Ko e Heigoa e Tau Taofiaga he Tau Fakamoli a Iehova?

Kua talitonu e Tau Fakamoli a Iehova “ko e tau Tohi Tapu oti kana mai he Agaga he Atua ia.” (2 Timoteo 3:16) Fakaaoga e mautolu e Tohi Tapu mo takitakiaga mitaki ke iloa e Tufuga mo e tau puhala ke aoga e tau momoui.

Pehē e Tohi Tapu: “Ti iloa ai e lautolu a koe, ko e hāu a higoa ko Iehova, hoko koe ni kua Mua ue atu ke he lalolagi oti.” (Salamo 83:18) Ko e mena ia, kua tapuaki hokoia ni a mautolu ki a Iehova ko e Atua, mo e ha ko e Tau Fakamoli haana, kua fakamalolō a mautolu ke fakailoa e higoa he Atua.​—Isaia 43:10-12.

Ha ko e tau Kerisiano, kua talitonu a mautolu ko Iesu “ko e Tama he Atua,”a ne hau ke he lalolagi ti eke a ia mo Mesia. (Ioane 1:34, 41; 4:25, 26) He mole e mate haana, ne fakaliu tu mai a Iesu ke he lagi. (1 Korinito 15:3, 4) He magaaho fakamui kua Patuiki a ia he Kautu he Atua. (Fakakiteaga 11:15) Ko e Kautu ia ko e fakatufono mooli ka liuaki mai e Parataiso ke he lalolagi. (Tanielu 2:44) “Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi,” he talahau he Tohi Tapu.​—Salamo 37:11, 29.

Talitonu e Tau Fakamoli a Iehova kua aoga agaia e tau matapatu fakaakoaga he Tohi Tapu ma e tau tagata he vahā nei. (Isaia 48:17, 18) Ko e mena ia, kua tapiki fakalahi a mautolu ke he tau matapatu fakaakoaga ia. Ma e fakatai, hataki e Tohi Tapu ki a tautolu ke kalo kehe mai he tau gahua ne takiva aki e tau manamanatuaga mo e tau tino ha tautolu, ati nakai ula tapaka po ke fakaaoga fakahehē e mautolu e tau tulaki kona. (2 Korinito 7:1) Kalo kehe foki a mautolu he tau gahua ne nakai talia he Tohi Tapu, tuga e konahia, feuaki, mo e kaiha.​—1 Korinito 6:9-11.