“Tumau a Au! Tumau a Au! Tumau a Au!”
1 Ko e tau kupu ia he Kerisiano fakamoli ne hao mai he Holocaust ne fakalea ai e fifiliaga he tau afe tagata he Tau Fakamoli—ne momoui mo e mamate—he talitonu mauokafua ha lautolu pete e favaleaga he tau Nasi. (Efeso 6:11, 13) Ko e talahauaga navanava ia he malolo mo e kautu ha lautolu ne tapaki he vitio fakahohofi loto Jehovah’s Witnesses Stand Firm Against Nazi Assault. Kua fakamafana atu ke he fakapotopotoaga ke kitekite mo e fefakatutalaaki ke he taha mo e taha e tau manamanatuaga mo e logonaaga.
2 Kia fakaaoga e tau huhu nai ke fakalagalaga e manamanatuaga hau: (1) Heigoa e tau kakano ne kua tu mauokafua e Tau Fakamoli ke he tau Nasi? (2a) Heigoa e tau totokoaga ne mafuke mai ha ko e taha puhala fakafeleveia, mo e ko e ha? (2e) Lauia fefe e tau magafaoa he Tau Fakamoli he mena nei? (3) Toko fiha e Tau Fakamoli ne fakafano ke he tau heaga api puipui, mo e puhala fe ne fakamailoga a lautolu i ai, mo e hao fefe a lautolu ke he tau lima he Gestapo? (4) Heigoa e totogiaga ne nakai mafai e tau matakainaga ha tautolu ke totogi ti kua fakagofua? (5a) He puhala fe mo e he magaaho fe ne fakapuloa fakamalolo he Tau Fakamoli a Iehova e tau favaleaga kelea he tau kautau Nasi? (5e) Ti fefe e tali ha Hitler? (6) Maeke fefe e kaufakalatahaaga he tau tagata a Iehova ke fakahao aki a lautolu mo e falu foki, ke he tino mo e fakaagaga? (7) Heigoa e lologo he Kautu ne tohitohi i loto he heaga api puipui? (8) Heigoa e tau fakafifitakiaga he tau tagata tane, fifine mo e tau fuata tua fakamoli kua omoi a koe ke tumau e mahani hakohako ki a Iehova, pete ha mena ka tutupu? (Kikite foki e 1999 Yearbook, lau 144-7.) (9) He taha Fakamoli a Iehova, heigoa e manamanatuaga hau he kitekite e vitio nei ha kua nakai ko e tagata he lalolagi?
3 Ko e fifitakiaga malolo he Tau Fakamoli a Iehova fakakite mai he vitio Stand Firm ne maeke ke lagomatai e tau tagata fuata, pihia mo lautolu ne nakai ko e Tau Fakamoli, ke fehagai mo e tau tuaga hagaao ke he fili tagata, tau atuhau taha kelea, mo e tu uho. Kaeke ko e fuata fano he aoga a koe po ke aoga tokoluga, ane ha he foaki age ke he faiaoga hau e vitio nei ke fakaaoga he vahega hau? Foaki age e vitio mo e tala age ko e taha faahi anei he tau fakamauaga tuai ne nakai fa iloa lahi mo e talahauaga ke he fakaakoaga he mahani mitaki.
4 Ko e vitio Stand Firm ko e mena homo ue atu ke fakakite e puhala ne fakaako faka-Atua ai a tautolu ke fakatoatoa fakaagaga ti fakafiafia e Atua ha kua tumau ke he tau mena tonuhia. (1 Kori. 16:13) Fakakite atu ki a lautolu oti ne talia ke he kupu moli.