Tau Huhu Mai he Tau Tagata Totou
Ha ko e poaki he Tohi Tapu hagaao ke he fakaaogaaga kua lata he toto, kua fefe e Tau Fakamoli a Iehova ke he fakaholoaga fakaekekafo he fakaaoga ni hana toto?
He nakai fifili ni hokoia ke he mena manako ne koe po ke falu talahauaga fakaekekafo, kua lata he tau Kerisiano takitokotaha ke manamanatu fakalahi atu ke he mena ne talahau he Tohi Tapu. Ko e fifiliaga a ia he vahaloto hana mo Iehova.
Ne poaki e Iehova, ne falanaki ki ai e tau momoui ha tautolu, kua nakai lata e toto ke kai. (Kenese 9:3, 4) I loto he Fakatufono ma Isaraela i tuai, ne fakakaupa he Atua e fakaaogaaga he toto ha kua hukui he toto e moui. Ne poaki e ia: “Ko e toto ko e moui he tino haia, kua tuku atu foki e au ia ke eke mo lukutoto ma mutolu ki luga he fatapoa.” Ka e kua ka tamate he tagata e manu ke kai? Ne talahau he Atua: “Kia liligi ai e ia hana toto, mo e ufiufi ai ke he kelekele.”a (Levitika 17:11, 13) Kua fatiaki tumau e Iehova e poakiaga nei. (Teutaronome 12:16, 24; 15:23) Ne talahau he Soncino Chumash Iutaia: “Kia nakai tanaki e toto ti kua nakai lata ke kai he liligi ke he kelekele.” Kua nakai fai Isaraela ke uta pulenoa, tanaki, mo e fakaaoga e toto he taha mena moui, ne falanaki e moui ke he Atua.
Ko e poakiaga ke muitua ke he Fakatufono faka-Mose kua fakaoti ai he matulei he Mesia. Ka kua tapu agaia e toto ke he onoonoaga he Atua. He omoomoi he agaga tapu he Atua, ne hataki he tau aposetolo e tau Kerisiano ke ‘fakamamao mai he toto.’ Kua nakai ke uta fakamama e poakiaga ia. Kua aoga foki ma e tau mahani tuga ke fakamamao mai he feuaki po ke tapuaki tupua. (Gahua 15:28, 29; 21:25) He magaaho ne talahaua e puhala foaki noa mo e huki he toto he senetenari ke 20 aki, ne maama he Tau Fakamoli a Iehova kua fepakaki e matagahua nei mo e Kupu he Atua.b
He falu magaaho, to fakamafana age e ekekafo ke he tagata gagao ke fai fahi tapu ke tanaki e toto ni hana ato hoko e iihi (preoperative autologous blood donation, po ke PAD) ti ka manako ke fakaaoga, ti fagai e ia e tagata gagao aki ni e toto ia hana. Ka ko e huki, tanaki, ti fagai toto kua kehe mamao mai he mena ne talahau ia Levitika mo Teutaronome. Kia nakai tanaki e toto; kua lata ke liligi ke he kelekele—tuga kua liuaki ke he Atua. Moli, kua nakai gahuahua e Fakatufono faka-Mose he mogonei. Pete he pihia, kua fakalilifu he Tau Fakamoli a Iehova e tau matapatu fakaakoaga he Atua i ai, ti kua fakamakai a lautolu ke ‘fakamamao mai he toto.’ Ko e mena ia, kua nakai foaki noa e toto ha tautolu, ti nakai tanaki e toto ha tautolu ke fagai toto ka kua lata ni ke “liligi.” Kua fepakaki e matagahua ia mo e fakatufono he Atua.
Ko e falu fakaholoaga po ke tau kumikumiaga ke he toto ni he tagata kua nakai fepakaki mo e tau matapatu fakaakoaga ne tohi he Atua. Ke tuga anei, tokologa e tau Kerisiano ne huki toto ke kumikumi po ke tivi, ka oti ti tiaki e vala toto ia. Ko e falu fakaholoaga halavihi ke he toto ni he tagata ka liga fakamafana mai foki he tau ekekafo ke uta.
Ke fakatai ki ai, he magahala he falu fakaholoaga iihi, liga fakatafe kehe taha vala toto mai he tino he fakaholoaga ne ui ko e hemodilution. Ko e toto ne toka agaia i loto he tagata gagao kua fakahui ai. Mogo fakamui, ko e toto hana ne uta ki fafo kua liuaki ki a ia, ati to hifo ai e totou he toto hana ke teitei toka he numera kua lata. Pihia foki e toto ka tafe ke he mena iihi kua taofi mo e hakahaka ke toka e tau tegatega toto kula ke liuaki ke he tagata gagao; kua ui e mena ia ko e cell salvage. He taha fakaholoaga kehe, kua fakatafe e toto ke he matini ne taute e matagahua ne fa taute he tau vala kakano he tino (tuga he atefua, māmā, po ke tau fuaifi). Ati liuaki ai e toto i loto he matini ke he tagata. He taha fakaholoaga foki, ne fakatafe e toto ke he matini vehevehe toto (centrifuge) ke uta kehe aki e tau vala toto nakai mitaki po ke kelea. Po ke lali ke vevehe falu vala toto ti huki mogoia e vala ia ke he taha fahi ni he tino. Ha i ai foki e tau kumikumiaga ne huki mai e toto ke fakamailoga po ke lafi aki e vai lakau, ti liuaki mogoia ke he tagata gagao.
Liga to kehekehe e tau talahauaga, mo e ha ha ai foki e tau fakaholoaga, tau tuluiaga, mo e tau kumikumiaga fou. Nakai ko e ha tautolu ke kumikumi fakamakutu ke he tau kehekeheaga takitaha mo e talahau e tau fifiliaga. Kua lata he Kerisiano ke fifili ma hana ni ko e fakaaoga fefe e toto hana he fakaholoaga iihi, kumikumi fakaekekafo, po ke tau tuluiaga fou he mogonei. Ka e fakamua, kua lata ia ia ke moua mai he ekekafo po ke taha tagata pulotu e talahauaga hagaao ke he puhala ka taute ai e toto hana he magahala he fakaholoaga. Mogoia ka lata ia ia ke fifili hagaao ke he mena ne fakaata he loto manamanatu hana ke taute. (Kikite puha.)
Kua lata he tau Kerisiano ke manatu e tukuleleaga ha lautolu ke he Atua mo e poakiaga ke ‘fakaalofa ki a ia mo e ha lautolu a loto katoa, agaga katoa, malolo katoa, mo e manatu katoa.’ (Luka 10:27) Kua nakai tatai mo e laulahi he lalolagi, kua takiofa he Tau Fakamoli a Iehova e fakafetuiaga mitaki ha lautolu mo e Atua. Ne fakamafana mai e Foaki Moui ke he tau tagata oti ke falanaki ke he toto a Iesu. Kua totou e tautolu: “Ha ia ia [Iesu Keriso] foki kua moua ai e tautolu e lukutoto ke he hana toto, ko e fakamagaloaga he tau hala.”—Efeso 1:7.
[Tau Matahui Tala]
a Ne tohia he Porofesa ko Frank H. Gorman: “Kua maama e liligi kehe he toto mo mena tapu ne fakakite e fakalilifu ma e moui he manu mo e fakalilifu ai ke he Atua, ne tufugatia mo e leveki tumau e moui ia.”
b Ne tali he The Watchtower ia Iulai 1, 1951, e tau huhu uho hagaao ke he vala tala nei, kua fakakite e kakano ne nakai lata ke fagai toto mai he toto foaki noa.
[Puha/Tau Fakatino he lau 31]
TAU HUHU KE HUHU KI A KOE NI
Kaeke fakatafe taha vala toto haku ki fafo he tino haku ti fai magaaho ne toka ai, to fakaata nakai he loto manamanatu haku au ke eke e toto nei mo taha vala agaia haku, ti kua nakai lata ke ‘liligi ke he kelekele’?
To hufia kelea nakai e loto manamanatu fakaako Tohi Tapu haku kaeke huki e toto haku mo e fakamea he magahala he fuafuaaga po ke he tuluiaga, ti liuaki ni ki loto (po ke ke he) tino haku?