Ko e Ha ne Fakalilifu a Lautolu ne Momotua?
KE HE kautahi i California, U.S.A., ne taha e akau talahaua ne poki tumau. Ne fakahigoa ai ko e Lone Cypress. Ne hokotaki ai, ko e akau nei kua molea e 250 e tau. He mailoga ai e malolō, ko e akau fulufuluola nei kua loga e puhala ne leveki aki. Tuga anei, ne tū agaia ha kua līlī aki e tau toua mo e ati aki e tau patuō e matapatu.
Kua liga fakamanatu mai he Lone Cypress ki a tautolu e tau Kerisiano momotua kua ha ha i ai mo tautolu, ne lahi mahaki e fakamanava lahi. Taha puhala kehe lahi ne taute e lautolu e mena nei ko e fakapuloa e tala mitaki. Ko e perofeta ko Ioelu ne talahau tuai ko e “tau patu” to fakapuloa e fekau he Tohi Tapu. (Ioelu 2:28-32; Gahua 2:16-21) Manamanatu la ke he tau tulā loga ha lautolu ia ne fakaaoga he fakamakai ke lagomatai falu ke iloa e “tala mitaki . . . he kautu”! (Mata. 24:14) Falu ia lautolu nei kua momotua ko e tau tagata fakapuloa he Kautu ne leva e fakamanava lahi ke he favale po ke falu mena vihi. Ka talahaua e akau Lone Cypress he leva e tū ti kua fakamalolō he ati aki e tau patuō mo e līlī aki e tau toua, kua mua atu e lata a lautolu ne momotua kua haia mo tautolu mo e fakalilifu ki ai!
Ne poaki a Iehova ko e Atua ke he tau tagata haana i tuai: “Kia tu a koe ki mua hana kua ulu hina, kia fakalilifu atu foki ki mua he tagata motua.” (Levi. 19:32) He tau fekafekau ha Iehova he vahā nei, kua moua e tautolu e tau fakafifitakiaga mitaki lahi mahaki ia lautolu ne ‘feoaki mo e Atua’ ke he loga e tau. (Mika 6:8) He matutaki a lautolu ke fakagahua e tau matapatu fakaakoaga he Tohi Tapu, kua eke mooli e ulu hina ha lautolu mo “foufou fulufuluola.”—Fakatai 16:31.
Ne fakaako he aposetolo ko Paulo e fuata ko Timoteo: “Aua neke [taute fakakelea] atu ke he patu.” Ka kua lata ia Timoteo ke “ole atu ki ai, tuga ne matua” mo e “patu fifine, tuga ne matua fifine.” (1 Timo. 5:1, 2) Kakano, kua lata a Timoteo ke “fakalilifu” a ia ne ulu hina. Maaliali ai, kua amanaki a Iehova ke he mahani he tau puhala vagahau ha tautolu ke fakaata e fakalilifu pihia.
“Kia takitokotaha mo e mua ke tuku atu e lilifu ke he falu,” he talahau he Roma 12:10. Kua fakakite mooli he tau leveki he fakapotopotoaga e fakalilifu ke he tau Kerisiano momotua. Ka e lata ia tautolu oti ke mua e fakalilifu ko e taha ke he taha.
Mooli, ko e tau tagata he magafaoa kua lago ki ai e levekiaga pauaki he tau matua mo e tau tupuna ha lautolu. Hagaao ke he Lone Cypress, ne kumi puhala e tau tagata ke leveki aki, ti matutaki a lautolu ke taute pihia. Ti kua lata mooli ni ia tautolu ke kumi puhala ke puipui e lilifu he tau matua mo e tau tupuna fuakau ha tautolu. Ma e fakatai, he fanogonogo fakamitaki ka taute a tautolu ke ua fakamakamaka ke taute e tau mena ke he puhala ha tautolu ka e nakai manamanatu ke he tau logonaaga ha lautolu.—Fakatai 23:22; 1 Timo. 5:4.
Ko lautolu kua momotua kua ha ha i ai mo tautolu kua uho lahi ki a Iehova. Nakai tiaki e ia a lautolu. (Sala. 71:18) Kua fakamalolō he Atua mooli a lautolu ke fakatumau ke fekafekau tua fakamooli ki a ia. Kia matutaki foki a tautolu ke lalago mo e fakalilifu a lautolu kua momotua.
[Tau Fakatino he lau 7]
Tuga ne lata e Lone Cypress ke lalago, kua lata ke fakalilifu a lautolu ne momotua
[Credit Line]
American Spirit Images/age fotostock