“To Foaki Atu e Ia e Malolo kia Lautolu kua Lolelole”

¹ Lolelole a tautolu oti ke he falu magaaho. Liga nakai ni ha ko e gahua po ke falu matagahua fakatino ka e mai foki he tau paleko ne fehagai mo tautolu ke he “tau aho uka” nei. (2 Timo. 3:1) Ha ko e tau fekafekau a Iehova, moua fēfē e tautolu e malolō fakaagaaga ne lata ke fakatumau a tautolu neke fakamanou hifo a tautolu he fekafekauga? Taute e tautolu e mena nei he falanaki ki a ia ne ‘malolo ue atu,’ ko Iehova. (Isaia 40:26) Kua kitia e ia e tau manako ha tautolu ti fiafia mooli ke lagomatai a tautolu.​—1 Pete. 5:7.

² Tau Foakiaga a Iehova: Kua fakamalolō e Iehova a tautolu he puhala he agaaga tapu haana, ko e malolō gahuahua taha ia ne fakaaoga e Ia ke tufuga aki e lagi mo e lalolagi katoatoa. Kua lagomatai he agaaga he Atua a tautolu ke ‘fakafoou e malolo’ ka lolelole a tautolu. (Isaia 40:31) Hūhū hifo ki a koe, ‘I ne fe ne liogi fakahiku pauaki au ma e agaaga tapu ke fakamalolō au ke fehagai mo e tau matagahua faka-Kerisiano haaku?’​—Luka 11:11-13.

³ He totou tumau mo e manamanatu fakahokulo ke he Kupu omoomoi he Atua mo e tupu olaola fakaagaaga he fakaako tumau e tau tohi faka-Kerisiano ha tautolu, to eke a tautolu ke tupu olaola tuga e “akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau.”​—Sala. 1:2, 3.

⁴ Kua fakaaoga foki e Iehova e tau matakainaga talitonu, ke eke “mo fakamafanatia” ki a tautolu. (Kolo. 4:10, 11) Kua fakamalolō e lautolu a tautolu ke he tau feleveiaaga he fakapotopotoaga ha ko e tau fakatutalaaga, tau tali, mo e tau lauga atihake ha lautolu. (Gahua 15:32) Mua atu ke he tau motua Kerisiano, ne foaki e lagomatai fakaagaaga mo e atihakeaga fakahauhau.​—Isaia 32:1, 2.

⁵ Ko e Fekafekauaga: Ka logona hifo e koe e lolelole, ua oti e fakamatala! Nakai tuga e tau matagahua loga, ko e fakalataha tumau ke he fekafekauaga kua fakahauhau a tautolu. (Mata. 11:28-30) Ko e folafola e tala mitaki ka lagomatai a tautolu ke hagaaki ke he Kautu he Atua mo e tokaloto tumau e tukulagi tukumuitea mo e tau monuina homo ue atu i ai.

⁶ Lahi mahaki e mena ke taute ato moumou e fakatokaaga kelea nei. Ti ha ha ia tautolu e tau kakano oti ke tumauokafua ke he fekafekauaga ha tautolu, “kaeke ke fekafekau e taha kia fakalata ke he malolo kua foaki mai he Atua.” (1 Pete. 4:11) Mo e lagomataiaga ha Iehova to fakakatoatoa e gahua ha tautolu, “to foaki atu e ia e malolo kia lautolu kua lolelole.”​—Isaia 40:29.