Ko e Heigoa Hau Ka Talahau ke he Tagata Musilimi?
1 Kua felauaki nakai a koe he fakamatala ke he tagata Musilimi? Kaeke kua pihia, liga ako e koe na ha ha he tau tagata Musilimi e taofiaga kaka ke he Atua. Pete ia, kua tote maka e mena ha lautolu ne iloa ke he Parataiso he lalolagi hane hau ne talahau tuai mai he tau perofeta a Iehova, ti kua manako a tautolu ke talahau e amaamanakiaga ia ki a lautolu. (1 Timo. 2:3, 4) Ko e tau vala tala na kua lata ke lagomatai a koe ke foaki e fakamatala mitaki.
2 Kua talitonu e tau Musilimi ki a Allah, po ke Atua, ti talitonu a lautolu ko Muḥammad ko e perofeta he Atua. Ko e tohi tapu ha lautolu ko e Korana, ti ko e lotu ha lautolu ne higoa ko e Isilama, ne kua kakano ko e “fakatokolalo.” Kua talahau he Korana ko e pikopiko mo e tapuaki ke he tau tupua na hepe, kua taha e Atua, ti nakai fai vala a ia he Tolu Taha. Kua fakaako foki e solu nakai maeke ke mate, afi a helo, mo e parataiso he lagi. Ne talia he tau tagata Musilimi e Tohi Tapu ko e Kupu he Atua ti talitonu kua hiki tuai, ka ko e Korana kua ha ha agaia ke he vagahau fakamua, ne kua tavana.
3 Kia Fakakapitiga, Fakalotolotomatala, mo e Manamanatu: He fakatutala mo e Musilimi, kia fakakapitiga mo e fakalotolotomatala. (Fakatai 25:15) Kia tokaloto ko e tau taofiaga Musilimi na mauokafua mo e laulahi ai na moua mai he manatu toka tuai. Ti, ko e fakakakano he tau fakaakoaga fakalotu mo e fakakite moli ki a lautolu e finagalo he Atua nakai ko e vala he tupuaga fakaagaga a ia. (Roma 12:2) Ke lagomatai e tau tagata Musilimi, kua aoga lahi ke fakauka mo e maama.—1 Kori. 9:19-23.
4 Kalo kehe he fakaaoga e tau kupu kua maeke he manamanatuaga he tagata Musilimi ke fakamatutaki a koe mo e Kerisitenitome. Kia fakamahino nakai fai vala a koe he lotu Katolika po ke Porotesano, na kehe a koe. Fakahagaao ke he Tohi Tapu ko e Tohi he Atua. Ha ko e mena totoko e tau Musilimi ke he talahauaga “Tama he Atua,” ti kua mitaki lahi ke nakai fakaaoga ai po ke he fakatutala e matakupu nei ato kitia e tupu fakaagaga. Pete ia, ki a tutala a koe hagaao ki a Iesu, he fakahaga ki a ia ko e perofeta po ke uta fekau. Fakamamao mai he taufetoko. Ka mailoga e koe kua vakavaka mai e ita, kia totonu mo e fakamafiti ke fano kehe.
5 Kua mitaki ke tutala ni mo e taha e tagata nakai ko e matakau. Mahani ai, kua tomatoma ai ke he tau fifine ke fakamatala ke he tau fifine, mo e tau tagata tane, ke he tau tagata tane. Kitia ai, to fai fakakeheaga ke he mena nei, ka ko e fifiliaga mitaki kua lata he fakaaoga. Tokologa foki e tau Musilimi kua tetotonu hagaao ke he puhala ha lautolu he tau tapulu kua nakai gali mo e tauteuteaga he tau fifine. Kua lata e tau matakainaga fifine ke mataala ke he mena nei.—1 Kori. 10:31-33.
6 Tau Mena ke Tutala ki Ai: Vagahau fakahako hagaao ke he mua ue atu he Atua mo e hana fakaalofa. Ua fakauaua ke talahau ko e tagata talitonu moli a koe, ko e Atua ne tokotaha (nakai ko e Tolu Taha), ti ko e tupua ia ne tapuaki ki ai kua hepe. Tutala hagaao ke he mahani kelea he lalolagi he vaha nei—ko e tau felakutaki, tau taufeauhi he latau, fevihiatiaaki fakamotu, mo e fakatupua kua maaliali ai ke he tokologa he tau tagata fakalotu.
7 Ko e porosua The Guidance of God—Our Way to Paradise ka foaki falu fakamaama foki ke he tau mataulu tala ka fakaaoga ke hafagi aki e tau fakatutalaaga mo e tau Musilimi. Ne talaga ke futiaki e tau Musilimi kua nonofo he takaiaga ia ke ataina e tau logonaaga ha lautolu ke fakaako e Tohi Tapu.
8 He fakatutalaaga, liga pehe a koe:
◼ “Kua lali pauaki au ke tutala ke he tau tagata Musilimi. Kua totou e au hagaao ke he lotu hau mo e talitonu kua hako au he talahau kua tua e tau tagata Musilimi ke he taha e Atua moli mo e ke he tau perofeta oti. [Fakaata ma e tali.] Manako au ke tutala mo koe hagaao ke he perofetaaga i tuai kua fita he talahau e fakafouaga he lalolagi ke he parataiso. Maeke nakai ia au ke totou atu ki a koe e mena ne tohi he perofeta? [Totou Isaia 11:6-9.] Kua taute he perofetaaga nei au ke manamanatu ke he fatiakiaga he Korana ne moua mai he porosua nei.” Veveu ke he lau 9 he porosua Guidance of God, ti totou e fatiakiaga ne lomi fakamatatohi puni lalahi, ne kua hagaao ki a lautolu kua tututonu ka momoui ke he lalolagi. Ka kitia e fiafia, fakamatutaki e fakatutalaaga he fakatutala e paratafa 7 ke he 9 he lau he taha fahi. Toka e porosua, ti fakatoka ke liu ahi atu.—Ma e taha fakatataaga, kikite Ha Tautolu a Fekafekauaga he Kautu, Fepuari 1998, lau 6, paratafa 27.
9 Ka uiina taha tagata ke totou e porosua Guidance of God, kua mitaki lahi ke fakahigoa ko e fakatutalaaga, nakai ko e fakaakoaga Tohi Tapu. Ka oti e porosua ha mua, kua lata e tagata fakaako ke mautali ke fakaako e porosua Manako po ke tohi Iloilo. Ko e falu tohi ne taute pauaki ma e tau tagata Musilimi ko e tau tuleke How to Find the Road to Paradise mo e tohi tote The Time for True Submission to God.
10 Mo e iloilo nei he tau taofiaga mo e tau taliaaga faka-Isilama, kua maeke ia tautolu ke mailoga e fifiliaga ha tautolu he tau tohi ka foaki ke he tau tagata Musilimi mo e puhala ka fakamatala a tautolu ki a lautolu. Kia fakatumau a Iehova ke fakamonuina e tau laliaga oti ha tautolu ke lagomatai e tau tagata kehekehe ke ui ke he hana higoa mo e ke hao ai.—Gahua 2:21.