‘Kia Taute ke he Tau Gahua Mitaki Oti Kana’
1 Ko e tau tagata a Iehova he vaha nei kua fakamonuina aki e mautu he tau mena kai fakaagaga loga. (Isaia 25:6) Kua loga e tau koloa faka-Tohiaga Tapu ke olioli ki ai he fakaakoaga fakatagata mo e magafaoa mo e he tau feleveiaaga he fakapotopotoaga, tau toloaga, mo e tau fonoaga. Ka kua fakaaoga katoatoa nakai e tautolu e tau mena oti nei mo e amaamanaki “kia katoatoa ai e mitaki . . . kia taute ni a ia ke he tau gahua mitaki oti kana”?—2 Timo. 3:17.
2 Manamanatu la ke he fakatokaaga fakaagaga he tau 1998, ne kua teitei lotoga tuai ke oti! Puhala mai he tau feleveiaaga he fakapotopotoaga fakafahi tapu, kua taute e tautolu e falu he tau fakamaamaaga he tau tohi 23 he tau Tohiaga Tapu Heleni Kerisiano, he liu fakamanatu e vala tala ne moua he Insight on the Scriptures hagaao ke he tau momoui he tau tagata 49 he Tohi Tapu, mo e totou ke he 138 e lau he tohi Proclaimers. Kua liu foki a tautolu fakamanatu e tau veveheaga ne tolu aki he tohi Iloilo, teitei oti e tohi Fiafia he Magafaoa, mo e tohi katoa he God’s Word. Lafi ki ai, kua fakatupuola ai a tautolu aki e 12 e tau fufuta he Ha Tautolu a Fekafekauaga he Kautu, 52 e tau vala tala fakaako he Kolo Toko, mo e loga foki e tau lauga ma e tau tagata ke he tau mataulu kehekehe he Tohi Tapu. Ko e tau fakaholoaga loga he fonoaga mo e toloaga kua lafi ke he tau mena oti nei. Ko e mautu ha ia he tau mena fakaagaga mitaki ne kua taute ai ma tautolu!
3 Fakaaue ke he Tau Foakiaga a Iehova: Ke maeke ai ke aoga katoa, kua lata ia tautolu ke fakaaue ke he kakano kua foaki e Iehova e mautu fakaagaga. Fagai ai ke he tau mena mitaki oti nei kua ati hake e tua ha tautolu mo e fakamalolo e fakafetuiaga ha tautolu mo ia. (1 Timo. 4:6) Pete ia, ko e tau mena kai fakaagaga kua nakai taute noa ma e tau hatakiaga ni ha tautolu. Kua omoi a tautolu ke talahau e kupu moli ke he falu mo e mautauteute a tautolu ke hufia mitaki he taute pihia mo tau fekafekau he tala mitaki.—2 Timo. 4:5.
4 Kia nakai tiaki e tau manako fakaagaga ha tautolu, ka e tumau ke feaki e manako ma e tau foakiaga lahi mo e makona fakaagaga mai he laulau a Iehova. (Mata. 5:3; 1 Pete. 2:2) Ke aoga katoa kua lata ke fakatoka fakalahi taha magaaho ma e tau mena kua aoga tuga e tumau e fakaakoaga Tohi Tapu fakatagata mo e magafaoa mo e fakalataha ke he feleveiaaga. (Efeso 5:15, 16) Ko e tau palepale fiafia he taute pihia ka tatai mo e fakamaloloaga omoomoi he agaga ne tohi e Paulo ke he tau Kerisiano Heperu tua fakamoli, ne fakamau ia Heperu 13:20, 21.