Kua Logona Hifo Nakai e Koe e Matimati mo e Matakutaku?

TOKOLOGA e tagata he vahā nei kua logona hifo e matimati; ti logona hifo e lautolu kua nakai fai tagata ne fakaalofa mooli ki a lautolu. Fa logona hifo pihia e tau fuakau. Ka e tokologa e tama he vahā nei, ti pihia mo e tokologa kua fekafekau ke he Atua, ne logona hifo foki e matimati mo e matakutaku. Iloa nakai e koe ko e ha?—a

Liga loga e tau kakano. Kia fakatutala a tautolu ke he fifitakiaga he tagata taane ne leva e moui he vahā i tuai—teitei afe e tau tau ato fanau a Iesu. Ko e higoa haana ko Elia. Ne moui a ia he magahala ne nakai fekafekau e tau tagata he motu ko Isaraela ke he Atua mooli, ko Iehova. Laulahi ne kamata ke tapuaki e atua fakavai ko Paala. Ne pehē a Elia: “Kua toe ni au hoko au.” Ka e manatu nakai a koe ko Elia ni tokotaha ne fekafekau agaia ki a Iehova?—

Pete he nakai iloa ai e Elia, kua fai agaia i Isaraela ne tapuaki ke he Atua mooli. Ka kua fakamumuli a lautolu. Kua matakutaku a lautolu. Iloa nakai e koe ko e ha?—

Ko Ahapo, ko e patuiki a Isaraela, ne nakai fekafekau ki a Iehova; ne tapuaki a ia ki a Paala, ko e atua fakavai he hoana mahani kelea ha Ahapo, ko Iesepela. Ti lali a ia mo Ahapo ke kumi a lautolu ne fekafekau ki a Iehova mo e kelipopo a lautolu, mua atu ki a Elia. Ko e kakano haia ne hola a Elia. Ne finatu a ia teitei ke 300 maila (483 kilomita), ke he tutakale ti hoko ki Horepa, ko e matakavi ne ui foki ko Sinai he Tohi Tapu. I ai, totou teau e tau tau ato hoko e vahā a Elia, ne foaki e Iehova ke he tau tagata haana e Tau Fakatufono Hogofulu mo e Fakatufono haana ne toe. Ne fakamumuli tokotaha a Elia he ana i Horepa. Manatu nakai a koe kua lata a Elia ke matakutaku?—

Fakakite he Tohi Tapu ne fakaaoga e Iehova a Elia he mogo fakamua ke taute e tau mana lalahi. He taha magaaho ne tali e Iehova e liogi ha Elia ke fakafano mai e afi he lagi ke huhunu e poa. He puhala ia, ne fakakite e Iehova ko Ia e Atua mooli, nakai ko Paala. Mogonei, he nofo a Elia he ana, ne vagahau a Iehova ki a ia.

“Ko e eke ha a koe ke he mena na?” he hūhū e Iehova. Magaaho ia ne pehē a Elia, ‘Kua toe ni au hoko au ia lautolu ne tapuaki ki a koe.’ Ti fakatonu fakamitaki e Iehova a Elia, he pehē, ‘Kua toka e au maaku toko fitu e afe ke fekafekau ki a au.’ Ne fekau e Iehova a Elia ke liu, he fakamaama kua lahi mahaki e gahua Haana ke taute e ia.

Ko e heigoa he manatu haau ka fakaako e tautolu mai he fifitakiaga ha Elia?— Kua liga matakutaku foki a lautolu ne fekafekau ki a Iehova he falu magaaho. Ti ko tautolu oti, tau fuata mo e tau fuakau, kua lata ke manatu ke hahaga atu ki a Iehova ma e lagomatai. Mavehe mai e Tohi Tapu: “Kua tata mai a Iehova kia lautolu oti kana ne ui atu kia ia.”

Fai fakaakoaga foki: Ha ha ia tautolu e tau matakainaga he tau matakavi oti kua fakaalofa ki a Iehova mo e fakaalofa ki a tautolu. Ne pehē e Tohi Tapu: “Ha ne fakakatoatoa e tau mena mamahi ia ni ke he tau matakainaga ha [ta]utolu ha he lalolagi.” Fiafia nakai a tautolu ke iloa kua nakai ni ko tautolu hokoia?—