To Nakai Tiaki e Iehova Haana Tau Tagata Fakamooli

“Nakai tiaki foki e [Iehova] hana tau tagata [“fakamooli,” NW]; kua leoleo e ia a lautolu tukulagi.”—SALA. 37:28.

1, 2. (a) Ko e heigoa e tau mena tutupu he senetenari ke hogofuluaki F.V.N. ne kamatamata e fakamooli he tau fekafekau he Atua? (e) Ko e heigoa e tau tuaga ne tolu kua leveki e Iehova haana tau tagata fakamooli?

KO E senetenari hogofuluaki F.V.N. a ia ti ko e magaaho ke taute e fifiliaga. Ne hao fetamaki e tau magafaoa he faahi tokelau a Isaraela he latau fakamotu ha ko e tuaga tū tokotaha. Ko e patuiki kotofa foou ha lautolu, ko Ierepoamo, ne taute e tau hikiaga mafiti ke omoi e pule haana ke fakatū e lotu foou he Motu. Ne poaki a ia ke kaufakalataha katoatoa mai e tau tagata haana. Ko e heigoa ka taute he tau fekafekau tua fakamooli a Iehova? To fakamooli tumau nakai a lautolu ke he Atua ne tapuaki a lautolu ki ai? Totou afe ne taute pihia, ti leveki e Iehova a lautolu he fakatumau a lautolu ke fakamooli.—1 Patu. 12:1-33; 2 Nofo. 11:13, 14.

² Ne kamatamata e mahani fakamooli he tau fekafekau he Atua he vahā nei foki. “Kia nonofo fakalatalata a mutolu, kia mataala a mutolu,” he hataki he Tohi Tapu. “Ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.” Maeke nakai a tautolu ke kautū ‘he totoko atu a tautolu kia ia, mo e mauokafua ke he tua’? (1 Pete. 5:8, 9) Kia kumikumi a tautolu mogonei ke he falu mena tutupu pauaki ne takatakai he fakatapuaga he Patuiki ko Ierepoamo he 997 F.V.N. mo e kitia e mena ka ako e tautolu mai i ai. He tau magaaho uka lahi ia, ne matematekelea e tau fekafekau tua fakamooli a Iehova. Ne fakatapakupaku foki a lautolu ke he tau fakaohoohoaga tiaki taofiaga, he hane taute he ha lautolu a tau kotofaaga uka lahi. He tau tuaga takitaha nei, ne nakai tiaki e Iehova haana tau tagata fakamooli he magahala ia, mo e to nakai tiaki foki e ia he vahā nei.—Sala. 37:28, NW.

Hane Lauia he Favaleaga

3. Ko e ha ne nakai favale e pule he Patuiki ko Tavita?

³ Kia kumikumi fakamua a tautolu ke he tau tuaga he magaaho ne eke a Ierepoamo mo patuiki. Pehē e Tau Fakatai 29:2: “Ko e mena ka pule e tagata mahani kelea ti ooi ai e motu.” I lalo he pule he Patuiki ko Tavita i Isaraela i tuai, ne nakai ooi e tau tagata. Ne nakai mitaki katoatoa a Tavita, ka e fakamooli a ia ke he Atua mo e falanaki ki a Ia. Kua nakai pule favale a Tavita. Kua taute e Iehova e maveheaga mo Tavita, he pehē: “To fakamau e au e magafaoa hau mo e hau a kautu ke tukulagi ki mua hau; to tumau tukulagi hau a nofoaiki.”—2 Samu. 7:16.

4. Fakavē ke he heigoa e tau monuina ne moua he vahā ne pule a Solomona?

⁴ Ko e pule he tama taane a Tavita ko Solomona ne mafola mo e monuina he kamataaga nukua liga fakaata fakamitaki e Pule Meleniamu ha Keriso Iesu anoiha. (Sala. 72:1, 17) Nakai taha he tau magafaoa toko 12 ha Isaraela i tuai ne fai kakano ke totoko. Pete ia, ne fai kaupāaga e tau monuina ne olioli e Solomona mo e tau tagata haana. Ne tala age a Iehova ki a Solomona: “Kaeke ke fano ai a koe ke he haku tau fakatufono, mo e eke e koe haku a tau fakafiliaga, mo e omaoma a koe ke he haku a tau poaki oti, mo e fano ai a koe; ti fakamau ai e au kia koe haku tau kupu oti ne vagahau atu ai e au ke he matua hau ko Tavita. To nofo foki au fakalataha mo e fanau a Isaraela, ti nakai tiaki au haku motu ko Isaraela.”—1 Patu. 6:11-13.

5, 6. Ko e heigoa ne fua mai he nakai fakamooli a Solomona ke he Atua?

⁵ He vahā ne motua a Solomona, ne nakai tua fakamooli a ia ki a Iehova ti kamata ke taute e tapuakiaga fakavai. (1 Patu. 11:4-6) Fano fakahaga ai, ne nakai liu a Solomona omaoma ke he tau fakatufono a Iehova mo e tupu lahi e favale. Ne tupu lahi e mena nei ti ko e magaaho ne mole e mate haana, ne gūgū agaia e tau tagata hagaao ki a ia ke he haana tama taane mo e hukui ko Rehopoamo, ti ole ke fakamāmā e tau kavega. (1 Patu. 12:4) Tali atu fēfē a Iehova he magaaho ne nakai tua fakamooli a Solomona?

⁶ Ne talahau he Tohi Tapu ki a tautolu: “Ti ita a Iehova kia Solomona, ha kua liu kehe ai hana loto [he] Atua a Isaraela ne fakakite mai lagaua kia ia.” Ne tala age a Iehova ki a Solomona: “Kua ha ha ia koe e mena nai, ti nakai omaoma a koe ke he haku a maveheaga mo e haku tau fakatufono ne poaki atu ai e au kia koe, ko e mena ia to hēhē kehe e au e kautu ia koe, mo e ta age ai e au ke he hau a fekafekau.”—1 Patu. 11:9-11.

7. Pete he tiaki a Solomona, ne leveki fēfē e Iehova e tau tagata fakamooli Haana?

⁷ Ne fakafano atu e Iehova e perofeta ko Akia ke fakauku e tagata ka laveaki. Ko e tagata ia ka laveaki ko Ierepoamo, ko e tagata iloilo ne gahua ke he fakatufono a Solomona. Pete he fakamooli tumau a Iehova ke he maveheaga he Kautu ne taute mo Tavita, ne talia e Ia e vevehe matafakatufono he tau magafaoa toko 12. To hogofulu e magafaoa ka age ki a Ierepoamo; ua ka tokamau he mataohi he magafaoa ha Tavita, ne hukui mogonei he Patuiki ko Rehopoamo. (1 Patu. 11:29-37; 12:16, 17, 21) Ne tala age a Iehova ki a Ierepoamo: “Kaeke foki ke fanogonogo a koe ke he tau mena oti ke poaki atu e au kia koe, mo e fano a koe ke he haku tau puhala, mo e eke e koe e tau mena tonu ki mua haku, ke omaoma ke he haku tau fakatufono mo e haku a tau poaki, tuga ne eke he fekafekau haku ko Tavita; ti ha ha i ai au mo koe ti eke e au māu e magafaoa tumau, tuga ne eke ai e au ma Tavita, to foaki atu foki e au a Isaraela kia koe.” (1 Patu. 11:38) Ne fai mena a Iehova ne taute ma e tau tagata haana ti foaki e puhala ke fakatotoka a lautolu mai he favaleaga.

8. Ko e heigoa e tau kamatamata ne pehia e tau tagata he Atua he vahā nei?

⁸ Kua tupu lahi e favale mo e nakai fakafili tonu he vahā nei. “Kua pule ai e taha tagata ke he taha, ke kelea ai e ia ni,” he talahau he Fakamatalaaga 8:9. Ko e lotokai ke he tau mena fakatupe mo e puhala pule matahavala ne liga fua mai e tau matematekelea fakatupe. Ko e tau takitaki he fakatufono, pisinisi, mo e lotu kua fa fakatoka e fakafifitakiaga mahani kelea. Tuga a Lota ne tututonu, ko e tau tagata fakamooli he Atua he vahā nei kua “oti e manava [ha lautolu] he tau mahani matahavala he tau tagata hemu.” (2 Pete. 2:7) Lafi ki ai, he lali fakatekiteki a tautolu ke momoui ke he tau poakiaga mahani Atua, kua fa mahani a tautolu ke eke mo matapatu he favaleaga he tau pule fakaikaluga.—2 Timo. 3:1-5, 12.

9. (a) Ko e heigoa ne fitā he taute e Iehova ke laveaki haana tau tagata? (e) Ko e ha kua mauokafua a tautolu to fakamooli tumau a Iesu ke he Atua?

⁹ Maeke ia tautolu ke mauokafua ke he mena moolioli nei:to nakai tiaki e Iehova haana tau tagata fakamooli! Manamanatu la ke he tau lakaaga ne fitā a ia he taute ke hukui e tau pule matahavala he lalolagi. Kua fitā e fakatū e Kautu faka-Mesia he Atua ne age ki a Keriso Iesu. Ti kua teitei tuai ke teau e tau tau he pule a Iesu Keriso i luga he lagi. To nakai leva ti tamai e ia e totokaaga katoatoa ki a lautolu ne matakutaku ke he higoa he Atua. (Totou Fakakiteaga 11:15-18.) Ne fitā he fakakite e Iesu e fakamooli haana ke he Atua he hokotia ke he mate. To nakai fakaita e ia e tau tagata haana, tuga ne taute e Solomona.—Hepe. 7:26; 1 Pete. 2:6.

10. (a) Fakakite fēfē e tautolu e loto fakaaue ha tautolu ke he Kautu he Atua? (e) Ka fehagai mo e tau kamatamata, ko e heigoa ka mauokafua a tautolu ki ai?

¹⁰ Ko e Kautu he Atua ko e fakatufono mooli ka utakehe e tau favaleaga oti kana. Kua tumau e fakamooli ha tautolu ki a Iehova ko e Atua mo e haana tau fakatokaaga. He mauokafua katoatoa ke he Kautu, kua tiaki e tautolu e tau mahani kolokolovao mo e tutuli fakamakamaka ke he tau gahua mitaki. (Tito 2:12-14) Kua eketaha a tautolu ke nakai ilaila mai he lalolagi nei. (2 Pete. 3:14) Pete ne tau kamatamata ne fehagai mo tautolu mogonei, kua maeke ia tautolu ke mauokafua to puipui e Iehova a tautolu mai he hagahaga kelea fakaagaaga. (Totou Salamo 97:10.) Lafi ki ai, ne fakamafana he Salamo 116:15 a tautolu: “Ko e mena lahi ni ke he manatu a Iehova ka mate hana tau tagata [“fakamooli,” NW].” Kua uho lahi e tau fekafekau a Iehova ki a ia mo e to nakai fakaatā e ia a lautolu ke mamate ko e matakau.

Hane Fakatapakupaku ke he Tau Fakaohoohoaga Tiaki Taofiaga

11. Ko e puhala fe ati nakai fakamooli a Ierepoamo?

¹¹ Na kua lata e pule he Patuiki ko Ierepoamo ke tamai taha totokaaga ke he tau tagata he Atua. Ka e nakai pihia, ko e tau gahua haana kua kamatamata foki e fakamooli ha lautolu ke he Atua. He nakai makona ke he lilifu mo e kotofaaga ne fitā he age ki a ia, ne kamata a Ierepoamo ke kumi puhala ke fakamalolō aki e tuaga haana. “Kaeke ke o hake e motu nai ke eke poa ai ke he fale a Iehova i Ierusalema,” he manatu e ia, “ti liliu atu ai e tau loto he motu nai ke he iki ha lautolu ko Rehopoamo ko e patuiki a Iuta, ti kelipopo e lautolu au, mo e liliu atu ai a lautolu kia Rehopoamo ko e patuiki a Iuta.” Ti fakatū e Ierepoamo e lotu foou ne fakavē ke he ua e punua povi auro. “Ti tuku e ia taha i Peteli, mo e tuku ai e ia taha i Tano. Ti eke e mena na mo hala; ha kua o atu e motu ki mua he taha ki Tano. Ti ta e ia e tau fale ke he tau mena tokoluga; ti kotofa e ia falu mai he motu oti ke eke mo tau ekepoa, nakai ko e fanau a Levi a lautolu.” Ne fafati foki e Ierepoamo e aho haana ni he “galue ma e fanau a Isaraela,” ti hake a ia “ke he fatapoa ke huhunu ai e mena manogi.”—1 Patu. 12:26-33.

12. Ko e heigoa ne taute he tau tagata fakamooli he Atua he kautu he faahi tokelau he magaaho ne fakatū e Ierepoamo e tapuakiaga punua povi i Isaraela?

¹² Ko e heigoa ka taute he tau tagata fakamooli he Atua he kautu he faahi tokelau mogonei? Tuga ni e tau tupuna tua fakamooli ha lautolu, ko e tau Levi ne nonofo he tau maaga ne foaki age ki a lautolu i loto he matakavi he kautu he faahi tokelau, ne tali fakamafiti. (Esoto 32:26-28; Nume. 35:6-8; Teu. 33:8, 9) He toka hifo e tau tufaaga ha lautolu, ne hiki atu e lautolu e tau magafaoa ke he faahi toga ki Iuta, ke maeke ia lautolu ke matutaki e tapuaki ki a Iehova mo e nakai tauhele. (2 Nofo. 11:13, 14) Ko e falu Isaraela ne nonofo fakakū i Iuta ne fifili ke nonofo tumau i ai ka e nakai liliu atu ke he maaga ha lautolu. (2 Nofo. 10:17) Ne kitekite a Iehova ki ai kua hafagi tumau e puhala ke liliu ke he tapuakiaga mooli ke maeke he falu he tau atuhau a mui mai he kautu he faahi tokelau ke tiaki e tapuakiaga punua povi mo e liliu ki Iuta.—2 Nofo. 15:9-15.

13. He vahā foou nei, kamatamata fēfē he tau fakaohoohoaga tiaki taofiaga e tau tagata he Atua?

¹³ Ne fakamatakutaku he tau tagata tiaki taofiaga mo e tau fakaohoohoaga ha lautolu e tau tagata he Atua he vahā nei. Ne lali falu pule ke fakatū e lotu ha lautolu he Motu, ti peehi e tau tagata he motu ha lautolu ke muitua ki ai. Ko e tau akoako Kerisitenitome mo lautolu foki ne fakaikaluga nukua lali ke moua e tuaga ekepoa fakaagaaga. Pete ia, kua moua ni e tautolu mai he tau Kerisiano fakamooli a lautolu ne fakauku mooli, ko lautolu ko e ‘tau patuiki ekepoa.’—1 Pete. 2:9; Fakakite. 14:1-5.

14. Ko e heigoa e tali ha tautolu ke lata mo e manamanatu tiaki taofiaga?

¹⁴ Tuga e tau Levi tua fakamooli i tuai he senetenari ke hogofuluaki F.V.N., ko e tau tagata fakamooli he Atua he vahā nei kua nakai fakahehē he tau manatu tiaki taofiaga. Ko lautolu ne fakauku mo e tau fekafekau Kerisiano ha lautolu kua mafiti ke kalo kehe mo e vihiatia katoatoa e tau manatu tiaki taofiaga. (Totou Roma 16:17.) He omaoma fakamakai a tautolu ke he tau tui ne mua ke he tau tuaga fakatufono mo e fakatumau ke tū uho he tau taufetoko he lalolagi, kua pipiki ni e fakamooli ha tautolu ke he Kautu he Atua. (Ioane 18:36; Roma 13:1-8) Ne tiaki e tautolu e tau talahauaga fakavai ha lautolu ne talahau kua fekafekau ke he Atua ka e nakai fakalilifu ki a Ia ke he ha lautolu a tau mahani.—Tito 1:16.

15. Ko e ha kua lata e “fekafekau fakamoli mo e loto matala” ke moua e mahani fakamooli ha tautolu?

¹⁵ Manamanatu foki kua taute e Iehova e puhala ke maeke ia lautolu ne loto fakamooli ke o mai kehe he lalolagi kelea, he vagahau fakatai, ke he parataiso fakaagaaga ne tufuga e ia. (2 Kori. 12:1-4) Mo e tau loto kua puke ke he fakaaue, kua nonofo fakatata a tautolu ke he “fekafekau fakamoli mo e loto matala, kua kotofa he hana iki ke pule ke he hana tau fekafekau mo e age kia lautolu e tau mena kai ke he tau magaaho [tonu].” Ko e fekafekau nei ne kotofa e Keriso “hana tau mena oti” ki ai. (Mata. 24:45-47) Ko e mena ia, pete ne nakai maama katoatoa e tautolu e falu tuaga ne taute he vahega fekafekau, nakai fai kakano ma tautolu ke tiaki ai po ke liliu ke he lalolagi a Satani. Ka e, to fakalagalaga he mahani fakamooli a tautolu ke fakatokolalo mo e tatali ki a Iehova ke fakahakohako e tau matakupu.

Hane Taute e Tau Kotofaaga ne Tuku Age he Atua

16. Ko e heigoa e kotofaaga ne moua he perofeta mai i Iuta?

¹⁶ Ne fakahala e Iehova a Ierepoamo ha ko e tau puhala tiaki taofiaga haana. Ne kotofa e ia e perofeta mai i Iuta ke fina atu ke he faahi tokelau ki Peteli ki a Ierepoamo, hane gahua ai he fatapoa haana. Kua talahau he perofeta e fekau he fakafiliaga matematekelea lahi ki a Ierepoamo. Nakai fakauaua ai, ko e kotofaaga uka lahi a ia.—1 Patu. 13:1-3.

17. Puipui fēfē e Iehova e fekafekau haana?

¹⁷ Ne ita lahi mahaki a Ierepoamo he logona e fakafiliaga a Iehova. Ne fakaolo e ia e lima haana ke he hukui he Atua, ti hea fakatūtū ke he tau tagata ne tata mai: “Kia tapaki a e mutolu a ia.” He magaaho ia ni, ato taute e lautolu taha mena ke he perofeta, ne “mate ai hana lima ne fakaolo age e ia kia ia, kua nakai maeke ke liuaki mai kia ia. Ti [hēhē] ai e fatapoa, ti maligi ai e tau efuefu afi mai he fatapoa.” Ne omoi a Ierepoamo ke ole ke he perofeta ke olelalo ki a Iehova mo e liogi ke liu maulu haana lima. Ati liogi ai e perofeta mo e liu e lima mitaki. Nukua puipui e Iehova e fekafekau haana mai he hagahaga kelea.—1 Patu. 13:4-6.

18. Leveki fēfē e Iehova a tautolu he fekafekau atu a tautolu ki a ia mo e nakai matakutaku?

¹⁸ He fakalataha fakamooli a tautolu ke he gahua fakamatala he Kautu mo e taute tutaki, kua feleveia a tautolu he falu magaaho mo e tali kelea, po ke favale. (Mata. 24:14; 28:19, 20) Ka kia nakai fakaatā e tautolu e hopoate neke vihiatia mai, ke fakalolelole e makutu ha tautolu ke he gahua he fonua. Tuga e perofeta ne nakai fai higoa he vahā a Ierepoamo, kua “nakai matakutaku a tautolu, ka e fekafekau a tautolu kia [Iehova], mo e fakatapu [po ke fakamooli].”a (Luka 1:74, 75) Pete he nakai amanaki a tautolu ke moua e lagomataiaga fakamana he vahā nei, ne leveki mo e lalago agaia e Iehova a tautolu ko e Tau Fakamoli haana, he puhala he agaaga tapu mo e tau agelu haana. (Totou Ioane 14:15-17; Fakakiteaga 14:6.) To nakai tiaki he Atua a lautolu ne fakatumau ke talahau mo e nakai matakutaku e kupu haana.—Filipi 1:14, 28.

To Leveki e Iehova Haana Tau Tagata Fakamooli

19, 20. (a) Ko e ha kua mafanatia a tautolu to nakai tiaki e Iehova a tautolu? (e) Ko e heigoa e tau hūhū ka fakatutala ke he vala tala ka mui mai?

¹⁹ Ko Iehova ko e ha tautolu a Atua fakamooli. Ko Ia ne “fakamoli ke he tau gahua oti kana hana.” (Sala. 145:17, NW) Ti fakamafana mai he Tohi Tapu ki a tautolu: “[To] leveki foki e ia e tau puhala he hana tau tagata [“fakamooli,” NW].” (Fakatai 2:8) Ka feleveia mo e tau kamatamata po ke tau manatu tiaki taofiaga po ke taute e kotofaaga uka lahi, maeke e tau tagata fakamooli he Atua ke mauokafua ke he levekiaga mo e lalagoaga a Iehova.

²⁰ Kua lata ia tautolu takitokotaha mogonei ke fakaata e mena nai: Ko e heigoa ka lagomatai au ke fakatumau e fakamooli haaku ki a Iehova pete ne tau mena uka po ke tau kamatamata ne liga tupu ki a au? Talahau foki pehē, maeke fēfē ia au ke fakamalolō e mahani fakamooli haaku ke he Atua?

[Matahui Tala]

To Tali Fēfē e Koe?

• Fakakite fēfē e Iehova kua nakai tiaki e ia haana tau tagata fakamooli ka feleveia mo e favaleaga?

• Lata ke tali atu fēfē a tautolu ke he tau tagata tiaki taofiaga mo e tau manatu ha lautolu?

• Leveki fēfē e Iehova haana tau tagata fakamooli he taute e lautolu e fekafekauaga faka-Kerisiano?

[Mepe/Fakatino he lau 5]

(Ma e puhala katoa ne tohi aki, kikite e tohi)

KAUTU HE FAAHI TOKELAU (Ierepoamo)

Tano

SIKEMA

Peteli

KAUTU HE FAAHI TOGA (Rehopoamo)

IERUSALEMA

[Fakatino]

Nakai tiaki e Iehova e tau tagata fakamooli haana he magaaho ne fakatū e Ierepoamo e tapuakiaga punua povi

[Fakatino he lau 3]

Fai kaupāaga e tau monuina ne olioli e Solomona mo e tau tagata haana