolo he Fanogonogo liogi lahi e perofeta ko Iahasielu ke tala age e tali Hana ki a lautolu ne fakapotopoto. (Mataio 24:45) Kua totou e tautolu: “Kua pehe mai e vagahau a Iehova kia mutolu, Aua neke matakutaku a mutolu, ti ua fakaatukehe a mutolu, ha ko e motu o tagata tokologa na, he nakai ko e mena ha mutolu e tau, ka ko e mena he Atua . . . Nakai tau a mutolu ke he tau nai; kia tutu a a mutolu, kia tutu a mutolu, mo e kitekite atu a mutolu ke he fakamouiaga mai ia Iehova ko ia ha ha ia mutolu; . . . aua neke matakutaku a mutolu, ti ua fakaatukehe a mutolu; kia o atu a mutolu kia lautolu a pogipogi; ha ko e mena ha ha ia mutolu a Iehova.”—2 Nofoaga he Tau Patuiki 20:15-17.
4. Ke he puhala fe ne manako a Iehova ke he hana tau tagata ke gahuahua, nakai fakalolelole, ka fehagai a lautolu mo e paleko mai he fi?
4 Kua lahi atu e mena ne manako a Iehova ke he Patuiki ko Iehosafata mo e tau tagata hana he nakai fakatali noa ke he fakahaoaga fakamana. Kua lata ia lautolu ke fakalotomatala he fahia mai he palekoaga he fi. Ko e patuiki mo ‘Iuta oti, mo e tau tama ikiiki ha lautolu, ko e tau hoana ha lautolu, mo e fanau ha lautolu’ ne fakakite e tua malolo he omaoma a lautolu ti uhu mamatike mo e o atu ke feleveia e malaga hane o mai. He fenoga, ne fakatumau e patuiki ke foaki e fakaakoaga mo e fakamaloloaga fakateokarasi, he fakamafana a lautolu: “Kia tua a mutolu kia Iehova ha mutolu a Atua, ti fakatumau ai a mutolu; kia tua a mutolu ke he hana tau perofeta, ti monuina ai a mutolu.” (2 Nofoaga he Tau Patuiki 20:20) Tua ki a Iehova! Tua ke he hana tau perofeta! Kua fakave ai e kei ke he kautuaga. Ti tuga ni he vaha nei, he fakatumau a tautolu ke gahuahua he fekafekauaga a Iehova, kia nakai fakauaua a tautolu to taute e ia e tua ha tautolu ke kautu!
5. Gahuahua fefe e Tau Fakamoli a Iehova he vaha nei he fakaheke e lautolu a Iehova?
5 Tuga e tau Iutaia ke he vaha a Iehosafata, kua lata ia tautolu ke “fakaaue atu kia Iehova, ha ko e mena tukulagi hana fakaalofa.” Fakakite fefe e tautolu e fakahekeaga nei? He ha tautolu a fakamakai ke he fakamatala he Kautu! Tuga e tau Iutaia ia “kua kamata a lautolu ke lologo mo e fakaheke atu,” ti lafi e tautolu ke he tua ha tautolu e tau gahua. (2 Nofoaga he Tau Patuiki 20:21, 22) E, kia foaki e tautolu e tua moli pihia tuga he tauteute a Iehova ke totoko atu ke he hana tau fi! Pete ni he tuga kua loa e puhala, kia mauokafua a tautolu ke fakauka, gahuahua ke he tua, ti pihia foki tuga hana tau tagata hane kautu he tau matakavi hagahaga kelea he lalolagi he vaha nei. He falu motu kua lauia lahi ha ko e tau favaleaga, keli, hoge, mo e tau tuaga fakatupe, kua moua he tau fekafekau fakamoli he Atua e tau fua mua ue atu, he hokotaki mai he 1998 Yearbook of Jehovah’s Witnesses.
Fakahao e Iehova Hana Tau Tagata
6. Maeke fefe he tua malolo ke lagomatai a tautolu ke tumau he vaha nei?
6 Ko e tau motu nakai fakamoli kua takatakai i Iuta ne lali ke pa e tau tagata he Atua, ka e ke he tua fakafifitaki he tau fekafekau a Iehova ne tali atu he lologo hana tau fakahekeaga. Maeke foki ia tautolu ke fakakite e tua pihia he vaha nei. He fakapuke ha tautolu a tau momoui ke he tau gahua he fakaheke ki a Iehova, kua fakamalolo e tautolu e tapulu tau fakaagaga ha tautolu, he nakai fakaata ha lagatau kelea ha Satani ke hufia mai. (Efeso 6:11) To fakalolelole he tua malolo e kamatamata he futiaki atu ke he tau fakafiafiaaga kelea, velevelekoloa, mo e fekehekeheaki kua fakakite aki e lalolagi kelea ne viko takai ia tautolu. Ko e tua nakai maueue nei to fakatumau a tautolu ke fekafekau fakamoli mo e “fekafekau fakamoli mo e loto matala” he fakatumau a tautolu ke fakatupuola moui e fuafuaaga kai fakaagaga ha tautolu ke he “tau magaaho.”—Mataio 24:45.
7. Tali atu fefe e Tau Fakamoli a Iehova ke he tau keliaga kehekehe mai ki a lautolu?
7 Ko e tua ha tautolu ne kua fakave ke he Tohi Tapu to fakamalolo a tautolu ke tutu mau ke he tau foakiaga fakavihia ne fakatupu e lautolu kua fakakite e agaga he “fekafekau kelea” he Mataio 24:48-51. He fakamoli e perofetaaga nei ke he puhala mua ue atu, ko e tau tagata tiaki e taofiaga kua gana fakamalolo e tau pikopiko mo e tau fakaakoaga ke he tau motu loga he vaha nei, mo e kau fakagalogalo ai ke he falu he tau tutuaga pule he tau motu. Ka e kua lata, ko e Tau Fakamoli a Iehova kua tali, he fakamaama ia Filipi 1:7, ‘he liliaga nai mo e fakatonu atu katoa e fakamoli ke he vagahau mitaki.’ Ma e fakatai, ia Sepetema 26, 1996, ke he mena tupu i Heleni, toko hiva e fakafili he European Court of Human Rights, i Strasbourg, ne talia he liu fakamoli ko e “Tau Fakamoli a Iehova kua hokotia he fakakakano ko e ‘lotu talahaua,’” ne lata ke olioli e tokanoaaga he manatu, loto manamanatu, mo e taofiaga, mo e tonuhia ke fakailoa e tua ha lautolu. Ka ko e tau tagata tiaki e taofiaga kua talahau he fakafiliaga he Atua: “Ka kua hoko kia lautolu e kupu fakatai moli, Kua liu foki e kuli ke he hana ni a koko, mo e kupu e, Ko e puaka ne koukou kua liu taveli foki a ia ke he pelapela.”—2 Peteru 2:22.
8. He vaha a Iehosafata, fakahoko fefe e Iehova e fakafiliaga ke he tau fi he Hana tau tagata?
8 He vaha ia Iehosafata, ne fakahoko e Iehova e fakafiliaga ki a lautolu ne manako ke fakamamahi Hana tau tagata. Kua totou e tautolu: “Ti tuku atu ai e Iehova e tau kau kua tatao ke tau mo e fanau a Amoni, mo Moapi, mo e tau tagata ne nonofo he mouga ko Seira, ne o mai ke tau mo Iuta; ti kelipopo ai a lautolu. He mamatike e fanau a Amoni mo e fanau a Moapi ke tau mo lautolu ne nonofo ke he mouga ko Seira, ke kelipopo ni mo e fakaoti ai a lautolu; kua fakaotioti e lautolu a lautolu ne nonofo i Seira, ti fekeliaki e lautolu a lautolu.” (2 Nofoaga he Tau Patuiki 20:22, 23) Ne fakahigoa he tau Iutaia e matakavi ia ko e pahua ko Peraka, kakano ko e “Monuina.” Ke he vaha nei foki, ko e fakahoko he fakafiliaga a Iehova ke he tau fi hana to fua ke he tau monuina loga ma e tau tagata ni hana.
9, 10. Ko hai kua fakakite ne lautolu a lautolu he latatonu mo e fakafiliaga lahi a Iehova?
9 To huhu a tautolu, Ko hai he vaha fou nei ka moua e fakafiliaga mamahi mai ia Iehova? Ke moua e tali ke he huhu ia, kia liliu la ke he perofetaaga a Ioelu. Kua tutala e Ioelu 3:3 ke he tau fi he hana tau tagata to ‘ta age e tama tane ke eke mo taui he fifine fakataka, kua ta age foki e lautolu e tama fifine ke fakafua aki e uaina.’ E, kua onoono hifo a lautolu ke he tau fekafekau he Atua, kua tatai ni e tau fanau ha lautolu mo e taui he fifine fakataka po ke totogi he tioki uaina. To fai fakalagoaga a lautolu ke he mena ia.
10 Kua tatai lahi e fakafiliaga ki a lautolu kua taute e fakataka fakaagaga. (Fakakiteaga 17:3-6) Ti mua atu ki a lautolu ne fakalagalaga e tau malolo fakapolitika ke favale ke he Tau Fakamoli a Iehova mo e fakalavelave e gahua ha lautolu, tuga ni kua taute he falu takitaki fakalotu uhu kau i Europa Lalo he tau magaaho kua mole. Kua fakakite e Iehova e fifiliaga ke totoko atu ke he tau tagata taute mahani kelea muikau pihia.—Ioelu 3:4-8.
“Kia Tauteute a a Mutolu ke Tau”
11. Paleko atu fefe a Iehova ke he tau fi hana he felakutaki?
11 Kua ui atu foki a Iehova ke he hana tau tagata ke fakapuloa e palekoaga ke he tau motu: “Kia tauteute a a mutolu ke tau, kia fakaohooho e mutolu e tau tagata malolo; kia fakatata mai e tau tagata tau oti, kia o hake a lautolu.” (Ioelu 3:9) Ko e fakapuloaaga anei he felakutaki kehe lahi—ko e felakutaki tututonu. Kua falanaki e Tau Fakamoli a Iehova ke he tau kanavaakau tau fakaagaga he tali atu ke he tau fakaakoaga pikopiko, fio e fakavai mo e kupu moli. (2 Korinito 10:4; Efeso 6:17) To nakai leva ti tauteute he Atua e “tau ke he aho lahi he Atua mana.” (Fakakiteaga 16:14) To uta kehe mai he lalolagi e tau tagata totoko he pule katoatoa he Atua. Ko e tau tagata hana he lalolagi to nakai fai vala ki ai. Fakatino mo e fakatai, kua “tukituki e lautolu ha lautolu a tau pelu ke eke mo tau koho, ko e ha lautolu a tau tao foki ke eke mo tau titipi ke taute aki e tau vine.” (Isaia 2:4) Nakai tatai, kua paleko e Iehova e tau motu totoko ke taute taha mena kehe: “Kia tukituki e mutolu e tau koho ha mutolu ke eke mo tau pelu, mo e tau titipi ne taute aki e tau vine ha mutolu ke eke mo tau tao.” (Ioelu 3:10) Kua uiina e ia a lautolu ke fakaaoga e tau tatanakiaga katoatoa he tau matini felakutaki mo e tau kanavaakau tau fou ha lautolu ke he male tau. Ka e nakai kautu a lautolu, ha ko e fetului mo e kautu kua toka ia Iehova!
12, 13. (a) Pete ni e oti e Felakutaki Taufetului, fakakite fefe he tau motu loga kua tuga e fia tau agaia a lautolu? (e) Ko e heigoa kua nakai mautali ki ai e tau motu?
12 He mataulu he atu tau 1990, ne fakapuloa he tau motu kua oti tuai e Felakutaki Taufetului. He mena ia, kua moua nakai he Tau Fahi Kaufakalataha e foliaga mua he mafola mo e haohao mitaki? Nakai maeke! Ko e heigoa kua talahau mai ki a tautolu he tau mena tutupu i Puruniti, Repapiliki Fakatemokarasi ha Konogo, Iraka, Liperia, Ruanata, Somalia, mo Iukosalavia tuai? He tau kupu he Ieremia 6:14, NW, kua pehe a lautolu: “‘Ha ha i ai e mafola! Ha ha i ai e mafola!’ he magaaho ne nakai fai mafola.”
13 Pete ni he oti katoatoa e felakutaki ke he falu matakavi, ko e tau motu he UN kua fakafehagai agaia mo e falu he taute e tau kanavaakau tau uka. Kua tumau agaia falu ke fakatumau e tau tatanakiaga he tau kanavaakau niukilia. Kua taute he falu e tau kanavaakau kemikolo po ke tau moko kiva ke lahi e moumouaga. He fakapotopoto e tau motu ia ke he matakavi fakatai ne fakahigoa ko Amaketo, ne totoko e ia a lautolu: “Kia pehe age a ia ne lolelole, Kua malolo au. Ko mutolu ko e tau motu oti kua agaagai mai, kia o mai fakaave a mutolu, mo e fakapotopoto mai ai a mutolu.” Ti hau ai a Ioelu mo e hana a kitiaaga: “Iehova na e, kia fakahoko hifo e koe ke he mena ia hau a tau toa malolo.”—Ioelu 3:10, 11.
Puipui e Iehova Hana Tau Tagata
14. Ko hai e tau toa malolo a Iehova?
14 Ko hai e tau toa malolo a Iehova? Fakaaoga ai he Tohi Tapu laga 280, he fakahigoa e Atua moli ko “Iehova Sapaota.” (2 Tau Patuiki 3:14) Ko e tau kautau nei ko e tau agelu leveki he lagi kua mautali ai ke taute e tau mena kua manako a Iehova ki ai. He magaaho ne kolo a Suria ke tamate a Elisaio, ne hafagi e Iehova e tau mata he fekafekau ha Elisaio ke kitia mitaki e ia e kakano he nakai kautu ai a lautolu: “Kitiala, kua puke e mouga ke he tau solofanua mo e tau kariota afi, kua agaagai a lautolu kia Elisaio.” (2 Tau Patuiki 6:17) Ne pehe a Iesu kua maeke ke ole atu a ia ke he Matua hana ma e “tau agelu ne mua he tokologa ke he tau lekeona ne hogofulu ma ua.” (Mataio 26:53) He fakamaama ai e hau ha Iesu ke fakafili i Amaketo, kua talahau mai he Fakakiteaga: “Ne mumui atu foki kia ia e tau kau ha ha he lagi, kua heke e tau solofanua hina, kua tapulu foki a lautolu ke he tau tapulu ie mitaki kua hina mo e mea. Kua fina atu foki mai he fofoga hana e pelu matila, ke ta aki e ia e tau motu; to pule foki a ia kia lautolu ke he tokotoko lapatoa; to holi foki e ia e holiaga vine he ita lahi he Atua hana e malolo oti kana.” (Fakakiteaga 19:14, 15) Ko e holiaga vine fakatai ia kua fakamaama mai ke he tau kupu malolo ko e “holiaga vine lahi he ita he Atua.”—Fakakiteaga 14:17-20.
15. Fakamaama fefe e Ioelu e felakutaki atu a Iehova ke he tau motu?
15 Ti tali fefe e Iehova e ole ha Ioelu ke tuku hifo ni he Atua hana tau toa? Kua talahau ai ke he tau kupu maaliali nei: “Kia lagalagā ai e tau motu kehe, mo e o hake a lautolu ke he pahua a Iehosafata, ha ko e mena to nofo ai au ke he mena ia ke fakafili ai e tau motu oti nai he tau fahi oti. Kia tuku atu e mutolu e helesaito ha kua motua tuai e tau saito; o mai a kia taholi e mutolu ha kua puke e holiaga vine, kua puapuā e tau mena ha lautolu ne hihina ki ai e huhua vine; ha kua lahi e mahani kelea ha lautolu. Ko e motu o tagata tokologa ni ke he pahua ke fakahala ai, ha kua tata mai e aho a Iehova ke he pahua he fakahala ai. To fakapouligia e la mo e mahina, ko e tau fetu foki nakai tuai kikila mai a lautolu. To fakaleo lahi mai foki a Iehova i Siona, mo e leo mai hana fofoga i Ierusalema; to vivivivi e lagi mo e lalolagi.”—Ioelu 3:12-16.
16. Ko hai ka putoia mo lautolu ka fakahoko e Iehova e fakafiliaga ki ai?
16 Ha kua moli ni kua kakano e higoa Iehosafata “Iehova Ko e Fakafili,” ko e moli ni to fakatokoluga katoatoa he Atua, ko Iehova, hana pule katoatoa ka fakahoko e ia e fakafiliaga. Kua fakamaama he perofetaaga a lautolu ka moua e fakafiliaga lahi ko e “motu o tagata ni ke he pahua ke fakahala.” Ko lautolu ne toe he lotu fakavai ka ha ha ai ke he moto tagata ia. Fakalataha ai foki a lautolu ne fakamaama he Salamo ua—tau motu, tau motu kehe, tau patuiki he lalolagi, tau iki—ne kua manako ke he fakatokaaga matahavala he lalolagi nai nakai ke ‘fekafekau ki a Iehova mo e matakutaku.’ Ko e nakai manako a lautolu nei ke “figita ā e Tama.” (Salamo 2:1, 2, 11, 12) Kua nakai talahau e lautolu a Iesu ko e Patuiki ka fakalataha mo Iehova. Lafi atu, to putoia ai he moto tagata kua fakamailoga ke moumou e tau tagata oti ka fakafili he Patuiki lilifu ko e “tau koti.” (Mataio 25:33, 41) Ka hoko mai ke he magaaho tonu a Iehova ke hea mai i Ierusalema he lagi, ko e Patuiki fakauku hana ka hau ai ke fakahoko e fakafiliaga ia. To lulululu moli ai e lagi mo e lalolagi! Pete ia, kua moli a tautolu: “Ko Iehova ko e taue a ia ma e motu hana, mo e kolo a ia ma e fanau a Isaraela.”—Ioelu 3:16.
17, 18. Ko hai kua fakakite mo tau tagata ka hao mai he matematekelea lahi, mo e ko e heigoa e tau tuaga ka olioli e lautolu?
17 Kua fakakite mai he Fakakiteaga 7:9-17 a lautolu ka hao he matematekelea lahi ko e “moto tagata tokologa” ko lautolu haia kua fakagahuahua e tua ke he malolo lukutoto he toto a Iesu. Kua moua e lautolu nei e puipuiaga he aho a Iehova, ka e to moua he malaga tagata he perofetaaga a Ioelu e fakafiliaga mamahi. Kua pehe a Ioelu ke he tau tagata ne momoui: “Ti iloa ai e mutolu ko au ko Iehova ha mutolu a Atua kua nofo i Siona haku a mouga tapu,” ko e nofoaga a Iehova he lagi.—Ioelu 3:17a.
18 Ko e perofetaaga ia foki kua talahau ki a tautolu ko e nofoaga he Kautu he Atua he lagi ‘to tapu ai, ko e tau tagata kehe foki nakai tuai o age ai a lautolu.’ (Ioelu 3:17e) He takaiaga he lalolagi he lagi mo e lalolagi he Kautu he lagi, to nakai fai tagata kehe, ha kua kaufakalataha oti e tau tagata oti ke he tapuakiaga mea.
19. Fakamaama fefe e Ioelu e fiafia fakaparataiso he tau tagata he Atua he vaha nei?
19 Pihia foki e vaha nei, ko e lahi he mafola kua ha ha ai ke he tau tagata ha Iehova he lalolagi nai. Kaufakalataha ai, kua fakapuloa e lautolu e tau fakafiliaga hana ke molea e 230 e motu mo e molea ke he 300 e tau vagahau kehekehe. Ko e fua monuina ha lautolu kua perofeta fakamitaki mai e Ioelu: “Ka hoko foki ke he aho ia ti hihina mai he tau mouga e huhua vine, to tafe hifo ai foki e puke huhu he tau matiketike, ko e tau vailele oti foki a Iuta to tafe ai e vai.” (Ioelu 3:18) E, to fakatumau a Iehova ke liligi mai ke he hana tau tagata fakaheke he lalolagi e pukenamo he tau monuina mo e mautu olioli mo e holo ki mua e tafe mai he kupu moli uho. Ko e pule katoatoa a Iehova to fakatokoluga katoatoa ai ke he pahua ke fakafili, ti ha ha ai e olioli he nofo tukulagi a ia mo e hana tau tagata kua fakahao.—Fakakiteaga 21:3, 4.
Manatu Nakai e Koe?
◻ Fakahao fefe e Iehova hana tau tagata he vaha a Iehosafata?
◻ Ko hai kua latatonu mo e fakafiliaga a Iehova he moumouaga ke he “pahua he fakafili”?
◻ Ko hai e tau toa malolo he Atua mo e vala fe ka taute e lautolu he tauaga fakahiku?
◻ Ko e heigoa e fiafia kua olioli he tau tagata tapuaki fakamoli?
[Fakatino he lau 27]
Ne tala age ki a Iuta: ‘Aua neke matakutaku, he nakai ko e mena ha mutolu e tau, ka ko e mena he Atua’
[Fakatino he lau 29]
Kua paleko e Iehova hana tau fi ke ‘tukituki e tau koho ha lautolu ke eke mo tau pelu’
[Fakatino he lau 30]
Kua fakakite he Tohi Tapu e moto tagata tokologa he tau tagata ka momoui mai he matematekelea lahi