Tau Leveki Takitaki—Ko e Takitaki he Fakaakoaga Kolo Toko
1 Ko e Kolo Toko Fakapuloaaga he Kautu a Iehova ko e koloa ne mua a ia he “fekafekau fakamoli mo e loto matala” ke foaki ki a tautolu e tau kai fakaagaga he “tau magaaho.” (Mata. 24:45) Ko e motua ne takitaki e Fakaakoaga Kolo Toko kua lago ki ai e matagahua lahi ko e faiaoga lotomatala ne fakatokatoka e fifitakiaga mitaki he moui faka-Kerisiano.—Roma 12:7; Iako. 3:1.
2 Ke lauia mitaki e fakaakoaga, kua lata he takitaki he Fakaakoaga Kolo Toko ke lahi e magaaho ke tauteute tuai he tau fahi tapu takitaha. Kua taute pihia e ia he liogi mo e fakaeneene tumau. Ko e tokaga hana ke he fakapotopotoaga kua kitia ai he fakamakamaka fakamoli ke hokotia ke he tau loto ha tautolu e tau manatu ne fakaako ki ai. Ne fakamahino atu a ia ke he tau manatu hokulo he fakaholoaga mo e lagomatai a tautolu ke kitia e puhala ne matutaki atu ai ke he mataulu he vala tala.
3 Ke hokulo e tauteute tuai hana kua lata foki ia ia ke totou fakamua e tau kupu Tohi Tapu ke iloa e puhala ke fakaaoga ai. Ne talahaua mau e ia e Kupu he Atua ke fakamalolo e fakapotopotoaga ke fakaaoga fakamitaki e Tohi Tapu he magahala he fakaakoaga. Ka nakai la hako ia e manatu he tau tali he fakapotopotoaga po kua ai talahau e fakaaogaaga he kupu Tohi Tapu ne matapatu ki ai, to huhu e ia taha huhu ke feaki mai e tali hako. Ko e puhala nei ka lagomatai e ia a tautolu ke mailoga e tali hako mo e ke iloa e puhala ke fakagahuahua e mena ne ako ke he tau momoui ha tautolu.
4 Ne fakamakamaka e takitaki he Fakaakoaga Kolo Toko ke fakatolomaki hana ni a iloilo ke fakaako. Nakai tala lahi a ia ka e fakamafana mai ki a tautolu ke tali—ke he tau kupu ni ha tautolu, fakaku, mo e hakotika. Liga to fakamanatu mai a ia ki a tautolu he falu mogo, ko e tagata tali fakamua kua lata ke fakaku e tau tali mo e fakahako ke he huhu he tohi. Ko e falu tali lafi mai he toloaga ka fakamaama e fakaaogaaga he tau kupu Tohi Tapu, lago atu ke he mena tutala ki ai, po ke puhala ke fakagahuahua e tau manatu ia. He fakamalolo age ke tauteute tuai fakatagata mo e fakamagafaoa ne fakaohooho he takitaki he Fakaakoaga Kolo Toko e tau tagata oti ke manako ke tali.
5 Ko e ‘tau tagata fakaako e Iehova,’ ne fakalilifu e tautolu “e tau mena fakaalofa ke he tau tagata,” tuga e tau takitaki he Fakaakoaga Kolo Toko, ne “gahua . . . katoa mo e fakaako atu.”—Isa 54:13; Efeso 4:8, 11; 1 Timo. 5:17.