Foaki e Tohi Fiafia he Magafaoa ke he Tau Tagata he Tau Tau Moui Kehekehe
1 Ne fakakite he tama tane 11 e tau he moui i California hana loto fakaaue ma e tohi Ko e Mena Galo he Fiafia he Magafaoa. Ne tohi e ia: “Kua fiafia au ki ai, ti fakamalolo foki e falu magafaoa ke totou e tohi nei ha kua mua atu e mitaki. Kua lagomatai . . . e magafaoa haku ke kumi e mafola mo e fiafia he kaina ha mautolu.” Ko e iloaaga he tama tote nei kua lata ke fakamalolo aki a tautolu ke foaki e tohi Fiafia he Magafaoa ke he tau tagata oti kana. Hanei falu manatu ka manako a koe ke fakaaoga he fekafekauaga hau ia Fepuari.
2 Ka feleveia mo e fuata, liga pehe a koe:
◼ “Tokologa he atu hau kua manamanatu ke fai tokoua. Ka e moua mai e koe i fe e vala tala moli ke he matakupu? [Fakaata ma e tali.] Fa mahani e tau tagata fuata ke talahau kua tehatehaua a lautolu ka amanaki ke fai tokoua. Kia fakakite atu e au e mena kua talahau mai he tohi nei hagaao ke he vala tala.” Veveu ke he lau 14 he tohi Fiafia he Magafaoa, ti totou e paratafa 3. Ti fakakite age e tau mataulu takitaha he veveheaga. Foaki e tohi, ti fakatoka ke liu ahi atu.
3 Ka fakatutala mo e matua, ki a pehe a koe:
◼ “Kua fakatutala a mautolu mo e tau mamatua ke he tau takitakiaga aoga kua gahua moli he feakiaga he tau fanau. Kua pota auloa e tau mena nei ke he tohi nei Ko e Mena Galo he Fiafia he Magafaoa.” Veveu ke he lau 55. Totou e paratafa 10, mui mai e Teutaronome 6:6, 7, he paratafa 11. Ti fakakite age e tau laini ne fakalilifa he paratafa 12 ke he 16. Fakalaulahi atu he talahau: “Kua lagomatai he tohi nei e tokologa ke moua e kautuaga lahi ma e tau mamatua. Ka manako a koe ke totou, to fiafia au ke foaki atu e lagaki nei.”
4 Ka tutala mo e tagata motua, liga pehe a koe:
◼ “He oti e totou e au e vala tala ku nei, fakamolemole kia talahau mai hau a manatu.” Hafagi ke he lau 169 he tohi Fiafia he Magafaoa ti totou e tau laini ua fakamua he paratafa 17. Ti huhu ma e tali. Falanaki ke he tali, liga totou atu foki e koe e tau vala he tohi nei ato foaki ai.
5 He liu fakakia e tau foakiaga he tohi Fiafia he Magafaoa, kia tokaloto he lali ke kamata e fakaakoaga Tohi Tapu. Ko e fakaakoaga 8 he porosua Manako po ke veveheaga 15 he tohi Iloilo kua liga lata ke foaki ke kamata aki. Mogonei, kia fakamakai a tautolu ke lagomatai e tau tagata he tau tau moui kehekehe ke ati hake e fiafia he moui Kerisiano he magafaoa.