Talia e Pule ha Iehova
“Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”—1 IOA. 5:3.
1, 2. (a) Ko e ha kua fakalialia ke he tau tagata tokologa he vahā nei e manatu ke omaoma ke he pule? (e) Kua tū tokotaha mooli kia a lautolu ne nakai mahalohalo? Fakamaama.
KO E “pule” ko e kupu nakai mahuiga he vahā nei. Ke he tokologa ko e mena fakalialia e manatu ke omaoma ke he manako he taha tagata. “Nakai fai tagata ka fekau au ke taute e mena ia,” ko e aga ha lautolu ne nakai mahalohalo ke he pule he falu tagata. Ka kua tū tokotaha mooli kia e tau tagata nei? Nakai pihia! Ne laulahi ia lautolu nukua mumui noa ke he tau puhala he tau tagata tokologa ne ‘mahani fakalataha mo e lalolagi nai.’ (Roma 12:2) Mamao mai he tū tokotaha, ko lautolu “kua eke mo tau tupa ke he kelea,” he fakaaoga e tau kupu ne talahau he aposetolo Kerisiano ko Peteru. (2 Pete. 2:19) Kua o fano a lautolu “ke lata mo e mahani he lalolagi nai, ke lata mo e takitaki ha lautolu kua pule ha he pulagi,” ko Satani ko e Tiapolo.—Efeso 2:2.
2 Ne palau e taha tagata tohia: “Nakai foaki e au e pule ke he tau matua haaku po ke akoako po ke faifeau po ke guru (faiaoga faka-Hinitū) po ke Tohi Tapu ke fifili e tau mena kua mooli ma haaku.” Haia, liga fakaaoga fakahehē he falu e pule ha lautolu ti nakai lata ke omaoma a tautolu ki ai. Ka ko e tali kia a ia ke fakatikai katoatoa e tau manako ke moua e takitakiaga? He fakahela atu ke he tau mataulu tala he nusipepa ne fakakite e tali nakai fiafia. Kua kelea lahi mahaki ai ha ko e magaaho ne lata ke moua he tau tagata e takitakiaga, ne tokologa kua nakai talia ai.
Ha Tautolu a Onoonoaga ke he Pule
3. Fakakite fēfē he tau Kerisiano he senetenari fakamua ne nakai fanogonogo tuli a lautolu ke he pule he tagata?
3 Ko e tau Kerisiano kua kehe e tuaga ha tautolu mai he tuaga he lalolagi. Nakai ha kua taute tuli e tautolu e tau mena ne talamai. Ke he taha faahi he falu magaaho, kua lata a tautolu ke nakai talia e manako he falu pete kua ha ha a lautolu he tuaga ke pule. Kua mooli foki e mena nei ke he tau Kerisiano he senetenari fakamua. Ke tuga anei, he poaki ke he tau aposetolo ke oti e fakamatala, ne nakai fanogonogo a lautolu ke he ekepoa ne mua mo e falu tagata ne pule, ko lautolu ne fai vala he Saneheturini. Ne nakai tiaki e lautolu e mahani hako ke fanogonogo ke he pule he tagata.—Totou Gahua 5:27-29.
4. Ko e heigoa e tau fakafifitakiaga mai he tau Tohiaga Tapu Heperu ne fakakite e tokologa he tau tagata he Atua ne nakai mumuitua ke he puhala mahuiga?
4 Ne fakamalolō pihia foki e tau fekafekau tokologa he Atua he vahā fakamua ato Kerisiano. Ke fakatai ki ai, ko Mose ne “nakai maeke ai e ia ke talahau a ia ko e tama he tama fifine a Farao, ne fifili e ia e matematekelea fakalataha mo e tau tagata he Atua,” pete kua fakatupu he mena ia e “ita he patuiki.” (Hepe. 11:24, 25, 27) Ne kalo kehe a Iosefa he tau manako feuaki he hoana ha Potifara, ne ha ha ai e pule ke fakahagahaga kelea a Iosefa. (Kene. 39:7-9) Ne “manatu e Tanielu [to] kelea ai a ia he tau mena taumafa he patuiki,” pete he uka ke talia he iki ne pule ke he tau eunuka ha Papelonia e tuaga haana ke he matakupu nei. (Tani. 1:8-14) Kua fakakite he tau fakafifitakiaga pihia he fakamauaga tuai ne tutū mauokafua e tau tagata he Atua ke he tau mena kua hako, pete kua matematekelea e tau fua ka moua; ti nakai talia tuli e lautolu e tau manako he tau tagata ke moua aki e fiafia ha lautolu. Ti nakai lata foki ia tautolu ke talia tuli.
5. Kehe fēfē e onoonoaga ha tautolu ke he pule mai he onoonoaga he lalolagi?
5 Ko e fakamalolō ha tautolu kua nakai lata ke fakatatai ke he ulukafilo pauaki; nakai tatai foki a tautolu mo e falu ne totoko ke fakakite kua nakai talia e lautolu e falu manatu fakapolitika. Ka kua fakamalolō a tautolu ke talia e pule ha Iehova mai he pule he ha tagata. He magaaho ka totoko e fakatufono he tagata ke he fakatufono he Atua, kua nakai uka ke fifili e mena kua lata ia tautolu ke taute. Ke tuga e tau aposetolo he senetenari fakamua, kua omaoma a tautolu ke he Atua nakai ke he tagata.
6. Ko e ha kua mitaki tumau ke omaoma ke he tau poaki ha Iehova?
6 Ko e heigoa ka lagomatai a tautolu ke talia e pule he Atua? Kua talia e tautolu e mena ne tohi he Tau Fakatai 3:5, 6: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Ne talia e tautolu ko e ha mena ne manako e Atua mai ia tautolu to fakahiku ke aoga ai ni a tautolu. (Totou Teutaronome 10:12, 13.) Mooli, ne fakakite ne Iehova a ia ke he tau Isaraela ‘ko Ia kua fakaako atu kia koe ke he tau mena ke aoga ai, kua takitaki e Ia a koe ke he puhala ke fano ai a koe.’ Ti lafi e ia: “Ane hagao mai a koe ke he haku tau poaki, po kua tuga ne vailele hāu a monuina; mo e tuga ne tau peau he tahi hau a tututonu.” (Isaia 48:17, 18) Kua talia e tautolu e tau kupu ia. Ti mauokafua ai a tautolu kua mitaki tumau ke omaoma ke he tau poaki he Atua.
7. Ko e heigoa ka taute e tautolu kaeke kua nakai maama katoatoa e tautolu e poaki ne tohi he Kupu he Atua?
7 Kua talia e tautolu e pule ha Iehova mo e omaoma ki a ia pete kua nakai maama katoatoa e tautolu e kakano ma e falu poaki i loto he Kupu haana. Nakai ko e tua teao anei; ko e falanaki mooli. Kua fakakite mai e mauokafua mooli na iloa e Iehova e tau mena kua mitaki ma tautolu. Ko e omaoma ha tautolu kua fakakite foki ha tautolu a fakaalofa, ha kua tohia he aposetolo ko Ioane: “Ko e fakaalofa ke he Atua hanai, kia omaoma a tautolu ke he tau poaki hana.” (1 Ioa. 5:3) Ka e fai vala foki he omaoma ne nakai lata ia tautolu ke tiaki.
Mahani a Tautolu ke Ako
8. Taute fēfē he “mahani he ako ke mailoga” a tautolu ke talia e pule ha Iehova?
8 Ne talamai he Tohi Tapu kua lata ia tautolu ke “mahani he ako mua ai ke mailoga e tau mena mitaki mo e tau mena kelea.” (Hepe. 5:14) Ti, ko e foliaga ha tautolu ke nakai omaoma teao ke he tau fakatufono he Atua; ka kua manako a tautolu ke “mailoga e tau mena mitaki mo e tau mena kelea” he fakavē ke he tau tutūaga a Iehova. Manako a tautolu ke mailoga e pulotu he tau puhala a Iehova, ke maeke foki a tautolu ke talahau tuga e salamo: “Ha i loto ia au hau a fakatufono.”—Sala. 40:8.
9. Fakatatau fēfē e tautolu e loto manamanatu ha tautolu mo e tau tutūaga a Iehova, ti ko e ha kua aoga ke taute pihia e tautolu?
9 Ke mailoga e aoga lahi he tau fakatufono he Atua tuga ne taute he salamo, lata ia tautolu ke manamanatu hokulo ke he tau mena ne totou i loto he Tohi Tapu. Ke fakatai ki ai, he ako a tautolu hagaao ke he taha poaki ha Iehova, liga hūhū e tautolu: ‘Ko e ha ne pulotu e poaki po ke matapatu fakaakoaga nei? Ko e ha kua mitaki lahi ki a au ke omaoma? Ko e heigoa e tau fua kelea ne tutupu ki a lautolu ne fakaheu e fakatonuaga he Atua hagaao ke he mena nei?’ He fakatatau e loto manamanatu ha tautolu mo e tau puhala a Iehova, to liga ni taute e tautolu e tau fifiliaga ne tatai mo e finagalo haana. Kua maeke ia tautolu mogoia ke ‘iloa e finagalo a Iehova’ ti muitua ki ai he mahani omaoma. (Efeso 5:17) Kua nakai mukamuka tumau e mena nei.
Lali a Satani ke Fakalolelole e Pule he Atua
10. Ko e heigoa taha puhala ne lali a Satani ke ekefakakelea e pule he Atua?
10 Nukua leva tigahau e lali ha Satani ke ekefakakelea e pule he Atua. Kua kitia ai e agaaga tū tokotaha haana ke he tau puhala loga. Ke fakatai ki ai, ko e nakai fakalilifu ke he fakamauaga ne fakatū he Atua. Ko e falu ne fifili ke nonofo tokoua ka e nakai mau, ka e pulega falu ke vevehe mai he hoa ha lautolu. To liga talitonu e lautolu he tau matakau ua ia e talahauaga he taha fifine talahaua ne taute ata kifaga: “Kua nakai maeke e tau taane mo e tau fifine ke takitaha ne hoa.” Ti lafi e ia: “Nakaila iloa e au ha tagata ne kua fakamooli po kua manako ke fakamooli.” He liu manatu e tau fakafetuiaga kaumahala haana, ko e tagata taane talahaua lahi ne taute ata kifaga, ne talahau pihia foki: “Ai talitonu lahi au po kua haia mooli ia tautolu e fatuakiloto pauaki ke lata ke takitaha ne hoa he moui katoa ha tautolu.” Kua lata a tautolu mogoia ke hūhū hifo, ‘Kua talia nakai e au e pule ha Iehova hagaao ke he fakamauaga, po kua hufia e manamanatuaga haaku he aga fakahanoa he lalolagi?’
11, 12. (a) Ko e ha kua liga uka ma e tau fuata ke talia e pule ha Iehova? (e) Talahau e mena tupu ne fakakite e goagoa he nakai fanogonogo ke he tau fakatufono mo e tau matapatu fakaakoaga a Iehova.
11 Ko koe kia ko e fuata he fakatokatokaaga a Iehova? Kaeke ke pihia, to liga eke a koe mo matafī pauaki ha Satani he lali a ia ke ekefakakelea e pule ha Iehova. Ko e “tau manako lahi he tau fuata” fakalataha mo e peehi mai he tau kapitiga haau ka liga taute a koe ke manamanatu kua uka lahi e tau fakatufono he Atua. (2 Timo. 2:22) Aua neke toka e manatu ia ke tupu. Kia eketaha ke kitia e pulotu he tau tutūaga he Atua. Ke fakatai ki ai, kua tala atu e Tohi Tapu ki a koe ke ‘hola kehe he feuaki.’ (1 Kori. 6:18) Mo e hūhū hifo ki a koe foki: ‘Ko e ha ne pulotu ai e poaki ia? To aoga fēfē au he omaoma ki ai?’ Liga iloa e koe e taha tagata ne fakaheu e fakatonuaga he Atua ti lahi e matematekelea ne moua ha ko e hēhē haana. Kua fiafia mooli kia a lautolu mogonei? Kua mitaki lahi kia e moui ha lautolu mogonei ke he moui ne olioli e lautolu he fakalataha mo e fakatokatokaaga a Iehova? Kua moua mooli kia e lautolu e mena galo ke he fiafia ne nakai moua he tau fekafekau he Atua ne toe?—Totou Isaia 65:14.
12 Mailoga e mena ne kua fai magaaho tuai he talahau he Kerisiano ne higoa ko Sharon: “Ha kua nakai fanogonogo ke he fakatufono ha Iehova, ne moua e au e gagao mate ko e AIDS. Ne fa liu au manamanatu ke he tau tau loga ne fiafia au he fekafekau ki a Iehova.” Ne mailoga e ia e goagoa he holia e tau fakatufono a Iehova ne kua lata ia ia ke fakalilifu lahi ki ai. Ko e tau fakatufono a Iehova ke puipui aki ni a tautolu. Ne mate a Sharon he fitu ne faahitapu he mole e tohi he tau kupu i luga. Tuga ne fakakite he matematekelea ne tupu ki a ia, kua nakai fai mena mitaki a Satani ke foaki ma lautolu ne eke mo vala he fakatokaaga kelea nei. Ko e “matua he pikopiko,” ne taute e ia e tau maveheaga, ka kua kaumahala ni, tuga ne maveheaga ne taute e ia mo Eva. (Ioane 8:44) Mooli ai, kua mua atu e mitaki ke talia tumau e pule ha Iehova.
Puipui Mai he Agaaga Tū Tokotaha
13. Ko e heigoa taha puhala ne kua lata ia tautolu ke puipui mai he agaaga tū tokotaha?
13 He talia e pule ha Iehova, lata ia tautolu ke puipui mai he agaaga tū tokotaha. Maeke he aga fakaikaluga ke taute a tautolu ke logona hifo kua nakai lata a tautolu ke moua e takitakiaga mai he ha tagata. Ke fakatai ki ai, liga totoko e tautolu e fakatonuaga ne foaki e lautolu ne leveki e tau tagata he Atua. Kua fitā he fakatū he Atua e fakaholoaga ne kua foaki he vahega fekafekau fakamoli mo e loto matala e tau mena kai fakaagaaga he magaaho kua lata. (Mata. 24:45-47) Kua lata ia tautolu ke mailoga fakatokolalo ko e puhala anei ne leveki e Iehova e tau tagata haana he vahā nei. Kia tuga e tau aposetolo tua fakamooli. He fakalolelole falu tutaki, ne hūhū a Iesu ke he tau aposetolo: “Po ke fia o kehe foki a mutolu?” Ne tali a Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi.”—Ioane 6:66-68.
14, 15. Ko e ha kua lata ke omaoma fakatokolalo a tautolu ke he fakatonuaga he Tohi Tapu?
14 He talia e pule ha Iehova kua lata ke fakatatai mo e fakatonuaga ne fakavē ke he haana Kupu. Ke fakatai ki ai, kua hataki ki a tautolu he fekafekau fakamoli mo e loto matala ke “mataala a tautolu mo e nonofo fakalatalata.” (1 Tesa. 5:6) Ko e fakatonuaga pihia kua lata lahi ma e tau aho fakamui nei ne tokologa e tagata ne ‘ofaofa ne lautolu a lautolu, to velevele koloa.’ (2 Timo. 3:1, 2) Liga maeke nakai a tautolu ke lauia he tau aga tupu lahi pihia? E. Maeke he tau foliaga nakai fakaagaaga ke fakataki a tautolu ke momohe fakaagaaga, po ke liga talia e tautolu e aga velevelekoloa. (Luka 12:16-21) Ti, ko e pulotu ha ia ke talia e fakatonuaga he Tohi Tapu mo e tiaki e puhala moui lotokai kua holofa lahi he lalolagi ha Satani!—1 Ioa. 2:16.
15 Ko e tau mena kai fakaagaaga mai he vahega fekafekau fakamoli mo e loto matala, kua tufatufa he tau motua kotofa ke he tau fakapotopotoaga he matakavi. Ne tomatoma he Tohi Tapu a tautolu: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.” (Hepe. 13:17) Kua pehē kia kua nakai maeke e tau motua he fakapotopotoaga ke hēhē e tau mena ka taute? Nakai pihia! Kua kitia maaliali he Atua e nakai mitaki katoatoa ha lautolu ke he mena ne kitia he ha tagata. Pete ia, kua amanaki agaia e Atua ki a tautolu ke mahani omaoma. He kaufakalataha mo e tau motua, pete he nakai mitaki katoatoa a lautolu ka fakakite mooli kua talia e tautolu e pule ha Iehova.
Ko e Aoga he Mahani Fakatokolalo
16. Fakakite fēfē e tautolu e fakalilifu ki a Iesu ko e Ulu he fakapotopotoaga Kerisiano?
16 Kua lata ia tautolu ke manatu tumau ko Iesu e Ulu mooli he ekalesia, po ke fakapotopotoaga. (Kolo. 1:18) Ko e taha kakano a ia ne omaoma fakatokolalo a tautolu ke he takitakiaga he tau motua kotofa, ti foaki ki a lautolu e “fakahelehele fakalahi.” (1 Tesa. 5:12, 13) Mooli, ne fakakite he tau motua he fakapotopotoaga kua mahani omaoma foki a lautolu he fakaeneene ke foaki ke he fakapotopotoaga e fekau he Atua, nakai ko e tau manatu ha lautolu. Kua nakai taute e lautolu e tau mena ke ‘mua ke he mena kua tohi’ ke fakamatalahi e falu manatu fakatagata.—1 Kori. 4:6.
17. Ko e ha kua hagahaga kelea e agaaga foli tuaga?
17 Ko e tau tagata oti he fakapotopotoaga kua lata ke puipui mai he kumi lilifu ma lautolu ni. (Fakatai 25:27) Ha ko e matahele mooli a ia he taha tutaki ne feleveia mo e aposetolo ko Ioane. Ne tohia e ia: “Ko Tioterefe, ko e tagata kua fia mua kia lautolu kua nakai talia e ia a mautolu. Ko e mena ia, ka fina atu au, ti fakamanatu ai au ke he hana mahani ne eke e ia, kua fa vagahau kia mautolu ke he tau kupu kelea.” (3 Ioa. 9, 10) Kua ha ha i ai e fakaakoaga ti pihia foki ma tautolu he vahā nei. Ha ha mogoia ia tautolu e kakano mitaki ke huo kehe ha manatu foli tuaga ka liga mailoga e tautolu ia tautolu ni. Ne pehē mai e Tohi Tapu: “Kua mua atu e mahani fakatokoluga ke he malaia; kua mua atu foki e mahani fakahakehake he loto ke veli ai e tagata.” Ko lautolu ne talia e pule he Atua kua lata ke totoko e matahele he mahani fakatokoluga, neke tataki atu ke he fakamā.—Fakatai 11:2; 16:18.
18. Ko e heigoa ka lagomatai a tautolu ke talia e pule ha Iehova?
18 Haia, kia eke ā mo foliaga haau ke totoko e agaaga tū tokotaha he lalolagi mo e ke talia e pule ha Iehova. Kia fakatumau ā ke manamanatu hokulo mo e loto fakaaue ke he lilifu lahi ne moua e koe ke fekafekau ki a Iehova. Ha kua ha ha a koe mo e tau tagata he Atua ne fakakite he mena ia kua futia he Atua a koe kakano he agaaga tapu haana. (Ioane 6:44) Kia nakai fakateaga ke he tuaga haau mo e Atua. Eketaha ke fakakite ke he tau faahi oti he moui nukua fakaheu e koe e agaaga tū tokotaha mo e talia e koe e pule ha Iehova.
Manatu Nakai e Koe?
• Ko e heigoa kua putoia he talia e pule ha Iehova?
• Taute fēfē he ha tautolu a mahani he ako ke mailoga ke talia e pule ha Iehova?
• Ko e heigoa e tau puhala ne lali a Satani ke ekefakakelea e pule he Atua?
• Ko e ha ne aoga e mahani fakatokolalo he talia e pule ha Iehova?
[Fakatino he lau 18]
“Kua lata ni [ia tautolu] ke mua e omaoma ke he Atua ke he omaoma ke he tau tagata”
[Fakatino he lau 20]
Kua pulotu tumau ke muitua ke he tau tutūaga he Atua