Ko Hai kua Taute e Finagalo ha Iehova he Vahā Nei?
1. To kamata a fe a tautolu ke fakatutala ke he Ko Hai kua Taute e Finagalo ha Iehova he Vahā Nei? mo e aoga fēfē ai a tautolu?
1 He taha mogo i mua to fakaaoga e porosua Ko Hai kua Taute e Finagalo ha Iehova he Vahā Nei? he Fakaakoaga Tohi Tapu he Fakapotopotoaga. Ko e porosua foou nei ne fakatoka mai he Fonoaga Faahimotu “Puipui Haau a Loto!” ne taute ke takitaki atu e tau tagata fakaako Tohi Tapu ke he fakatokatokaaga. Ka fakatutala ke he porosua nei to fakalahi atu e loto fakaaue ha tautolu he eke mo vala he fakatokatokaaga ha Iehova mo e lagomatai foki a tautolu ke iloa mitaki e tohi lagomatai nei ke fakaaoga he fekafekauaga.—Sala. 48:13.
2. Taute fēfē e fakaakoaga ke he porosua he fakapotopotoaga?
2 Puhala ka Fakaako Ai: Lata e takitaki fakaakoaga ke fakatokatoka fakamitaki e magaaho ma e tau fakaakoaga takitaha. To kamata e ia e tau fakaakoaga takitaha ne 28 he totou e tau hūhū he mataulu. Ti uiina e ia e tagata totou ke totou e paratafa he kamataaga. Ti hūhū he matakainaga ne takitaki ke he toloaga e hūhū ne kua tauteute e ia ma e kamataaga ia. Ka mole ia, ko e tau vala takitaha ne kamata aki e talahauaga ne matatohi puni lahi kua lata ni ke totou ti fakatutala ai takitaha. Ka oti e vala ia he totou, to uiina he takitaki fakaakoaga ke talahau e tau manatu kua tali e hūhū he mataulu he fakaakoaga. Loga foki e tau fakatino he porosua kua maeke ke fai manatu ki ai. Lata e tau matapatu kupu Tohi Tapu ke totou kaeke kua fai magaaho. Ato hiki ke he taha fakaakoaga, ko e takitaki fakaakoaga to liu ke fakamanatu he hūhū e tau hūhū i lalo he lautohi. Ka fai puha “Kumikumi Fakalaulahi” i ai, to totou ai, ti uiina e ia e toloaga ke fai manatu ke he puhala ka aoga ke he tagata fakaako Tohi Tapu he muitua ke he tau puhala nei. Ka fai magaaho he matahiku he aoga, liga fakaaoga he takitaki fakaakoaga e tau mataulu tala he tau fakaakoaga mo tau hūhū liu fakamanatu. Manatu liga nakai ko e puhala anei ke taute aki e fakaako Tohi Tapu he kaina.
3. Aoga katoa fēfē a tautolu he fakaako ke he porosua nei?
3 Ke aoga katoa mai ai, kia mautauteute tuai to o mai ke he feleveiaaga. Lali fakalahi ke fai tali. Ka fakatutala ai, manamanatu ke he kakano kua aoga e vala tala ke he tau tagata fakaako Tohi Tapu. Kia eke e fakaakoaga ha tautolu ke he porosua foou nei mo taoga ha tautolu ke lagomatai e falu ke fakalataha mai mo tautolu he taute e finagalo he Atua ke maeke foki a lautolu ke tumau tukulagi.—1 Ioa. 2:17.