Fakafeleveia Atu ki a Lautolu!
1. Ko e heigoa e magaaho mitaki lahi kua moua e tautolu ke foaki e fakamatala, ti ko e ha?
1 Nakai fai magaaho kua mua atu e mitaki ke foaki e tautolu e fakamatala ka ko e Fakamanatuaga ne taute lagataha he tau. Manamanatu la: He tau nei kua amanaki ke molea e hogofulu e miliona he tau tagata ahiahi ka fakalataha ke he Fakamanatuaga mo e fanogonogo ke he ua e mena fakaalofa mua ue atu ne kua fakakite mai he lukutoto. (Ioane 3:16; 15:13) To iloa e lautolu e tau monuina kua maeke ia lautolu ke moua ha ko e mena fakaalofa ha Iehova. (Isaia 65:21-23) Ka e nakai ko e tagata lauga ni ka fakamatala hokoia he feleveiaaga nei. Ko tautolu oti ka fakalataha mai to moua e magaaho ke foaki e fakamatala malolō ka fakafeleveia mafanatia atu ke he tau tagata ahiahi.—Roma 15:7.
2. Fakafeleveia mafanatia atu fēfē a tautolu ke he tau tagata ahiahi?
2 He nakai kumi ni e nofoa haau ti nofo fakatekiteki ke fakatali ke kamata e fakaholoaga, he ha he fakamakaukau ke fakafeleveia atu ke he falu ne tata ki a koe? Liga maimainā e tau tagata ahiahi mo e nakai iloa ko e heigoa ka amanaki ki ai. Ko e mamali mafanatia mo e tau kupu fakafeleveia fiafia ha tautolu ka lagomatai a lautolu ke fakatotoka. Ke iloa kua hau e tagata ha kua moua e uiina, liga hūhū a koe ko e magaaho fakamua kia anei haana kua fakalataha ke he taha he tau feleveiaaga ha tautolu po ke fai tagata a ia ne iloa he fakapotopotoaga. Liga maeke ia koe ke uiina a ia ke nofo mo koe ti fakaaoga tokoua e Tohi Tapu mo e tohi lologo haau. Ka fakahoko ai he Fale he Kautu, liga maeke ia koe ke uta viko a ia ke fakakitekite fakakū. Ka oti e lauga, fakaatā a koe ke tali haana a tau hūhū. Kaeke kua lata e fakapotopotoaga haau ke ō mafiti ka e fakaatā ke lata mo e taha fakapotopotoaga, liga pehē a koe: “Fia iloa au ko e fēfē e manatu haau ke he fakaholoaga. Fai puhala nakai ke maeke au ke matutaki mo koe?” Ti taute e tau fakatokaaga ke feaki e fiafia. To manako pauaki e tau motua ke mataala ke fakamalolō e tau tagata fakailoa ne nakai malolō fakaagaga ne kua fakalataha mai.
3. Ko e ha kua aoga ma tautolu ke fakamakaukau ke fakafeleveia e tau tagata ahiahi ke he Fakamanatuaga?
3 Ke he tokologa he tau tagata ahiahi, ko e magaaho fakamua la nei ma lautolu ke kitia e fiafia, mafola, mo e kaufakalataha he parataiso fakaagaaga ne ha ha mo tautolu ko e tau tagata ha Iehova. (Sala. 29:11; Isaia 11:6-9; 65:13, 14) Ko e heigoa ka manatu he tau tagata ahiahi ka oti e fakamanatuaga? To falanaki ni ke he makaukau haau ke fakafeleveia atu ki a lautolu.