Manako a Koe ke Eke mo Vahega Tagata Fēfē?

NE HŪHŪ e takitaki leoleo he taone i Filipaina ke he paionia, “Ko e heigoa ne taute e koe ke hiki he tagata taane ia e mahani haana?” He tuhi ke he fata laupepa he laulau haana, ne lafi e ia: “Iloa nakai e koe, ko e tau fakamauaga oti nei ko e tau fakahala haana kua mole? Kua fakaokioki e koe a mautolu mai he taha he tau fakamamahi ulu he taone nei.” Ko e tagata ne tutala ki ai, ko e tagata favale ka kona kava ne fakatupu lekua tumau. Ko e heigoa ne omoi a ia ke taute e tau hikiaga lalahi he moui haana? Ko e fekau omoomoi he Kupu he Atua, ko e Tohi Tapu.

Tokologa e tagata ne muitua ke he fakatonuaga he aposetolo ko Paulo ke ‘tuku kehe e tagata tuai ke he tau mena ne mahani ai a lautolu i tuai, ko ia ha ne kelea, ke lata mo e tau manako lahi ke fakahehe ai. Ka kia tapulu a lautolu ke he tagata fou kua eke ke lata mo e Atua.’ (Efeso 4:22-24) He lalahi po ke ikiiki e tau hikiaga kua lata ia tautolu ke taute, ko e tapulu ke he tagata foou ko e vala he fakatokaaga faka-Kerisiano.

He taute e tautolu e tau hikiaga mo e holo ki mua ke lata ke hokotia ke he papatiso, ko e kamataaga ni a ia. He tuku atu e tautolu a tautolu ke tanumia ke he vai, kua tuga e vala akau a tautolu ne kua talatalai ke he fakataitaiaga pauaki. Kua kitia tuai e fakataitaiaga, ka e lahi agaia e gahua ke taute. Lata agaia e tagata talatalai ke lafi falu vala pauaki ke fakamanaia aki e fakataitaiaga. He papatisoaga, kua moua e tautolu e tau aga pauaki kua lata ke eke mo fekafekau he Atua. Ka kua lata agaia e tagata foou ha tautolu ke feaki. Kua lata ia tautolu ke fakatumau ke fakaholo ki mua ai he taute e tau hikihikiaga.

Ne kitia foki e Paulo e lata ke fakaholo ki mua. Ne talahau e ia: “Ka loto au ke he mena mitaki ke eke, ti ha ha ia au e kelea.” (Roma 7:21) Ne mailoga mooli e Paulo ko e tagata fēfē a ia mo e mena ne loto a ia ke taute. Ka e kua a tautolu? Kua lata foki ia tautolu ke hūhū ki a tautolu: ‘Ko e heigoa e mena kua ha ha ia au? Ko e vahega tagata fēfē au? Manako au ke eke mo vahega tagata fēfē?’

Ko e Heigoa e Mena kua “Ha Ha ia Au”?

Ka fakafoou e tautolu e fale tuai, kua nakai kuenaia he vali a fafo kaeke kua popo e tau akau fakalava i loto. Ka nakai fakafoou e tau akau popo he fale, to loga atu e lekua ka tupu fakamui. Pihia foki, ko e mahani hakohako hokoia ke he tino kua nakai lahi. Kua lata ia tautolu ke kumikumi hifo fakahokulo ke he aga fakatagata ha tautolu ti mailoga e tau lekua ne lata ke fakahako. Neke liu e tau aga he tagata tuai ke mafuta mai. Ti kua latatonu ke kumikumi hifo fakatagata. (2 Kori. 13:5) Kua lata ia tautolu ke kitia e tau aga kelea ti fakahako ai. Ke moua ai, kua foaki e Iehova e lagomatai ki a tautolu.

Ne tohia e Paulo: “Ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.” (Hepe. 4:12) Ko e fekau he Kupu tohia he Atua, ko e Tohi Tapu, kua fakaohooho malolō ke he tau momoui ha tautolu. Kua tuina hifo taha ki loto ha tautolu—he puhala fakatai, ke he uho hui i loto muatua he tau polohui motua. Kua fakakite ai e tau manatu mo e tau fatuakiloto ha tautolu, he fakatapakupaku ko e heigoa mooli i loto ha tautolu ka fakatatai ke he mena ne kitia ai a tautolu i fafo po ke mena ne manamanatu a tautolu ki ai. Kua lagomatai mooli e Kupu he Atua ke maeke ia tautolu ke mailoga e tau lekua ha tautolu!

Ka fakafoou e tautolu e fale tuai, liga kua nakai kuenaia ke fakafoou he tau koloa ne malona. He iloa e tupuaga he tau lekua ka lagomatai a tautolu ke taute e tau hikiaga ke puipui mai neke liu e tau lekua ia ke tupu. Pihia foki, kua nakai kuenaia ke kitia e tau mahani kelea ha tautolu ka e hagaaki foki ke he kakano ne tupu ai po ke ne lafi ki ai, ka lagomatai a tautolu ke fahia ke he tau lolelole ha tautolu. Loga e tau mena ka fakahakohako e aga fakatagata ha tautolu. Falu he tau mena ia ko e tuaga fakatagata ha tautolu mo e tuaga fakatupe ha tautolu, takatakaiaga ha tautolu, aga motu ha tautolu, tau matua ha tautolu, tau tagata ne lafi a tautolu ki ai, mo e feakiaga fakalotu ha tautolu. Pihia foki e tau polokalama televisoni mo e tau kifaga ne kitekite e tautolu, mo e falu puhala fakafiafia, kua lauia ai a tautolu. He mailoga e tau mena ka fakaohooho kelea e tau aga fakatagata ha tautolu kua lagomatai a tautolu ke fakatote e tau lauiaaga ia.

He mole e kamatamata fakatagata, kua liga hihiga a tautolu ke talahau, ‘Na pihia pauaki ni au.’ Ko e fakakakanoaga hehē anei. Hagaao ki a lautolu he fakapotopotoaga i Korinito ne eke mo tau tagata mahani feuaki, fakasotoma, konahia, mo e tau mena pihia, ne pehē a Paulo: “Ne pihia foki e falu ia mutolu, ka kua koukou tuai a mutolu, . . . ke he [a]gaga foki he Atua ha tautolu.” (1 Kori. 6:9-11) Mo e lagomatai he agaaga tapu ha Iehova, kua maeke foki ia tautolu ke kautū he taute e tau hikiaga kua lata.

Manamanatu ke he tagata taane ne higoa ko Marcos,a ne nofo i Filipaina. He talahau ke he feakiaga haana, ne pehē a Marcos: “Ne taufetoko tumau e tau matua haaku. Ko e kakano haia ati totoko au he 19 e tau he moui.” Ne talahaua a Marcos he pelē tupe, kaiha, mo e tau fakaneinei aki e fana. Ne taute foki a ia mo e falu ke kaiha (hijack) e vakalele, ka e nakai fakahoko e pulega ia. Ne matutaki e tau gahua kelea ha Marcos he mole e fai hoana haana. Ne galo oti e tau koloa haana ha ko e pelē tupe. Nakai leva he mole, ne fakalataha a Marcos mo e hoana haana he fakaako Tohi Tapu ne taute he Tau Fakamoli a Iehova mo e hoana. He magaaho fakamua, ne logona hifo e ia e fakateaga ke eke mo Fakamoli. Pete ia, ko e fakagahua e tau mena haana ne fakaako mo e fina atu he tau feleveiaaga kua lagomatai a Marcos ke tiaki e tau puhala tuai haana. Ko ia mogonei ko e Kerisiano papatiso ne fakaako tumau e falu ke he puhala kua maeke ia lautolu ke hiki foki.

Manako a Koe ke Tuga a Hai?

Ko e heigoa e tau hikiaga kua liga lata ia tautolu ke taute ke maeke ke fakaholo ki mua e tau mahani Kerisiano ha tautolu? Ne fakatonu e Paulo e tau Kerisiano: “Kia tuku kehe e mutolu e tau mena oti ia ko e ita foki, ko e vale, ko e loto kelea, ko e kupu kelea, mo e kupu fuafuakelea, mai he tau gutu ha mutolu. Aua neke fepikopikoaki ha kua tuku kehe e mutolu e tagata tuai katoa mo e hana tau mahani.” Ne matutaki e aposetolo: “Fakatapulu a mutolu ke he tagata fou, ko ia kua fakafou ke he iloilo ke fakalata ke he fakatai [H]ana kua eke a ia.”—Kolo. 3:8-10.

Ko e matapatu foliaga ha tautolu mogoia ko e tuku kehe he tagata tuai mo e tapulu ke he tagata foou. Ko e heigoa e tau mahani ka feaki ke lagomatai a tautolu ke taute e mena ia? Pehē a Paulo: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua. . . . Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [“Iehova,” NW] kia mutolu, kia pihia foki a mutolu. Ka e ha i luga he tau mena oti ia e fakaalofa ko e pipi haia ke fakamaopoopo ai.” (Kolo. 3:12-14) Mai he eketaha ke feaki e tau mahani nei ka lagomatai a tautolu ke ‘ofania e Iehova katoa mo e tau tagata.’ (1 Samu. 2:26) He nofo ke he lalolagi, ne mua atu e mitaki e puhala ne fakakite e Iesu e tau mahani Atua. Mai he fakaako mo e muitua haana fakafifitakiaga, kua maeke ia tautolu ke tuga lahi e Keriso ko e tau ‘fifitaki ke he Atua.’—Efeso 5:1, 2.

Taha puhala ke mailoga e tau hikiaga kua lata ia tautolu ke taute ko e fakaako ke he tau mahani fakatagata ha lautolu he Tohi Tapu, manamanatu ke he tau mena mitaki mo e kelea ne futiaki ai a lautolu. Ma e fakatai, manamanatu ki a Iosefa, ko e tama taane he tupuna ko Iakopo. Pete he lauia he tau nakai fakafili tonu, ne tumau a Iosefa ke aga mitaki mo e fulufuluola he loto. (Kene. 45:1-15) Ke he taha faahi, ko Apisaloma ko e tama taane he Patuiki ko Tavita, ne fakatupua ke manamanatu lahi ke he tau tagata mo e nava ki ai ha ko e fulufuluola haana. Ka ko e mooli, ko ia ko e tagata afokau mo e kelipopo tagata. (2 Samu. 13:28, 29; 14:25; 15:1-12) Ko e mahani mitaki fakatupua mo e tino mitaki kua nakai taute e tagata ke fulufuluola mooli.

Maeke ia Tautolu ke Kautū

Ke hiki ke he mitaki mo e fulufuluola ke he fofoga he Atua, kua lata ia tautolu ke hagaaki ke he tagata he loto. (1 Pete. 3:3, 4) He taute e tau hikiaga ke he aga fakatagata ha tautolu kua lata ke mailoga e tau aga kelea ha tautolu mo e tau puhala ne fakatupu po ke lafi ki ai, pihia foki mo e feaki e tau mahani Atua. Maeke nakai ia tautolu ke mauokafua ko e tau laliaga ha tautolu ke taute e tau holo ki mua pihia ka kautū ai?

E, mo e lagomatai ha Iehova kua maeke ia tautolu ke taute e tau hikiaga kua lata. Tuga e salamo, maeke ia tautolu ke liogi: “Ko e Atua na e, kia eke e koe e loto meā maku; mo e fakafou e loto mau ki loto ia au.” (Sala. 51:10) Maeke ia tautolu ke ole ke he agaaga he Atua ke gahuahua i loto ha tautolu, he fakaholo ki mua e manako ha tautolu ke fakatatau katoatoa e tau momoui ha tautolu mo e finagalo haana. Maeke mooli ia tautolu ke kautū he futiaki lahi ke he fofoga ha Iehova!

[Matahui Tala]

[Fakatino he lau 4]

Kuenaia ni kia ke vali a fafo he fale nei ne malona he afā?

[Fakatino he lau 5]

Kua eke kia e aga fakatagata haau ke tuga he Keriso?