To Ha Ha Nakai a Koe i Ai?
1 Ko e taha Fakamoli kua leva ne talahau agataha: “Ka nakai fano a koe he aho fakamua he fonoaga, kua lahi mahaki e mena hau kua to noa ai!” Ko e ha ne logona hifo pihia e ia? Ha ko e aho fakamua ko e kamataaga he galue fakaagaga ne tauteute he fakatokatokaaga ha Iehova ma tautolu. (Isaia 25:6) Ko e ha ha i ai a tautolu tali mai he kamataaga kua fakakite e talia ha tautolu ke he tau manatu he salamo: “Ne fiafia au he pehe mai a lautolu kia au, Kia o a tautolu ke he fale a Iehova.”—Sala. 122:1.
2 Pete ia, ke he tau kua mole he falu Fonoaga Fahimotu “Kia Fakaheke Atu ke he Atua,” ne tote hifo e numera ne o atu he Aho Faraile he fakatatai ke he Aho Faiumu mo e Aho Tapu. Kakano he mena nei kua lahi e pasene he tau matakainaga ne to noa nakai logona e tau vala he fonoaga ne kua tuku mai e tau vala tala kua mua atu e aoga hagaao ke he fakaheke atu ke he Atua. Kua fakatonoa e lautolu e lafiaga fiafia mo e tau matakainaga tapuaki.
3 Aua Neke Fakaata e Gahua Tupe ke Fakatauhele: Ko e manamanatu neke fakahagahagakelea e gahua tupe e taha kakano ne liga nakai o atu ai falu he Aho Faraile. Pete ia, tokologa e Tau Fakamoli ne mailoga kua makai e tau takitaki gahua ha lautolu ke kaufakalataha mo lautolu ke he fekau nei kaeke ole tuai ke he taha magaaho ke nakai gahua. Taha e takitaki gahua ne nava lahi ke he fifiliaga malolo he matakainaga fifine ke fano tumau he tau feleveiaaga he fakapotopotoaga mo e tau toloaga oti ati finatu a ia he taha e aho katoa ke he fonoaga hana!
4 Kua nakai lata ia koe ke fuafua manatu to nakai atu he takitaki gahua hau taha magaaho ke nakai gahua, po ke fakahiku e koe ko e fakatonoa he taha e aho he fonoaga to nakai fai lekua. Mo e loto mauokafua, mau amaamanaki ke fakakite fakailoilo ke he takitaki gahua hau mai he tau Tohiaga Tapu e kakano he fano ke he fonoaga ko e vala aoga lahi he tapuakiaga hau. (Hepe. 10:24, 25) Ti tuku hau a mauokafua katoatoa ke he tau maveheaga ha Iehova, he mailoga ko e ha mena ni ka manako fakatino a koe to foaki mai ka tuku fakamua tumau e koe e tau mena fakaagaga he moui hau.—Mata. 6:33; Hepe. 13:5, 6.
5 Ko e matapatu mena ko e loto fakaaue ke he tau “mena ne mua atu e aoga lahi.” (Filipi 1:10, 11, NW; Sala. 27:4) Kua omoomoi he mena nei a tautolu ke taute tuai e tau fakatokatokaaga ke aoga katoatoa mai he foakiaga nei mai ia Iehova. Kamata ke taute tuai e tau fakatokatokaaga mogonei, ti fakamalolo ke ha ha a koe i ai he tolu e aho katoa!