‘Fakamahani ke he Tau Kupu he Tua’
1 Ke tutuli e moui fakamoli mahani Atua kua lata ke lali fakamakamaka. (1 Timo. 4:7-10) Ke he malolo ni ha tautolu, to nakai leva ti lolelole mo e tupetupe a tautolu he lali ke tutuli e puhala ia. (Isaia 40:29-31) Taha puhala kua maeke ia tautolu ke moua e malolo mai ia Iehova ko e ‘fakamahani ke he tau kupu he tua.’—1 Timo. 4:6.
2 Tau Mena Kai Fakaagaga Loga: Puhala he Kupu hana mo e he “fekafekau fakamoli mo e loto matala,” ne foaki mai e Iehova e tau mena kai fakaagaga loga. (Mata. 24:45) Kua taute nakai e tautolu ha mena ke aoga mai ai? Totou nakai e tautolu e Tohi Tapu he tau aho takitaha? Kua fakatoka nakai e tautolu e tau magaaho ma e fakaakoaga fakatagata mo e manamanatu fakahokulo? (Sala. 1:2, 3) Kua atihake he puhala kai malolo fakaagaga pihia a tautolu mo e puipui a tautolu mai he tau lauiaaga fakalolelole he lalolagi a Satani. (1 Ioa. 5:19) Ka fakapuke e tautolu e manamanatuaga ha tautolu aki e tau mena atihake mo e fakagahua ai ke he tau momoui ha tautolu, to fakalataha a Iehova mo tautolu.—Filipi 4:8, 9.
3 Kua fakamalolo foki e Iehova a tautolu puhala he tau feleveiaaga he fakapotopotoaga. (Hepe. 10:24, 25) Ko e fakaakoaga fakaagaga mo e feoaki atihake ne moua mai he tau fakapotopotoaga nei kua fakamalolo a tautolu ke tutu mau pete ko e tau kamatamata. (1 Pete. 5:9, 10) Ne pehe taha Kerisiano fuata: “Fano au he aoga he tau aho oti, mo e lahi e fakalolelole haku. Ka ko e tau feleveiaaga kua tuga e huaga he tutakale, ne moua e au e malolo ke fahia ke fano he aoga he aho hake.” Kua fakamonuina moli a tautolu ha ko e tau laliaga ke o ke he tau feleveiaaga!
4 Fakapuloa e Kupu Moli: Ko e fakamatala ke he falu kua tuga e mena kai ki a Iesu. Ne fakamalolo a ia. (Ioane 4:32-34) Tatai foki, ka tutala a tautolu mo e falu hagaao ke he tau maveheaga mitaki lahi he Atua, ne logona e tautolu e malolo. He nakai faihoania ke he fekafekauaga ka fakatumau foki e tau loto mo e tau manamanatuaga ha tautolu ke onoono fakamahao atu ke he Kautu mo e tau monuina ka nakai leva ti moua. Kua fakamalolo moli he mena ia a tautolu.—Mata. 11:28-30.
5 Ko e monuina ha ia ha tautolu ke aoga mai he tau mena kai fakaagaga huhua mitaki ne foaki e Iehova ma e tau tagata hana he vaha nei! Kia fakatumau a tautolu ke kalaga he loto fiafia ke he fakahekeaga hana.—Isaia 65:13, 14.