Loto Fakaaue Nakai a Koe ke he Tau Mena Tapu?
1 He magaaho ka huhu mai, loto fakaaue nakai a tautolu ke he tau mena tapu, liga tali fakaave a tautolu e! Ko e heigoa falu he tau foakiaga tapu he Atua ne loto fakaaue a tautolu ki ai?
2 Kua tokiofa moli e tautolu e fakafetuiaga tata ne kua fakaata ke moua e tautolu mo e ha tautolu a Matua he lagi! Ne fakamoli mai a ia ki a tautolu kaeke ‘fakatata atu a tautolu ki a ia, ti fakatata mai ai a ia kia tautolu.’ (Iako. 4:8) Ka noa mo e poa lukutoto ha Iesu Keriso, to nakai fakai taha ke moua e moui tukulagi. (Ioane 3:16) Mai he oue tulou moli, ne fakakite e tautolu he liogi he tau aho takitaha e loto fakaaue hokulo ha tautolu ma e fakaalofa uho nei he Atua.
3 Ko e Kupu mai he agaga he Atua, ko e Tohi Tapu, kua tapu foki ki a tautolu, ti pihia foki e fakatokatokaaga a Iehova he lalolagi. Kua fakakite e tautolu e loto fakaaue kua lata ma e tau foakiaga nei mai ia Iehova he momoui a tautolu ke he tau matapatu fakatufono he Tohi Tapu, fakamalolo e liliaga he fakaalofa fakamatakainaga, muitua fakamitaki ke he puhala fakateokarasi, mo e kaufakalataha mo lautolu ne takitaki.—1 Pete. 1:22.
4 He puhala he fekafekau fakamoli mo e loto matala, ne moua e tautolu e tau mena kai fakaagaga loga. To fakamoli e tau mena nai he Fonoaga Fahimotu “Tau Tagata Omaoma he Kupu” he tau nei. To moua e tautolu i ai e tau fakaakoaga aoga lahi mo e olioli e feoakiaga mafanatia ne lata lahi mo tautolu. Maeke fefe a tautolu ke fakakite e loto fakaaue moli ma e foakiaga tapu nei?
5 Kia Nakai Tiaki e Fale a Iehova: Ne tomatoma age a Nehemia ki a lautolu ne gahua lahi he liu ati e tau kaupa ha Ierusalema ke ‘nakai tiaki e fale he Atua ha lautolu.’ (Nehe. 10:39) Ko e “fale” a Iehova ko e hana fakaholoaga ma e tapuakiaga. Ko e tau fonoaga fahimotu ha tautolu ko e vala he fakaholoaga ia. He nakai fakaheu e fakaholoaga nei, kua lata ia tautolu ke o atu mo e fanogonogo fakamitaki, fakakite ai ki a Iehova kua fakatokoluga e tautolu e tau foakiaga hana. (Hepe. 10:24, 25) Ko e heigoa kua lata ke pulega e tautolu he mogonei ke fakakite kua loto fakaaue katoatoa a tautolu ke he fonoaga tapu nei?
6 O he Tau Aho Oti ne Tolu: Kia igatia a tautolu oti ke taute taha fakaholoaga ke o atu ke he tau aho oti ne tolu he fonoaga. Kua pulega nakai a koe ke o tuai he tau aho takitaha mo e nonofo ato oti e liogi fakahiku he Aho Tapu? Ka pihia, to moua e koe e tau monuina loga. Liga kua nakai mukamuka tumau ke o atu ke he fonoaga. Ti liga ni kua lata ke hiki fakatote e gahua tupe hau ke tu mauokafua. Liga kua nakai hagahaga mitaki tumau ke moua e tau puhala peleoafi. Ka e, kia nakai toka e tau mena nei ke fakalolelole aki a koe he fano ke he fonoaga.
7 Kikite ke he Fakataiaga Homo Nei: He o atu a lautolu ke he fonoaga fahimotu he tau kua mole, ne feleveia e matakau he tau matakainaga he taha fahi latau i Aferika mo e matakau kautau. Kua huhu ke he tau matakainaga: “Ko hai a mutolu, mo e o a mutolu ki fe?” Ne tali e lautolu: “Ko e Tau Fakamoli a Iehova a mautolu, ti ko e o a mautolu ke he fonoaga fahimotu.” Ati pehe taha kautau: “Ko mutolu ko e Tau Fakamoli a Iehova kua nakai matakutaku ke he taha mena. Kia o a, to maeke ia mutolu ke fakahoko e fonoaga ha mutolu mo e nakai fai lekua. Ka e taha e mena, kia fakaeneene to feleveia a mutolu mo e tau kautau loga. Kia o tumau he uho puhala tu! Ka kitia e mutolu e tau tagata tokologa ne fakapotopoto, fakatumau ke o he uho puhala tu!” Kua taute pihia e lautolu ti hohoko a lautolu ke he fonoaga mo e nakai haofia. Kua palepale ai e tau matakainaga nei ha kua fakatata e lautolu e loto fakaaue ha lautolu ma e tau mena tapu.
8 Tuga e tau matakainaga ha tautolu i Aferika, kua fehagai foki a tautolu mo e tau paleko. Ka e nakai fakauaua kua maeke ia tautolu ke fifitaki e tua ha lautolu ti fakamalolo ke o ke he tau fakaholoaga oti he fonoaga fahimotu. Kaeke fai hikiaga ke taute, haga atu ki a Iehova ma e takitakiaga, he mailoga to fakamonuina e ia e tau laliaga ha tautolu ke ha ha ai he fakaholoaga katoa.
9 Moua e Tau Monuina: Kua manako lahi a tautolu ke he Kupu he Atua, ko e mena ia to tutupu a tautolu ke he fakamouiaga. (1 Pete. 2:2) Ko e o atu ha tautolu ke he fonoaga fahimotu mo e fanogonogo ke he tau polokalama ka lagomatai a tautolu takitokotaha ke ati hake e tua malolo ke he Kupu ia, ati fahia mitaki mogoia ke totoko ke he tau matahele ha Satani. He taute pihia, to fakakite e tautolu ki a Iehova mo lautolu ne onoono mai kua loto fakaaue katoatoa a tautolu ke he tau mena tapu mo e ‘nakai tukumuli . . . ka kua tua ke momoui ai e tau solu.’—Hepe. 10:39; 12:16; Fakatai 27:11.
10 Kua maeke ia tautolu ke talifaki ke he mogo ka hafagi e Iehova ko e Atua e tau pa he lagi ke liligi mai ki a tautolu e uha he tau monuina fakaagaga. (Mala. 3:10) Kia eke ai mo foliaga hau ke ha ha ai he Fonoaga Fahimotu “Tau Tagata Omaoma he Kupu” mai he kamataaga he polokalama he pogipogi Faraile ke he liogi fakahiku mo e “Amene!” he afiafi Tapu. To fiafia lahi a koe ka taute pihia!