MANATU NAKAI E KOE?
Kua totou fakamitaki nakai e koe e tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:
Kua tonu kia ma e tau Kerisiano ke tugi e tino mate?
Ko e tugi po ke nakai tugi he tino he tagata kua mate ko e fifiliaga fakatagata. He nakai talahau fakahako he Tohi Tapu hagaao ke he mena nei, kua aoga ke mailoga ko e tau gati tino he Patuiki ko Saulo mo e tama taane haana ko Ionatana ne tugi ti tanu. (1 Samu. 31:2, 8-13)—6/15, lau 7.
Hagahaga kelea fēfē e ula?
Ne 100,000,000 e tagata ne mamate he senetenari kua mole. Kavi 6,000,000 ne mamate he tau tau takitaha.—7/1, lau 3.
Ko e heigoa e tau paleko ka fehagai mo e tagata ka hiki atu ke he motu kehe ke fekafekau he matakavi ne manako lahi ke he lagomatai?
Tolu e paleko (1) hiki ke he puhala moui kehe, (2) fahia mai he manamanatu tumau ki kaina, mo e (3) ke tuga e tau matakainaga he matakavi. Tokologa ne kua feleveia mo e tau paleko nei kua fakamonuina lahi mahaki.—7/15, lau 4-5.
Moui fakatatau fēfē a Iesu ke he kakano he higoa haana?
Ko e tau pulotu tokologa he Tohi Tapu ne talia ko e higoa Iesu ne moua mai he higoa faka-Heperu Jeshua, ti ha ha i ai e puhala kū he higoa faka-Atua; kua kakano “Iehova ko e Fakamoui.” He fakatatau mo e kakano he higoa haana, ne lagomatai e Iesu e “tau mamoe galo he faoa a Isaraela” ke fakatokihala he tau agahala ha lautolu ke liu moua e taliaaga ha Iehova. (Mata. 10:6; 15:24; Luka 19:10)—7/15, lau 28-29.
Ko e ha e tau tuleke foou kua lauia mitaki mo e mukamuka ke fakaaoga?
Taha e fakatokaaga he tau tuleke foou oti ia. Ha ha he tau tuleke takitaha e kupu Tohi Tapu kua fakalagalaga a tautolu ke totou mo e tala age e hūhū ke he tagata he kaina. Ko e heigoa ni e tali haana, veveu e tautolu ki loto mo e fakakite ki a ia e mena ne talahau he Tohi Tapu. Maeke foki a tautolu ke fakakite e hūhū ke liu aahi atu.—8/15, lau 13-14.
Maeke fēfē a tautolu ke iloa kua nakai fakatupu he Atua e tau mena kelea?
Tututonu a Iehova ke he haana tau mahani oti. Kua tonu mo e mahani hakohako ni a ia. Fakaalofa fakalahi mai a Iehova mo e hofihofi noa. (Teu. 32:4; Sala. 145:17; Iako. 5:11)—9/1, lau 4.
Ko e heigoa ka taute he tau matua Kerisiano ke leveki e tau fanau ha lautolu?
Kua aoga ke fanogonogo ke he fanau ke maeke ke iloa a lautolu. Eketaha ke fagai fakaagaaga a lautolu. Takitaki fakamitaki a lautolu, ma e fakatai, he magaaho ka lali a lautolu ke kautū he tau fakauaua ke he kupu mooli.—9/15, lau 18-21.
Ko e heigoa e maveheaga ne fakaatā e falu ke pule mo Keriso?
He mole e kai Paseka fakahiku ha Iesu mo e tau aposetolo, ne taute e ia e maveheaga mo e tau tutaki fakamooli haana ka fakahigoa ko e maveheaga he Kautu. (Luka 22:28-30) Kua fakamooli ki a lautolu to pule fakalataha a lautolu mo Iesu ke he lagi.—10/15, lau 16-17.
I lalo he Kautu he Atua, ko e heigoa e tau mena ka nakai liu ke fai foki?
To nakai tuai fai lekua e malolō tino, mate, nakai fai gahua, felakutaki, hoge, mo e nonofogati.—11/1, lau 6-7.
Ko hai e “tau tagata māna” ne hagaao a Iakopo ki ai, ne totoku ia Gahua 15:14?
Ko lautolu nei ko e tau Iutaia mo lautolu he tau motu kehe ne fifili he Atua ke eke mo motu fifili ke ‘fakakite atu e mitaki’ Haana ne ui a lautolu. (1 Pete. 2:9, 10)—11/15, lau 24-25.