Ko e Heigoa kua Fakatoka ma e Vahā Anoiha?
KO E HA NE AOGA E TALI? Ko e tau onoonoaga he tagata ma e vahā i mua kua lauia e puhala gahua haana he vahā nei. Ma e fakatai, ko lautolu ne temotemoai e amaamanakiaga ma e anoiha kua liga moua e aga: “Kia kai mena a tautolu mo e inu, ha ko e mena mamate a tautolu a pogipogi.” (1 Korinito 15:32) Ko e aga pihia kua fa takitaki ke he kai lahi, inu lahi, mo e tupetupe—nakai ke he mafola mooli he loto.
Mooli, ane mai toka katoatoa e vahā anoiha ke he tau laliaga he tagata, to pulefu e amaamanakiaga ha tautolu. Ko e matagi, vai, mo e kelekele he lalolagi kua kiva lahi mahaki. Kua tupu ki mua e fakamatakutaku he felakutaki niukilia mo e tau totoko fakamatakutakuina. Kua totou piliona he lalolagi katoa ne lauia he gagao mo e mativa. Ka e fai kakano mitaki agaia ma e amaamanakiaga.
Pete kua nakai maeke e tagata ke iloa mahino e vahā anoiha, kua fakamaama e Iehova ko e Atua a ia “kua talahau ai tali mai he kamataaga e tau mena fakamui; tali mai ne aho mua foki e tau mena nakaila eke.” (Isaia 46:10) Ko e heigoa e talahauaga ha Iehova ke he mena kua fakatoka ma e anoiha?
Talahauaga he Tohi Tapu
To nakai fakaatā e Iehova e lalolagi po ke moui i ai ke malona tiaki. Ka kua mavehe mai e Tohi Tapu, ko e Atua ka “moumou ai foki a lautolu kua moumou e lalolagi.” (Fakakiteaga 11:18) Puhala he Kautu haana, po ke fakatufono he lagi, to utakehe e Iehova e mahani kelea he lalolagi mo e tamai e tau tuaga ne finagalo a ia ki ai he kamataaga. (Kenese 1:26-31; 2:8, 9; Mataio 6:9, 10) Ko e tau kupu Tohi Tapu ne mumui mai ka hafagi e maamaaga ke he vahā anoiha, he fakamaama e tau mena tutupu ka nakai leva ti lauia e tau tagata takitokotaha he lalolagi.
Salamo 46:8, 9. “Ati o mai a, kia kitekite ke he tau gahua a Iehova, ko ia kua moumou e tau mena ke he lalolagi. Kua fakahiku e ia e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao; kua huhunu foki e ia e tau kariota ke he afi.”
Isaia 35:5, 6. “Ti fakaala ai e tau mata he tau tagata mata pouli, to logona foki he tau teliga he tau tagata teliga tuli. Ti hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu; ha kua tafe mai e vai ke he tutakale, mo e tau vailele ke he motu talue.”
Isaia 65:21, 22. “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua. Nakai ta fale e lautolu ke nonofo ai e falu, ti nakai to uluvine e lautolu ke kai ai e falu.”
Tanielu 2:44. “Ko e vaha he tau patuiki ia to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”
Ioane 5:28, 29. “Ko e mena hoko ke he aho ke logona ai ke he hana [Iesu] leo a lautolu katoa ha he tau [“tuagamau fakamanatu,” NW], mo e o mai ai.”
Fakakiteaga 21:3, 4. “To ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”
Puhala ne Tamai he Tali he Tohi Tapu e Mafola Mooli he Loto
Fakamua, liga uka lahi ke talitonu ke he tau tuaga ne fakamaama i luga. Ka ko e Atua ne taute e tau maveheaga nei, nakai ko e tagata. Ti “nakai maeke ke pikopiko” a Iehova ko e Atua.—Tito 1:2.
Ka ako a koe ke falanaki ke he tau maveheaga he Atua mo e moui fakatatau ke he tau fakatufono haana, to tumau e mafola he loto haau pete ne tau tuaga vihi lahi mahaki. Ko e felakutaki, mativa, gagao, ti pihia foki e tau lekua he fuakau po kua teitei mate—to nakai fakaai e tau mena nei ke fofō katoatoa e mafola haau. Ko e ha? Kakano kua mauokafua a koe ko e Kautu he Atua ka utakehe e tau lauiaaga he tau matematekelea oti nei.
Maeke fēfē ia koe ke moua e amaamanakiaga pihia ma e vahā anoiha? Kua latatonu ia koe ke ‘liu foki fakafou e loto haau’ mo e kumikumi hifo ki a koe “po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Liga lata ia koe ke loga atu e fakamooliaga na kua mooli e tau maveheaga he Tohi Tapu. Kua latatonu ke taute e kumikumiaga pihia. Kua gahoa ni e tau mena ne taute e koe he moui ka tamai fakalahi e mafola he loto.
[Tau Fakatino he lau 8, 9]
Ko e heigoa e talahauaga he Kupu he Atua ke he vahā anoiha?