Fioia Nakai e Iehova a Koe?

“Kua fioia [e Iehova] hana tau tagata.”—2 TIMO. 2:19.

1, 2. (a) Ko e heigoa ne manamanatu lahi a Iesu ki ai? (e) Ko e heigoa e tau hūhū kua lata ke manamanatu a tautolu ki ai?

TAHA aho ne fina atu e Farasaio ki a Iesu mo e hūhū: “Ko e poaki fe he fakatufono kua lahi?” Ne tali a Iesu: “Kia fakaalofa a koe [ki a Iehova] hau a Atua mo e hau a loto katoa, mo e hau a agaga katoa, mo e hau a manatu katoa.” (Mata. 22:35-37) Lahi mahaki e fakaalofa ha Iesu ma e haana a Matua he lagi ti moui fakatatau mooli ke he tau kupu ia. Ne manamanatu foki a Iesu ke he tuaga haana mo Iehova, he fakakite e mena nei he puhala moui fakamooli haana. Ko e mena ia, nakai leva ti hoko e mate haana, ne maeke a ia ke pehē na fioia, po ke iloa he Atua a ia ko e taha ne omaoma fakamooli ke he tau poakiaga Haana. Ne fakatumau a Iesu ke he fakaalofa a Iehova.—Ioane 15:10.

² Tokologa he vahā nei ne talahau ke fakaalofa ke he Atua. Kua lafi mooli e tautolu a tautolu he numera ia. Ka ko e tau puhala aoga lahi mahaki ke manamanatu ki ai ko e: ‘Fioia nakai he Atua au? Onoono fēfē a Iehova ki a au? Iloa nakai kua ha ha au mo Ia?’ (2 Timo. 2:19) Ko e lilifu mooli ke manamanatu ke he fakafetuiaga tata pihia mo e Pule Katoatoa he lagi mo e lalolagi!

3. Ko e ha ne tuahā e falu ko e mena iloa nakai e Iehova a lautolu, ti ko e heigoa ka lagomatai ke utakehe e manatu pihia?

³ Ka e falu ne fakaalofa ki a Iehova ne paleko ai ke talitonu kua maeke e Atua ke iloa a lautolu he puhala mitaki. Falu ne ha ha i ai e logonaaga fakateaga, ti tuahā a lautolu ke he manatu he iloa ai e Iehova. Fiafia ha ia ha tautolu kua maeke he Atua ke kitia a tautolu mai he onoonoaga kua kehe! (1 Samu. 16:7) Ne tala age e aposetolo ko Paulo ke he tau matakainaga Kerisiano haana: “Kaeke ke fakaalofa taha ke he Atua, kua iloa e ia e tagata ia ni.” (1 Kori. 8:3) Ko e haau a fakaalofa ke he Atua ko e lakaaga aoga lahi ke iloa e ia. Manamanatu: Ko e ha kua totou e koe e senolo nai? Ko e ha kua eketaha a koe ke fekafekau ki a Iehova mo e loto, tino, manatu, mo e malolō katoa? Ka tukulele a koe ke he Atua ti kua papatiso, ko e heigoa ne takitaki a koe ke he tau lakaaga ia? Kua fakamaama he Tohi Tapu ko Iehova ne kumikumi e tau loto, ti futia a lautolu kua manako ki ai. (Totou Hakai 2:7; Ioane 6:44.) Ko e mena ia, maeke ia koe ke fakahiku ko koe hane fekafekau ki a Iehova ha kua futia e ia a koe. To nakai tiaki e ia a lautolu kua futia e ia ka fakatumau a lautolu ke tua fakamooli. Kua onoono e Atua ki a lautolu kua uho lahi mo e ofania e ia a lautolu.—Sala. 94:14.

4. Ko e ha kua lata ia tautolu ke fakatumau ke fakakite na iloa he Atua a tautolu?

⁴ Ka futia e Iehova a tautolu, lata ia tautolu ke manamanatu ke fakatumau ke he fakaalofa haana. (Totou Iuta 20, 21.) Manatu, kua fakakite he Tohi Tapu na maeke a tautolu ke tafia kehe po ke o kehe mai he Atua. (Hepe. 2:1; 3:12, 13) Ma e fakatai, ato hoko ke he talahauaga ia 2 Timoteo 2:19, ne totoku he aposetolo ko Paulo a Humenio mo Fileto. Ko e tau tagata taane tokoua ia ne ha ha i ai ki a Iehova he taha magahala, ka e mafoki kehe a laua mai he kupu mooli he mogo fakamui. (2 Timo. 2:16-18) Manatu foki, he fakapotopotoaga Kalatia, falu ne iloa he Atua ne nakai tumau ke he maama fakaagaaga ne olioli e lautolu he taha magahala. (Kala. 4:9) Kia nakai uta fakateaga e tautolu e tuaga uho ha tautolu mo e Atua.

5. (a) Ko e heigoa falu aga ne uho ke he Atua? (e) Ko e heigoa e tau fifitakiaga ka manamanatu a tautolu ki ai?

⁵ Na fai mahani ne uho lahi ki a Iehova. (Sala. 15:1-5; 1 Pete. 3:4) Ko e tua mo e mahani fakatokolalo ne kitia aki e falu ne iloa he Atua. Kumikumi la tautolu ke he tau fifitakiaga ke he tokoua e tagata taane ne kitia e puhala ne ofania lahi a laua ki a Iehova. To kitekite foki a tautolu ke he tagata taane ne manatu kua iloa he Atua a ia ka e mahani fakatokoluga ti mailoga fakamui kua tiaki e Iehova a ia. Maeke ia tautolu ke iloa e tau fakaakoaga uho lahi mai he tau fifitakiaga nei.

Ko e Matua ki a Lautolu kua Tua

6. (a) Ko e heigoa e tua ne fakakite e Aperahamo ke he tau maveheaga a Iehova? (e) Iloa fēfē e Iehova a Aperahamo?

⁶ Ko Aperahamo ko e tagata ne ‘tua kia Iehova.’ Ti, fakahigoa a ia ko e “matua kia lautolu oti kana kua tua.” (Kene. 15:6; Roma 4:11) He tua, ne toka e Aperahamo e kaina haana, mo e tau koloa haana ke fano ke he motu mamao. (Kene. 12:1-4; Hepe. 11:8-10) Ko e tua a Aperahamo ne malolō agaia ke he tau tau loga fakamui. Kitia mooli e mena nei he magaaho ne ‘eke e ia a Isaako mo poa’ ko e tama haana, he omaoma ke he poakiaga a Iehova. (Hepe. 11:17-19) Ne fakakite e Aperahamo e tua ke he tau maveheaga a Iehova, ti onoono e Atua ki a ia kua uho lahi; ne iloa mooli e ia a Aperahamo. (Totou Kenese 18:19.) Ne nakai mailoga noa e Iehova na moui a Aperahamo; ka kua tokiofa e ia a Aperahamo ko e kapitiga.—Iako. 2:22, 23.

7. Ko e heigoa ne uho hagaao ke he fakamooliaga he tau maveheaga a Iehova, ti lauia fēfē e mena nei ki a Aperahamo?

⁷ Kua mailoga ai ne nakai moua e Aperahamo e tufaaga he veveheaga he motu ne mavehe ki a ia he magaaho ne moui a ia. Nakai kitia foki e ia e tega haana kua “tuga . . . e oneone he matafaga.” (Kene. 22:17, 18) Pete ne nakai fakamooli e tau maveheaga nei he magahala a Aperahamo, ne fakatumau e tua malolō haana ki a Iehova. Ne iloa e ia ka talahau he Atua e kupu haana, kua mitaki tuga ni he taute ai. E, ne moui fakatatau a Aperahamo ke he tua ia. (Totou Heperu 11:13.) Kua iloa nakai e Iehova a tautolu tuga kua ha ha i ai e tua ke tatai mo e ha Aperahamo?

Fakatali ki a Iehova ko e Fakamailoga he Tua

8. Ko e heigoa e tau manako kua latatonu ne kua leva e loto he falu ke kitia kua fakamooli?

⁸ Liga fai manako a tautolu ne leva e loto ke kitia kua fakamooli. Fai taane mo e fai hoana, fanafanau, mo e tino malolō ko e tau manako pauaki oti mo e kua latatonu. Ma e tokologa, taha po ke loga he tau manako ia ka nakai fakamooli. Ka pihia e mena ne tupu ki a tautolu, ko e puhala ne fehagai a tautolu ke he tuaga ne liga kitia e tua ha tautolu.

9, 10. (a) Kumi fēfē he falu ke fakamooli e tau manako ha lautolu? (e) Fēfē e logonaaga haau hagaao ke he fakamooliaga he tau maveheaga he Atua?

⁹ Nakai pulotu mooli ke kumi ke fakamooli e tau manako nei he puhala kua nakai tatai mo e iloilo faka-Atua. To hagahaga kelea e mena ia ke he tuaga fakaagaaga he tagata. Tuga anei, ko e falu ne fifili e tau puhala he levekiaga fakatino kua fekehekeheaki mo e fakatonuaga a Iehova. Falu ne fai gahua ti kua fakamamao aki mai he tau magafaoa ha lautolu po ke tau feleveiaaga he fakapotopotoaga. Ka e kua e feaki e fakafetuiaga loto fakavihi mo e tagata nakai tua? Ka mui e Kerisiano he puhala ia, kua kumi mooli kia a ia ke iloa e Iehova? To fēfē e logonaaga a Iehova ane mai nakai fakauka a Aperahamo hagaao ke he tau maveheaga he Atua ki a ia? Ka e kua ane mai uta e Aperahamo e tau mena nei ke he tau lima ni haana ke liu moua e moui hagahaga mitaki mo e ke fakamatalahi e higoa ma haana ni ka e nakai fakatali ki a Iehova? (Fakatatai Kenese 11:4.) To fakatumau nakai a ia ke iloa mitaki e Iehova?

¹⁰ Ko e heigoa e tau manako kua leva e loto haau ke fakamooli? Kua malolō lahi nakai e tua haau ke fakatali a koe ki a Iehova, kua mavehe ke fakamakona e tau manako haau kua lata? (Sala. 145:16) Tuga ni e mena ne tupu ki a Aperahamo, ko e fakamooliaga he falu maveheaga faka-Atua ne liga nakai hau tuai tuga ne manako a tautolu. Ka kua uho agaia ki a Iehova e tua ha tautolu kua tupu ki mua tuga ha Aperahamo mo e fakatatau ai ki ai. Ko e taute pihia kua aoga lahi mooli ki a tautolu.—Hepe. 11:6.

Kehekehe he Mahani Fakatokolalo mo e Fakatokoluga

11. Liga moua e Koru e tau kotofaaga fe, ti fakakite mooli e heigoa hagaao ke he aga haana ke he Atua?

¹¹ Kua kehekehe lahi mahaki a Mose mo Koru he fakakite e laua e fakalilifuaga ke he fakatokaaga a Iehova mo e tau fifiliaga haana. Ko e tau tali ha laua kua fai fakalagoaga ke he onoonoaga a Iehova ki a laua. Ko Koru ko e Levi i Koato, ti loga e kotofaaga ne moua e ia, ati kua liga putoia e kitia he fakahaoaga he motu ne o ke he taha faahi he Tahi Kula, lalago e fakafiliaga a Iehova ke he tau Isaraela nakai omaoma he Mouga ko Sinai, mo e moua e matagahua ke uta e puha he maveheaga. (Esoto 32:26-29; Nume. 3:30, 31) Kua maaliali e mahani fakamooli haana ki a Iehova ke he loga e tau tau ti fakahiku kua tokologa ne muitua ki ai he heaga api ha Isaraela.

12. He fakatino ne fakakite he lau 28, fēfē e iloa he Atua a Koru ha ko e haana a mahani fakatokoluga?

¹² Ko e mena ia, ko e motu ha Isaraela ne o atu ke he Motu he Maveheaga, ne mailoga e Koru e mena ne manatu e ia ko e tau lekua e tau fakatokaaga he Atua. Ti ko e 250 e falu tagata taane ne takitaki e motu ne kau mo Koru he lali ke taute e tau hikiaga. Liga mauokafua a Koru mo e falu hagaao ke he fakafetuiaga ha lautolu mo Iehova. Ne tala age a laua ki a Mose: “Kua fakatokoluga a mua, ha kua tapu e fakapotopotoaga oti ni, ha ha ia lautolu foki a Iehova.” (Nume. 16:1-3) Ko e aga kua molea e mauokafua mo e fakatokoluga mooli! Ne tala age a Mose ki a laua: ‘To fakailoa mai ai e Iehova po ko hai hana tau tagata.’ (Totou Numera 16:5.) Ke he matahiku he aho hake, ko Koru mo lautolu oti ne kau mo ia he totokoaga ne mamate.—Nume. 16:31-35.

13, 14. Ke he tau puhala fe ne fakakite e Mose e mahani fakatokolalo haana?

¹³ He taha faahi, ko Mose “kua totonu ue atu a ia he tau tagata oti ha he fuga kelekele.” (Nume. 12:3) Ne fakakite e ia e mahani totonu mo e fakatokolalo ha ko e fifiliaga haana ke muitua ke he takitakiaga a Iehova. (Esoto 7:6; 40:16) Nakai fai fakakiteaga na tuahā a Mose ke he puhala taute mena ha Iehova po ke hogohogomanava ke muitua ke he tau fakaholoaga ne fakatoka e Iehova. Ma e fakatai, ne poaki e Iehova hagaao ke he talagaaga he faituga e tau puhala oti kana ke hoko ke he tau mena ikiiki lalahi ke talaga aki, tuga e lanu he afo mo e numera he tau kaviti ke fakaaoga ke taute aki e tau ie puipui. (Esoto 26:1-6) Ka foaki atu he leveki he tagata he fakatokatokaaga he Atua ki a koe e tau fakaakoaga ne tuga kua fakamatafeiga lahi, liga kua logona e koe e ita he falu magaaho. Ka ko Iehova ko e leveki mitaki katoatoa, kua mautali ke tufa age mo e falanaki ke he tau fekafekau haana. Ka foaki e ia e tau vala tala fakamatafeiga, ne taute e ia mo e kakano mitaki lahi. Ka e mailoga, ne nakai ita a Mose ki a Iehova ha kua age e tau vala tala fakamatafeiga loga ia, ke tuga kua fakateaga e Iehova a ia po ke moumou e tau mena haana ne taute po ke atāina. Ka e matakite mooli a Mose ko e tau tagata gahua haana “kua eke pihia” he muitua e tau takitakiaga he Atua. (Esoto 39:32) Ko e puhala fakatokolalo mooli! Ne mailoga e Mose ko e gahua a Iehova mo e ko e halavaka noa ni a ia ne fakaaoga ke taute aki e gahua ia.

¹⁴ Ko e mahani fakatokolalo foki ha Mose ne kitia mitaki he fehagai a ia mo e tau tuaga kelea ne lauia fakatagata a ia. He taha magaaho, ne galo e mahani fakalatalata ha Mose ti kaumahala ke fakatapu e Atua he fehagai mo e tau gugū he tau tagata. Ti ko e fua, ne tala age a Iehova ki a Mose to nakai fakahoko e ia e tau tagata ke he Motu he Maveheaga. (Nume. 20:2-12) Ko ia mo e haana taokete ko Arona, ne fakauka ke he loma he tau Isaraela ke he loga e tau tau. Ti hepehepe ai a Mose he taha e magaaho ia, to nakai moua e ia e lilifu ia ne leva lahi e amanaki haana ki ai! Fēfē e tali atu ha Mose? He hogohogo manava mooli, ne talia fakatokolalo e Mose e fifiliaga a Iehova. Ne iloa e ia ko Iehova ko e Atua tututonu, ne nakai fai mahani hepehepe. (Teu. 3:25-27; 32:4) Ka manamanatu a koe ki a Mose, nakai kia kitia e koe a ia ko ia ne iloa e Iehova?—Totou Esoto 33:12, 13.

Omaoma ki a Iehova kua Lata ke Mahani Fakatokolalo

15. Ko e heigoa ka fakaako e tautolu mai he puhala fakatokoluga a Koru?

¹⁵ Ko e tali atu ha tautolu ke he tau hikihikiaga he fakapotopotoaga Kerisiano he lalolagi katoa mo e tau fifiliaga ne taute e lautolu ne takitaki kua fakavē ni ke he iloa e Iehova a tautolu. Ko Koru mo e tau kau haana ne vevehe kehe a lautolu mai he Atua ha ko e ha lautolu a molea e mauokafua, fakatokoluga, mo e temotemoai e tua. Pete ke he fofoga a Koru, ko e fuakau ko Mose, ne taute e tau fifiliaga he tau aho takitaha, ko Iehova mooli ne takitaki e motu. Ne galo ia Koru e mooli mo e tau fua he kaumahala ke fakakite e mahani fakamooli ki a lautolu ne fakaaoga he Atua. Ko e pulotu lahi mooli ki a Koru ke fakatali ki a Iehova ma e maamaaga maaliali po ke tau hikihikiaga ka lata mooli ai ke taute. He fakahikuaga, ne moumou e Koru e fakamauaga haana he gahua fakamooli ha ko e tau gahua fakatokoluga!

16. Maeke fēfē e muitua ke he fifitakiaga a Mose ke lauia e iloa e Iehova a tautolu?

¹⁶ Kua foaki he tala ia e hatakiaga aoga lahi ma e tau motua mo e falu he fakapotopotoaga he vahā nei. Ko e fakatali ki a Iehova mo e muitua ke he tau takitakiaga mai ia lautolu kua kotofa ke takitaki kua lata ma e mahani fakatokolalo. Fakakite nakai e tautolu kua fakatokolalo mo e mahani molu a tautolu tuga a Mose? Maeke nakai a tautolu ke mailoga e tuaga ha lautolu kua takitaki ia tautolu mo e mumui ke he tau takitakiaga kua moua e tautolu? Kua maeke nakai a tautolu ke totoko e tau logonaaga fakatagata ha tautolu ka fehagai mo e tau fakahogohogo manava? Ka pihia, to iloa mitaki foki e Iehova a tautolu. Ko e ha tautolu a mahani fakatokolalo mo e mahani omaoma to fiafia a ia ki a tautolu.

Fioia e Iehova Haana Tau Tagata

17, 18. Ko e heigoa ka lagomatai a tautolu ke fakatumau ke iloa kua fioia e Iehova a tautolu?

¹⁷ Kua aoga lahi ke manamanatu ki a lautolu kua futia mo e iloa mitaki e Iehova. Ko Aperahamo mo Mose ne nakai mitaki katoatoa mo e hepehepe, tuga ni a tautolu. Ka kua iloa e Iehova a laua ti fioia e ia a laua. Ka ko e fifitakiaga ha Koru, kua fakakite to maeke ia tautolu ke mokulu kehe mai ia Iehova ti nakai iloa e ia a tautolu he nakai talia a tautolu. Igatia a tautolu mo e lata ke hūhū hifo ki a ia: ‘Fēfē e onoonoaga a Iehova ki a au? Ko e heigoa haaku ka fakaako mai he tau fifitakiaga nei he Tohi Tapu?’

¹⁸ Maeke ia koe ke mafanatia lahi he iloa ko Iehova kua onoono na ha ha ai a lautolu kua fakamooli nukua futia ki a ia. Fakatumau ke feaki e tua, mahani fakatokolalo, mo e falu aga kua futia fakalahi atu a koe ke he ha tautolu a Atua. He iloa e Iehova a tautolu ko e lilifu uho lahi mooli kua tamai e makona ke he tau momoui ha tautolu mogonei, ti fakatoka mai e tau monuina homo ue atu ma tautolu anoiha.—Sala. 37:18.

Manatu Nakai e Koe?

• Ko e heigoa e tuaga uho ka olioli e koe mo Iehova?

• Maeke fēfē ia koe ke fifitaki e tua ha Aperahamo?

• Ko e heigoa e tau fakaakoaga ka fakaako e tautolu mai ia Koru mo Mose?

[Fakatino he lau 26]

Tuga a Aperahamo, ha ha nakai ia tautolu e tua to fakamooli katoatoa e Iehova e tau maveheaga haana?

[Fakatino he lau 28]

Nakai fakamakai a Koru ke muitua fakatokolalo ke he takitakiaga

[Fakatino he lau 29]

Iloa nakai e Iehova a koe kua muitua fakatokolalo ke he tau takitakiaga?