Puhala Gahua Auloa he Tau Tagata he Magafaoa ke Katoatoa—Ke he Fekafekauaga
1 Ko e heigoa ka mua atu e mafanatia he kitia e tau tane mo e tau hoana, tau mamatua mo e tau fanau hane gahua auloa ke he fekafekauaga Kerisiano, he fakaheke ke he tau tagata e higoa a Iehova? (Sala. 148:12, 13) Kua lata he tau magafaoa oti ke moua e fakaholoaga mitaki ma e fakalataha tumau ke he gahua he fonua. Fai aho fakatoka pauaki nakai e magafaoa hau he tau fahitapu takitaha ke fakaaoga ke he fekafekauaga? Ka pihia, ti iloa tonu he tau tagata oti e mena ke pulega ki ai mo e fakalataha katoatoa auloa ki ai.—Fakatai 21:5a.
2 He fakatoka tuai e aho fekafekau he magafaoa, ko e ha he taute mo matagahua matutaki ke tauteute e tau fakafeleveiaaga ka fakaaoga he magafaoa hau? Maeke he tau magaaho fakamahani ke lagomatai lahi, ti maeke mogoia ke hufia e aga moli he kaufakalataha he magafaoa. Ko e palepale ha ia ka eke e fekafekauaga he fonua mo mena fakamagafaoa ti mau tauteute e tau tagata oti!
3 Ko e leveki takaiaga ne o mo e magafaoa katoa ke he gahua mekasini. He gahua a ia he taha fale ke he taha fale mo e taha he tau tama fifine, ne huhu a ia: “Fiha e leva ka gahua a koe mo au?” Ti fakamaama age he tama fifine ko e amanaki a ia ke gahua mo e matua tane hana. Maaliali ai kua olioli moli e ia mo e matua tane hana e gahua tokoua. Ko e aga mitaki ha ia he magafaoa!
4 Falu magafaoa liga maeke ke paionia fakaku auloa he taha e mahina he tau. Po ke liga kua maeke ke taha mai he magafaoa ke matutaki tumau ke he fekafekauaga paionia fakaku po ke hu he paionia tumau. Mo e fakatokatokaaga mo e fakalataha auloa mitaki, liga ke maeke he tau tagata oti he magafaoa ke fakalahi e foaki fakatagata ke he gahua he lagomatai ki a ia hane paionia. To fakamonuina e magafaoa ha ko e gahua fakatolomaki nei mo e tau mena iloa mitaki hane olioli he fekafekauga—Mala. 3:10.
5 Ko e fakalataha auloa ke he gahua evagelia to lagomatai e tau magafaoa ke tumau e fetataaki, fakamakai, fua mitaki, mo e fiafia ke he fekafekauaga a Iehova!—Fakatatai Filipi 2:1, 2.