Takitaki he Tau Leveki—Tau Leveki he Fakaakoaga Tohi he Fakapotopotoaga
1 Ko e kotofaaga lilifu lahi ma e motua po ke fekafekau lagomatai ke eke mo takitaki he Fakaakoaga Tohi he Fakapotopotoaga. Ko e leveki e tau manako fakaagaga ha lautolu he matakau hana ko e matagahua nakai fakateaga. Tolu la e fufuta he tau gahua hana.
2 Maeke ke Fakaako: Kua lata ke tauteute fakamakutu e leveki he Fakaakoaga Tohi he Fakapotopotoaga ke foaki e maamaaga ke he matakau he tau fahi tapu takitaha. Kua kumi e ia ke fakalaulahi e loto fakaaue ma e tohi kua fakaako. He nakai tali tumau a ia he fakaakoaga, kua aoga ni he falu magaaho ke fakalaga e ia e falu huhu koto ke futia aki e tau matapatu manatu he fakaakoaga. Ko e paleko hana ke fakaalaala mo e fakamaama e fakaakoaga mo e ke fakalataha e tau tagata oti he fakaakoaga. Ko e foliaga hana ke ati hake fakaagaga, ke fakakatoatoa e uho he aoga he fakaakoaga, mo e ke taute e fakaakoaga ke hokotia ke he manamanatuaga mo e loto.—1 Tesa. 2:13.
3 Levekiaga Lagomatai: Ko e leveki he Fakaakoaga Tohi he Fakapotopotoaga kua “tuga ne fakamumuliaga mai he matagi, mo e mena ke malu ai ka to e afa.” (Isa 32:2) Kua leveki moli e ia e tau tagata oti he matakau hana mo e kitia ki ai kua foaki e lagomataiaga fakaagaga ka eke kua lolelole taha ia lautolu kua leveki e ia.—Eseki. 34:15, 16; 1 Tesa. 2:7, 8.
4 Gahua Evagelia Malolo: Ko e takitaki he Fakaakoaga Tohi he Fakapotopotoaga kua fakamakutukutu ke he tau fakatokatoka aoga ma e tau tagata oti he matakau hana ke fakalataha katoatoa ke he gahua he fonua. Kua takitaki e ia e gahua evagelia, he iloa e fakalatahaaga tumau, fakamalolo, mo e fakamakai ne fakakite e ia ma e fekafekauaga ka fakaata ke he matakau katoa. (Kolo. 4:17; 2 Tesa. 3:9) He falu magaaho, kua makai a ia ke gahua mo e tau tagata takitokotaha he matakau hana. Ka manako a tautolu ke fakamatila e tau puhala fakamatala mo e fakaako ha tautolu ke he fekafekauaga, ko e leveki he Fakaakoaga Tohi he Fakapotopotoaga ka lagomatai a tautolu ke moua e foliaga ha tautolu.—1 Timo. 4:16; 2 Timo. 4:5.
5 Kua fakamonuina moli a tautolu aki e tau mena fakaalofa ke he tau tagata nei ne kua mautali ke foaki ki a tautolu e lagomataiaga fakaagaga mo e lagomataiaga fakaalofa. (1 Tesa. 5:14) Kia eke e fakalatahaaga tumau ha tautolu ke he fakaakoaga tohi mo e lagomatai fakamoli he gahua evagelia ke fakakite e loto fakaaue ha tautolu ma e foakiaga homo ue atu nei mai ia Iehova.—Hepe. 10:25.