Manatu Nakai e Koe?
Kua loto fakaaue nakai a koe he totou ke he tau fufuta foou he Ko e Kolo Toko? Lali la mogoia ke tali e tau hūhū i lalo:
• Maeke nakai e liu tu mai ka mate e tama i loto he manava ato fanau?
Kamata e moui he magaaho ne fakafua. Maeke a Iehova ke fakaliu tu mai a lautolu ke he tau magaaho kehekehe he moui, ha kua “maeke ke he Atua e tau mena oti kana.” (Mare. 10:27) Ka e nakai talahau fakahako mai he Tohi Tapu to fakaliu tu mai e Ia e tau tama ne mamate ka e nakaila fanau mai he manava.—4/15, lau 12, 13.
• Ko e heigoa kua ako mai e tautolu he onoono ke he tau lō, tau sifanai, tau hē akerisi, mo e tau moko taliga?
Ko e tau mena momoui tokofā nei kua fakakite e iloilo mua ue atu. Ti fakatokoluga e lautolu e iloilo he Atua. (Fakatai 30:24-28)—4/15, lau 16-19.
• Ko e ha ne tutala lahi e Tohi Tapu ke he fakanono?
Kua fakakite ai ko e fakanono kua eke mo fakamailoga he fakalilifu, mo e lagomatai ke he manamanatu fakahokulo, mo e fakamooliaga he lotomatala mo e manamanatu. (Sala. 37:7; 63:6; Fakatai 11:12)—5/15, lau 3-5.
• Tokofiha e patuiki Iutaia ne fakakite e manako lahi ma e fale he Atua?
Hogofulumahiva la e patuiki ne pule ke he faahi toga he kautu a Iuta, ti tokofā ne talahaua ha ko e manako lahi pihia—ko Asa, Iehosafata, Hesekia, mo Iosia.—6/15, lau 7-11.
• Putoia kia e tau Kerisiano fakauku oti ne haia he lalolagi he foaki e tau mena kai fakaagaaga?
Nakai. Ko lautolu oti ne fakauku he agaaga he Atua ko e vala he vahega fekafekau fakamooli mo e loto matala, ka ko lautolu ke he Kau Fakatufono ne leveki e tauteaga he tau mena kai fakaagaaga.—6/15, lau 22-24.
• Ko e heigoa e tau mena kua lata he tau matua ke fakamahani ke he tau fuata mui ha lautolu ato toka e lautolu e kaina?
Kua lata ia lautolu ke maeke ke fakatumau e fakaholoaga fakaagaaga, taute e tau manatu mo e tau fifiliaga mitaki, matutaki fakamitaki mo e falu, leveki e malolō tino haana ni, iloa e puhala ke fatifati aki e tau tupe haana, fakamea mo e leveki e kaina po ke fale, mo e kia fakamakaukau ne ia a ia.—7/1, lau 12.
• Ko e heigoa ati uho lahi e tau 2009 ke he Tau Fakamoli a Iehova?
He 1909 ko e tau matapatu he Watch Tower Bible and Tract Society, ko e fakatokatokaaga matafakatufono he matakau taute fakailoa ne fakaaoga he Tau Fakamoli a Iehova, ne hiki mai Pittsburgh, Pennsylvania, ki Brooklyn, New York, ti gahua agaia.—7/1, lau 14-16.
• Ko e ha ne talahau ai ko e fakaalofa ati kehekehe lahi mahaki a Iesu mo e tau takitaki lotu?
He lata ke fakaalofa ke he tau tagata noa, ne fakavihia he tau takitaki lotu ia a lautolu. Mua atu ne nakai fakaalofa a lautolu ke he Atua. Ne fakaalofa a Iesu ke he Matua haana ti fakaohooho ai he fakaalofa hofihofi ke he tau tagata. (Mata. 9:36) Ne mafanatia, hofihofi noa, mo e totonu a ia ki a lautolu.—7/15, lau 15.