Aoga Nakai ki a Koe?

¹ Totou miliona e tau tagata he vaha nei kua manako ke iloa e puhala ke kautu mai he tau mena vihi mo e fiafia e tau momoui. Ne fiafia a lautolu ke he tau tohi lagomatai po ke kumi atu ke he tau fakatokatokaaga ma e tomatomaaga ke he puhala ke fakalaukauka aki e tau momoui ha lautolu. Liga talahau he falu e mena aoga tote ne moua e lautolu. Ka e, he kitia ai ke he tuaga he moui he vaha nei, kua ako kia he tau tagata e fiafia he tau momoui mafola mo e makona he puhala mai he tau fakaholoaga he tau fakaakoaga he tagata? Nakai moli e talahauaga ia!​—1 Kori. 3:18-20.

² He taha fahi, kua foaki noa mai he Tufuga ha tautolu e fakaakoaga lagomatai lahi ki a lautolu oti ka fanogonogo. Manako a Iehova ke he tau tagata oti ke aoga mai he hana fakaakoaga. Kua foaki fakamokoi e ia hana Kupu he agaga ke takitaki aki e tau tagata ke he tututonu, ti fakatupu e ia e tala mitaki he Kautu hana ke fakapuloa ke he lalolagi oti. (Sala. 19:7, 8; Mata. 24:14; 2 Timo. 3:16) Ko e moui fiafia moli kua hagaaki tonu ke fanogonogo ke he tau fakatufono a Iehova.​—Isa 48:17, 18.

³ Kua mua atu e tokoluga he takitakiaga a Iehova ke he tau tohi foaki lagomatai po ke tau puhala fakaholo ki mua mai he tagata he lalolagi. Moua e tautolu e lagomataiaga moli mo e tau aoga tukulagi ka fakaaoga katoatoa e tautolu e tau foakiaga a Iehova ne tohi mai he hana Kupu mo e ne fakaako mai he hana fakatokatokaaga.​—1 Pete. 3:10-12.

⁴ Aoga a Koe Mai he Tau Feleveiaaga he Fakapotopotoaga: He vaha nei, kua fakakite e Iehova e fiafia moli he fakaako a tautolu ke he hana tau puhala, ti aoga ki a tautolu he fanogonogo ke he hana fakaakoaga. Ko e tau feleveiaaga ne lima ha tautolu he vahatapu kua foaki e fakamoliaga he manamanatu fakaalofa a Iehova. He fakalataha atu a tautolu ke he tau feleveiaaga he fakapotopotoaga, kua tolomaki ki mua e iloilo ha tautolu ke he Atua. Kua ako e tautolu e puhala ke puipui aki a tautolu mai he mena kelea he fakatata atu ki a Iehova. He puhala nei kua atihake e tau agaga ha tautolu.

⁵ Lahi atu foki. He tau feleveiaaga he fakapotopotoaga kua maeke ia tautolu ke “fakalahi atu.” (2 Kori. 6:13) Kua putoia e mena nei he lali ke iloa falu he fakapotopotoaga. Kua aoga a tautolu mai he feutaaki e fakamaloloaga, tuga he tohia he aposetolo ko Paulo hagaao ke he tohi hana ke he tau Roma. (Roma 1:11, 12) He tohi ke he tau Heperu, ne fakamafana fakamalolo e ia a lautolu ne kua fakatupu e aga he tiaki e fakalatahaaga Kerisiano.​—Hepe. 10:24, 25.

⁶ Ko e makona he olioli he moui kua tatai tonu ke he fiafia he tau mena he falu. Kua fakamalolo a tautolu ke kumi e tau puhala ke lafi ke he fiafia he falu. Ko e mena ia, ko e tau feleveiaaga Kerisiano ha tautolu, kua moli ke aoga ki a tautolu ni fakatagata mo e aoga he falu kua feaki e tautolu e fakalatahaaga atihake ki ai. Ko e mena kua lata ia tautolu ko e fakalataha mai he loto.

⁷ Kua taute he aposetolo ko Paulo e manatu taha he hana tomatomaaga ki a Timoteo he tohi e ia: “Kua fakahiku e au e poitufi, kua taofi au ke he tua.” (1 Timo. 4:7) Kia huhu hifo a tautolu ki a tautolu ni: ‘Fakamahani nakai e au a au? Ako nakai au ke aoga mai he tau mena kua logona e au he tau feleveiaaga he fakapotopotoaga?’ To e, e tau tali ha tautolu ka fanogonogo a tautolu ke he mena kua logona e tautolu ke he tau feleveiaaga mo e fakamakai ke fakagahua e tau mena kua ako e tautolu. Fakalataha mo e tau mata he tua, kua lata ia tautolu ke maeke ke ono fakalahi atu ke he tau matakainaga tane hane taute e tau fakaakoaga mo e kitia a Iehova ko e Faiaoga Homo Ue Atu he hana tau tagata.​—Isa 30:20.

⁸ Aoga Fekafekau Fakateokarasi mo e Feleveiaaga Fekafekau: Ko e tau feleveiaaga ua nei ne fakatoka pauaki ke lagomatai a tautolu ke lauia mitaki ke he fekafekauaga Kerisiano. Ko e kakano tonu haia ma e Aoga Fekafekau Fakateokarasi​—ko e aoga mo e tau tagata fakaako kua moua e fakaakoaga mo e tomatomaaga tumau ke he tau magaaho oti. Moua e koe e kotofaaga ke fakatata hau a mahani lahi ko e tau tagata lauga mo e ko e faiaoga he Kupu he Atua. Ka e ke lahi e mena ka moua mai he aoga, kia hu a koe, fina atu, fai vala tumau, mo e tuku e loto hau ke he tau kotofaaga hau. Ko e talia mo e fakagahuahua he tomatomaaga ne kua foaki, ka lagomatai a koe ke tupu ki mua.

⁹ Kua fakaako mai he Feleveiaaga Fekafekau ki a tautolu e aoga he fekafekauaga Kerisiano mo e fakakite ki a tautolu e puhala ka fakalataha a tautolu ke he gahua taute tutaki. Kua aoga katoatoa nakai a koe mo e magafaoa hau mai he tau mena kua tala mai he tau feleveiaaga nei ne ua? Kua talahau he hoa Kerisiano: “He taha Feleveiaaga Fekafekau, ne logona e maua e manatu ke taute e kupu ma e aho fakamagafaoa. Nakai taute e mautolu e mena nei, ka ko e mogonei hane taute e mautolu.” Aoga fefe ai kia lautolu? Ne talahau e lautolu: “Kua moua e mautolu ko e tau fakatutalaaga ha mautolu he laulau kai kua fiafia lahi. Nakai liu fai taufetoko ke he magaaho kai.” Aoga pihia foki kia ke he tau fanau e tau feleveiaaga? E. Kua talahau he matua fifine: “Kua maaliali ai ko e tau fanau ha maua kua hufia lahi he tau feleveiaaga. Taha e vahatapu pauaki ne moua e maua e tama tane ono tau ha maua ne talahau ai falu pikopiko. Ka ko e fahitapu ia he feleveiaaga, ko e lauga he fakaakoaga kua hagaao ke he pikopiko. Mo e fakakiteaga agahala he hana mata, ne ono e tama tane ha maua ke he matua tane hana mo e fakahololi hifo ke he hana nofoa. Ne moua e ia e manatu, ti nakai fai mena vihi a mautolu he mole e mena ia.”

¹⁰ Pehe e matakainaga fifine paionia kua fiafia a ia ke he tau lagomataiaga ke fakatolomaki ki mua e fekafekauaga ha tautolu ne kua foaki mai he Feleveiaaga Fekafekau. Ko e ha? Kua fakamaama e ia: “To au ke he hele. Falu magaaho kua manatu au to nakai gahuahua e lagomataiaga ne tuku mai he Our Kingdom Ministry. Ka e he Feleveiaaga Fekafekau, ne logona e au nukua lata ia tautolu ke fakaaoga ai, kua puke au he fakamakai ke fakagahua e tau lagomataiaga ia. Kua taute e fekafekauaga ke fiafia!” He mole e tau fahitapu loga he fakagahua e lagomataiaga ke fakaaoga ke kamata e fakaakoaga Tohi Tapu he ahi atu fakamua, ne kamata e ia e fakaakoaga mo e tama fifine, he ahi atu fakamua, ne fa e liogi ma e lagomatai.

¹¹ Ka logona e koe e lauga kua putoia e tomatomaaga mai he Tohi Tapu ke he tau fifiliaga fakatagata ne taute e koe, kua mailoga nakai e koe kua vagahau fakahako mai a Iehova ki a koe? Pihia e logonaaga he taha matakainaga. Ne pehe a ia: “Nakai la leva he taha feleveiaaga, ha ha i ai e lauga ne fakatutala e matakainaga tane ke he tau puhala fakafiafiaaga ne kua lata mo e Kerisiano mo e tau fakafiafiaaga kua nakai lata. Na fa manako au ke kitekite e hu momi he televisoni. Ka e he mole e feleveiaaga ia, ne fifili au ko e sipote nei ko e faga fakafiafiaaga ne nakai lata mo e tau Kerisiano. Ti nakai liu au kitekite foki.” E, pete kua feaki he matakainaga tane nei e fiafia ke he taha mena kua favale, ne tali fakatokolalo a ia ke he takitakiaga a Iehova.​—Sala. 11:5.

¹² Ko e Feleveiaaga ma e Tau Tagata, ko e Fakaakoaga Kolo Toko, mo e ko e Fakaakoaga Tohi he Fakapotopotoaga: Ko e tau lauga ke he tau tagata ne logona e tautolu he tau fahitapu takitaha kua puke he tau vala tala kehekehe he Tohi Tapu. Ko e heigoa hau kua moua mai he tau lauga nei? Taha e tane Kerisiano ne talahau ke he tau aoga ne moua e ia: “Ne talahau he taha lauga ke he tau tagata e tau fua oti he agaga. Ne talahau he tagata lauga, hagaao ki a ia, ke maeke ke gahua e feakiaga he tau fua nei, to fifili e ia taha e fua pauaki mo e gahua ai ke he fahitapu katoa ia. He matahiku he fahitapu, ne fakaata e ia e puhala ne taute e ia he fakatata e fua ia he tau gahua hana he tau aho takitaha. Ti fakaholo atu a ia ke gahua taha fua foki he taha fahitapu. Ne manako au ke he manatu ti kamata au ke taute pihia.” Ko e fakagahuahuaaga mitaki ha ia ke he mena kua ako!

¹³ Kua fakaako he Fakaakoaga Kolo Toko a tautolu ke fakagahua e tau matapatu fakaakoaga he Tohi Tapu ke he tau tutuaga kehekehe he moui. Kua lagomatai he mena nei a tautolu ke fakatumau e totoka ke he tau manamanatuaga mo e tau loto pete ni e tau kapeletu he moui. Kua fakatumau foki he Fakaakoaga Kolo Toko a tautolu ke fakatatau mo e holo ki mua he kupu moli. Ma e fakatai, aoga nakai a tautolu mai he fakaakoaga he tau vala tala he Kolo Toko ia Me 1, 1999, ne mataulu e tau vala tala: “Ko e Mena Hohoko Mai e Tau Mena Oti Ia ke Lata Ai,” “Ko Ia ne Totou Kia Manamanatu,” mo e “Kia Mataala mo e Kia Fakailoilo!” Lauia fefe a koe fakatagata ke he tau fakaakoaga nei? Fakakite nakai e koe he tau gahua hau kua uta e koe ke he loto e hatakiaga a Iesu hagaao ke he vaha anoiha? Kua tauteute nakai e koe a koe ma e tau kamatamata i mua ka kitia e tautolu e “mena vihiatia ke moumou aki . . . kua tu ke he mena tapu”? (Mata. 24:15-22) Fakakite nakai he tau foliaga mo e puhala moui hau e mena ia, nakai ko e fakaputu he tau koloa tino, ka ko e fakatokolugaaga he higoa a Iehova ko e mena kua mua atu e aoga ki a koe? He Fakaakoaga Kolo Toko, nakai kia ako e tautolu ke aoga he magaaho nei ki a tautolu ni?

¹⁴ Manamanatu ke he lahi he mena kua ako e tautolu he Fakaakoaga Tohi he Fakapotopotoaga he tau fahitapu takitaha. Hane fa e fakaako a tautolu mogonei he tohi a Tanielu he Tohi Tapu. Ke he fa e mahina nukua fakaako a tautolu ke he tohi he Tohi Tapu, kua kitia nakai e tautolu e tupu he tua ha tautolu he tau fahitapu takitaha? Tuga e perofeta fakahele ha Iehova, ko Tanielu, kua fakamalolo e tua ha tautolu ke liga maeke ia tautolu ke fakauka.

¹⁵ Fakaako e Iehova a Tautolu ke Momoui Fiafia: To fehola kehe a tautolu mai he mamahi lahi e loto ka fanogonogo a tautolu ke he tau fakatufono he Atua. Lafi ki ai, kua iloa e tautolu e moui fiafia. Muitua ai ke he takitakiaga a Iehova, kua eke a tautolu mo tau tagata gahua he hana gahua, nakai ko e tau tagata kitekite hokoia. Mo lautolu hane taute e gahua he Atua ko e tau tagata fiafia.​—1 Kori. 3:9; Iako. 1:25.

¹⁶ Manamanatu fakalahi ke he puhala ka fakagahua e koe e tau mena kua logona e koe he tau feleveiaaga he fakapotopotoaga. (Ioane 13:17) Kia fekafekau ki a Iehova mo e eketaha, mo e loto katoa hau. To pukenamo e olioli hau. To monuina ti kakano lahi foki hau a moui. E, to aoga ai ki a koe ni.