Feaki e Tau Aga Mitaki, Helehele e Tau Monuina Loga
1. Ko e ha ne aoga ai ke liu kitekite ke he fakaholoaga fakaagaaga haau?
1 He magaaho fakamua ne eke a koe mo Kerisiano, ne liga lali lahi a koe ke feaki e fakaholoaga mitaki ma e tau gahua fakaagaaga ne putoia e fakaako he Tohi Tapu, tau feleveiaaga Kerisiano, fekafekauaga he fonua, mo e liogi. Ti ko e fua he fakamonuina e Iehova e tau laliaga haau, ne tupu a koe fakaagaaga. Ti liga kua loga e tau tau mogonei he mole tali mai he papatiso a koe. Kua fakatumau agaia nakai a koe ke he tau aga mitaki fakaagaaga ne feaki e koe he eke mo Kerisiano?
2. Aoga fēfē ki a tautolu e totou e Tohi Tapu he tau aho oti?
2 Liu Kitekite ke he Fakaholoaga Haau: Ko e aga nakai haau ke totou taha vala he Kupu he Atua he tau aho oti? Kua helehele e tautolu e tau monuina loga he taute pihia! (Iosua 1:8; Sala. 1:2, 3) I Isaraela i tuai, ne igatia e patuiki mo e totou e haana lagaki he Fakatufono “ke he tau aho oti he hana moui.” Ko e heigoa e aoga? Ke maeke a ia ke feaki e loto fakatokolalo mo e ako ke matakutaku ki a Iehova ti nakai fano kehe he Haana tau fakatufono. (Teu. 17:18-20) Pihia foki he vahā nei, kua lagomatai he totou tumau e Tohi Tapu a tautolu ke nakai tokutoku kelea mo e aga totonu he nonofo he lalolagi kelea mo e matahavala nei. Lagomatai foki a tautolu ke mautali katoatoa ma e fekafekauaga.—Filipi 2:15; 2 Timo. 3:17.
3. Ko e heigoa e tau monuina ne helehele e tautolu he fakalataha tumau ke he tau feleveiaaga?
3 Ne mahani a Iesu ke fina atu ke he sunako, ko e matakavi ne totou ai e tau Tohiaga Tapu. (Luka 4:16) Nakai noa ko e mena nei ati mauokafua ai a ia he fehagai ke he tau kamatamata ne matematekelea a ia ki ai. Kua fakamalolō foki a tautolu he tau fakamaamaaga fakaagaaga ne vetevete mai he tau feleveiaaga he fakapotopotoaga mo e “fefakamafanaaki” ne atihake. (Roma 1:12) Ko e fakapotopoto fakalataha mo e tau matakainaga ha tautolu ka lagomatai a tautolu ke fakauka ke he tau tutuaga uka he tau aho fakamui nei. (Hepe. 10:24, 25) Ko e mahani agaia nakai haau ke fakalataha ke he tau feleveiaaga oti?
4. Maeke fēfē he fekafekau ke he fonua he tau faahi tapu takitaha ke aoga ki a tautolu?
4 Kua tala mai he fakamauaga mai he agaaga ki a tautolu ko e tau aposetolo ne fakalataha he fakapuloa e tala mitaki he ‘tau aho oti he faituga, ke he taha fale mo e taha fale.’ (Gahua 5:42) Liga nakai maeke ia tautolu ke fakamatala he tau aho oti, ka e maeke nakai ia tautolu ke feaki e aga ha tautolu ke taute falu puhala he fekafekauaga he tau faahi tapu oti? He taute pihia, to mautali mooli a tautolu ke lalago e Kupu he Atua, ti liga olioli foki a tautolu he tau mena atihake ne moua he folafola e kupu mooli he Tohi Tapu ke he falu.
5. Ko e ha kua aoga ke liogi tumau ki a Iehova?
5 Ne fakamonuina lahi e perofeta ko Tanielu he fekafekau “mau” ki a Iehova he moui katoa haana. Ne putoia ke he mena nei e aga ke liogi tumau ki a Iehova. (Tani. 6:10, 16, 20) Pihia foki, he fuluhi tumau a tautolu ki a Iehova he liogi mai he tau loto, to fakamonuina e ia a tautolu aki e haana agaaga tapu. (Luka 11:9-13) Lafi ke he mena ia, to tali e Iehova he fakatata ki a tautolu, he fakaatā a tautolu ke olioli e fakafetuiaga tata mo ia. (Sala. 25:14; Iako. 4:8) Ko e palepale mitaki lahi! Kia gahua fakamakamaka a tautolu mogoia ke fakatumau e tau aga mitaki fakaagaaga mo e helehele e tau monuina loga mai ia Iehova.