Kua Fakatatau Nakai e Tau Pulega Haau mo e Finagalo he Atua?
KO E manu lele ne iloa ai ko e Clark’s nutcracker na lanu efuefu tea ti lologo ne fa kitia ai kua hopohopo fano he tau vaouhi he faahi lalo ha Amerika Tokelau. Kua oko mo e tanu ke hokotia ke 33,000 tega akau he tau tau takitaha, ti fakaputu ai ke kavi ke he 2,500 he tau matakavi kehekehe he tauteute ma e tau mahina makalili. Mooli, kua ‘mua ue atu ni e iloilo’ he manu lele nei he puhala ne tatanaki ai e tau mena kai ma e vahā i mua.—Tau Fakatai 30:24.
Ne moua he tau tagata e lotomatala mua ue atu. He tau tufugatia oti ha Iehova ke he lalolagi, ne mua atu e lotomatala he tau tagata ke ako mai he tau mena ne tutupu kua mole mo e fakaatā e tau fakaakoaga nei ke fakaohooho e tau pulega ha lautolu ma e vahā anoiha. “Ha ha he loto he tagata e tau manatu loga,” he talahau he patuiki iloilo ko Solomona.—Tau Fakatai 19:21.
Pihia foki, nakai lahi e fifiliaga he tau tagata ka e fakavē e tau pulega ha lautolu ke he tau manatu noa hagaao ke he vahā anoiha. Ma e fakatai, kua fakatokatoka e koe e tau matagahua a pogi he manatu noa to hake e laā mo e to amanaki a koe ke moui agaia. Ko e manatu noa fakamua kua fakavē ke he tau mena mooli; ka e fakauaua e manatu ke uaaki. Maaliali ai, ne pehē e tagata tohia Tohi Tapu ko Iakopo: ‘Nakai iloa e mutolu e mena ke tupu mai a pogipogi ke he ha mutolu a moui.’—Iakopo 4:13, 14.
Nakai fai fakakaupāaga pihia a Iehova ko e Atua. Ne iloa e Ia “tali mai he kamataaga e tau mena fakamui.” Nakai fakauaua ai, to fakamooli e finagalo haana ne talahau. “To tumau haku pule,” he fakapuloa e ia, “to eke foki e au e tau mena oti kua loto au ki ai.” (Isaia 46:10) Ko e heigoa ka tupu mogoia he magaaho ka nakai felauaki e tau pulega he tagata mo e finagalo he Atua?
Ka Tiaki he Tau Pulega he Tagata e Finagalo he Atua
Kavi ke he 4,000 tau kua mole, ne pulega e tau tagata talaga he Kolo i Papelu ke taha ne matakavi ke nonofo ai e lanu tagata. “O mai ā,” he talahau e lautolu. “Kia ati e tautolu taha maga, mo e taha kolo, kia hoko hana tapunu ke he lagi; kia eke e tautolu e mena ke talahaua ai a tautolu, neke mavehevehe fano a tautolu ke he lalolagi oti kana.”—Kenese 11:4.
Ka kua kehe lahi e finagalo he Atua ma e lalolagi. Ne poaki a ia ki a Noa mo e tau tama taane haana: “Kia fanau a mutolu, ti fakatokologa, ti fakapuke e mutolu e lalolagi.” (Kenese 9:1) Fehagai fēfē e Atua mo e tau foliaga he tau tagata totoko ha Papelu? Ne fakakehekehe e Ia e tau vagahau ha lautolu ti nakai maeke ia lautolu ke fematutakiaki. Ko e fua? “Ti fakamavehevehe e Iehova a lautolu he mena ia ke he lalolagi oti.” (Kenese 11:5-8) Ne omoi e tau tagata talaga ha Papelu ke ako e fakatonuaga kua aoga lahi. Ka fekehekeheaki e tau pulega he tagata mo e finagalo he Atua ko e “pule a Iehova to tumau ni a ia.” (Tau Fakatai 19:21) Fakaatā nakai e koe e tau fakatonuaga pihia mai i tuai ke fakaohooho e moui haau?
Ko e Goagoa he Tagata Maukoloa
Liga nakai pulega a koe ke talaga e kolo, ka e tokologa he vahā nei ne pulega ke tanaki e tau tupe loga he pege mo e fakaputu e tau koloa fakatino ke maeke ke tokotoko mitaki ka okioki mai he gahua. Ko e logonaaga pauaki he tagata ke olioli e tau fua he haana tau gahua. “Kia takitaha e tagata mo e kai, mo e inu, mo e fiafia ai ke he tau mena mitaki he hana tau gahua oti,” he tohia e Solomona. “Ko e mena kua foaki mai he Atua haia.”—Fakamatalaaga 3:13.
Kua fakalago a tautolu ki a Iehova ke he puhala ne fakaaoga aki e tautolu e mena foaki nei. Teitei 2,000 tau kua mole, ne peehi e Iesu e manatu nei ke he tau tutaki haana ke he fakatai. Ne pehē a ia: “Kua fua loga mai e fonua he taha tagata maukoloa; ti manamanatu hifo a ia, kua pehe, Ko [e] heigoa e mena ke eke e au, ha kua nakai fai mena au ke tanaki ai haku a tau mena? Ti pehe a ia, Hanai e mena ke eke e au; to ulu e au haku a tau fale saito, mo e ta fakalalahi; ti tanaki e au ki ai haku a tau fua mo e tau mena mitaki oti haku. To pehe hifo au ke he haku a agaga, Haku agaga na e, ha ha ia koe e tau mena mitaki loga kua toka mo e tau tau loga; kia nofo fakatekiteki a, ti kai a, mo e inu, mo e fiafia ai a koe.” (Luka 12:16-19) Tuga kua mauokafua e foliaga he tagata maukoloa, pihia nakai? Tuga e manu lele ne talahau fakamua, ko e Clark’s nutcracker, ko e tagata he fakatai kua tuga ke mautauteute ke lata mo e tau manako haana anoiha.
Ka kua nakai tonu e manamanatuaga he tagata. Ne matutaki e Iesu: “Ka kua tala age e Atua kia ia, Ko e goagoa na e, to ahi atu hau a moui mai ia koe ke he po a magaaho; to eke ma hai e tau mena ia ne taute e koe?” (Luka 12:20) Kua fekehekeheaki kia e talahauaga ha Iesu mo Solomona ko e tau mena mitaki ne moua mai he gahua ko e tau mena foaki mai he Atua? Nakai. Ko e heigoa e manatu ha Iesu? “Ha ha ne pihia foki,” he talahau e Iesu, “e tagata kua tanaki e tau koloa ia ia, ka e nakai maukoloa a ia ke he Atua.”—Luka 12:21.
Ne fakaako e Iesu e toloaga haana, kua manako a Iehova ki a tautolu ke manamanatu ki a Ia he taute e tautolu e tau pulega. Nukua maeke he tagata muhukoloa ke maukoloa ke he Atua he kumi e tau puhala ke tupu ke he fakamooli mahani Atua, pulotu, mo e fakaalofa. Kua fakakite he tau kupu he tagata taane e nakai fiafia ke he tau mena pihia, po ke toka hifo falu he tau fua haana he fonua ke oko he tau tagata nonofogati, po ke foaki mo poa ki a Iehova. Ko e tau tutuliaga fakaagaaga pihia mo e tau gahua foaki noa ne nakai ko e vala he moui he tagata muhukoloa. Ne takatakai ni e tau pulega haana ke he tau manako mo e tau hagahaga mitaki fakatagata haana.
Kua mailoga nakai e koe kua tokologa e tagata he vahā nei ne ha ha ai e tau mena ne tuku mua he moui ke tuga he tagata maukoloa ne fakamaama e Iesu? Pete he muhukoloa po ke nofogati a tautolu, kua mukamuka lahi ke mokulu ke he manamanatuaga velevelekoloa, he fakaatā e tau manako he moui he tau aho takitaha ke poka kehe e tau manako fakaagaaga. Ko e heigoa haau ka taute ke kalo kehe mai he matahele ia?
Pulega e Moui ‘Hagahaga Mitaki’
Nakai tuga e tagata maukoloa he fakatai a Iesu, hane liga taufetului fakatupe a koe. Pete ia, kaeke kua fai tokoua a koe, kua pulega mooli a koe ke foaki e tau koloa he moui ma e magafaoa haau, mo e ka maeke, ke moua he tau fanau haau e fakaakoaga mitaki. Kaeke kua nofo tokotaha a koe, liga kua putoia ke he tau pulega haau e kumi gahua po ke fakatumau ke he gahua haau, ke nakai fakalahi gahua a koe ke he falu. Ko e tau foliaga kua latatonu mooli anei.—2 Tesalonia 3:10-12; 1 Timoteo 5:8.
Pete he pihia, kua maeke he gahua, kai, inu—moui ke he puhala ne onoono ki ai kua hagahaga mitaki—ke taute e tagata ke nakai fakatatau mo e finagalo he Atua. Pihia fēfē? Ne pehē a Iesu: “Ka e tuga e vaha kia Noa, to eke pihia foki ka hau e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai [mailoga] e lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.”—Mataio 24:37-39.
Ato hoko e Fakapuke, kua olioli he tau tagata tokologa e mena ne onoono a lautolu ki ai ko e moui hagahaga mitaki. Ka ko e lekua ha lautolu, kua ‘nakai mailoga’ e lautolu e amaamanakiaga he Atua ke holoholo kehe e lalolagi kelea ia he fakapuke e lalolagi katoa. Nakai fakauaua ai ne manamanatu a lautolu kua nakai lagotatai e puhala moui ha Noa. Ka ko e magaaho ne hoko e Fakapuke, ko e puhala moui ha Noa mo e magafaoa haana ne eke ai mo pulotu mooli.
He vahā nei, ko e tau fakamooliaga oti kua fakakite kua momoui a tautolu he vahā he fakaotiaga. (Mataio 24:3-12; 2 Timoteo 3:1-5) Nakai leva, to “tuki malipilipi mo e fakaotioti” he Kautu he Atua e tau fakatokaaga he lalolagi nei. (Tanielu 2:44) I lalo he Kautu ia, to liliu e lalolagi ke he parataiso. To utakehe he Kautu e gagao mo e mate. (Isaia 33:24; Fakakiteaga 21:3-5) Ko e tau mena momoui oti he lalolagi to momoui fakafeheleaki mo e nakai liu ke hoge.—Salamo 72:16; Isaia 11:6-9.
Ato fai mena ka taute e Iehova, ne finagalo a ia ke he tala mitaki he Kautu ke ‘fakamatala atu ke he lalolagi oti, ke eke mo talahau ke he tau atu motu oti.’ (Mataio 24:14) He fakatatau mo e finagalo he Atua, kavi ke he fitu e miliona he Tau Fakamoli ha Iehova hane fakamatala e tala mitaki ke he 236 e motu mo e molea e fā e teau vagahau.
Ke he lalolagi, ko e puhala moui he Tau Fakamoli a Iehova kua liga matakehe he falu puhala—mo e goagoa foki. (2 Peteru 3:3, 4) Tuga a lautolu ne momoui ato hoko e Fakapuke, laulahi he tau tagata he vahā nei kua putoia ke he moui lavelave he tau aho takitaha. Kua liga kitekite a lautolu nei kua nakai lagotatai e tau tagata ne fakaheu e puhala moui ne onoono e kaufakalatahaaga ki ai ke hagahaga mitaki. Ka e mai he onoonoaga ha lautolu ne tua ke he tau maveheaga he Atua, ko e moui ne fakavē ke he fekafekauaga he Atua kua lagotatai mooli.
Ko e mena ia, kaeke ko koe kua monuina po ke nofogati po ke he vahāloto, kua pulotu ke matakite tumau ke he tau pulega haau ma e vahā anoiha ne tata mai. He taute pihia e koe, hūhū hifo, ‘Kua lagotatai nakai e tau pulega haaku mo e finagalo he Atua?’
[Fakatino he lau 11]
Ka feoka e tau pulega he tau tagata mo e finagalo he Atua, to tumau tukulagi e pule ha Iehova
[Fakatino he lau 12]
Ne kaumahala e tagata maukoloa he fakatai a Iesu he magaaho ne taute e ia e tau pulega haana ke hagaaki ke he finagalo he Atua