Puhala ke Fakaaoga e Ko Hai kua Taute e Finagalo ha Iehova he Vahā Nei?
Porosua Foou kua Talaga ke Takitaki e Tau Tagata ne Fakaako Tohi Tapu ke he Fakatokatokaaga
1. Ko e heigoa e tau kakano tolu he porosua Finagalo ha Iehova?
1 Kua kamata nakai a koe ke fakaaoga e porosua foou Ko Hai kua Taute e Finagalo ha Iehova he Vahā Nei? Ko e kakano he porosua (1) ke fakamahani e tau tagata ne fakaako Tohi Tapu mo tautolu ko e Tau Fakamoli a Iehova, (2) ke lagomatai a lautolu ke iloa e tau gahua ha tautolu, mo e (3 ke fakakite ki a lautolu e puhala ne gahuahua ai e fakatokatokaaga ha tautolu. Ko e porosua Finagalo ha Iehova kua ha ha i ai taha e fakaakoaga he lau, ti mukamuka ke taute he lima ke he hogofulu e minuti he matahiku he fakaakoaga.
2. Fakamaama e puhala ne talaga aki e porosua mo e tau vala i ai.
2 Puhala kua Talaga Ai: Kua vevehe e porosua ke he tolu e vala, ne igatia mo e fakatutala ke he tau tutuaga kehekehe he fakatokatokaaga ha Iehova, tuga ne totoku i luga. Ko e mataulu he tau fakaakoaga ne 28 kua tohia ai ko e hūhū, ti ko e tau vala mataulu ne puni lahi ne mui mai kua tali e hūhū ia. Ko e tau ata mai he molea e 50 e motu kua tohi e higoa i ai ke fakakite e laulahi he gahua ha tautolu ke he lalolagi katoa. Loga e fakaakoaga ne fai puha “Kumikumi Fakalaulahi,” ne tu ai e tau puhala ke fakamalolō e koe e tagata fakaako haau ke muitua ki ai.
3. Fakaaoga fēfē e tautolu e porosua Finagalo ha Iehova?
3 Puhala ke Fakaaoga e Koe: Kamata he fakakite age e hūhū, ko e mataulu he fakaakoaga a ia. Ti ka totou tokoua e mua e fakaakoaga, fakamaama e tau vala mataulu puni lahi. Fakaoti aki, fakatutala ke he tau hūhū fakamanatu i kelekele he lau ia. Maeke ia koe ke totou katoa e vala tala he fakaakoaga po ke totou ti fakatutala ke he tau vala takitaha. Fifili ni e koe ko e tau kupu tohi fe i loto ka totou. Ua nimo ke fakatutala ke he tau fakatino mo e tau puha “Kumikumi Fakalaulahi.” Ke he laulahi he tau magaaho, kua lata ke tutala fakapapahi ke he tau fakaakoaga. Pete ia, kua atāina ke holo atu ke he fakaakoaga ne felauaki tonu mo e tuaga he mogoia. Ma e fakatai, kaeke kua tata mai e toloaga po ke fonoaga, maeke ke fakaholo atu ke he fakaakoaga 11.
4. Ko e ha kua fiafia ai a koe ke moua e koloa foou nei?
4 Ka fakaako Tohi Tapu a tautolu mo e taha tagata, kua lagomatai e tautolu a ia ke iloa ha tautolu a Matua he lagi. Ka kua lata foki a tautolu ke fakaako a ia hagaao ke he fakatokatokaaga ha Iehova. (Fakatai 6:20) Ko e fiafia ha ia ha tautolu ke moua e koloa foou nei ke mukamuka ke taute pihia!