Fakatata Atu ke he Atua

Ka Liu Fuata a Lautolu ne Fuakau

KO HAI ia tautolu ka fiafia ke he tau lauiaaga he vahā fuakau—mafigofigo e kili, hegihegi e tau mata, tuli e tau teliga, mo e vivivivi e tau hui? Liga manamanatu a koe, ‘Ko e ha kua tufuga he Atua a tautolu mo e amaamanakiaga ke olioli e hakahakau he vahā fuata ka e fakahiku a tautolu ke fakaatukehe he tau lauiaaga he vahā fuakau?’ Ko e tala mitaki, ne nakai ko e finagalo he Atua anei ma tautolu. Ka e, finagalo fakaalofa a ia ke fakatoka mai a tautolu he tuaga fuakau! Mailoga e tau kupu ne vagahau ke he tupuna ko Iopu ia Iopu 33:24, 25.

Manamanatu la ke he tuaga ha Iopu, ko e tagata mahani fakamooli ne ofania e Iehova. Nakai iloa e Iopu, ne tuahā a Satani ke he mahani fakamooli haana, he talahau kua fekafekau ni a ia ke he Atua ha ko e tau kakano lotokai. Kua mauokafua a Iehova ki a Iopu mo e iloa ko e malolō Haana ka utakehe e hagahaga kelea, ne fakaatā a Satani ke kamatamata a Iopu. Ti ko Satani ne “fakahoko atu kia Iopu e gagao fufula kelea, ne kamata mai he tau aloalohui hana, ti hoko atu ke he hana tumuaki ulu.” (Iopu 2:7) Ne kaputia e tino ha Iopu he tau uaga, ti popopopo, paku uli, mo e mokulu e kili haana. (Iopu 7:5; 30:17, 30) Maeke nakai a koe ke manamanatu ke he mamahi lahi mahaki haana? Ka e tumau e tua fakamooli ha Iopu, he pehē: “Ato hoko ke he aho ke mate ai au nakai toka e au haku a mahani hakohako.”​—Iopu 27:5.

Ka e taute mooli e Iopu e hehē kelea lahi mahaki. He tuga kua teitei mate tuai a ia, ne tupetupe lahi mahaki a ia ke fakatokoluga ni a ia, “he talahaua e ia a ia kua tututonu, ka e nakai ko e Atua.” (Iopu 32:2) Ne akonaki e Elihu ko e gutuvagahau he Atua a Iopu. Ka e fakahoko foki e Elihu ki a Iopu e fekau atihake he Atua: “Kia laveaki mai a [Iopu], neke hifo a ia ke he luo [ko e tukuaga tagata]; kua moua e au e mena ke taui aki a ia. Kua liu moui mitaki hana tino ke homo atu ke he tino he tama tote; to liu foki a ia ke he hana vaha fuata.” (Iopu 33:24, 25) Liga fakapuke he tau kupu ia a Iopu aki e amaamanakiaga. Nakai lata a ia ke matutaki ke matematekelea ke hoko ke he mate haana. Kaeke kua tokihala a Iopu, to fiafia e Atua ke talia e taui ke lata mo ia, ti fakatokanoa a ia mai he tau mamahi haana.a

Ne talia fakatokolalo e Iopu e fakatonuaga, ti fakatokihala. (Iopu 42:6) Kua talia mooli ai e Iehova e taui ke lata mo Iopu, he fakaatā ai ke uufi e hehē haana ti hafagi e puhala ma e Atua ke fakamagalo mo e palepale a ia. Ti “fakamonuina e Iehova a Iopu ke he hana a fakahikuaga ke he hana a kamataaga.” (Iopu 42:12-17) Manamanatu la ke he fakatotoka ha Iopu, ke he falu he tau monuina, ne maulu e gagao fakalialia haana ti ko e tino haana kua “homo atu ke he tino he tama tote”!

Ko e taui ne talia he Atua ke lata ma Iopu kua fakakaupā e aoga, ha kua tumau e tagata ke nakai mitaki katoatoa ti fakahiku ke mate. Ha ha ia tautolu e taui mitaki lahi ne hafagi ki a tautolu. Ne foaki fakaalofa e Iehova e Tama haana ko Iesu ke taui po ke, lukutoto a tautolu. (Mataio 20:28; Ioane 3:16) Ko e tau tagata oti ne tua ke he lukutoto ia ka moua e amaamanakiaga he moui tukulagi ke he parataiso he lalolagi. He lalolagi foou ia hane hoko mai, to fakatokanoa he Atua e tau tagata tua fakamooli mai he tuaga fuakau. Ko e ha he fakaako fakalahi hagaao ke he puhala ka maeke ia koe ke moui ke kitia e magaaho he tau fuakau ka “liu moui mitaki [ha lautolu a] tino ke homo atu ke he tino he tama tote”?

[Matahui Tala]