Kua Matematekelea Lahi e Tau Momoui!
1 Kua fakamahino he Tohi Tapu to “fakamomoui [e Iehova] e tau tagata oti kana.” Pete ia, kua moli foki ko e tau amaamanakiaga he moui he tau tagata piliona he lalolagi kua falanaki ni ke he aga ha lautolu ki a Iehova ko e Atua mo e hana Kautu ia Iesu Keriso. Ko e aga mitaki kua fakave hokoia ke he “maama ke he kupu moli.” (1 Timo. 2:3, 4) He fakailoa to nakai leva ti fakamea e lalolagi nei mai he tau mahani kelea oti ke fakaata e lalolagi tututonu fou he Atua, kua poaki foki ki a tautolu ke taute e gahua fakamomoui kua lata lahi.—Mata. 24:14; 28:19, 20; Roma 10:13-15.
2 Mafiti he Ha? Ne hataki a Iesu hagaao ke he ‘vaha ke lahi e matematekelea, nakai pihia taha mena tali mai he kamataaga he lalolagi.’ (Mata. 24:21) To hokotia e matematekelea ia ke he tapunu i Amaketo. (Fakakite. 16:16) Kua fehagai e tau tagata tokologa mo e moumouaga ka kaumahala a lautolu ke talia e tala mitaki, putoia e tau magafaoa, tau tuuta kaina, tau kapitiga gahua, mo e tau tagata mahani ne nakai tua. Ka ko e tupetupe ha tautolu ke hokotia ke he “tau tagata oti kana” he muitua ke he Atua, ne fakakite hana fakaalofa ma e lalolagi katoa he tau tagata he foaki e hana Tama, ko Iesu Keriso, ko e lukutoto ma e tau tagata oti. (Ioa. 3:16) Kua lata ia tautolu ke fakamakai fakalahi ke uiina e tau tagata oti ke fehola ke he huaga haohao mitaki he Atua. He taute katoatoa e gahua fakamatala, kua fakamamao a tautolu mai he lima toto.—Eseki. 33:1-7; 1 Kori. 9:16.
3 Ko e Heigoa e Foliaga ha Tautolu? Kua peehi he Kupu katoa he Atua e gahua fakamatala. He talahau he aposetolo ko Paulo, “kua omoomoi a mautolu he fakaalofa a Keriso” ke momoui lagotatai mo e tau puhala he Atua. (2 Kori. 5:14) Lafi ki ai, Ko e Kolo Toko kua fa mahani ke peehi e matagahua ha tautolu ke fakamatala. Kua foaki tumau mai he Ha Tautolu a Fekafekauaga he Kautu e puhala ke taute aki e tautolu e gahua fakamatala. Kua fakatokatoka he tau motua e gahua mo e fakamalolo a tautolu ke fai vala i ai. Ko e tau matakainaga fakailoa kua uiina a tautolu ke gahua mo lautolu he fekafekauaga. Logona lahi e tautolu e tauteuteaga ke he tau fakatataaga, foaki e tau mekasini mo e falu tohi, taute e tau liliu ahi atu, taute e tau fakaakoaga Tohi Tapu, mo e fakaaoga e tau magaaho oti ke fakamatala. Ko e tau mena oti nei ka lagomatai a tautolu ke fakakatoatoa e foliaga ke fakahao e tau momoui.—1 Kori. 9:22, 23; Efeso 1:13.