Pulega Tuai—Ma e Heigoa?
1 Igatia a tautolu mo e manamanatu ke he tau pulega ha tautolu ma e vaha anoiha. Ko lautolu mo e amaamanakiaga he lalolagi kua onoono atu ke he moui tukulagi he lalolagi tututonu fou he Atua. Ka e fai fakaohoohoaga ka hamuti e amaamanakiaga ia mai he loto he tagata. Ko e lali eketaha kua lata ke ati tumau e tau momoui ha tautolu takai viko he tau mena he Kautu mo e nakai fano kehe ha ko e tau manako kamatamata he tino.—1 Ioane 2:15-17.
2 Nakai maeke he lalolagi ke maama e tau foliaga he tau tagata fakaagaga. (1 Kori. 2:14) Ko e falu he tau tagata hane taufetului ke moua e talahaua, malolo, po ke mautu, kia tutuli atu a tautolu ke he tau tanakiaga fakaagaga. (Mata. 6:19-21) Ka lali a tautolu ke hiki e tau manamanatuaga ha tautolu ke lautatai mo e onoonoaga he lalolagi he vaha anoiha, to hokotia nakai a tautolu ke he tau foliaga fakaagaga? To nakai leva ti puke e tau loto ha tautolu he tupetupe. Puipui fefe e tautolu e mena nei?
3 ‘Fakatapulu ke he Iki, ko Iesu Keriso’: Taha puhala ke fifili kua ati viko e tautolu e vaha anoiha ha tautolu he tau mena he Kautu ko e kumikumi e fakatutalaaga ha tautolu. Tutala tumau kia a tautolu ke he tau koloa he tino mo e tau tupetupe? Ka pihia, kua lata ia tautolu ke manamanatu nukua galo kia e onoonoaga he tau loto ha tautolu ke he tau koloa fakaagaga. Kua liga lata ia tautolu ke foaki e peehiaga lahi ke ‘fakatapulu ke he Iki, ko Iesu Keriso; aua foki neke taute e tau mena he tino ke hoko ai hana tau manako lahi.’—Roma 13:14.
4 Pulega tuai e tau fuata he ‘fakatapulu a Keriso’ ma e aho ka hokotia atu a lautolu ke he fekafekauaga tumau. Ko e fuata ne manako ke paionia mau ne feaki hake he aga fakamotu kua mahani ko e tau tagata tane fuata ka haohao mitaki fakatupe. Ti, putoia lahi a ia ke he pisinisi ke hokotia atu ko e fano fakatehana noa ni a ia ke he tau feleveiaaga mo e fakalataha he fekafekauaga. He kamata agataha a ia ke falanaki ke he tau kupu ha Iesu ne moua he Mataio 6:33 mo e hau kehe he atagia ia ne nofo ai a ia, ne taute e ia e feua he fekafekauaga mau. Mogonei, fakalataha mo e loto manamanatu mitaki, kua fekafekau a ia ki a Iehova, he talahau e ia, ‘mo e malolo katoa hana.’
5 Kua talahau he Tohi Tapu nukua pulotu ke pulega ma e vaha anoiha. (Fakatai 21:5) Kia taute pihia e tautolu oti he tuku mua e finagalo he Atua he tau manamanatuaga.—Efeso 5:15-17.