Kia Feati Hake he Tali he Tau Feleveiaaga
1 Kua tomatoma mai ki a tautolu he Heperu 10:24 ke ‘fakalagalaga ke fefakaalofaaki mo e tau gahua mitaki.’ Lata ai foki ke feati hake ha ko e tau tali kakano he tau feleveiaaga he fakapotopotoaga. Ko e ha kua lata ia tautolu ke tali? Taute fefe e tautolu e mena nei? To aoga ni a hai?
2 Manamanatu la ke he tau magaaho loga ne kua lagomatai a koe ha ko e tau tali mukamuka mo e maama he falu, ne fakatolomaki e maamaaga hau mo e fakamalolo fakaagaga aki a koe. Ha ha ia koe e kotofaaga ke taute pihia foki ma lautolu. Ti he magaaho ka tali ai a koe, kua fakakite e koe hau a manako ke ‘ta atu taha mena fakaalofa ke lata mo e Agaga’ ke fakamalolo aki a lautolu oti ne ha ha i ai.—Roma 1:11, 12.
3 Kia Tali Mitaki Fefe: Aua neke tali loa, he talahau e tau manatu oti he paratafa. Kua fa mahani e tau tali loloa ke ai hokotia ke he manatu kua lata, mo e liga ke fakalolelole foki e falu ke tali. Kua lata e tali fakamua he paratafa ke ku mo e pako tonu ni ke lata mo e huhu. Ko lautolu ne fai tali foki kua lata ke fakamaama e puhala ke fakagahuahua ai po ke fakakite e puhala ke fakaaoga e tau kupu tohi. Kikite e School Guidebook, lau 90-2.
4 Ka hopo e ate hau ke tali, kia tauteute fakamua e tali ku, ti ole ke he takitaki ke tali a koe he paratafa ia. Ka taute mau pihia e koe he falu feleveiaaga, to mukamuka fakahaga ai ke tali. Manatu na fakalolelole a Mose mo Ieremia ke vagahau ke he moto tagata. (Eso 4:10; Iere. 1:6, matahui tala, NW.) Ka e lagomatai e Iehova a laua ke vagahau hagaao ki a ia, ti to lagomatai foki e ia a koe.
5 Ko Hai ka Lagomatai he Tali Hau? Ko koe ni ka moua e lagomatai, kakano kua peehi fakalahi he tau tali hau e kupu moli ki a koe, ati mukamuka ai ke manatu he taha magaaho. Taha mena foki, kua lagomatai e falu he logona hau a tau tali feati hake. Kua mafanatia a tautolu he magaaho ka lalilali oti ke fakakite e tua he tau feleveiaaga he fakapotopotoaga, pete ko e tagata fa mahani, fuata tote, ma, po ke fou.
6 Moli to logona e tautolu ‘e kupu ke he hana aho ke lata ai, ko e mitaki lahi haia’ ka fakaaoga ai ke feati hake he tau feleveiaaga!—Fakatai 15:23.