Fakatumau e Fakamooli mo e Loto ne Katoatoa
“To fano au ke he tonu mai ia koe, kia fakamau e koe hoku loto ke matakutaku ke he hāu a higoa.”—SALA. 86:11.
1, 2. (a) Hagaao ke he Salamo 86:2, 11, ko e heigoa ka lagomatai a tautolu ke fakatumau e tua fakamooli ki a Iehova he fehagai ke he tau mena uka po ke tau kamatamata? (e) Magaaho fe kua lata ke feaki e loto fakamooli?
KO E ha e falu Kerisiano ne leva e tua fakamooli pete he tuku ke he tau fale puipui po ke favale ki ai, nukua hoko ke he magaaho fakamui ti mahala ke he velevelemena? Ko e tali kua lauia ai e tau loto ha tautolu—ko e tagata mooli he loto. Ne matutaki he Salamo 86 e mahani fakamooli ke he loto ne fakamau fakalataha; ko e loto kua katoatoa, ne mauokafua. “Kia leveki e koe au; ha ko e tagata [“fakamooli,” NW] au,” he liogi he salamo a Tavita. “Ko koe na, haku Atua na e, kia fakamoui e koe hāu a fekafekau kua tua kia koe.” Ne liogi foki a Tavita: “To fano au ke he tonu mai ia koe, kia fakamau [po ke katoatoa] e koe hoku loto ke matakutaku ke he hāu a higoa.”—Sala. 86:2, 11.
2 Ka nakai falanaki katoatoa a tautolu ki a Iehova mai he tau loto, to moumou he falu tupetupe mo e falu manako e mahani fakamooli ha tautolu ke he Atua mooli. Ko e tau manako lotokai kua tuga e tau pomu ne tanu i lalo he puhalatū ne ō hui a tautolu. Pete ne liga tumau a tautolu ke tua fakamooli ki a Iehova he tau tuaga kamatamata, maeke ia tautolu ke mokulu ke he tau matahele po ke tau lagatau ha Satani. Kua latatonu ha ia ke feaki e tautolu e loto fakamooli ki a Iehova mogonei, ato tutupu e tau mena uka po ke tau kamatamata ki a tautolu! “Kia mua he leveki e koe e loto hāu ke he tau mena oti kua leveki ai; ha kua tupu mai ai e mahani” he talahau he Tohi Tapu. (Fakatai 4:23) Maeke ia tautolu ke ako e tau fakaakoaga aoga lahi ke he mena nei mai he mena ne tupu ke he perofeta i Iuta ne fakafano atu e Iehova ke he Patuiki ko Ierepoamo i Isaraela.
“To Ta Atu Foki e Au e Mena Fakaalofa kia Koe”
3. Tali atu fēfē a Ierepoamo ke he fekau fakafili ne fakailoa he perofeta he Atua?
3 Manamanatu ke he tala. Kua fakailoa laia he tagata he Atua e fekau mania lahi ke he Patuiki ko Ierepoamo, ne fakatū e tapuakiaga punua povi he faahi tokelau he kautu he magafaoa tokohogofulu ha Isaraela. Ne ita lahi mahaki e patuiki. Ne poaki e ia e tau tagata taane haana ke tapaki e fekafekau. Ka kua fakalataha a Iehova mo e fekafekau haana. Ati mate agataha e lima he patuiki ne fakaolo atu he ita, ti hēhē e fatapoa ne fakaaoga ma e tapuakiaga fakavai. Ne amanaki ni e aga ha Ierepoamo ti hiki. Ne olelalo a ia ke he tagata he Atua: “Kia ole atu ā ki mua a Iehova hāu a Atua, mo e liogi atu e koe maku ke liu mitaki ai haku a lima.” Ne liogi e perofeta, ti liu mitaki ai e lima he patuiki.”—1 Patu. 13:1-6.
4. (a) Ko e ha ne kamatamata mooli e foakiaga he patuiki ke he mahani fakamooli he perofeta? (e) Ko e heigoa e tali he perofeta?
4 Ne tala age a Ierepoamo ke he tagata he Atua mooli: “Hau ke o a taua mo au ke he fale haku, ke okioki ai, to ta atu foki e au e mena fakaalofa kia koe.” (1 Patu. 13:7) Ko e heigoa he perofeta ka taute mogonei? To talia kia e ia e mahani fakamokoi he patuiki he mole e fakailoa atu he fekau fakafili ki a ia? (Sala. 119:113) Po ke lata kia a ia ke nakai talia e uiina he patuiki, pete ne tuga kua tokihala e patuiki? Ne mautū mooli a Ierepoamo ke maeke ke foaki fakamokoi e tau mena fakaalofa tauuka ma e tau kapitiga haana. Kaeke ke fai manako fakagalogalo e perofeta he Atua ma e tau koloa he tino, to liga kamatamata lahi mahaki e foakiaga he patuiki. Ka kua poaki a Iehova ke he perofeta: “Aua neke kai mena ai a koe, ti ua inu ai foki a koe ha maga vai, ti ua liu mai a koe ke he puhala ne fina atu ai a koe.” Ti tali atu e perofeta mo e mauokafua: “Kaeke ke ta mai e koe e maga ne veveheua aki e tau mena ha ha he fale hāu, nakai ni ō a taua mo koe, ti nakai kai mena ai au, ti nakai inu ai e au e maga vai ke he mena nai.” Ti fano e perofeta mai i Peteli he taha puhala. (1 Patu. 13:8-10) Ko e heigoa e fakaakoaga ke he fifiliaga he perofeta ne ako e tautolu hagaao ke he loto fakamooli?—Roma 15:4.
‘To Lata Ai’
5. Eke fēfē e velevelemena mo lekua ke he mahani fakamooli?
5 Tuga kua nakai eke e velevelemena mo lekua ke he mahani fakamooli, ka kua lekua mooli. Kua falanaki kia a tautolu ke he maveheaga a Iehova ke foaki e tau mena kua lata mooli mo tautolu? (Mata. 6:33; Hepe. 13:5) He nakai tutuli katoatoa e falu mena “tokotoko mitaki” he moui ne kua nakai maeke ia tautolu ke moua he mogonei, to momoui nakai a tautolu ka nakai fai koloa pihia? (Totou Filipi 4:11, 12.) Kua kamatamata kia a tautolu ke fakahui e tau kotofaaga fakateokarasi ke maeke ke moua e tau mena ne manako a tautolu ki ai mogonei? Tuku fakamua nakai e tautolu e fekafekauaga fakamooli ki a Iehova he tau momoui ha tautolu? To falanaki lahi mahaki e tau tali ha tautolu ke he loto katoa, po ke nakai loto katoa ha tautolu ke he fekafekauaga he Atua. “Ko e koloa lahi ni haia,” he tohi he aposetolo ko Paulo, ko e “mahani Atua mo e fakamate [po ke mahani fakalatalata]. . . . Ha kua nakai ta mai e tautolu ha mena taha ke he lalolagi, ti iloa maliali foki e tautolu nakai maeke ni ke uta kehe ai ha mena. Kaeke kua moua e tautolu e tau mena kai, mo e tau mena ke fakatapulu ai, to lata ia kia tautolu.”—1 Timo. 6:6-8.
6. Ko e heigoa e “tau mena fakaalofa” kua liga foaki ki a tautolu, mo e ko e heigoa ka lagomatai a tautolu ke fifili kua lata nakai ke talia ai?
6 Ma e fakatai, liga foaki mai he takitaki gahua ki a tautolu e holo hake he gahua mo e totogi mitaki mo e falu aoga foki. Po ke liga mailoga e tautolu kua maeke ke lahi e tau palepale fakatupe ka moua ka hiki atu ke he taha motu po ke matakavi ke kumi gahua. Fakamua, kua tuga ko e fakamonuina mai ia Iehova e tau foakiaga pihia. Ato taute e tautolu e fifiliaga ke he tau mena ia, nakai kia lata ia tautolu ke kumikumi hifo ke he tau fatuakiloto ha tautolu? Ko e matapatu hūhū kua lata ke manamanatu ki ai a tautolu, “To lauia fēfē e fakafetuiaga haaku mo Iehova ha ko e fifiliaga ne taute e au?”
7. Ko e ha kua aoga ke taaki kehe e tau manako velevelemena?
7 Ne fakatupu fakalahi ni ki mua he fakatokatokaaga a Satani e velevelemena. (Totou 1 Ioane 2:15, 16.) Ko e foliaga he Tiapolo ke fakahehē e tau loto ha tautolu. Ko e mena ia, kua lata ia tautolu ke mataala ke kitia mo e taaki kehe e tau manako velevelemena he tau loto ha tautolu. (Fakakite. 3:15-17) Ne mukamuka lahi ia Iesu ke tiaki e foakiaga ha Satani he tau kautu oti kana he lalolagi. (Mata. 4:8-10) Ne hataki e ia: “Kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai.” (Luka 12:15) To lagomatai he mahani fakamooli a tautolu ke falanaki ki a Iehova ka e nakai ki a tautolu ni.
Ko e Perofeta Fuakau ne ‘Pikopiko ki a Ia’
8. Kamatamata fēfē e mahani fakamooli he perofeta he Atua?
8 Nakai fai lekua e perofeta he Atua ane fakatumau a ia ke he fenoga haana ki kaina. Ka e nakai leva lahi, ne fehagai a ia mo e taha kamatamata foki. “Ne nofo i Peteli taha perofeta ko e fuakau,” he talahau he Tohi Tapu, “ti o age hana tau tama tane mo e tala age kia ia” e tau mena oti ne fitā he tutupu he aho ia. He logona e tau mena oti ia, ne ole e fuakau taane ki a lautolu ke fakanofoa e asini ma haana ke liga maeke ia ia ke moua atu e perofeta he Atua. Nakai leva ai, ne moua e ia e perofeta ne okioki i lalo he akau lahi mo e pehē: “Hau ke o a taua mo au ke he fale haku, ke taumafa mena ai a koe.” He magaaho ne nakai talia he tagata he Atua mooli e uiina, ne pehē e fuakau: “Ko e perofeta foki au tuga na koe; kua vagahau mai foki e agelu kia au ke he finagalo a Iehova, kua pehe mai, Kia liuaki mai e koe a ia fakalataha mo koe ke he fale hau, ke kai mena ai a ia, mo e inu ai a ia e maga vai.” Ti pehē e tau Tohiaga Tapu: “Ka e pikopiko a ia kia ia [perofeta he Atua].”—1 Patu. 13:11-18.
9. Ko e heigoa ne talahau he tau Tohiaga Tapu hagaao ke he tau tagata taute lagatau, ti ko hai ne fakamamahi e lautolu?
9 Ko e heigoa ni e logonaaga he fuakau taane, ne pikopiko a ia. Liga ko e perofeta tua fakamooli ha Iehova e fuakau taane he taha vahā. Ka ko e mogonei, kua fakavaia e mena haana ne taute. Ne totoko malolō he Tohi Tapu e mahani ia. (Totou Tau Fakatai 3:32.) Ko lautolu ne eke lagatau ne nakai ni fakamamahi fakaagaaga ki a lautolu ka e fa fakahagahaga kelea foki e falu.
‘Ti Liliu Age a Ia’ mo e Fuakau Taane
10. Tali atu fēfē e perofeta he Atua ke he uiina he fuakau taane, ti ko e heigoa e fua?
10 Kua lata e perofeta mai i Iuta ke iloa e lagatau he fuakau. Nukua maeke ia ia ke hūhū hifo, ‘Ko e ha ne fakafano e Iehova e agelu ke tala age ke he taha tagata e tau fakaakoaga foou ma haaku?’ Na maeke he perofeta ke hūhū ki a Iehova ke fakamaama e fakaakoaga, ka e nakai fakakite mai he tau Tohiaga Tapu na taute pihia e ia. Ka e, “liliu age ai a laua [fuakau taane] mo ia, ke he fale hana, ke kai mena ai a ia, mo e inu ai a ia e maga vai.” Ne nakai fiafia a Iehova. He magaaho ne matutaki atu e perofeta ne mahala ke he lagatau, ke he fenoga haana ki Iuta, ne moua he leona a ia mo e tamate. Ko e fakahikuaga kelea lahi ha ia ke he matagahua fakaperofeta haana!—1 Patu. 13:19-25.a
11. Ko e heigoa e fakafifitakiaga mitaki ne fakatoka e Akia?
11 He taha faahi, ko e perofeta ko Akia, ne fakafano atu ke fakauku a Ierepoamo ke eke mo patuiki, ne fakatumau ke tua fakamooli ti hoko ke he vahā motua haana. He magaaho ne fuakau mo e matapouli a Akia, ne fakafano atu e Ierepoamo e hoana haana ke hūhū ki a Akia hagaao ke he haohao mitaki he tama taane ha laua ne gagao. Ne fitā he talahau fakamalolō e Akia to mate e tama taane a Ierepoamo. (1 Patu. 14:1-18) Mai he tau monuina loga foki ne moua e Akia ko e kotofaaga ke fai vala ke he Kupu omoomoi he Atua. Puhala fe? Ne fakaaoga e Esera ko e ekepoa e tau tohi ha Akia he magaaho fakamui ke eke mo fakavēaga he tau vala tala.—2 Nofo. 9:29.
12-14. (a) Ko e heigoa e fakaakoaga kua ako e tautolu mai he mena ne putoia ai e perofeta fuata? (e) Fakamaama e latatonu ke manamanatu fakamitaki mo e liogi ke he fakatonuaga ne fakavē ke he Tohi Tapu ne talahau he tau motua.
12 Ne nakai talahau he Tohi Tapu e kakano ne nakai kumi atu e perofeta fuata ki a Iehova ato fuluhi a ia ke kai mo e inu mo e tagata fuakau. Kua liga tala age kia he fuakau taane e mena ne manako e perofeta fuata ke logona? Ko e heigoa e fakaakoaga he mena ia ma tautolu? Kua lata ia tautolu ke talia katoatoa e tonutika he tau poakiaga a Iehova. Ti kua lata ia tautolu ke eketaha ke mumuitua ki ai, pete ne tau mena tutupu.
13 Ne logona ni he falu e tau mena ne manako a lautolu ke logona he magaaho ka hoko ke he fakatonuaga. Ma e fakatai, kua liga foaki ke he tagata fakailoa e gahua ne liga fōfō e tau magaaho haana ne kua lata ke fakalataha mo e magafaoa mo e tau matagahua fakateokarasi. Ne liga ole a ia ke he motua ma e tomatomaaga. Liga kamata he motua e talahauaga haana he talahau kua nakai ha ha a ia he tuaga ke tala age ke he matakainaga taane e puhala ke lalago aki e magafaoa haana. Ti liga matutaki e motua ke fakatutala mo e matakainaga taane ke he tau hagahaga kelea fakaagaaga kua putoia he talia e gahua ne foaki age ki a ia. To manatu ni kia he matakainaga taane e talahauaga fakamua he motua, po ke to manamanatu fakahokulo a ia ke he talahauaga ke uaaki? Kua lata mooli e matakainaga taane ke fifili e mena kua mitaki lahi mahaki ma e moui fakaagaaga haana.
14 Manamanatu ke he taha tuaga foki. Kua liga hūhū e matakainaga fifine ke he motua kua lata kia a ia ke nonofo kehekehe mo e taane nakai tua haana. Nakai fakauaua to fakamaama age he motua, ko e nonofo fakalataha po ke mavehevehe, ko e fifiliaga ni he matakainaga fifine a ia ke taute. Ti maeke a ia mogoia ke fakatutala ke he fakatonuaga he Tohi Tapu hagaao ke he matakupu. (1 Kori. 7:10-16) To manamanatu fakahokulo nakai e matakainaga fifine ke he mena ne talahau he motua? Po kua fitā he mau e manatu haana ke tiaki e taane haana? He taute he matakainaga fifine e fifiliaga haana, to pulotu a ia he manamanatu mo e liogi ke he fakatonuaga ne fakavē ke he Tohi Tapu.
Kia Fakatokolalo
15. Ko e heigoa kua ako e tautolu mai he hehē he perofeta he Atua?
15 Ko e heigoa foki kua ako e tautolu mai he hehē he perofeta mai i Iuta? Pehē e Tau Fakatai: “Kia [falanaki] a koe kia Iehova mo e hāu a loto katoa; ka e aua neke falanaki a koe ke he hāu a pulotu.” He nakai fakatumau ke tua ki a Iehova tuga ne taute e ia fakamua, he magaaho nei ne falanaki e perofeta mai i Iuta ke he fifiliaga ni haana. Ne mate a ia ti galo e higoa mitaki haana mo e Atua ha ko e hehē ne taute e ia. Kua peehi malolō ha ia he mena nei ne tupu ki a ia e aoga he fekafekau fakatokolalo mo e fakamooli ki a Iehova!
16, 17. Ko e heigoa ka lagomatai a tautolu ke fakamooli tumau ki a Iehova?
16 Ko e logonaaga lotokai he tau loto ha tautolu kua hihiga ke tataki kehe a tautolu. “Kua mua ke he tau mena oti e loto he fakavai, ti gagao lahi ni a ia.” (Iere. 17:9) Ke fakamooli tumau ki a Iehova, kua lata ia tautolu ke fakatumau ke eketaha ke aaki kehe e tagata tuai fakalataha mo e hihiga ke he fakaikaluga mo e tua ki a ia ni. Ti kua latatonu ia tautolu ke tapulu ke he tagata foou, “kua eke ke lata mo e Atua, ke he tututonu mo e mahani mitaki ke fakamoli ai.”—Totou Efeso 4:22-24.
17 “Ha ha i ai e iloilo kia lautolu kua fakatokolalo,” he talahau he Tau Fakatai 11:2. Ko e tua fakatokolalo ki a Iehova kua lagomatai a tautolu ke fakamamao he taute e tau hepehepe kelea muikau. Ma e fakatai, kua mukamuka lahi e fakalolelole ke fakatauhele e fifiliaga ha tautolu. (Fakatai 24:10) Liga mategūgū a tautolu he taute he falu matagahua fakaagaaga mo e kamata ke logona kua lahi tuai e mena ne taute e tautolu he tau tau kua mole, ti manamanatu mogoia kua hoko tuai e magaaho ke hahamo he falu e tau matagahua. Po ke liga manako a tautolu ke moui “tokotoko mitaki.” Ka ko e ‘eke taha a tautolu’ mo e “fakamakai nakai noa ke he gahua he Iki” to puipui e tau loto ha tautolu.—Luka 13:24; 1 Kori. 15:58.
18. Ko e heigoa ha tautolu ka taute ka nakai iloa e tautolu e fifiliaga kua lata?
18 He falu magaaho, kua liga lata ia tautolu ke taute e tau fifiliaga uka, ka e liga nakai kitia maali e puhala hako ke taute aki. To kamatamata kia a tautolu mogoia ke taute ne tautolu e tau matafekau ha tautolu? Kaeke ko tautolu he tau tuaga pihia, to pulotu a tautolu ke ole ki a Iehova ke lagomatai a tautolu. “Kaeke ha ha ia mutolu taha kua nakai fai iloilo” he talahau e Iakopo 1:5, “kia ole atu a ia ke he Atua, ko ia kua foaki mai mo e totonu ke he tau tagata oti.” To foaki mai he ha tautolu a Matua he lagi e agaaga tapu kua lata mo tautolu ke maeke ia tautolu ke taute e tau fifiliaga mitaki.—Totou Luka 11:9, 13.
Kia Eketaha ke Fakamooli Tumau
19, 20. Ko e heigoa ha tautolu kua lata ke eketaha ke taute?
19 He tau tau matematekelea he magaaho ne haga kehe a Solomona mai he tapuakiaga mooli, ne kamatamata lahi e mahani fakamooli he tau fekafekau he Atua. Nukua mooli ai ne tokologa kua fakahui ke he tau puhala kehekehe. Ka e fai agaia ne fakamooli tumau ki a Iehova.
20 He tau aho takitaha, kua fehagai a tautolu mo e tau fifiliaga ne kamatamata e mahani fakamooli ha tautolu. Maeke foki ia tautolu ke fakakite e tua fakamooli ha tautolu. Kia matutaki a tautolu ke fakamooli tumau ki a Iehova he loto katoa a tautolu, mo e mauokafua katoatoa to fakatumau a ia ke fakamonuina e tau tagata fakamooli haana.—2 Samu. 22:26.
[Matahui Tala]
a Nakai talahau he Tohi Tapu na tamate e Iehova e perofeta fuakau.
To Tali Fēfē e Koe ?
• Ko e ha kua latatonu ke gahua a tautolu ke taaki kehe e tau manako velevelemena he tau loto ha tautolu?
• Ko e heigoa ka lagomatai a tautolu ke fakatumau ke fakamooli ki a Iehova?
• Maeke fēfē he fakatokolalo ke lagomatai a tautolu ke fakamooli tumau ke he Atua?
[Tau Fakatino he lau 9]
Uka kia ia koe ke totoko e tau kamatamata?
[Tau Fakatino he lau 10]
To manamanatu nakai a koe mo e liogi ke he fakatonuaga ne fakavē ke he Tohi Tapu?