Kia “Fakaatukehe Tuai” ke he Fekafekauaga Hau

¹ He totou e tautolu kua gahua e aposetolo ko Paulo he taute fale la i Korinito, liga fakahiku e tautolu kua fakakaupa he mena nei e magaaho hana ke fakamatala. Pete ia, ne talahau he Gahua 18:5: “Kua fakaatukehe tuai a Paulo ke he loto hana, he talahau atu ke he tau tagata Iutaia, ko Iesu ko e Keriso a ia.” Ko e ha kua fakaatukehe lahi a Paulo ke he gahua fakamatala? Pete ni e tokologa he tau Korinito kua fita e tua, ne fakamau he Iki to tokologa lahi agaia e tau tutaki ke moua i loto he maaga ia. (Gahua 18:8-11) Pihia nakai e kakano ha tautolu ke fakaatukehe tuai ke he fekafekauaga ha tautolu? E. Tokologa agaia e tau tagata ke moua mo e fakaako e kupu moli.

² Fakaaoga Fakalahi e Magaaho he Fekafekauaga ia Aperila: Liga ko e foliaga hau ke lavelave tumau ke fakamatala e tala mitaki he tau mahina takitaha. Ka e fai mahina ne foaki fakalahi mai e magaaho ki a tautolu ke “fakaatukehe tuai” ke he gahua nei. Lafi ke he mena nei e mahina ha Aperila, ko e tapunu he magahala Fakamanatu. Kua fakaata kia he tau tutuaga hau a koe ke paionia fakaku po ke fakamahomo atu e lali hau ke he fekafekauaga hau he tupuaga nei? Tokologa e tau tagata fakailoa ne taute e mena nei kua fakamonuina lahi. (2 Kori. 9:6) Ka taute e koe e mena kua fahia katoa a koe, manatu kua fiafia a Iehova mo e fekafekauaga solu katoa hau. (Luka 21:2-4) Ko e ha tuaga ni hau, kia eke mo foliaga hau ke “fakaatukehe tuai” ke he fekafekauaga ia Aperila. Ti ua nimo ke tuku e hokotaki hau he fonua he matahiku he mahina ke totou e laliaga hau mo e tau tagata ne toe ha Iehova.

³ Ahi Atu a Lautolu kua Fou ne O Mai he Fakamanatuaga: I Niu Silani he tau kua mole, ko e katoatoa ne o mai he Fakamanatuaga ko e 26,144. Nakai la iloa ia e katoatoa ka o mai he tau nei. Ka e, fakakite he tau hokotaki kua kitia ai e maeke mua ue atu ma e “helehele” lahi mahaki. (Mata. 9:37, 38) Ko e mena ia, kia fakamafiti, he fakatoka ke ahi atu a lautolu kua fiafia ke o mai he Fakamanatuaga ke lagomatai a lautolu fakaagaga. Ko e fakatolomaki e tau ahi ia ke fakatonoa ‘ti hau ai a ia ne kelea, kua fofo e tau mena ne gana ke he loto ha lautolu.’ (Mata. 13:19) Ko e ahi mafiti atu ka fakakite kua “fakaatukehe tuai” moli a koe ke he fekafekauaga hau.

⁴ Fakatumau ke Lagomatai a Lautolu ne Nonofo Tua: Ia Fepuari ko e laliaga pauaki kua kamata ke lagomatai a lautolu ne nonofo tua. Ka nakai la moua ia he taha e aahi leveki, kua lata e tau motua ke fakatoka ke ahi atu a lautolu ato hoko e matahiku ia Aperila. To fakamalolo e tau motua ke fifili e tupuaga galo he mena vihi he tagata mo e puhala mitaki ke lagomatai a ia ke liu gahuahua he fekafekauaga a Iehova. Ko e lagomatai fakaalofa nei kua fakakite kua uta fakahokulo he tau motua ha lautolu a matagahua ko e tau leveki mamoe he “fuifui mamoe he Atua.” (1 Pete. 5:2; Gahua 20:28) Ko e fufuta he The Watchtower ia Sepetema 15, 1993, lau 22-3, ne foaki mai he tau lagomataiaga mitaki ue atu ke fakaaoga he tau motua ka felauaki ai mo e tau mena vihi tumau nukua lauia ai a lautolu ne nonofo tua. Manatu, maeke agaia he falu ke liu gahuahua ke he fekafekauaga ia Aperila.

⁵ Lagomatai e Tokologa ke Eke mo Tau Tagata Fakailoa: Taute e tau fanau ke lata mo tau tagata fakailoa fou he tala mitaki? Ka e kua e falu ne fakaako mo koe ke he Tohi Tapu? Ka talia a lautolu ia he tau motua, nakai kia homo ue atu a Aperila ma lautolu ke kamata fakailoa? Ka holo ki mua e tagata mo e kua fakaako e porosua Manako mo e tohi Iloilo, kia matutaki e fakaako he Tohi Tapu ke he tohi ke ua aki​—ko e God’s Word, ko e tohi True Peace, po ke tohi United in Worship. Ko e foliaga hau ke lagomatai e tagata fakaako ke moua e maama lahi ke he kupu moli, lata ke eke mo tagata fakailoa nakai la papatiso, mo e eke mo Fakamoli tukulele mo e papatiso ha Iehova.​—Efeso 3:17-19; 1 Timo. 1:12; 1 Pete. 3:21.

⁶ Ko e fakatumau mo e fiafia moli hau ke he tagata fakaako Tohi Tapu ka lagomatai a lautolu ke hokotia ke taute e kupu moli ma lautolu ni. Taha e Fakamoli ne feleveia mo e hoa mau fuakau ne talia fiafia ke he fakaako Tohi Tapu. Ka e nakai fakahoko he hoa mau e fakaakoaga he tau fahitapu tolu oti ia. Fakahiku ti kamata e fakaakoaga. Ti nakai taute he hoa mau e fakaakoaga he falu fahitapu foki. Ka e, fakahiku ai ne hokotia e hoana ke he papatisoaga. “He mole e papatiso hana,” ne talahau he matakainaga tane, “kua puke e tau mata he matakainaga fifine he tau hihina mata he fiafia, nukua ta mai foki e tau hihina mata he fiafia ke he hoana haku mo au.” E, he “fakaatukehe tuai” ke he tala mitaki kua ta mai e olioli lahi!

⁷ Ko e perofetaaga he Tohi Tapu mo e tau mena tutupu he lalolagi kua fakakite kua nonofo tapitapi lahi a tautolu ke he fakaotiaga. Ko e magaaho nei ka lata e tau tagata oti he Atua ke “fakaatukehe tuai” he fakailoa e tala mitaki ke he falu. Ne foaki he aposetolo ko Paulo e fakamoliaga ko e gahua pihia kua “nakai noa mo e fua ha mutolu a fakafita ke he gahua he Iki.”​—1 Kori. 15:58.