Kua Fakatoka Nakai e Koe e Magaaho ke Fakaako Tohi Tapu?
KO E tau kua mole ne fakailoa he Kau Fakatufono e hikiaga ke he setulu he feleveiaaga he fakapotopotoaga ke fakaatā fakalahi taha magaaho ma e fakaakoaga mo e fakatutalaaga Tohi Tapu he magafaoa. Kaeke ko e ulu magafaoa a koe, kia fakatumau ke taute e fakaako Tohi Tapu he magafaoa mo e hoana mo e tau tama haau. Ko e tau hoa mau ne nakai fai tama kua manako ke fakaaoga e magaaho nei ke fakaako tokoua e Tohi Tapu. Ko e tau matakainaga taane mo e fifine ne nofo tokotaha mo e nakai fai matagahua fakamagafaoa, to maeke ke fakaaoga fakamitaki e magaaho nei ke fakaako fakatagata e Tohi Tapu.
Tokologa ne fakakite e loto fakaaue ma e fakaholoaga he fai afiafi Tapuakiaga he Magafaoa. Ma e fakatai, ne tohi he taha motua ko Kevin: “Ko e kupu ‘fakaaue’ kua nakai malolō lahi mahaki ke fakakite aki e logonaaga ha mautolu he fakapotopotoaga. Ne tutala a mautolu ko e tau motua ke he puhala kua fakaaoga e mautolu e pō atā ke taute e mena tonu ia ne ole mai he Kau Fakatufono—ke fakaako mo e tau magafaoa ha mautolu.”
Ko Jodi, ko e motua e taane haana, ne tohi: “Tolu e tama fifine ha maua, ne 15, 11, mo e 2 e tau tau he moui. Ne hiki foou laia a mautolu ke he fakapotopotoaga vagahau matalima. Ne lahi e magaaho mo e gahua ke tauteute ma e tau feleveiaaga oti. Mo e hikiaga nei, kua fai afiafi lafi ki luga a mautolu he mogonei, ne fakaatā a mautolu ke hagaaki ke he tapuakiaga he magafaoa!”
Ko John mo JoAnn, ko e hoa mau ne gahua paionia tumau, ne tohi: “Ne nakai taute tumau e fakaako Tohi Tapu he magafaoa ha maua, ha kua lali a maua ke fakahaohao ai mo e tau gahua loga he fakapotopotoaga. Ko e fakaholoaga foou nei ko e mena fakaalofa mai ia Iehova ne fakahauhau fakaagaaga a tautolu—kaeke ke fakaaoga fakahako e tautolu e magaaho ia.”
Ko Tony, ko e matakainaga taane nofo tokotaha ne 20 tumā e tau he moui, ne fakatoka e afiafi Ua ma e pō fakaako fakatagata haana. Ne fakaaoga e ia e falu magaaho he faahi tapu ke tauteute ma e tau feleveiaaga he fakapotopotoaga. Ka e pehē a Tony, “Kua amaamanaki pauaki au ke he Aho Ua.” Ko e ha? “Ko e afiafi ia ko e magaaho uho haaku mo Iehova.” Ne fakamaama e Tony: “Kavi ke he ua e tulā, ne fakaako au ke he tau vala tala ka fakamalolō e fakafetuiaga haaku mo Iehova. Ha kua lahi e magaaho ke fakaako, ne fakaatā au ke manamanatu fakahokulo ke he tau kupu Tohi Tapu ne totou e au.” Ko e fua? “Hane hokulo hifo fakahaga e fakatonuaga ha Iehova ke he loto haaku mai he magaaho fakamua.” Maeke nakai a ia ke talahau e taha puhala? “I loto he tohi Insight, ne totou au hagaao ke he fekapitigaaki ha Tavita mo Ionatana. Ne lahi e mena haaku ne ako mai he aga nakai fulukovi ha Ionatana. Ne lagomatai he fakafifitakiaga haana au ke kitia maaliali e kakano ke eke mo kapitiga mooli. Kua amanaki lahi au ke loga foki e tau maka uho pihia ka moua he tau pō Ua!”
Nakai fakauaua, ko e tau fekafekau oti ha Iehova to aoga lahi mahaki mai he fakaaoga fakamitaki e magaaho lafi ki luga mogonei ma e fakaakoaga kakano lahi he Tohi Tapu mo e tapuakiaga he magafaoa.