Fakaheke a Iehova he Fakakite e Fakalilifu

“Ko e hana [Iehova] tau gahua ko e tau mena haia, ke [“fakalilifu,” NW] ki ai, mo e tau mena fulufuluola.”—SALA. 111:3.

1, 2. (a) To fakamaama fēfē e koe e “lilifu”? (e) Ko e heigoa e tau hūhū ka fakatutala ki ai he vala tala nei?

HE TALA AGE ke fakamaama e kupu “fakalilifu,” ne tali mafiti a Madison ne hogofulu e tau, “Tui he tapulu mitaki.” Ne liga nakai iloa he tama fifine tote ia na tutala e Tohi Tapu hagaao ke he Atua kua ‘fakatapulu ke he lilifu.’ (Sala. 104:1) Ma e tau tagata, ke fakatātā e lilifu he falu magaaho kua putoia e tapulu kua gali. Tuga anei, ne manako e aposetolo ko Paulo ke he tau fifine Kerisiano ke “taute e lautolu a lautolu ke he tau tapulu kua gali, mo e maimaina mo e mahani fakalatalata; aua neke taute mo e lauulu fili, po ke auro, po ke tau penina, po ke tapulu fakafua lahi.” (1 Timo. 2:9) Ka ko e mahani fakalilifu ne fakaheke ke he ‘lilifu mo e fulufuluola’ a Iehova kua mua atu ke he tau mena ia.—Sala. 111:3.

² I loto he Tohi Tapu, ko e kupu Heperu ma e “lilifu” kua fakaliliu foki ko e “fulufuluola,” “mua ue atu,” “fakamonū,” mo e “fakaheke.” Hagaao ke he taha tohi fakamaama kupu, ko e “lilifu” ko e “mahani po ke tuaga ne latatonu, fakaheke, po ke matalahi.” Ti nakai fai tagata ne latatonu ke moua e fakahekeaga mo e matalahi mua ue atu ka ko Iehova ni. Ha ko e tau fekafekau tukulele haana, kua lata ia tautolu ke fakalilifu e tau vagahau mo e tau gahua. Ko e ha mogoia ne maeke he tau tagata ke fakakite e lilifu? Ti kua kitia fēfē e lilifu mo e fulufuluola a Iehova? Kua lata ke lauia fēfē a tautolu he lilifu he Atua? Ko e heigoa ne maeke ia Iesu Keriso ke fakaako ki a tautolu hagaao ke he puhala ke fakakite e mahani nei? Ti fakakite fēfē e tautolu e lilifu mahani Atua?

Kakano ne Fakakite e Tautolu e Lilifu

3, 4. (a) Kua lata ke tali fēfē a tautolu ke he lilifu ne foaki mai ki a tautolu? (e) Ko hai ne tuhi fakaperofeta e Salamo 8:5-9 ki ai? (Kikite e matahui tala.) (i) Ko hai ne foaki e Iehova e lilifu ki ai he vahā i tuai?

³ Ha kua eke a tautolu ke he fakatai he Atua, kua maeke he tau tagata oti kana ke fakakite e lilifu. Ne fakalilifu e Iehova e tagata fakamua he kotofa a ia mo leveki he lalolagi. (Kene. 1:26, 27) Pete he mole e kaumahala he tagata mai he mitaki katoatoa, ne liu a Iehova talahau e matagahua he tagata hagaao ke he lalolagi. Ti “fakafoufou” agaia he Atua e tau tagata aki e lilifu. (Totou Salamo 8:5-9.)a Ko e lilifu ne foaki ki a tautolu kua lata ke tali lilifu atu foki—he fakamonū e higoa mua ue atu a Iehova ke he puhala fakaheke mo e lilifu.

⁴ Ne fafati pauaki e Iehova e lilifu ki a lautolu ne taute e fekafekau tapu ki a ia. Ne fakalilifu he Atua a Apelu he talia e poa haana, ka e tiaki e poa he matakainaga haana ko Kaino. (Kene. 4:4, 5) Ne hataki ki a Mose ke ‘tuku atu taha maaga he haana a lilifu’ ki a Iosua, ko e tagata ka hukui a ia ke takitaki e tau Isaraela. (Nume. 27:20) Hagaao ke he tama a Tavita ko Solomona, ne pehē e Tohi Tapu: “Ne fakatupu fakalahi e Iehova e lilifu a Solomona ki mua a Isaraela oti, mo e foaki atu e ia kia ia e lilifu ke lata mo e patuiki, nakai pihia ke he taha patuiki a Isaraela ne fakamua atu kia ia.” (1 Nofo. 29:25) To foaki he Atua e lilifu pauaki ke he tau Kerisiano fakauku ne fakaliu tu mai, ko lautolu ne fakapuloa fakamooli e “lilifu he fulufuluola he hana kautu [po ke, pule].” (Sala. 145:11-13) Ti, he fakaheke a Iehova, kua tokologa fakahaga he ‘tau mamoe kehe’ ha Iesu kua moua e matagahua monuina mo e lilifu.—Ioane 10:16.

Kua Mailoga e Lilifu mo e Fulufuluola a Iehova

5. Lahi atu fēfē e lilifu a Iehova?

⁵ He lologo ne fakakite e kehekehe he lahi ue atu he Atua mo e tote lahi mahaki he tagata, ne uhu he salamo ko Tavita: “Iehova na e, ha mautolu a Iki, kua mua ue atu hāu a higoa ke he lalolagi oti kana; ko koe ni kua tuku atu hāu a lilifu ki luga ke he lagi.” (Sala. 8:1) Ato tufuga e “lagi mo e lalolagi” ke hokotia atu ke he fakamooliaga lahi ue atu he finagalo he Atua, ke taute e lalolagi mo parataiso mo e fakatupu e magafaoa tagata ke he mitaki katoatoa—ke he tukulagi tukumuitea—ko Iehova ko e Atua e Peresona mua ue atu mo e lilifu he lagi mo e lalolagi katoatoa.—Kene. 1:1; 1 Kori. 15:24-28; Fakakite. 21:1-5.

6. Ko e ha ne talahau e salamo kua tapulu a Iehova ke he lilifu?

⁶ Kua aamotia lahi ha ia e salamo matakutaku Atua he kitia e ia e pō mamanofua ne loga e fetū he lagi kua kikila kalopalopa he tau “maka uho”! He puke ke he ofoofogia ke he puhala ne “fofola [he Atua] e lagi tuga ne ie ke puipui aki,” ne fakakite he salamo kua tuga ke tapulu a Iehova ke he lilifu ha ko e pulotu mua ue atu Haana he tufugatia. (Totou Salamo 104:1, 2.) Ko e lilifu mo e fulufuluola he Tufuga malolō ue atu ne nakai kitia, nukua mailoga ai ke he Haana tau tufugatia.

7, 8. Ko e heigoa ne mailoga e tautolu ke he lilifu mo e fulufuluola a Iehova ke he tau mena he lagi?

⁷ Ke tuga anei, kia manamanatu ke he fakatokaaga fetū he Milky Way. He fakatokatokaaga lahi nei he tau fetū, tau palaneta, mo e tau fakatokaaga sola, kua tuga ke tote lahi mahaki e palaneta Lalolagi ke tatai mo e tepu oneone he mataafaga lahi. Ko e fakatokaaga fetū nei kua molea ai e 100 piliona fetū! Ka maeke ia koe ke totou hololoa ke taha e fetū he tau sekone takitaha ke 24 e tulā he aho, to molea e 3,000 tau ato hokotia a koe ke he 100 piliona fetū.

⁸ Kaeke ke 100 piliona fetū ne ha ha ai hokoia he fakatokaaga fetū he Milky Way, ka e kua e vala ne toe he lagi mo e lalolagi? Kua fuafua he tau tagata kumikumi ke he aolagi ko e Milky Way ne liga 50 e piliona ke he 125 e piliona he tau fakatokaaga fetū. Fiha e fetū he lagi mo e lalolagi katoatoa? Kua uka lahi mooli ke maama e tali. Ka “kua totou e [Iehova] e tau fetu poke ne fiha; kua ui e ia ha lautolu a tau higoa oti kana.” (Sala. 147:4) He iloa kua tapulu a Iehova ke he lilifu mo e fulufuluola pihia, kua nakai kia omoi a koe ke fakatokoluga e higoa lahi haana?

9, 10. Maeke fēfē he foakiaga he falaoa ke fakatokoluga e iloilo he Tufuga ha tautolu?

⁹ Kia hagaaki e onoonoaga ha tautolu mogonei mai he tau mena ofoofogia he lagi ke he mena fa mahani tuga e falaoa. Nakai ni ko Iehova ne Eke e lagi katoa mo e lalolagi ka ko Ia foki ne age e tau mena kai [po ke, falaoa] ki a lautolu kua hoge. (Sala. 146:6, 7) Kua kitia e ‘lilifu mo e fulufuluola’ he Atua ke he tau gahua lalahi haana, putoia foki e foakiaga he tau akau ne taute mai ai e fua falaoa. (Totou Salamo 111:1-5.) Ne fakaako e Iesu e tau tutaki haana ke liogi: “Kia foaki mai . . . ke he aho nai ha mautolu a tau mena kai [po ke, falaoa], ke lata ke he aho taha.” (Mata. 6:11) Ko e falaoa ko e mena kai tumau he tau tagata tokologa i tuai, putoia ai e tau Isaraela. Pete ko e mena kai tumau e falaoa, ko e puhala he tau vai ne laku aki e tau mena gahoa ke moua mai e fua falaoa mitaki, kua uka lahi.

¹⁰ He magaaho ne tohi e Tohi Tapu, ne fakaaoga he tau Isaraela e falaoa mata mai he tau saito po ke tau karite mo e vala vai ke taute aki e fua falaoa. Kua fa fakaaoga e fakaea, po ke isi, he falu magaaho ke laku aki e falaoa. Ko e tau mena mukamuka nei kua laku auloa ai ke moua e loga he tau vai kehekehe ne kua felauaki mitaki. Kua nakai maama katoatoa e matutakiaga tonu he tau vai kehekehe nei. Mua atu, ko e puhala ne tavili e falaoa i loto he tino ko e taha mena halavihi ofoofogia. Ko e mena ia ati lologo e salamo: “Iehova na e, kua loga ue atu hāu a tau gahua! Ne eke e koe e tau mena oti ia mo e iloilo”! (Sala. 104:24) Kua omoomoi pihia nakai a koe ke fakaheke a Iehova?

Lauia Fēfē a Koe he Lilifu mo e Fulufuluola he Atua?

11, 12. Ko e heigoa ne lauia a tautolu he manamanatu ke he tau gahua ne tufuga he Atua?

¹¹ Nakai eke a tautolu mo tau tagata kumikumi ke he aolagi ke ofoofogia ke he pulagi pouli po ke eke mo tau tagata kumikumi kemikolo ke fiafia he kai e falaoa. Ka ke loto fakaaue ke he fulufuluola he Tufuga ha tautolu, kua lata ia tautolu ke fai magaaho ke manamanatu ke he tau gahua he haana tau lima. Ko e heigoa ka moua e tautolu he manamanatu hokulo pihia? Kua lauia pihia foki e manamanatu hokulo ke he falu gahua a Iehova.

¹² Hagaao ke he tau gahua lalahi ne taute e Iehova ma e tau tagata Haana, ne lologo a Tavita: “To manamanatu e au ke he fulufuluola he fakahekeaga he hāu a lilifu, mo e tau kupu ke he hāu a tau [gahua].” (Sala. 145:5) Kua fakakite e tautolu e manamanatu ke he tau gahua nei he fakaako e Tohi Tapu mo e fai magaaho ke manamanatu hokulo ke he tau mena ne totou ai e tautolu. Ko e heigoa ne lauia he manamanatu hokulo nei? Kua tupu ki mua e loto fakaaue ha tautolu ke he lilifu mo e fulufuluola he Atua. Mooli ai, kua omoomoi a tautolu ke fakalataha mo Tavita he fakaheke a Iehova mo e pehē: “To tokutoku atu foki au hāu a homo atu.” (Sala. 145:6) He manamanatu hokulo ke he tau gahua homo ue atu he Atua kua lata ke atihake e fakafetuiaga ha tautolu mo Iehova mo e fakalagalaga a tautolu ke tala age fakamakutu mo e fakamalolō ke he falu hagaao ki a ia. Kua fakapuloa fakamakai kia e koe e tala mitaki mo e lagomatai ke he tau tagata ke loto fakaaue ke he lilifu, fulufuluola, mo e mua ue atu ha Iehova ko e Atua?

Fakaata Katoatoa e Iesu e Lilifu he Atua

13. (a) Hagaao ke he Tanielu 7:13, 14, ko e heigoa ne foaki e Iehova ke he Tama haana? (e) Ha ko e Patuiki, fehagai fēfē a Iesu mo e tau tagata haana?

¹³ Ko e Tama he Atua, ko Iesu Keriso, ne fakapuloa fakamakai e tala mitaki mo e fakaheke ke he lilifu mo e mua ue atu he haana Matua he lagi. Ne foaki e Iehova ke he Tama fuataha haana e lilifu pauaki he tuku age ki a ia e ‘pule mo e kautu.’ (Totou Tanielu 7:13, 14.) Pete ia, ne nakai fakaikaluga po ke hemu a Iesu. Ka kua eke a ia mo Pule fakaalofa hofihofi noa ne maama e tau kūkū he tau tagata haana mo e fakalilifu atu ki a lautolu. Kia fakatutala la ke he taha fakafifitakiaga ke he puhala ne fehagai a Iesu ko e Patuiki ne Kotofa mo e tau tagata ne feleveia mo ia, mua atu ki a lautolu ne kua fakaheu mo e nakai fakaalofa ki ai.

14. Onoono fēfē ke he tau tagata lepela i Isaraela i tuai?

¹⁴ Ko e tau tagata ne gagao lepela he tau vahā i tuai ne fa mamahi fakatekiteki ti mamate ai tuai. Ne popo fakahaga e tau alaga ha lautolu ia ne gagao. Ko e manatu ke fakamaulu e tagata lepela kua uka ke tuga e liu fakatū mai he tagata mate. (Nume. 12:12; 2 Patu. 5:7, 14) Ne totoku e tau tagata lepela kua kelea, po ke nakai meā, ti kua fakavihia mo e vega a lautolu mai he maaga. He tata atu ke he tau tagata, kua lata a lautolu ke hea atu tuai: “Kua kelea, Kua kelea”! (Levi. 13:43-46) Ko e tagata lepela kua tatai mo e tagata mate. Hagaao ke he tau fakamauaga fakarapai, ne fakaatā ni e tagata lepela ke kavi ke he 1.7 e mita he mamao mo e ha tagata. Ne talahau foki ka kitia e tagata lepela, pete he mamao, ne tauliti aki he taha takitaki lotu e tau maka a ia ke fakamamao.

15. Fehagai fēfē a Iesu mo e taha tagata lepela?

¹⁵ Mailoga pauaki mogoia e aga ha Iesu ke he tagata lepela ne hau ki a ia mo e olelalo ke fakamalolō a ia. (Totou Mareko 1:40-42.) He nakai fekau e tagata lepela ke fano kehe, ne fehagai a Iesu mo e tagata fakavihia nei ke he puhala fakaalofa hofihofi noa mo e lilifu. Ko e mena ne kitia e Iesu ko e tagata he tuaga fakaalofa ne manako lagomatai. He loto fakaalofa, ne mafiti a Iesu ke fakagahua e tau logonaaga hofihofi noa haana. Ne fakaolo atu haana lima mo e piki atu ke he tagata lepela, ti fakamalolō a ia.

16. Ko e heigoa e fakaakoaga ne ako e koe mai he puhala ne fehagai a Iesu mo e falu?

¹⁶ Ha ko e tau tutaki ha Iesu, maeke fēfē ia tautolu ke fifitaki e puhala ne fakaata e Iesu e lilifu he Matua haana? Taha puhala ke mailoga kua lata e tau tagata oti kana ke moua e fakahekeaga mo e fakalilifu pete ne tau tuaga, malolō tino, po ke tau tau he moui. (1 Pete. 2:17) Mahomo atu ki a lautolu he tau tuaga ke leveki, tuga e tau taane, tau matua, mo e tau motua Kerisiano, kua lata ke fakalilifu e lautolu e tau tagata ne leveki e lautolu mo e lagomatai ai ke fakatumau e lilifu fakatagata ha lautolu. He peehi ko e poakiaga anei ma e tau Kerisiano oti, ne pehē e Tohi Tapu: “Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu.”—Roma 12:10.

Fakakite e Lilifu he Tapuakiaga

17. Ko e heigoa kua ako e tautolu mai he tau Tohiaga Tapu ke fakakite e fakalilifu ka tapuaki ki a Iehova?

¹⁷ Kua lata pauaki ke fakakite e fakalilifu ka tapuaki a tautolu ki a Iehova. “Kia leveki e koe hāu a tau hui ka fina atu a koe ke he fale he Atua,” he talahau he Fakamatalaaga 5:1. Ne poaki ki a Mose mo Iosua ke utakehe e tau afīaloalohui ha laua ka tūtū ai he mena tapu. (Esoto 3:5; Iosua 5:15) Kua lata ia laua ke taute e mena nei he fakakite e fakalilifu po ke fakaheke atu. Ne poaki ke he tau ekepoa Isaraela ke tui e tau fihui ie lino “ke ufiufi aki ha lautolu a tau kakano.” (Esoto 28:42, 43) Ne puipui he mena nei a lautolu neke fakatokanoa e tau kakano ka fekafekau he fatapoa. Kua lata e tau tagata takitaha he magafaoa he ekepoa ke fakatokoluga e fakalilifu mahani Atua.

18. Fakakite fēfē e lilifu he ha tautolu a tapuakiaga ki a Iehova?

¹⁸ Ko e lilifu he tapuakiaga mogoia kua putoia e fakahekeaga mo e fakalilifu. Ke moua e fakahekeaga mo e fakalilifu, kua lata ia tautolu ke fakagahua e mahani lilifu. Ko e lilifu ne fakakite e tautolu kua nakai fakatupua po ke matahigoa teao. Ka kua lata ke molea atu e mena ne kitia he tagata ke he mena ne kitia he Atua—ko e tau loto ha tautolu. (1 Samu. 16:7; Fakatai 21:2) Kua lata e lilifu ke eke mo vala ha tautolu mo e lauia e mahani ha tautolu, aga ha tautolu, mo e fakafetuiaga ha tautolu mo e falu, pihia foki e puhala ne kitia mo e logona hifo e tautolu ki a tautolu ni. Mooli, kua lata ke kitia maali e lilifu he tau magaaho oti ke he tau mena oti kana ne talahau mo e taute e tautolu. Ke lata mo e mahani, foliga, mo e tapulu mo e tauteuteaga ha tautolu kua omaoma a tautolu ke he tau kupu he aposetolo ko Paulo: “Kua nakai tuku atu e mautolu kia taha ha mena ke tupetupe ai, neke talahaua kelea e gahua. Ka kua fakakite e mautolu a mautolu ke he tau mena oti ko e tau fekafekau he Atua.” (2 Kori. 6:3, 4) “Kia fakalilifu ai e [t]autolu e tau kupu he Atua, ha tautolu a Fakamoui ke he tau mena oti.”—Tito 2:10.

Fakatumau ke Fakakite e Lilifu Mahani Atua

19, 20. (a) Ko e heigoa e puhala mitaki ke fakalilifu e falu? (e) Hagaao ke he lilifu, ko e heigoa ha tautolu kua lata ke eketaha ke taute?

¹⁹ Ne fakakite he tau Kerisiano fakauku e lilifu, ko lautolu e ‘tau hukui a Keriso.’ (2 Kori. 5:20) Ko e ‘tau mamoe kehe,’ ne lalago fakamooli atu ki a lautolu, ko e tau fekafekau lilifu ma e Kautu faka-Mesia. Ko e hukui po ke fekafekau kua vagahau fakamalolō mo e fakalilifu ke lata mo e fakatufono haana. Ko e mena ia, kua lata ia tautolu ke vagahau fakalilifu mo e fakamalolō he lalago e fakatufono he Atua, ko e Kautu. (Efeso 6:19, 20) Ti ko e magaaho ka talahau e tautolu “e tala mitaki” ke he falu, kua nakai kia fakalilifu e tautolu a lautolu?—Isaia 52:7.

²⁰ Kua lata a tautolu he eketaha ke fakaheke e Atua he fakatatau atu ke he haana lilifu. (1 Pete. 2:12) Kia fakakite tumau e tautolu e fakalilifu hokulo ki a ia, ke he tapuakiaga haana, mo e tau matakainaga ne tapuaki mo tautolu. Ti maeke ia Iehova ne fakatapulu ke he lilifu mo e fulufuluola ke fiafia ke he ha tautolu a mahani fakalilifu he tapuaki ki a ia.

[Matahui Tala]

To Tali Fēfē e Koe?

• Kua lata ke lauia fēfē a tautolu he loto fakaaue ke he fulufuluola he lilifu a Iehova?

• Ko e heigoa ne ako e tautolu ke he lilifu he puhala ne tali atu a Iesu ke he taha tagata lepela?

• Fakaheke fēfē e tautolu a Iehova ke he tau puhala kua lilifu?

[Fakatino he lau 12]

Fakalilifu fēfē e Iehova a Apelu?

[Fakatino he lau 14]

Kitia foki e tau gahua lalahi a Iehova ke he foakiaga he falaoa

[Fakatino he lau 15]

Ko e heigoa ne ako e koe ke he fakalilifu ne taute e Iesu ke he taha tagata lepela?

[Fakatino he lau 16]

Putoia he tapuakiaga lilifu e fakaheke ki a Iehova