Tau Fonoaga—Magaaho ke Olioli!
1 Ko e tau fonoaga he Tau Fakamoli a Iehova e tau magaaho olioli lahi. He molea e teau he tau tau, ko e tau fakapotopotoaga nei ne lafi atu ke he malikitiaga nukua tupu ai he fakatokatokaaga ha tautolu. Mai he kamataaga tote, kitia e tautolu e tau monuina loga ha Iehova ke he gahua ha tautolu he lalolagi katoa. He fonoaga fakamua ha tautolu he vaha fou nei i Chicago, Illinois, he 1893, ko e katoatoa he 70 mai he 360 kua fakalataha mai, ne fakamailoga ha lautolu a tukuleleaga he papatisoaga ki a Iehova. Ko e tau vala he tau kua mole he Fonoaga Fahimotu “Tagata Omaoma ke he Kupu” ne fakakatoatoa e fakalatahaaga he lalolagi katoa ke 9,454,055, mo e 129,367 ne papatiso. Ko e tupuaga moli ha anei ma e olioli!
2 Tali mai he tau vaha Tohi Tapu, ko e fakapotopotoaga he tau tagata he Atua kua foaki e puhala mua ue atu he talahau e fakaakoaga mai ia Iehova. He vaha ha Esera mo Nehemia, ne fanogonogo e tau tagata ke he totouaga he Fakatufono “mai he maama he aho ke hoko ke he tupoulā.” (Nehe. 8:2, 3) He maama mitaki e Fakatufono ke he magaaho ia, ne moua he tau tagata e “olioli lahi.” (Nehe. 8:8, 12) Kua olioli foki a tautolu ha kua foaki he tau fonoaga e magaaho mitaki ma tautolu ke moua e tau fakaakoaga mitaki mo e tau mena kai fakaagaga ‘ke he tau magaaho tonu’ mai ia Iehova puhala he “fekafekau fakamoli mo e loto matala.” (Mata. 24:45) Ha kua pehe mai a Iesu kua lata e tagata ke moui ke he “tau kupu oti ne to mai he fofoga he Atua,” ti kua aoga e tau fonoaga ke he ha tautolu a tau momoui fakaagaga.—Mata. 4:4.
3 Uho e Tau Laliaga Oti ke Hohoko Atu: Kua lata ia tautolu oti ke eke mo foliaga fakatagata ke hoko atu ke he Fonoaga Fahimotu “Tau Faiaoga he Kupu he Atua” he tau nei. Kua lata ke pulega a tautolu ke hohoko atu tuai he tau aho takitaha ti nonofo ke fakalataha he talahau “Amene!” ke he liogi fakaoti. Ke fakakatoatoa e mena nei kua lata ia tautolu ke hikihiki e tau setulu ha tautolu. He ole magaaho ke fina atu ke he fonoaga kua liga fakatupu falu mena uka. Kua lata ke mauokafua a tautolu, nakai amanaki to mokulu noa mai ha monuina. Ka manako nofoaga mo e/po ke peleoafi, maeke ia mautolu ke taute tuai e tau fakatokaaga. Ko e ha laliaga kua taute e tautolu to uho lahi ai!
4 Nakai totou he tau tagata a Iehova e tau monuina he o atu ke he fonoaga ha ko e tau tupe loga. Mailoga e fakafifitakiaga he falu ne fifili ke o atu ke he Toloaga he Lalolagi Katoa Finagalo Faka-Atua he Tau Fakamoli a Iehova i New York City he 1958. Ne pa he taha matakainaga tane e pisinisi talaga hana ke ua e fahitapu ke maeke ke foaki noa hana lagomatai mo e ke fina atu ke he toloaga. Ne fakafua he matakainaga tane i Virgin Islands lima e eka fonua ke maeke he magafaoa katoa hana ne tokoono ke o atu oti. Ne fakafua he hoa mau fuata e poti enisini ke maeke ia laua ke uta oti e tau fanau tokotolu ha laua, ne ua e mahina he tau tau moui ke he fitu e tau tau moui. Tokotolu e lafu tane mai i California ne tala age ki ai ka nakai o mai a lautolu ke gahua, to nakai fai gahua a lautolu ka liliu mai. Nakai taofi he mena ia a lautolu he o atu ke he toloaga nakai maeke ke nimo.
5 Fakamonuina e Iehova e Laliaga Fakamakai ha Tautolu: Kua kitia mo e fakamonuina e Iehova e tau laliaga he tau tagata hana. (Hepe. 6:10) Tuga ma e fakatai, ke he Theocracy’s Increase Assembly he 1950, ko lautolu kua hohoko atu ne logona e lauga liliuina ko e “Fakatokaaga Fou.” Ne fakalagalaga mo e fakamafiti e Frederick Franz e fiafia ha lautolu oti he huhu: “To fiafia nakai e toloaga nei he lalolagi katoa ke iloa, i hinei mo tautolu he po nei, kua fai ne amaamanaki mo tau iki he lalolagi fou?” He molea e 50 e tau he mole, olioli agaia a tautolu ke hakahaka e maamaaga he Salamo 45:16.
6 He mole e o atu ke he fonoaga fahimotu he tau kua mole, ne tohi he ulu magafaoa loto fakaaue e mena nei: “Ma tau matakainaga, to nakai iloa e mutolu e fakahao moui he fonoaga nei. Ne hiki e magafaoa haku ke he taone ma e tau tutuaga gahua, ka ko e mena ne tupu kua tafea fakaagaga a mautolu. . . . Kua tiaki e mautolu e tau matagahua faka-Kerisiano. Ti oti foki e o ha mautolu he tau feleveiaaga mo e fakalataha ke he fekafekauaga. . . . Kua liu fakamoui he fonoaga nei a mautolu, ti liu a mautolu fakatoka foki e tau foliaga fakaagaga mo e fakatokatoka ke fakamoli e tau mena nei.”
7 Kua foaki mai e Iehova e tau mena kai fakaagaga kua lata mo tautolu. Kua fakatoka e ia e laulau monuina ke he tau fonoaga ha tautolu. Ko e loto fakaaue ha tautolu ma e foakiaga nei kua lata ke fakamalolo a tautolu ke talahau e mena ne talahau e Konelio he magaaho ne ahiahi atu e aposetolo ko Peteru: “Ha i hinai a mautolu oti kana ki mua he Atua, ke fanogonogo atu ke he tau mena oti ni ne poaki mai ai e Atua kia koe.” (Gahua 10:33) Kia eke mo foliaga ha tautolu ke ‘ha ha ki mua he Atua’ he tau fakaholoaga oti nei he Fonoaga Fahimotu “Tau Faiaoga he Kupu he Atua” mo e olioli!